Sa Daan

Mga Hamon sa Missouri

Ni Jennifer Maddy

Samahan ninyo kaming maglibot sa isang mahalagang lugar sa kasaysayan ng Simbahan!

Para kay Joseph Smith matagal at mahirap ang paglalakbay mula Kirtland, Ohio, hanggang Independence, Missouri. Naglakbay siya sakay ng bagon, ng bangka, at ng karuwahe. Sa huling 250 milya (402 km), kinailangan niyang maglakad! Ngunit sinabihan na siya ng Panginoon na magpunta sa Missouri para itatag ang lungsod ng Sion, kaya sumunod si Joseph Smith.

Nagsimulang magdatingan ang iba pang mga miyembro ng Simbahan sa Missouri noong 1831. Nagbungkal sila ng lupa, nagtayo ng mga bahay, at nag-ani ng mga pananim.

Nang dumami nang dumami ang mga miyembrong lumilipat sa Independence, Missouri, naghinala at nagalit ang ilan sa mga taong naninirahan na roon. Nilusob ng mga mandurumog ang mga tahanan ng mga Banal at inutusan silang umalis.

Liberty Jail

Noong taglamig ng 1838 dinakip si Joseph Smith at ang lima pang mga pinuno ng Simbahan dahil sa mga maling paratang at dinala sila sa Liberty Jail. Madilim, marumi, at napakalamig ng bilangguan, at walang makapal na kumot o maayos na pagkain ang mga bilanggo. Makakapal ang dingding na bato ng Liberty Jail. Ang silid sa itaas ay para sa bantay at sa pamilya nito, at ang silid sa ibaba—ang “piitan”—ay para sa mga bilanggo. Isang maliit na pinto lamang ang madaraanan papasok at palabas ng unang palapag.

Habang nasa piitan ang Propeta, sinabi sa kanya ng Panginoon, “Huwag katakutan ang nagagawa ng tao, sapagkat ang Diyos ay kasama mo magpakailanman at walang katapusan” (D at T 122:9).

Itinayong muli ng Simbahan ang ilang bahagi ng piitan mula sa ilang orihinal at ilang bato na binuong muli at pagkatapos ay nagtayo ng visitors’ center sa paligid nito. Ngayon ay maraming bisitang nagpupunta upang makita ang lugar kung saan tumanggap ang isang propeta ng Diyos ng nakapapanatag na mga paghahayag habang nakapiit siya.