Maliliit at mga Karaniwang Bagay

2011

Pebrero 2011

Maliliit at mga Karaniwang Bagay

“Sa pamamagitan ng maliliit at mga karaniwang bagay ay naisasakatuparan ang mga dakilang bagay” (Alma 37:6).

Bakit Kailangang Kumanta?

Ang pagkanta ng mga himno ay makapag-aanyaya sa Espiritu sa mga miting natin sa Simbahan, sa ating tahanan, at sa ating pang-araw-araw na buhay. Itinuro ni Pangulong J. Reuben Clark Jr. (1871–1961) ng Unang Panguluhan na, “Napapalapit tayo sa Panginoon sa pamamagitan ng musika kaysa marahil sa alinmang bagay maliban sa panalangin.”¹

Ang Simbahan ay naglaan ng Web site para ma-access ang mga himno (makukuha sa wikang Ingles, Pranses, Portuges, at Espanyol). Ang music.lds.org ay kinabibilangan ng mga tagubilin sa pagkumpas ng musika at pagtugtog ng mga himno gamit ang mga keyboard at mga mungkahi rin sa pagpili ng angkop na mga himno para sa sacrament meeting.

Ang musika at mga titik ay maaaring basahin, i-download, o patugtugin nang direkta sa Web site, na lalong makatutulong sa mga miyembrong walang piano o keyboard.

Ang musika ay magagamit sa tahanan gayundin sa simbahan. Ipinayo ng Unang Panguluhan: “Turuan ninyo ang inyong mga anak na mahalin ang mga himno. Awitin ang mga ito tuwing Sabbath, sa [family home evening], tuwing nag-aaral ng banal na kasulatan, tuwing oras ng panalangin. Umawit habang kayo’y nagtatrabaho, habang kayo’y naglalaro, at habang kayo’y sama-samang naglalakbay.”² Ang mga himno ay makapaghahatid ng diwa ng pagmamahal at pagkakaisa sa tahanan.

Mahahalagang Pangyayari sa Church Welfare Services

Sinisikap ng programang tulong-pantao ng Ang Simbahan ni Jesucristo ng mga Banal sa mga Huling Araw na paunlarin ang buhay ng mga nangangailangan sa pamamagitan ng pagbibigay ng pagkain, malinis na tubig, pangangalaga sa mata o paningin, mga wheelchair, bakuna, at pagtugon sa emergency. Mula sa mga simpleng simulain, lumaganap ang programa sa paglipas ng mga taon upang tulungan ang milyun-milyong katao sa buong mundo.

Huling bahagi ng 1920s: Nagtatag ng mga welfare farm. Inimbak ang mga ani sa mga storehouse.

1932: Itinayo ang unang planta ng mga pagkaing de-lata.

1936: Nabuo ang General Church Welfare Committee. Labing-apat na welfare region ang nilikha upang pamahalaan ang mga aktibidad na pangkawanggawa sa buong mundo.

1936: Itinatag ang unang opisyal na employment center.

1936–1940: Nagsimula ang mga proyekto sa produksyon, kabilang na ang isang sawmill, tannery, planta ng pasta, pagde-de-lata ng salmon, pagde-de-lata ng peanut butter, paggawa ng sabon, at pagbobote ng gatas.

1937: Ang unang regional storehouse ay itinayo sa Salt Lake City.

1938: Ang pagtatayo ay nagsimula sa Welfare Square, kabilang na ang isang mataas na gusaling imbakan ng mga butil at isang central storehouse.

1938: Ang unang Deseret Industries thrift store ay nagbukas sa Salt Lake City.

1940: Natapos ang pagtatayo sa Welfare Square.

1945: Nagpadala ang Simbahan ng napakaraming pagkain, damit, at iba pang mga suplay sa naghihirap na mga miyembro sa Europa pagkatapos ng Ikalawang Digmaang Pandaigdig.

1960: Natapos ang bagong planta ng de-latang pagkain at plantang nagpoproseso ng gatas sa Welfare Square.

1970s: Pinalawak ng Simbahan ang mga proyektong pangkawanggawa at produksyon sa Mexico, England, at Pacific islands.

1973: Ang LDS Social Services (ngayon ay LDS Family Services) ay nilikha bilang isang opisyal na korporasyon ng Simbahan.

1976: Sinimulang palakihin ng Simbahan ang mga storehouse sa lahat ng dako ng Canada at Estados Unidos. Ibinalita rin na palalawakin ang mga planta ng mga pagkaing de-lata at pasilidad para sa produksyon.

1982: Binisita ng pangulo ng Estados Unidos na si Ronald Reagan ang Welfare Square.

1985: Sinimulan ng Simbahan na maglaan ng malinis na balon ng tubig sa Africa, na nagpasimula sa malaganap na pagtulong ng Simbahan sa mga tao sa buong mundo.

1990s: Ang Latter-day Saint Humanitarian Center ay itinayo upang magbukud-bukod at mag-impake ng mga sobrang damit at iba pang mga suplay, kabilang na ang mga suplay pangmedikal, para ipadala sa iba’t ibang dako ng mundo sa pagtugon sa kahirapan at mga kalamidad.

2002: Sinimulan ng LDS Charities ang mga inisyatibo sa wheelchair, malinis na tubig, at neonatal resuscitation.

2003: Nakiisa ang LDS Charities sa pandaigdigang inisyatibo sa paglaban sa tigdas at nangakong magbibigay ng isang milyong U.S. dollars bawat taon bilang suporta sa kampanya. Nagsimula rin ang pandaigdigang inisyatibo sa panggagamot ng mata o paningin.

2010: Pinasimulan ng LDS Charities ang inisyatibong pag-ibayuhin ang produksyon ng pagkain at nutrisyon sa ilan sa mga pinakamahirap na bansa sa mundo. Naganap ang groundbreaking para sa bagong 600,000-talampakang-kuwadrado (56,000 m²) na Bishop’s Central Storehouse sa Salt Lake City.

Larawan ng São Paulo Brazil Temple na kuha ni Matthew Reier; Ang Mabuting Samaritano, Ni Joseph Brickey

Dulong kaliwa (mula itaas): tatlong larawan sa kagandahang-loob ng Church Welfare Department; larawang kuha ni Welden C. Andersen; kaliwa (mula itaas): Larawang kuha ni Gerry Avant, Deseret News; larawang kuha ni Howard M. Collett; larawan © Rosa Pena