Te Mwakuri ae Kamimi Aei
Ngkana ko ongo te taeka waakinako, tera te bwai ae ko iangoia? Te kaibuke ae a tauraoi n waakinako? Ira te mwananga ae tamaroa? Moanakin te mwananga?
Ngkana ko “waakinako n ana mwakuri te Atua,” ko a raona te mwananga ae te kabanea ni korakora. Ko buoka te Atua ni kawaekoa ana mwakuri, ao bon te atatai ae tamaroa, ae kakukurei, ao ni kamimi.
Ko na tai tii anai ara taeka ibukina. N te ririki ae nako n te taun ae uarereke i Utah, ataeinimwaane n aia kooram taan reirei a nakon te webutiaite n aia waaki ni kakukurei kairake (lds.org/youth/activities) ni kakaei iango ibukin te waaki ni kakukurei. Temanna ae onoti e katika aia iango: “Itiua te Bong ni Mwakuri.”
A kataia ataeinimwaane aikai ni karaoa te bwai ae bubura riki: a na katauraoa te mwakuri ni katoabong ibukin te wiiki ae bwanin nakon temanna kain te uoote ae bubuti. Ngke a bubuti te ibuobuoki 19 utu, a mimi teutana ataeinimwaane ao tao n rangin n rotaki n te kukurei. A kanga ni karaoa te mwakuri ae rangin ni mwaiti n te tai ae uarereke? Ma a tia ni karaoa te berita, ngaia ae a iangoia bwa a na buokiia aia utu ni kabane.
Inanon tii teuana te wiiki, a tia n anga 250 te aoa ni bootaki ni mwakuri, ni karaoi aekan karikirake aikanne n aron kamwaingan te bwariko ni bwaa, kenakin te mwarua, kaitiakan kawawa, ao ni boboti raoi kaai. Ao e bitia naba ataeinimwaane.
A rangin ni mimi man te korakora ae a namakinna ao kakabwaia aika a karekei. A kabwarabwara te katiteuanaki n te namakin bwa te kooram ao ni karekei ibuobuoki mai ieta ni karaoi mwakuri n te reirei ao tabeua riki aia mwakuri. Ngkai, ngkana a kainnanoa te ibuobuoki aia uoote, te tia reirei n te kooram e kaeka ma te kukurei. A aki tii mwakuri ibukin te wiiki—a kataia ni mwakuri ni katoa bong.
Te mwakuri ao katean abanuean te Atua ni koaua bon te mwakuri ae kamimi. E uota te kukurei nakoia ataeinimwaane aikai, ao e na uota te kimwareirei nakoim ngkana ko tabekia rake tabeman ao n nora maiuia bwa a bitaki man te mwakuri ae itiaki ao ni koaua. N aron are e koroia te beretitentii ni kabuta ibukiia Ataeinaine iaon te iteraniba 48, bon te tai ae kakawaki ni beku ibukin te Atua.
Waakinako ngkai naba n am mwakuri ibukin te Atua “ma nanom, am kantaninga, am iango, ao korakoram ni kabane” (D&C 4:2). Ti tangiria n ata am atatai n te mwakuri n ibuobuoki! Karaoi witeo ao rawea tamnein am mwakuri, anai nakon te tiaite n te aro n reitaki, tibwauai ma am utu ao raoraom, ao imerin nakon liahona@ldschurch.org. Ko kona naba n tuangia tabeman taekaia n aia tiaite kairake n te waaki ni kakukurei. Taiaoka kaoia tabeman bwa a na raoniko n te mwakuri ae kamimi aei, ao n taraia bwa mwaitira ae ti kona ni bita iai te aonaaba.