របៀបស្វែងរកកម្លាំង និង ជោគជ័យ
ដោយ អែលឌើរ ជែហ្វ្រី អ័រ ហូឡិន
នៃកូរ៉ុមនៃពួកសាវកដប់ពីរនាក់
ដកស្រង់ចេញពីការប្រជុំពិសេសនៅសាកលវិទ្យាល័យព្រិកហាំ យ៉ង់ធ្វើឡើងនៅថ្ងៃទី 2 ខែ មិនា ឆ្នាំ 1997
អ្នករាល់គ្នាមួយចំនួនដឹងពីអ្វីដែលអ្នកចង់ប្រែក្លាយ និងពីអ្វីដែលអ្នកចង់ធ្វើនៅក្នុងជីវិតរបស់អ្នក ហើយមានអ្នកមួយចំនួនទៀតមិនបានដឹងពីបញ្ហានេះទេ ។ អ្នករាល់គ្នាមួយចំនួនទំនងដូចជាមានពរជ័យ និង ជម្រើសដ៏អស្ចារ្យយ៉ាងច្រើននៅចំពោះមុខ ។ នៅពេលខ្លះ និងដោយហេតុផលអ្វីក៏ដោយ អ្នករាល់គ្នាខ្លះទៀតមានអារម្មណ៍ថាឥតសំណាង ហើយមានផ្លូវល្អៗតិចតួចដែលបានដាក់នៅចំពោះមុខ ។
ប៉ុន្តែទោះអ្នកជាមនុស្សប្រភេទណា ហើយមិនថាអ្នករកឃើញថា អ្នកស្ថិតនៅកន្លែងណា ក្នុងខណៈពេលដែលអ្នកស្វែងរកផ្លូវរបស់អ្នកនៅក្នុងជីវិតនេះ ខ្ញុំសូមផ្ដល់ដល់អ្នកនូវ « ផ្លូវ សេចក្ដីពិត និងជីវិត » ( យ៉ូហាន 14:6 ) ។ មិនថាអ្នកគិតថាអ្នកអាចនឹងទៅកន្លែងផ្សេងមួយទៀតដែរឬអត់នោះទេ ខ្ញុំសូមឲ្យអ្នក « មករកទ្រង់ » ( សូមមើលម៉ាថាយ 11:28–30 ) ជាជំហានដ៏សំខាន់ដំបូងបង្អស់នៅក្នុងការទៅដល់ទីនោះ ក្នុងការស្វែងរកសុភមង្គល និង កម្លាំង ព្រមទាំងជោគជ័យផ្ទាល់ខ្លួនរបស់អ្នក ។
នៅពេល អនទ្រេ និង ភីលីព បានឮព្រះគ្រីស្ទមានបន្ទូលជាលើកដំបូង ពួកគេមានចិត្តរំភើបជាខ្លាំងដែលមិនអាចថ្លែងបាន រហូតពួកគេបានដើរតាមទ្រង់ កាលទ្រង់យាងចេញពីហ្វូងមនុស្ស ។ ដោយមានអារម្មណ៍ថា ទ្រង់មានគេតាម នោះព្រះគ្រីស្ទបានងាក ហើយសួរទៅបុរសទាំងពីរនាក់នោះថា « អ្នកមករកអី ? » យ៉ូហាន 1:38 ។ ការបកប្រែផ្សេងទៀតបង្ហាញឃ្លានោះដោយសាមញ្ញថា « តើអ្នកចង់បានអី ? »
ពួកគេបានតបថា « តើលោកនៅឯណា ? » ឬ « តើលោករស់នៅឯណា ? »
