ʻEletā Patrick Kearon
ʻO e Kau Fitungofulú
Lolotonga haʻane kiʻi nofo taimi nounou ʻi Kalefōnia, ne nofo ʻa ʻEletā Petuliki Kealoni mo ha fāmili Siasi “tuʻukimuʻa” ʻa ia naʻa nau fakafeʻiloaki kiate ia ʻa e ongoongoleleí.
Hili ha taʻu ʻe ua, ne foki ki ʻIngilani peá ne feʻiloaki ai mo ha ongo faifekau ʻi ha hala ʻi Lonitoni pea kamata ke ne ako fekauʻaki mo e Siasí. Naʻá ne maʻu ha potufolofola ʻi he Tohi ʻa Molomoná ʻoku pehē, “ ʻOku ʻi ai ʻa e faʻahinga ʻo e tangatá koeʻuhí ke nau maʻu ʻa e fiefiá” (2 Nīfai 2:25). Ne hangē ʻoku fakamanatu ange ʻe he potufolofolá ʻa e fiefia ʻi he ʻapi ʻo e fāmili Siasí pea ʻi he moʻui ʻa e ongo faifekau ʻokú na akoʻi iá.
ʻOku pehē ʻe ʻEletā Kealoni, “Ne maʻu ʻe he potufolofolá ʻa ʻeku tokangá. Ne u sio ki he hanga ko ia ʻe he faleʻi ʻa e Fakamoʻuí ke fiefiá ʻo fakatupulekina ʻa e moʻui ʻa kinautolu ne u feʻiloaki mo iá.”
Talu mei heʻene kau ki he Siasí ʻi he ʻaho 24 ʻo Tīsema 1987, mo hono ʻoatu ʻe ʻEletā Kealoni ʻa e fiefia ko iá ki ha ngaahi uiuiʻi lahi ʻo kau ai ʻa ʻene hoko ko ha palesiteni ʻo e Kau Talavoú, tokoni pīsope, palesiteni fakakolo, palesiteni fakasiteiki pea mo ha Fitungofulu Fakaʻēlia.
ʻI heʻene hoko ko ia ko ha mēmipa foʻou ʻo e Kōlomu ʻUluaki ʻo e Kau Fitungofulú, ʻokú ne pehē “ ʻoku ou feinga maʻu pē ke tataki au ʻe he ngaahi tefitoʻi moʻoni ʻo e Siasí. Kuó u mamata ki he founga kuo lava ʻe hono moʻui ʻaki e ngaahi tefitoʻi moʻoni ko iá ʻo liliu e moʻuí.”
Naʻe fāʻeleʻi ʻa ʻEletā Kealoni ʻi Kālaila, Kamupaleni ʻi Pilitānia ʻi Siulai ʻo e 1961 kia Pate mo Petilisa Kealoni. Koeʻuhí ko e ngāue ʻa ʻene tangataʻeikí ʻi he Laulā Puna ʻa Pilitāniá, ne ako ai ʻa ʻEletā Kealoni ʻi he Hahake Lotolotó pea mo ʻIngilani.
Naʻá ne fetaulaki mo Senifā Kalo Helime lolotonga ʻa ʻene ako ʻi Ingilani mo e ʻUnivēsiti Pilikihami ʻIongí. Naʻá na mali ʻi he Temipale ʻOkalani Kalefōniá ʻi he 1991. Ko ha mātuʻa kinaua ki ha fānau ʻe toko fā pea kuo mālōlō ha toko taha ʻo kinautolu.
Kuo nofo mo ngāue ʻa ʻEletā Kealoni ʻi ʻIngilani, Saute ʻAlepea mo ʻAmelika ʻi ha ngaahi kautaha kehekehe ʻo kau ai ʻa e politiki, tafaʻaki fakamoʻui leleí mo e kautaha ngaohi meʻalelé. Kimuʻa pea maʻu hono uiuiʻí, ne fakalele ʻe ʻEletā mo Sisitā Kealoni ʻi ʻIngilani ha kautaha faleʻi fekauʻaki mo e fetuʻutakí.