N Anga te Bwaintangira ae te Kabanea n Tamaroa
E maeka te tia korokaraki i Texas, USA.
I angan raoraou te kabanea n tamaroa ni bwaintangira n ana koro n ririki are e a karekea.
Kamatata n te korotamnei iroun Taia Morley
Ngke e koro 13 au ririki ni maiu, te burabeti e bubutiia membwa n te Ekaretia bwa a na wareka ana Boki Moomon inanon nimaua namwakaina, imwaain banen te ririki anne, ao kakabwaia ake a tia ni beritanaki ibukin karaoana. N te bong teuana ngke I tabe ni wareka ana Boki Moomon iaon te bwati, te ataeinaine ae arana Cynthia e tekateka irarikiu ao n titiraki bwa terana te boki aei. I taekinna bwa bon ana Boki Moomon bon te boki ae rang n onoti. I taekinna bwa I tangiria ni warekia imwaain banen te ririki n te aro bwa I aonga ni karekei kakabwaia.
E a moanna n tabeki titiraki aika bati, ao I tuangnga bwa e kona ni kawarai n au auti n te aro bwa ti aonga ni maroroakina taekana. E butimwaea au kakao, ao ti kabanei tabeua aoa tabebong te bong imwiina ni maroroakina taekan ana Boki Moomon ao te Ekaretia.
Te Moanibong are imwiina, I kaoa neiei nakon te bootaki n utu n te tairiki, ike I kabwarabwara nakoia mitinare. A moanna n anga reirei nakoina, ao e a moanna n roroko n taromauri ao nakon aia bootaki ni kakukurei kairake ao tabeua boowin te Ekaretia.
E baireia bwa e tangiria ni kan bwabetitoaki, ao ma aia kariaia ana karo, e a bwabetitoaki n ana koro n ririki n te ririki anne. E taku bwa bon te kabanea n tamaroa ni bwaintangira are e a tia ni karekea. Tinana ma tarina ao mwaanena a ira te bwabetito. E bubutiai bwa N na anenea “Tamnein te Atua” (Kuna n Taromauri, nambwa 2), ao e bubutia tamau bwa e na karaoa te bwabetito. Imwiin aerakena man te ran, ti irabwati ao n tang. N na bon aki mwanuokina te bong anne ibukina bwa I namakina te kukurei ae moan te kamimii.
Te ririki are imwiina a mwaing nako au utu. E bon kaangaanga ibukina Ngai ma Cynthia ti a riki bwa raao aika tamaroa ao taari aine inanon te euangkerio.
E ngae ngke ti aikoa manga uaia ni maeka ni kaan, ti teimatoa n riki bwa raao aika nakoraoi. Ti mamaroro n angin te tai iaon te tareboon, ao n te tai ae e a tibwa nako e tareboon n tuangai bwa tinana e tabe n ongongora n aia reirei mitinare. Aei are e a anganai te kukurei ibukina bwa mai imwaain anne tinana e aki tangiria ni kan ongora n te reirei. E tuangai Cynthia bwa n te taina n ana kantaninga e na nako n taromauri ma ana utu ae bwanin. E karabwaai ibukin kairakina nakon te Ekaretia.