Tamneina
Otan Bitere
E maeka te tia korokaraki i Washington, USA.
Ti katokai matara iaon kaniwanga aika akea tokiia—ke iaon bwai tabeua?
Kamatata n te tamnei iroun Supansa Wongwiraphab
Tabeua te ririki n nako I mwakuri n te archeological site ae aranaki bwa Aguateca, are e mena ni mwakoron Guatemala ae tamaroa man kakironako ao e ti kona n roko te aba iai ngkana ko toka n te booti are e buti n te karanga ae minomino ae Petexbatún
N te tairiki teuana I oki nako Aguateca ma tabeman taan rabakau iaon kamatebwaiakan kateia kaain rimoa imwiin kabanean tabeua te bong n te tabo ae uakaan. Ngke ti mwananga iaon te booti ni butirake inanon te karaanga, ma rurungaan te moto ae bebete ao tangiia maan mai buki, I raraa iteran te booti, ni kamwengaraoai n te buti ae rau n akea otan namwakaina, te tairiki ae akea aekakina. Ngke ara booti e ira butin airan te karanga, I kataia ni kateimatoa au kantaninga n ira te Itoi ni Meang. N tabetai Itoin Meang e bua ibuakon nuun aroka ake imataniwiin te karanaga, ma e manga oti n tainako n te ai ae uarereke.
N bwakee teuana inanon te karaanga, e manga bua naba taraan te Itoi ni Meang iakuun taubukin aroka. Ngke e bitaki inin te booti nako maiaki, I waekoa ni manga nooria, n namakiina kaanga ai aron te tia borau ni kawai, I kakatonga n rabakau ni bon kona ni kairai. Imwiin tabeua te miniti n tataraia, I a ataia bwa e bure matau: I a tia n aki kona ni kunea te Itoi ni Meang ke te itoi naba teuana. I bon tatara otan te bitere.
Man te tai anne are I ataia bwa mwaitiia “itoi” ake ietau bon otan bitere ake a kiba n aki karongoa n abuen angin te bong. I rang mimi, ranean tebwitabun otan bitere i etan atu a kuri ni bane n titebo ma ranean itoi ake a raroanako ao karakitii, ao bibitakin ao rairakin te booti iaon te karanga e a a tia ni kabebetea ni kamangaoi ake uoua.
“I kanga ni kairua otan bitere aika bingingi ma itoi aika raroanako raneaneaia?” I bon mimi. Te kaeka ae mataata: Bon ti man te taratara. Otan bitere aika taa nako ae bon titebo raoi ma otan itoi e kairiruaaki ma itoi ibukina bwa otan bitere bon ti tabeua ke uoua te miita rietaia i etau ao itoi a bon raroanako riki. Man au taratara, ni kauoua a taraa n rang titebo tarakiia.
N aron otan bitere, kariri ao kataaki a tara n rang ni bubura ibukina bwa a kaan riki nakoira. E ngae n anne, ao kakabwaia ake a taekinaki n te berita, n aroia itoi, a kona ni kaoti n rang raroa.
Matakiira n te maiu n tamnei a kona ni mwaiti mwiina. Raroan kaotin te kaniwanga, korakoran riki kataakira are ti iangoia bwa ti na taotaona ara bong n rairannanora ao ni kona n oki nakon Tamara are i Karawa ni karekei ara bwai ake akea tokiia (tara Aramwa 34:33–34). Ti kona ni bae n nanououa n te kaniwanga ae akea tokina ke ni baireia bwa e kaunga riki ae ko bon ira nanom ni kakukureiko n te aro n aomata ngkai nakon are n tataningai kakabwaia ake a na kona n roko rimwi riki. Ti kona ni maaka nakobuakan, maiuakinan te inimaki ni kaitaraan te bure ke karakon te onimaki are ara Tia Kamaiu e na buokiira ni kona ni kaitara ana kariiri Tatan.
Ti bane ni kabuai ara taratara ae akea tokiia n tainako; te kakaewenako bon karekeana n te tai ae waekoa. E ngae ngke te aonaaba e kona n anga ae kantara, kaniwanga aika kewe, ti kona n tararake nakon Iesu Kristo ngkai ti borau ni bwakekeen ao minominon te maiu ao n onimaki bwa “bon te tia kabo aia onimaki akana kakorakoraia n ukoukoria” (Ebera 11:6).
E a bon maan te ririki n nako ngke I toka iaon te booti iaon te karaanga, ma bon ngkai naba I tei ngkana I kaitara ma te kariri ao I kauringai, “Bon tii otan te bitere.”