Bukin Tera E Kakawaki Iesu Kristo inanon Maiu?
Ngkana ti oota ni bwaai ni kabane ake e karaoi te Tia Kamaiu ibukira, E riki bwa te kabanea ni kakawaki n aomata inanon maiura.
N te tai ae e a tibwa nako I wareka te rongorongo n te intanete ike e maroroakinna te tia korokaraki bwa e kanga n iai kakawakin ana mwakuri te Tia Kamaiu inanon maiun neiei ni katoa bong. I kukurei bwa e tauraoi n tibwaua ana namakin, ma I nanokawaki man teuana ana kaeka te tia wareware: “Bon akea kakawakina ni baika a riki inanon maiu—e bon aki riki ao e na bon aki.”
Te tia wareware anne e aki kona ni kairua. N taai tabetai (n te tai ae waekoa ke rimwi riki), ngaira ni kabane ti kainnanoa te Tia Kamaiu. Ti bane ni karaoi kairua ake ti aki kona ni karaoi mwiia, taneiai ni kabane ake ti kabuai ake ti aki kona ni kunei, ao ni kaitara te maraki, bwainikirinaki, kaangaanga, rawawata, ao raraoma ake ti aki kona n taobarai n tii ngaira.
Te rongorongo ae raoiroi bwa ti aki riai n taobarai n tii ngaira.
“Inanon te tai ni mamaara ti bae n tang nako, ‘A na akea ae e ataia bwa aekakira. A na akea ae e ataia.’ Ma natin te Atua e kororaoi ana atatai ao n oota, bwa E a tia n namakina ao n uota rawawatara aika onoti,” e taku Unimwaane David A. Bednar man te Kooram n Abotoro n te Tengaun ma Uoman. “Ao ibukin Ana kabanea n anga karea are kakannato are akea tiana man akea tokina (taraa Aramwa 34:14), E kororaoi ana akoi ao ni kona ni karaababa Baina n nanoanga nakoira.”1
Iesu e kakawaki nakoira ibukina bwa rinanon Ana Mwakuri ni Kamaiu, anga reirei, kantaninga, rau, ao ana katoto, E buokira ni bitii maiura, ni kaitarai kakatai, ao ni waaki nako ma te onimaki ngkai ti mwananga n oki Nakoina ao Tamana.
Iesu E Karaoa te Kona n Rairannano
Teuana bukina ngkai e rang kakawaki iai Iesu nakoia naake a kataia n Iriria ma nanoia ni koaua ibukina bwa ngaira ni kabane ti bane ni kabwaka ao ti kainnanoa te bwaintangira n te rairannano are e karaoaki rinanon te Mwakuri ni Kamaiu.
Ngkana ti tatanako ao ni bwaka, Tatan e tangiria bwa ti na iangoia bwa ti aki tau ni manga waaki nako riki ao n okira te kawai ae eti. E tangirira naba bwa ti na mwaninga are te euangkerio bon “te euangkerio ibukin te rairannano” (D&C 13:1; e kairaki ma katuruturuana). Ma ti ataia bwa “ana akoi Kristo e bon koaua, ni kona ni kabooa te kabwarabure ao kaitiakan te tia bure are e raira nanona.”2
Mwaakan ana Mwakuri ni Kamaiu Iesu Kristo e bon tauraoi nakoira n tatabemanira, ma ti riai n rineia bwa e na mwakuri inanon maiura. Iangoia n anga te bwaintangira ae onoti nakon te rao—te bwai ae rang ni kainnanoia raoraom ao te bwai ae ko katauraoia rinanon am anganano ae onoti. Ngkanne iangoa raoraom ma ana kaeka, “Ko aitau, ma I aki rang tangira am bwaintangira.” E kanga am namakin?
Ngkana ti aki kaoa Iesu ni buokiira n riki bwa ti na itiaki rinanon te rairannano, titebo ngke ti totokoa Ana bwaintituaraoi.
Iesu e Anga Reirei taekan te Koaua
N te tai teuana, imwiin mwaitiia aomata ake a aki kariaia bwa a na rianna riki ma Ngaia, E titirakiniia Abotoro ake Tengaun ma Uoman Iesu, “Ngkami kam kan nako naba?” e kaeka Betero, “Te Uea, ti na nako n antai? E mena i Roum taekan te maiu are aki toki” (Ioane 6:67–68).
Ko kona ni kunei “taeka aika akea tokiia” mairoun te Tia Kamaiu inanon booki aika tabu, n aia anga reirei burabeti aika maiu, ao ana wirikiriki te Tamnei ae Raoiroi. A anga aan te kateitei ibukin te “kukurei n te maiu aei ao te maiu are akea tokina n te aonaaba are e na roko,”3 ao a kamanoira n oki nakon Tamara are i Karawa ao ara Tia Kamaiu.
Baikara tabeua koaua aika kakannato ake e reiakinna te Tia Kamaiu? Beretitenti Dieter F. Uchtdorf, Kauoman ni Kauntira n te Moan Beretitentii, e karinani aua maroro man te maungatabu ni kabuta ae a tibwa nako:
-
“E a tia Tamara n anganiia natina te babaire ni kakukurei ae kakannato.”
-
“Rinanon te Mwakuri ni Kamaiu … , ti kona ni maeka n aki toki ma ara utu aika tangiraki.”
-
“Ti na karekei rabwatara aika mimitong, kororaoi, aki mamate, n aki karawawataki man te aoraki ke te aki toamau.”
