Naʻa nau Lea ki he Toʻu tupú

Ako, Ngāueʻi, mo Vahevahe: Ko Hono Fakahoko ho Fatongia ki he ʻOtuá

Kuo fakafalala mai ke tau maʻu ʻa e lakanga fakataulaʻeikí pea ngāue ʻi he huafa ʻo e ʻOtuá. Ko e falala toputapu ʻoku tuku mai kiate kitautolú. ʻOku lahi e meʻa ʻoku ʻamanaki mai ke tau fakahokó… . Tau fakakaukau ki hotau ngaahi uiuiʻí, tau toe vakai ki hotau ngaahi fatongiá pea muimui ʻia Sīsū Kalaisi, ko hotau ʻEikí.

Palesiteni Thomas S. Monson, “ ʻOku ʻOmai ʻe he Teuteú ʻa e Ngaahi Tāpuakí,” 64.

ʻI he ngaahi uike siʻi kuo hilí, ne u vakai ki ha kamata ʻa ha tīkoni foʻou ʻi he hala ko ia ʻo e faivelengá. Ne fakaʻaliʻali mai ʻe heʻene tangataʻeikí ha fakatātā ne tā ʻe hono fohá ʻa ia ne ʻasi ai e ʻotu sea kotoa ʻo honau falelotú, ha fika ki he tīkoni kotoa ʻe vahe ke ne tufaki e sākalamēnití pea mo honau hala he falelotú ke tufaki e sākalamēnití ki he kāingalotú. Naʻá ku malimali mo ʻene tamaí ʻi heʻema fakakaukau ki ha kiʻi tamasiʻi, naʻe ʻikai fekauʻi ka naʻá ne faʻu ha palani ke fakapapauʻi te ne lavameʻa ʻi heʻene ngāue ʻi hono lakanga fakataulaʻeikí.

Naʻá ku ʻilo mei heʻene faivelengá, ha sīpinga mei he tohi foʻou ʻo e Fatongia ki he ʻOtuá. ʻA ia ko hono ʻiloʻi ʻo e meʻa ʻoku ʻamanaki mai ki ai ʻa e ʻEikí, fai ha palani ke fakahoko ia, ngāueʻi hoʻo palaní ʻi he faivelenga pea vahevahe mo e niʻihi kehé ʻa e founga ne hanga ʻe he meʻa naʻá ke fouá ʻo liliu koe mo faitāpuekina e niʻihi kehé.

Palesiteni Henry B. Eyring, Tokoni ʻUluaki ʻi he Kau Palesitenisī ʻUluakí, “Ngāue ʻi he Faivelenga Kakato,” 60.

ʻOku totonu ke mahino ki he kakai lalahi ʻo e Siasí ʻoku ʻikai ko e Fakalakalaka Fakatāutahá mo e Fatongia ki he ʻOtuá ko ha lisi lōloa pē ʻo ha ngaahi meʻa ke fakaʻilongaʻi pe ngāue ne fai. Ko ha ngaahi taumuʻa fakatāutaha ia kuo fokotuʻu ʻe he talavoú mo e finemuí ke tokoni ke nau hoko ʻo taau ke maʻu ʻa e ngaahi ouau ʻo e temipalé, ngāue fakafaifekaú, pea fakahoko e mali taʻengatá mo fiefia ʻi he hakeakiʻí. Tuku ke mahino eni: ʻe hoko ko ha mole lahi mo fakamamahi ki he kau talavoú mo e kau finemuí haʻanau feinga ke lavaʻi e ngaahi taumuʻá ʻiate kinautolu pē!

Ngaahi tamai, ngaahi faʻē, pea mo e kau taki ʻo e toʻu tupú, ʻoku mau kole atu ke mou ngāue fakataha mo hoʻomou fānaú pea mo e toʻu tupú ki he Fakalakalaka Fakatāutahá mo e Fatongia ki he ʻOtuá. He ʻikai ngata pē ʻi heʻenau tupulakí, ka te ke tupulaki ai mo koe foki. Kae mahuʻinga angé ko hoʻomou fakalakalaka fakataha ʻi he haʻi ʻo e tuí mo e fakakaumeʻá pea fefakamālohiaʻaki ai mo mou nofo maʻu ʻi he ongoongoleleí ʻo taʻengata.

ʻEletā Robert D. Hales ʻo e Kōlomu ʻo e Kau ʻAposetolo ʻe Toko Hongofula Mā Uá, “Ko hotau Fatongia ki he ʻOtuá: Ko e Misiona ʻo e Ngaahi Mātuá mo e Kau Takí ki he Toʻu tangata kei Tupu Haké,” 95.

ʻOku ʻamoutolu e faingamālié, kau talavou ʻofeina ʻo e Lakanga Taulaʻeiki Faka-ʻEloné. ʻOkú ke mateuteu mo loto nai ke fakahoko ho fatongiá? ʻOku finangalo ʻa e ʻEikí ke māteuteu pea tukupā ʻa e talavou kotoa pē, ʻo kamata ʻi he poó ni, ke moʻui taau mo e ui mei he pālofita ʻa e ʻOtuá ke ʻalu ʻo ngāue fakafaifekau.

