ʻEletā Larry R. Lawrence
ʻO e Kau Fitungofulú
Kuo ʻilo ʻe ʻEletā Leuli Lei Lōleni ʻi hono ngaahi uiuiʻi kehekehe mo e ngāue ʻi he Siasí ke “falala ki he ʻEikí ʻaki [hono] lotó kotoa” (Lea Fakatātā 3:5).
Ne fāʻeleʻi ia ʻi ʻAokosi ʻo e 1947 kia ʻĀkeila mo Mele Lōleni ʻi Sevele, Meulileni peá ne tupu hake ʻo Tūsoni, ʻAlesona. Naʻá ne ako ʻi he ʻUnivēsiti ʻo ʻAlesoná pea maʻu ai hono mataʻitohi B.A. ʻi he ako fakafaitoʻo ki he ngoué pea maʻu mo hono toketā fakafaitoʻo ʻo maʻu ai ʻene ngāue maʻuʻanga moʻui ko ha toketā mata.
Naʻá ne kau ki he Siasí ʻi he 1970, ʻi hono taʻu 23 peá ne mali mo Loumaile Sitoti ʻi he Temipale Mesa ʻAlesoná ʻi he ʻaho 5 ʻo Nōvema, 1971.
Kimuʻa pea uiuiʻi ia ki he Kōlomu Hono Ua ʻo e Kau Fitungofulú, naʻá ne fakahoko fatongia ko ha palesiteni ʻo e kōlomu ʻo e kaumātuʻá, pīsope, aleaʻanga māʻolunga, palesiteni fakasiteiki pea mo ha palesiteni fakafaifekau fakasiteiki.
ʻOku pehē ʻe ʻEletā Lōleni ʻi he hangē ko ia ʻoku ʻikai toe femoʻukina ʻena moʻuí, he kuo lalahi ʻena fānau ʻe toko onó pea nau moʻui pē ʻiate kinautolu, ne ui ia mo hono uaifí ʻi he 2001 ke na tokangaʻi ʻa e Misiona Lūsia Novosipisikī ʻi Saipīliá. Ne fie maʻu ai ke ngāue ʻaki ʻe ʻEletā mo Sisitā Lōleni ʻa ʻena tuí ʻi heʻena mavahe atu mei hona ʻapí mo e fāmilí ke ngāue ʻi ha fonua ne ʻikai te na maheni mo ʻenau lea fakafonuá, kakaí pe ko e anga hono ʻeá.
ʻOku pehē ʻe Sisitā Lōleni, “Ne hoko ia ko ha sivi lahi kiate kimaua ʻi heʻema falala ki he ʻEikí. Ko e meʻa kotoa pē naʻá ma hohaʻa ki aí ne tokamālie pea naʻe liliu ʻe he [meʻá ni] ʻa ʻema moʻuí.”
Ne hanga ʻe ha kiʻi tohi ʻi he peito ʻo e ʻapi fakamisioná ʻo fakamanatu mai maʻu pē ke “sio pē [ki he Fakamoʻuí] ʻi he fakakaukau kotoa pē; ʻoua ʻe tālaʻa, ʻoua ʻe manavahē” (T&F 6:36).
ʻOku lau ʻe ʻEletā mo Sisitā Lōleni ʻa e ngaahi meʻa naʻá na foua he ngāue fakafaifekaú ko ha niʻihi pē ʻo e ngaahi meʻa maʻongoʻonga taha ʻo ʻena moʻuí pea naʻe teuteuʻi ai kinaua ki hona ngaahi fatongia foʻou ʻi hono ui ʻo ʻEletā Lōleni ki he Kau Fitungofulú.
ʻOku pehē ʻe ʻEletā Lōleni, “ ʻOku ʻikai ke ma ʻilo ki he kahaʻú, ka ʻokú ma ʻilo ʻe lelei ia.”