-
“Ranninmatara n nanokawaki ao te mate a na oneakimwiia ma te kukurei ao te kimwareirei ae bati.”4
Iesu e Anga te Kantaninga
Ngkana ti kaitara ma kakaewenako, n tabetai ti kunea bwa e kaangaanga onimakinan te Uea. Ma onimakinana e anganiira te kantaninga are ti kainnanoia bwa ti aonga ni katarai kakaewenako.
Anne te bwai ae riki ma kaain ana utu Gatrell, ake a maeka n ana uoote Titita Jean A. Stevens. Titita Stevens, te moan kauntira n te Beretitentii ni kabuta n te Moanrinan, e taku bwa te utu e na tei ni matoatoa n te euangkerio ao nakon aia berita aika tabu n te tembora imwiin kunean te Tari Gatrellrell n te aoraki ae te kaentia. Ni karaoana e anganiia te kantaninga n ana berita te Atua are a na manga ikotaki riki imwiin te maiu aei.
Rinanon boong aika kaangaanga imwaain maten buuna, e taku Titita Gatrell, “I ataia bwa e bon tararuaia raoi te Uea. Ngkana ko onimakina te Uea, ni koauana ko na kona n tokanikai iaon kakaewenako n te maiu.”5
Te bwaintaningra n te Makuri ni Kamaiu e anganiira te kantaninga ibukin te maiu are akea tokina—te bwai are ti rang kainnanoia ngkana ti korakai n taian kaangaanga ke maten temanna ae tanigraki.
“Tamara are i Karawa ae tangira e anganiira ana bwaintangira Natina Ae Tangiraki, Iesu Kristo, bwa ara Tia Kamaiu,” e taku Beretitenti Henry B. Eyring, te Moan Kauntira n te Moan Beretitentii. “Te bwaintangira ane kakannanto anne ao te kakabwaia n ana Mwakuri ni Kamaiu Iesu Kristo e anganiira te bwaibwai ae tabangaki: te berita ibukin te Mangauti ao te kona ni karekea te maiu are akea tokina nakoia ni kabane ake a bungiaki.”6
Iesu e Anga te Rau
Ngkana ko kuba ni kaitara ma te urubwai ae riki man te aonaaba, ae riki man te bwai ae te winnanti ae buakaka, n rinanon bitakin te kakawenako n te maiu, e bua am iraorao, ke n tei ibukin te bwai ae eti, ko ataia bwa ko kainnanoa ana raui te Uea. “Ana rau te Tia Kamaiu,” e taku Unimwaane Neil L. Andersen man te Kooram n Abotoro n te Tengaun ma Uoman, “e kamaraui kaangaanga n te aonaaba.”7
N tain te maungatabu ae e a tibwa nako, Unimwaane Andersen e tibwaua rongorongon te ataeinaine n te kiraati ae te Raurere are e waningareaki ao n aranaki ao ni weteaki n aara nako ibukin teina ni katein te mare. Ni waningareana, e reiakinna, bwa n tabetai bon boon “te etieti nakon te Atua ao aia reirei Ana burabeti aika maiu.”8
Ma te teirake tiaki nanona bwa ko tei n ti ngkoe. Ti kona n rairaki nakon Uean te Raoi n tainako ngkana ti namakina te maroa ke ni karawawataaki, n nanokawaki ke n raraoma, ni maaku ke n akea bonganam. Ti karaoia man:
-
Te tataro nakon te Tama are i Karawa ibukin te Tamnei bwa e na raoniira.
-
Wareka ana taeka te Uea inanon booki aika tabu ao n aron are e kaotaki irouia burabeti aika maiu.
-
Kakawaran te tembora.
-
Kamatebwaian maiun te Tia Kamaiu n te taromauri ao n te tieminari.
-
Kamwakuran Ana Mwakuri ni Kamaiu man rairan nanora man ara bure.
-
Tibwauan ara kakoaua Ibukina.
Ngkana ti namakina ana rau te Tia Kamaiu, a na tai rawawata nanora ke ni maaku (taraa Ioane 14:26–27).
“Bon tii te Tia Reirei ae e atai korakoran ara kaangaanga, marakira, ao korakaira,” e taku Beretitenti Thomas S. Monson. “Bon tii Ngaia ae e anganiira te rau ae akea tokina inanon taai ni kakatai. Bon tii Ngaia ae riingii tamneira aika ikoaki nAna taeka ni karaunano.”9
Iesu e Katea te Katoto
Rinanon Ana tai ni mwakuri, Iesu e aki tii kotea te kawai nakon te kakukurei—E kaira te kawai. Rinanon Ana Mwakuri ni Kamaiu, E kairiira nakon te tangira. Rinanon Ana anga reirei, E kairiira nakon koaua aika akea tokiia. Rinanon maiuna ae kororaoi, E kairiira nakon te kawai n ongotaeka.
“Te kabanea ni kakannato ni katoto are e a tia n nakonako n te aonaaba bon ara Tia Kamaiu, Iesu Kristo. Ana mwakuri n rabwata e kaonrakeaki ma te anga reirei, te beku, ao tangiraia tabeman,” e taku Unimwaane Richard G. Scott man te Kooram n Abotoro n te Tengaun ma Uoman. Te Tia Kamaiu, e reitia, “e kaoira bwa ti na iri Ana katoto aika kororaoi.”10
Ngkana ti oota bwa te Tia Kamaiu e karaoa ae ti na kona ni karaoa te rairannano ao te mangauti, e reirei koaua aika kakawaki, e anga te kantaninga ao te rau, ao ni katea te katoto ae kororaoi, E riki bwa nuukan maiura. Ao raonakira Irouna n aron ae raoraora, ti karekea te ninikoria ni kakeai maakura ao ni waaki nako ma te onimaki.