ʻEletā Ronald A. Rasband ʻo e Kau Fitungofulú, “Ko e Uiuiʻi Fakalangi ʻo ha Faifekaú,” 51.

ʻI hoʻomou hoko ko ha tīkoni, akonaki, mo e taulaʻeikí, te mou kau atu ai ki ha ngaahi ʻekitivitī ʻe tokoni ke fakamālohia fakalaumālie ai kimoutolu pea mou ako ke fakahoko homou ngaahi fatongia lakanga fakataulaʻeiki kotoa pē. Ko e ʻekitivitī takitaha ʻoku nau muimui ʻi he founga faingofua ko ʻení:

ʻUluakí, ʻokú ke ako ai ki ha tefitoʻi moʻoni ʻo e ongoongoleleí pe ko ha fatongia ʻo e lakanga fakataulaʻeikí. Te ke ʻilo ai ʻa e meʻa ʻoku finangalo ʻa e Tamai Hevaní ke ke faí, peá ke feinga leva ke ke maʻu ʻa e fakamoʻoni fakalaumālie fekauʻaki mo iá pea mo e ʻuhinga ʻoku mahuʻinga aí.

Hokó, te ke fokotuʻu leva ha ngaahi palani ke ngāueʻi ʻa e meʻa ko ia kuó ke akó. ʻOku poupouʻi kimoutolu ke fakatefito hoʻomou ngaahi palaní ʻi he ngaahi fie maʻu pē ʻaʻaú, pea mo e ngaahi faingamālie ke ke tokoni ai ki he niʻihi kehé. Ko ha faingamālie fakaʻofoʻofa ʻeni ke ke fatongia ʻaki hono tokangaʻi hoʻo tupulakí pea mo fakatupulaki hoʻomou fakafalala fakalaumālie pē kiate kimoutolú.

Hili ko iá, peá ke vahevahe atu leva ʻa e ngaahi meʻa kuo mou akó pea mo e ngaahi meʻa kuo mou aʻusiá ki he niʻihi kehé. ʻI hoʻomou fai ʻení, te ne fakamālohia ai hoʻomou fakamoʻoní pea langaki ai e tui ʻa e niʻihi ʻoku mou feohí. Te mou fakalahi hoʻomou malava ko ia ke talanoa fekauʻaki mo e ongoongoleleí ki he niʻihi kehé… .

… ʻOku ou fakamoʻoni atu ko hoʻo ngāue faivelenga ko ia ʻi he Lakanga Taulaʻeiki Faka-ʻĒloné te ne liliu ʻa e moʻui ʻa kinautolu ʻoku mou ngāue ki aí. ʻOku ʻi ai ha kakai ʻoku nau fie maʻu hoʻomou tokoni ʻi he lakanga fakataulaʻeikí. ʻOku fie maʻu koe ʻe homou fāmilí. ʻOku fie maʻu koe ʻe hoʻomou kōlomú. ʻOku fie maʻu kimoutolu ʻe he Siasí. ʻOku fie maʻu kimoutolu ʻe he māmaní.

David L. Beck, palesiteni lahi ʻo e Kau Talavoú, “Ko e Lakanga Taulaʻeiki Faka-ʻĒlone Fakaʻeiʻeikí,” 54.

ʻE maʻu atu e ngaahi fakamatala fekauʻaki mo e polokalama foʻou Fatongia ki he ʻOtuá ʻi he ngaahi lea fakafonua kehekehe mei he DutyToGod.lds.org.

Taukaveʻi e Angamaʻá: Fakalakalaka Fakatāutahá

ʻI he peesi ʻuluaki ʻo hoʻo tohi Fakalakalaka Fakatāutahá te ke maʻu ai e ngaahi kupuʻi lea ko ʻení: “Ko ha ʻofefine ʻofeina koe ʻo e Tamai Hēvaní, kuo teuteuʻi ke ke haʻu ki he māmaní ʻi he kuonga ko ʻení koeʻuhí ko ha taumuʻa toputapu mo naunauʻia.”

