I Kona Ni Kaotia?

Te Ara e tauaki

Ngke I tekateka ni kaitaraia kain te beretititentii n te titeiki, e moanna ni bukibuki buroou. I namakina te nako n nano ngkai e a tia te kiraaka n te titeiki n tareboniai ni kabaea au tai (ni kaitibo ma kain te beretitentii n te titeiki). A na ataia kain te titeiki beritenti ae I aki tau ni beku?

I a tia n ingoia bwa tabeua buure a na bebete riki kaetakiia imatan te Atua nakon ae ko na kaoti ikai iaon te aba, n iangoia bwa e na babakanikawai ni kaoti bwaai aika e na uoti karawawata ke te aki mweraoi nakon kainabau. E raoiroi riki ae N na tokanikai iaoia ao ni maeka ma te kaangaanga anne. Tii te kaangaanga bwa I aki kona n tokanikai iaoia n tii ngai.

I tekateka ikekei ngke te kauntira n te beretitentii n te titeiki e kanakoa te wewete. E titiraki, “Tariu, ko butimwaea te wewete aei?” I tangiria n takarua te reke, “Eng!” Irarikina, n aki iango, I ongo au taeka ae kangai, “I aki kona; I tangiria ni kaitiaki tabeua au bure.”

I kaonaki ma te ingainga n nano ao te kamaiuaki ngke I kaota aron rikin te bure. E titirakinai ngkana I a tia n taetae ma au bitiobi. “I tuai.” Kainabau? “I tuai.” E kamauri ma ngai, e matangare, ao e tuangai bwa e rangin ni kamoamoai ibukin kaotakina, ao e tuangai bwa N na taetae ma au bitiobi ao kainabau.

I kariaia, ao I tuanga moa kainabau—e kakea maku ae moan te korakora. E teimatoa n tangirai! Eng, e bon un, ma ti riai ni kaitiaki bwaai tabeua, ma e tangirai ao e kaungaai bwa N na kawara te bitiobi.

Ngke I nako ni kawara te bitiobi, e waekoa ni butimwaeai nakon ana aobiti. Ma te kaangaanga, I kataia ni kabwarabwara bwa bukin tera ngkai I kawaria. Imwiin karabakin au bure n te tai ae maan, I aki ataia bwa N na kanga ni kabwarabwara au bure nakoina. E kaungaai ma te tangira bwa N na kona ni kaoti au kairua ni kabane. I kabwarabwara aron rikin au bure ao n tuanga bwa e na anganai au tai ni koroi ni kabane au bure. E waekoa ni kariaia.

I teimatoa n tuai kaoti ni kabane au bure, ma I namakina te rawawata ae korakora ae tabekaki nako mai iaou. I namakina naba te kantaninga ae N na kainaomataki, n tokina, man te rawawata aei.

I kabanei wiiki ake imwiina n tataro, wareki booki aika tabu, ao ni koroi mwiin au bure ni kaoti nakon te bitiobi ao Tamau are i Karawa. Te moan I uota mwiin au bure nakon te Tama are i Karawa, ma te nano ae uruaki ao te tamnei ae raraoma, ni kaotia nakoina bwa I kabwara au bure ao ni kani karaoa te bitaki ae koaua. I karrekea au tai riki ma te bitiobi n tibwauai au bure ni kabane. E aki urarake, n takarua, ke ni kanakoai; irarikina, e koonai. E kaota ana tangira ao ana tangira te Uea, ma n tuangai bwa I a mena ngkai ni kawain te rairannano ni koaua. I ataia bwa e koaua.

Kaotakin au bure, are e a tia n riki bwa makuu ae moan te korakora, e riki bwa teuana te kabanea n atatai ae moan te tamaroa ni maiu. Bon te moan kawai ibukiu n ataakin raoi koauan te bwaintangira ao mwakan ana Mwakuri ni Kamaiu Iesu Kristo.