Ni Karokoa Ae Ti A Manga Kaitiboaki
N na kanga n Ataia Bwa E A tia ni Kabwarai au Bure te Uea?
Man “Stand Ye in Holy Places,” Ensign, Turai 1973, 122.
Ko na kanga ni kaeka temanna are e roko nakoim n titirakiniko te titiraki anne?
Tabeua te ririki n nako Beretitenti [Marion G.] Romney [1897–1988] ao ngai ti tekateka inanon au aobiti. E uki te mataroa ao te kairake n ataeinimwaane ae tamaroa e rinnako ma taraana ae iai ana kangaanga iaon moana, ao e taku, “Tariu, N na nakon te tembora n au moantai ningabong. I a tia ni karaoi tabeua kaairua n taai aika nako, ao I a tia n nakoia au bitiobi ao au titeiki beretitenti, ao I a tia ni kaotia raoi ni kabane; ao imwiin te tai n rairannano ao te kakoaua bwa I a tia n aki okiri riki kaairua akanne, a tia ni motikia bwa I a tauraoi n nakon te tembora. Ma, tariu, anne e aki tau. I tangiria n ataia ao N na kanga n ataia, bwa e a tia naba ni kabwarai au bure te Uea.”
Tera ae ko na kaeka temanna are e na roko nakoim ma te titiraki anne? Ngke ti iangoia raoi inanon tabeua te tai, ti uringa te Uea Beniamina ma ana kabwarabwara are e kuneaki n ana boki Motiaea. Ikai bon te kurubu n aomata ake ngkai a titiraki ibukin te bwabetito, ao a taku bwa a taraia n tein rabwataia are irouia:
“Ao a tang n takarua n te bwanaa ae ti teuana, ni kangai: Taiaoka nanoangaira, ao kamaiuira n raraan Kristo ni kabwara bure bwa ti aonga ni karekea kabwaran ara bure, ao a na kaitiakaki nanora. …
“… Imwiin are a tia n taekin aikai ao e a roko Tamnein te Uea, ao a onrake n te kimwareirei, ngkai e a reke irouia kamaunaan aia bure, ao n reke naba raun nanoia” (Motiaea 4:2–3).
Bon arei te kaeka.
Ngkana e roko te tai are ngkana ko a tia ni karaoi ni kabane are ko kona n raira nanom n am bure, bwa antai ngkoe, ko mena iaa, ao n tia ni kabooi mwiin ao ni kaokiia nakon arona nakon am kabanea ni konabwai; ngkana te bwai teuana are e na roota arom n te Ekaretia ao ko a tia ni kawari rabwata ake a riai ni kawaraki, imwiina ko na tangira te kaeka ni kamatoa bwa tao te Uea e a tia ke e tuai ni butimwaiko. Inanon tamneim ni kakae, ngkana ko ukoukoria ao ko kunea te rau n nano, man te kanika anne ko kona n ataia bwa te Uea e a tia ni butimwaea am rairannano. Tatan e na anganiko te iango teuana ao n tabetai e na kairoroiko bwa ngkai ko a tia ni karaoa teuana te kaairua, ko kona ni waaki nako ao n akea te karairaki. Anne bon teuana te rongorongo ae e kaairua. Te kakai n te kabwarabure e bon reke nakoia ni kabane ake a rairaki man aia mwakuri aika buakaka ao man aki manga okiri