Beku n te Ekaretia
Te Buteta ibukin te Tia Reirei
E maeka te tia korokaraki i Utah, USA.
Ikunea bwa n na aki anga te ibuobuoki ni bwaai aika bubura ni katoa tai. Te bwai ae uarereke are e kaota te tangira e bon tau.
Tamnei iroun Feng Yu/iStock/Thinkstock
Ngke I tia reirei irouia ataei aika uarereke n te maan ae raka iaon 25 te ririki, I karekei bwaai aika mwaiti aika kamimi mai irouia ataein te reirei. Koroboki aika bubura, korotamnei aika koreaki, ao taibora aika karaoaki n te iango bon bwaintangira aika tataneiai te aba iai. N te ririki ae nako, e ngae ngke, bon te moan tai ae I karekea te buteta.
“Te buteta ibukin te tia reirei,” e taku Emma ma te kakatonga ngke e roko n au taibora, “ibukina bwa akea au aboro.” Bon te buteta ae tau buburana, ireaki raoi ni kaitiakaki, man tamaroa ibukin taian buteta. I karabwa ao I katoka iaon au taibora. I noori matan Emma aika bubura ni buruu n taraia ma te kakatonga ngkana e tataraia n auan te bong.
Imwiin te reirei, ngke I mwakuri n au taibora, I aki toki n rairaki nakon te buteta ma te moangare. Ataei a noori bwai aika bebete, ao ma te buteta ae kabuta, Emma e reireinai te bwai ae e rangi ni kakawaki. I katikua iaon au taibora inanon te wiiki ibukina bwa e riki bwa te kauring nakoiu.
Ngkai te tia reirei ni kakawari ao te titita n au uoote, I tangiria ni buokiia tabeman, ma I tataninga n tainako ibukin te “tai ni karaoa te mwakuri n ibuobuoki” imwain ae I nako n ibuobuoki. Ngkana tao I tabetabe ao n aki kona ni karekea te amwarake ke ngkana I tangiria n anga te uee ae okoro ma I aki kona n roko n te titoa n uee, I mwaninga taekan te bwanaa ae maraara n Tamnei are e wirikiriki ibukin temanna are e kainnanoa au ibuobuoki.
“Nna karaoa te bwai teuana n te wiikente aio, ngkana e reke au tai,” Nna bon bae n tuangai. “Akea ae e kainnanoa au ibuobuoki n te bong aei.”
Ma tera ngkana tao temanna e rangi ni kainnanoai? Ao ngkana tao I aki katinanikua te wirikiri ni kawara te Unimwaane ae uakaan irarikiu ke te kairake n aine ae tibwa mate buuna? I kona n ibuobuoki ke ni beku; riki ma te bwai are I kona n anganiia—te mwakuri n ibuobuoki ae “uarereke”?
I reiakina te reirei ae korakora mai iroun Emma are I kataia ni karaoia. Ngkana akea au aboro, I anga onean mwiina te buteta, ao Ia karaoia ngkai. I aki tataninga bwa nna karaoa te umum ke au remon ae onoti n au bie ae kuriim; I kabooa te bwaoki ni kuuki n onean mwiina. I aki nakon te titoa n uee n tainako, ma I kona n tii maroro n akea te uee. Te kaati are I karaoia ni mweengau e na bon tamaroa, ma ai aron naba ti te tareboon ae tawe. E na aki riki bwa te bwai ae rang bubura te ibuobuoki iai ni katoa tai. Te bwai ae uarereke are e kaota te tangira ae bon tau.
Iai au buteta ni mweengau ngkai, ma I taku bwa Nna bon aki kanna. E riki bwa te tia kauring n tainako n ibuobuoki ngkana I karekea te wirikiriki. I anga are I kona n anga ngkai nakon are I tataninga ni karokoa rimwi. Te buteta ibukin te tia reirei bon te kabanea n tamaroa ni bwaintangira.