ហើយព្រះគ្រីស្ទមានបន្ទូលតបថា « ចូរតាមខ្ញុំទៅមើល » ។ បន្តិចក្រោយមក ទ្រង់បានហៅពេត្រុស និង អ្នកផ្សេងទៀតជាផ្លូវការឲ្យធ្វើជាសាវកថ្មីជាមួយនឹងការអញ្ជើញដូចគ្នានេះ « ចូរមកតាមខ្ញុំ » ( សូមមើល ម៉ាថាយ 4:19 ) ។
រីឯចំពោះខ្ញុំវិញ អត្ថន័យដ៏សំខាន់បំផុតនៃជីវិតរបស់យើង គឺត្រូវបានមើលឃើញនៅក្នុងកត្តាដ៏សង្ខេបទាំងពីរនេះ ក្នុងឆាកចាប់ផ្ដើមនៃការបម្រើក្នុងជីវិតរមែងស្លាប់របស់ព្រះអង្គសង្គ្រោះ ។ កត្តាទីមួយគឺជាសំណួរមួយឃ្លានោះចំពោះយើងគ្រប់គ្នា « អ្នកមករកអី ? តើអ្នកចង់បានអ្វី ? » ទីពីរគឺជាចម្លើយរបស់ទ្រង់ពីរបៀបទទួលបានវត្ថុនោះ ។ « ចូរមកតាមខ្ញុំ » ។ចូរមកមើលអ្វីដែលយើងធ្វើ និងពីរបៀបដែលយើងចំណាយពេលវេលារបស់យើង ។ រៀនពីយើង ធ្វើតាមយើង ហើយនៅក្នុងដំណើរការនេះ យើងនឹងផ្ដល់ចម្លើយដល់អ្នកការអធិស្ឋានរបស់អ្នក ហើយឲ្យព្រលឹងអ្នកបានសម្រាក ។
មិត្តយុវវ័យជាទីស្រឡាញ់របស់ខ្ញុំអើយ ខ្ញុំដឹងថា គ្មានផ្លូវឯណាទៀតដែលអ្នកអាចទទួលបានជោគជ័យ ឬមានភាពរីករាយ ឬមានសុវត្ថិភាពឡើយ ។ ខ្ញុំដឹងថា គ្មានផ្លូវឯណាទៀតដែលអ្នកអាចទ្រាំទ្របន្ទុករបស់អ្នក ឬរកឃើញនូវអ្វីដែលយ៉ាកុបបានហៅថា « សុភមង្គលដែលបានរៀបចំឡើងសម្រាប់ពួកបរិសុទ្ធ » នោះឡើយ ( នីហ្វៃទី 2 9:43 ) ។ នោះជាហេតុផលដែលយើង ធ្វើសេចក្ដីសញ្ញាដ៏ធំ ផ្អែកទៅលើពលិកម្មធួនរបស់ព្រះគ្រីស្ទ ហើយនោះជាហេតុផលដែលយើង លើកដាក់មកលើខ្លួនយើងនូវព្រះនាមរបស់ទ្រង់ ។
ព្រះយេស៊ូវគឺជាព្រះគ្រីស្ទ ជាព្រះរាជបុត្រានៃព្រះដ៏មានព្រះជន្មរស់ ។ នេះគឺជាសាសនាចក្រដែលពិត ហើយសកម្មរបស់ទ្រង់ ។ ទ្រង់ចង់ឲ្យយើងមករកទ្រង់ ធ្វើតាមទ្រង់ ទទួលការលួងលោមពីទ្រង់ ។ រួចទ្រង់ចង់ឲ្យយើង ផ្ដល់ការលួងលោមដល់អ្នកដទៃ ។ សូមឲ្យយើងមានសេចក្ដីជំនឿគ្រប់គ្រាន់ដើម្បី ទទួលយកសេចក្ដីល្អរបស់ព្រះ និងសេចក្តីមេត្តាករុណានៃព្រះរាជបុត្រាបង្កើតតែមួយរបស់ទ្រង់ ។ សូមឲ្យយើងមករកទ្រង់ និងដំណឹងល្អរបស់ទ្រង់ ហើយបានជាសះស្បើយ ។