Tokoni e Fokotuʻutuʻu Foʻoú ʻke Fakalakalaka e Faiako ʻAʻahi ʻa e Kau Fafinéʻ

ʻI Siulai ʻo e 2010, ʻe ʻiloʻi ʻe he kau fafine ʻo e Fineʻofá mo kinautolu ʻoku maʻu e makasini Liahona mo e Ensign ha liliu ki he fokotuʻutuʻu angamaheni ʻo e Pōpoaki ʻa e Faiako ʻAʻahí.

Ne pehē ʻe Sisitā Suli B. Peki ko e palesiteni Lahi ʻo e Fineʻofá, “ʻOku mau fie maʻu ke mahino ki he faiako ʻaʻahi kotoa ko e faiako ʻaʻahí ko ha uiuiʻi ia mei he ʻEikí ke ʻofaʻi, tokoniʻi, akoʻi mo tokangaʻi ha fefine ʻaki e ngaahi fakakaukau ko iá.

ʻE tokoni e fokotuʻutuʻu foʻou ko ʻeni ʻo e pōpoakí ke mahino ki he kau fafiné ʻa e taumuʻa ʻo e Fineʻofá, akoʻi e ngaahi tefitoʻi moʻoní ke tokoni ke moʻui ʻaki ʻe he kau fafiné ʻa e taumuʻá, ʻomi ha vakai fakahisitōlia mo ha ngaahi fokotuʻu ki he founga ʻe lava ai ʻe he kau fafiné ʻo tokoniʻi mo fakamālohia lelei ange ʻa e kau fafine kehé.

Ne pehē ʻe Sisitā Peki, “Ko e Pōpoaki ʻa e Faiako ʻAʻahí ko ha meʻangāue ia ʻi he nima ʻo ha faiako ʻaʻahi. ʻI heʻene ako ʻa e pōpoakí mo fakakaukau ki he kau fafiné, te ne ʻiloʻi ʻa e meʻa ke ne vahevahe mo kinautolú pea mo ia ke fai maʻanautolú.”

ʻOku hā atu ʻi he peesi hokó ha sīpinga fo’ou ʻo e Pōpoaki ʻa e Faiako ʻAʻahí, mo e fakahinohino ki he anga hono fokotuʻutuʻu foʻoú.

Ngaahi Fakahinohinó.

Ngaahi Taumuʻa ʻo e Fineʻofá

Pōpoaki

Fehuʻi Ke Ngāueʻí

Fehuʻi ke Fakaʻaongaʻí

Mei Hotau Hisitōliá

Mei he Folofolá

Ngaahi Fakamatala Lahi Ange

ʻOku tokoni e ngaahi fakahinohinó ke ʻilo ʻe he kau faiako ʻaʻahí ʻa e founga hono akoʻi mo fakaʻaongaʻi e pōpoakí.

Ne tānaki atu e ngaahi taumuʻa ʻo e Fineʻofá ke fakamanatu ki he kau fafiné ʻa e ngaahi fatongia ʻo e Fineʻofá: ke fakatupulaki e tuí mo e angatonu fakatāutahá, fakamālohia e ngaahi fāmilí mo e ʻapí pea fekumi mo tokoniʻi e niʻihi faingataʻaʻiá.

Ko e uho ʻo e pōpoakí te ne ʻomi ha faleʻi pau mo taimi tonu fakahangatonu mei he kau palesitenisī lahi ʻo e Fineʻofá.

Ko e taumuʻa ʻo e fehuʻí ni ke tokoniʻi e kau faiako ʻaʻahí ke nau ngāue ʻo fakatatau mo e ueʻi ʻa e Laumālié ke tokoniʻi lelei ange ai e kau fafine ʻoku nau akoʻí.

ʻOku ʻuhinga ʻa e fehuʻí ni ke ne fakatupu ha loto fie ngāue ʻa e Fineʻofa takitaha pea tokoni ki ai ke ne fakaʻaongaʻi ʻa e pōpoakí ʻi heʻene moʻuí.

ʻI hono lau ko ia e tukufakaholo fakaʻeiʻeiki ʻo e Fineʻofá, ʻe lava ke maʻu ʻe he kau fafiné ha ueʻi fakalaumālie mei he kautaha ne fokotuʻu ʻi he kamataʻanga ʻo e Siasí pea mo e polokalama lolotonga ʻo e Fineʻofá. Naʻe pehē ʻe Sisitā Peki, “ ʻOku ueʻi fakalaumālie kitautolu ʻe heʻenau ngaahi feilaulaú pea tau fakaʻamu ke kau atu ʻi hono langa ʻo e puleʻanga ʻo e ʻEikí ʻi he faʻahitaʻu ko ʻeni ʻo ʻetau ngāué.”

ʻE tokoni e ngaahi potufolofola ko ʻení ke fakalahi atu ki hono ako, akoʻi pea mo hono fakaʻaongaʻi ʻo e pōpoakí.

ʻE lava ke toe maʻu mo ha ngaahi fakafehokotakiʻanga ki he ngaahi maʻuʻanga tokoni ʻoku nau fekauʻaki mo e Uepi saiti ʻa e Fineʻofá, ʻa ia ko e reliefsociety.lds.org.