Bubuhatin Ka Namin!

Ni Pangulong Thomas S. Monson

Mula sa isang mensahe sa pangkalahatang kumperensya noong Oktubre 2006.

Isang umaga habang nagmamaneho ako patungo sa opisina, may nadaanan akong isang karatula. Mababasa rito, “Paglilingkod ang Mahalaga.” Ang mensahe sa karatula ay hindi nawaglit sa aking isipan. Sa katotohanan ang paglilingkod ang mahalaga—ang paglilingkod sa Panginoon.

Maraming taon na ang nagdaan nagkaroon ako ng pribilehiyo na basbasan ang isang magandang dalagita na edad 12, si Jami Palmer. Natuklasang may kanser siya. Nalaman niya na ang binti niya kung saan naroon ang kanser ay nangangailangan ng maraming operasyon. Ang matagal na nilang planong pagha-hiking kasama ang klase niya sa Young Women ay hindi na mangyayari, ang naisip niya.

Sinabihan ni Jami ang kanyang mga kaibigan na mag-hiking na sila kahit hindi siya kasama. Alam kong may nadama siyang kabiguan sa kanyang puso.

Subalit mariing tumugon ang ilang dalagita, “Hindi, Jami, sasama ka sa amin!”

“Pero hindi ako makalakad,” ang sagot niya.

“Kung gayon bubuhatin ka namin hanggang sa itaas!” At binuhat nga nila si Jami.

Walang sinuman sa mga dalagitang iyon ang malilimutan ang araw na iyon nang dumungaw ang mapagmahal na Ama sa Langit na may ngiti ng pagsang-ayon at lubos na nasisiyahan.

Sa Aklat ni Mormon mababasa natin ang tungkol sa magiting na si Haring Benjamin. Pahayag niya, “At masdan, sinasabi ko sa inyo ang mga bagay na ito upang inyong matamo ang karunungan; upang inyong malaman na kung kayo ay nasa paglilingkod ng inyong kapwa-tao, kayo ay nasa paglilingkod lamang ng inyong Diyos” (Mosias 2:17).

Ito ang paglilingkod na mahalaga, ang paglilingkod kung saan tinawag tayong lahat: ang paglilingkod ng Panginoong Jesucristo.

Naglingkod Din Tayo

Tingnan kung paano nagpasiya ang mga batang ito na paglingkuran ang iba.

Paglilingkod sa Pamamagitan ng Pananahi

Nang marinig ni Sarah, edad 9, mula sa Oklahoma, USA, ang tungkol sa lindol sa Haiti noong nakaraang taon, naisip niya ang mga batang babae na nangawalan ng tahanan. Katatanggap lang niya ng makina na iniregalo sa kanyang kaarawan, at nagpasiya siyang gumawa ng mga simpleng palda para sa mga batang babae. Matiyagang tinatastas ni Sarah ang ilang tahi kapag nagkakamali siya at muli itong tinatahi. Ngunit hindi nagtagal ay nakagawa siya ng 18 bagong palda. Ipinadala niya ang mga ito sa Church Humanitarian Center para sa mga batang babae sa Haiti.

Paglilingkod sa Pamamagitan ng Pagbibigay ng Backpack

Pinagsama-sama nina Alex, edad 9, at Noah, edad 6, mula sa Oregon, USA, ang 15 backpack na puno ng kagamitan sa eskuwela para sa mga batang nangangailangan nito. Nangolekta sila ng mga donasyon mula sa mga kaibigan at kapamilyang gustong tumulong. “Masaya ako sa pangangalap ng mga backpack,” sabi ni Alex.

Mga Kamay na Handang Tumulong

Kailangan ng branch ni Rikki sa California, USA, ng isang tutugtog ng piano. Siyam na taong gulang lamang siya, ngunit handang tumulong si Rikki. Limang taon na siyang nag-aaral ng pagtugtog ng piano, gayunman mahirap tugtugin ang ilan sa mga himno. Ngayon bawat linggo ay pumipili siya ng mga himno at tumutugtog para sa sacrament meeting. “Kahit kinakabahan ako, alam kong mahalagang maglingkod sa branch ko,” sabi niya. “Panatag ang loob ko kapag tumutugtog ako ng mga himno.”

Mga Cookies Kapalit ng Sabon

Narinig ni Eliana, edad 7, na kailangan ng kanyang stake sa Utah, USA, ng 300 piraso ng sabon para sa mga hygiene kit na ibibigay sa mga biktima ng lindol. Nagpasiya sila ng kanyang ina na gumawa ng maraming-maraming cookies at ibenta o ipagpalit ang mga ito ng sabon. Bawat kapitbahay nila ay umorder ng hindi kukulangin sa isang dosena. Gamit ang kupon, nakabili sila ng 172 piraso ng sabon. “Alam kong biniyayaan ako ng Ama sa Langit at ang pamilya ko sa kagustuhan naming gawin ang aming bahagi,” sabi ni Eliana.

Ibahagi ang Inyong mga Ideya

Kung may natuklasan kayong mabuting paraan upang tulungan ang isang taong nangangailangan, gusto naming marinig ang tungkol dito. Tingnan sa pahina 3 upang malaman kung paano ninyo ipadadala sa amin ang inyong ideya.

Mga paglalarawan ni Taia Morley

Pagtugmain

Gumuhit ng isang linya sa pagitan ng bata o retrato ng mga bata at ng isang bagay sa ibaba na binanggit sa kuwento. Ang ilan sa mga kuwento ay mayroong mahigit sa isang bagay.