ʻE ngaahi tuofāfine, ʻoku moʻoni e ngaahi leá ni! Ne ʻikai faʻu kinautolu ʻi ha talanoa fananga! ʻIkai ʻoku fakaofo ke ʻilo ʻoku ʻafioʻi kimoutolu ʻe heʻetau Tamai Hēvani taʻengatá, ʻokú Ne fanongo, tokangaʻi mo ʻofaʻi kimoutolu ʻaki ʻa e ʻofa ʻoku taʻengatá? Ko hono moʻoní, ʻoku hulu fau ʻa ʻEne ʻofa kiate kimoutolú kuó Ne foaki atu ai e moʻui matelié ni ko ha meʻaʻofa mahuʻinga ʻo e “tokua ne ʻi ai ha taimí,” pea fakakakato mo hoʻo talanoa ki hoʻo fonongá, faingataʻaʻiá mo e ngaahi faingamālie ke hoko ʻo ʻiloá, fakaʻeiʻeiki, loto-toʻa mo ʻofa. Pea ko e nāunauʻia tahá, ʻokú Ne foaki atu ha meʻaʻofa ʻoku ʻikai lava ke fakamahuʻingaʻi pe mafakamatalaʻi. ʻOku foaki atu ʻe he Tamai Hēvaní ʻa e meʻaʻofa maʻongoʻonga tahá—ʻa e moʻui taʻengatá—mo e faingamālie mo e tāpuaki taʻe hano tatau ko e “nofo fiefia ʻo lauikuongá.”

Palesiteni Dieter F. Uchtdorf, Tokoni Ua ʻo e Kau Palesitenisī ʻUluakí, “Ko hoʻo Fiefia ʻo Lauikuongá,” 124.

ʻE kau finemui ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, manatuʻi ko hai kimoutolu! Ko e kakai fili kimoutolu. Ko e ngaahi ʻofefine kimoutolu ʻo e ʻOtuá. He ʻikai lava ke mou hoko ko ha toʻu tangata ʻo ha kau finemui ʻoku fiemālie pē ke kau he laú. Kuo pau ke mou maʻu ʻa e loto-toʻa ke hā mākehe; ke tuʻu hake pea ulo atu, koeʻuhí ke hoko ʻa hoʻomou māmá ko ha fuka ki he ngaahi puleʻangá.”¹⁰ (T&F 115:5). ʻE hanga ʻe he māmaní ʻo lohiakiʻi kimoutolu ʻo nau pehē ʻoku ʻikai ke mou mahuʻinga—ʻo pehē fakakuonga muʻa hoʻomou teuteú pea ʻikai ke mou ʻilo ʻa e ngaahi meʻa ʻoku hoko ʻi māmaní. ʻOku ui taʻetūkua mai ʻa e māmaní ʻi ha leʻo hohaʻa ke mou “fiefia,” “ ʻahiʻahiʻi ʻa e meʻa kotoa,” “aʻu ki ai ka mou fiefia.” ʻI he tafaʻaki ʻe tahá ʻoku fanafana atu ʻa e Laumālie Māʻoniʻoní pea fakaafeʻi kimoutolu ʻe he ʻEikí ke “ ʻaʻeva ʻi he ngaahi hala ʻo e angamaʻá,” pea “liʻaki ʻa e ngaahi meʻa ʻo e māmaní,” pea “pīkitai ki he ngaahi fuakava ʻa ia kuo [mou] faí (T&F 25:2, 10, 13).

Elaine S. Dalton, palesiteni lahi Kau Finemuí, “Manatuʻi Ko hai Koe!” 120.

ʻOku ʻomi ʻe he Fakalakalaka Fakatāutahá ha founga fakaofo maʻau ke fakatupulaki fakakongokonga ai hoʻo fakamoʻoní. Ko hoʻo aʻusia ko ia e ngaahi tuʻunga ʻulungāanga mahuʻingá mo e ngaahi ngāué, ko e fanga kiʻi meʻa iiki ia te nau fakatupulaki hoʻo fakamoʻoni kia Sīsū Kalaisí ʻi hoʻo ako ʻEne ngaahi akonakí mo fakaʻaongaʻi maʻu pē kinautolu ʻi hoʻo moʻuí. ʻE hanga ʻe hono tanumaki maʻu pē ko ʻení ʻo maluʻi koe he halá.

Mary N. Cook, tokoni ʻuluaki kau palesiteni lahi ʻo e Finemuí, “ʻOua, ʻOua, ʻOua ʻAupito Naʻá ke Foʻi!,” 117.

ʻOku tau maʻu ʻa e loto-toʻa mo e mālohi ʻi he talaʻofa ko ʻení ʻe ʻi ai maʻu pē ʻa e ʻEikí ke tokoniʻi kitautolu pea ʻe ʻikai ʻaupito te Ne liʻaki kitautolu. Kuo akoʻi kitautolu ʻoku afioʻi mo ʻofaʻi ʻe he Tamai Hēvaní ʻEne fānaú kotoa. ʻI hoʻo hoko ko e taha ʻo Hono ngaahi ʻofefine pelepelengesí, ʻoku lava ke ke maʻu ai ʻEne loto-fakapapaú, tatakí mo e tokoní ʻo fakafou ʻi he mālohi ʻo e lotú.

Ann M. Dibb, tokoni ua kau palesiteni lahi ʻo e Kau Finemuí, “Ke ke Loto-toʻa,” 114.

Ki ha toe fakamatala fekauʻaki mo e Fakalakalaka Fakatāutahá, vakai ki he PersonalProgress.lds.org.