Savali a le Au Peresitene Sili
Uso, Ua Ou Tautino
Sa tutu se au uso tama talavou e toalua i luga o se tamai pupū e iloa atu vaimanino o se vaituloto lanumoana. O se nofoaga lauiloa lea e fepuna ai, ma sa masani lava ona talanoa le au uso e uiga i le fepuna ai —o se mea na la vaai o faia e nisi.
E ui lava sa la mananao uma e fepuna, a e sa le’i manao se isi o i laua e puna muamua. E le maualuga tele le pupū, ae i tama talavou ia e toalua, na foliga mai na faateleina le maualalo i taimi uma sa la punonou ai agai i luma—ma na vave ona mou ese atu le lotototoa.
Mulimuli ane, na tuu e le tasi o le au uso lona vae i le tausiusiuga o le pupū ma agai atu i luma ma le mautinoa. O le taimi lena na musumusu atu ai lona uso, “Pei e lelei ona ta faatali seia oo i le taumafanafana a sau.”
Peitai, o le taimi foi lea ua toso atu ai e le malosi o le uso muamua o ia i luma. “Uso,” o lana tali mai, “ua ou tautino!”
Sa palasi o ia i totonu o le vai ma ea vave a’e ma se alaga o le faamanuiaina. Sa vave ona sosoo atu ai ma le uso lona lua. Mulimuli ane, na la talie e uiga i upu mulimuli a le alii lea na muamua ao le’i puna i le vai: “Uso, ua ou tautino.”
O le tautino e tai pei lava o le puna i totonu o le vai. A lē o lou tautino po o lou lē tautino foi. A lē o lou minoi i luma po o lou tutu sasao ai lava. E leai se faalotolotolua. Tatou te feagai uma lava ma taimi o filifiliga e sui atoa ai taimi o totoe o o tatou olaga. I le avea ai ma ni tagata o le Ekalesia, e tatau ona tatou fesili ifo ia i tatou lava, “Pe ou te puna i totonu pe na o le tutu i le taufaasiusiuga? Pe ou te laa i luma pe na o le sue o le malulu o le vai i ou tamatamai vae?”
E faia nisi o agasala ona tatou te faia mea sese; o nisi o agasala tatou te faia ona o lo tatou le faia o se mea. O le faatagā tautino i le talalelei, e mafai ona oo atu ai i le le fiafia, faanoanoaga, ma le tausalaina. E le tatau ona faatatau lenei tulaga ia i tatou ona o i tatou o ni tagata o le feagaiga. Tatou te osi feagaiga ma le Alii pe a papatisoina i tatou ma pe a tatou ulu atu i le maota o le Alii. E osi feagaiga tama tane ma le Alii pe a faaeeina atu ia i latou le perisitua. E leai se mea e sili atu ona taua nai lo le tausia o se tautinoga na tatou faia ma le Alii. Ia tatou manatua le tali a Rasela ma Lea ia Iakopo i le Feagaiga Tuai. O se tali faigofie ma tuusao ma na faaalia ai la la’ua tautinoga: “O mea uma ua fetalaia mai e le Atua ia te oe, ina faia ia o lea” (Kenese 31:16).
O i latou o e faatagā tautino atu e ono faamoemoe e maua na o ni nai faamanuiaga o le molimau, olioli, ma le filemu. E na ona faataga tatala mai foi i ai pupuni o le lagi ia i latou. Pe le o se tulaga faavalevalea ea le mafaufau faapea, “O le a ou tautino atu le 50 pasene i le taimi nei, ae 100 pasene pe a afio mai Keriso i le Afio Mai Faalua”?
O le tautino i a tatou feagaiga ma le Alii o se fua lea o lo tatou liua. O le tautinoga i lo tatou Faaola ma Lana Ekalesia e galueaiina ai o tatou tagata ma faamalolosia ai o tatou agaga ina ia oo ai i le taimi tatou te feiloai ai ma Keriso, o le a Ia opoina i tatou ma faapea mai, “Ua lelei ia, le auauna lelei e ma le faamaoni” (Mataio 25:21).
E i ai se eseesega i le va o le faamoemoega ma le faatinoga. O i latou o e na o le faamoemoe lava e tautino atu e ono maua ni ’alofaga i soo se itu. O i latou o e tautino faamaoni atu o le a fetaiai lelei lava ma o latou luitau ma faapea atu ia i latou lava,” Ioe, o se mafuaaga lelei lena e faatuai ai, peitai ua uma ona ou osi feagaiga, ma o lea o le a ou faia ai le mea na ou tautino e fai.” Latou te suesue i tusitusiga paia ma saili ma le faamaoni le taitaiga a lo latou Tama oi le Lagi. Latou te talia ma faalautele o latou valaauga i le Ekalesia. Latou te auai i a latou fonotaga. E fai a latou asiasiga faaleaiga po o faiaoga asiasi.
Fai mai se alagaupu faa-Siamani, “O folafolaga e pei lava o le masina ua atoa. Afai e le tausia i le taimi lava lea, o le a faaitiitia i lea aso ma lea aso.” I le avea ai ma tagata O Le Ekalesia a Iesu Keriso o le Au Paia o Aso e Gata Ai, ua tatou tautino atu e savavali i le ala o le avea ma soo. Ua tatou tautino atu e mulimuli i le faataitaiga a lo tatou Faaola. Mafaufau i le faamanuiaina ma le liua o le lalolagi mo le lelei pe a ola tagata uma o le Ekalesia a le Alii i o latou gafatia moni—liuaina i le taele o o latou loto ma tautino atu i le fausia o le malo o le Atua.
O nisi o tulaga, tatou te tutu uma ai i se tulaga e faia ai filifiliga lea e iloa atu ai le vai. O la’u tatalo ia tatou maua le faatuatua, agai i luma, faafetauia ma le lototele o tatou atugaluga ma masalosaloga, ma faapea ifo ia i tatou lava, “Ua ou tautino!”
Ata na tusia e Bjorn Thorkleson
Ata na tusia e Steve Kropp