Te Tataro iaon te Bwati
E maeka te tia korokaraki i Mexico
Sofía e a bon kaaniia waniua ana ririki. E a bon tauraoi nakon te bwabetitoaki. E bon reiakini bwaai aika bati aika kakawaki. Teuana te bwai ae e a tia n reiakinna bon te tataro. E ataia bwa e kona n tataro nakon te Tama are i Karawa n te tai are e tangiria. E ataia bwa e kona n tataro n te tabo are e tangiria.
N te bong teuana Sofía ao tinana a baireia bwa a na kawara tamana n ana mwakuri. E na maan te mwananga. Tamana e mwakuri n te kaawa teuana. A na mwananga iaon te bati, imwiina n te turaki imwiina n te taekiti.
Inanon aia tai ni mwananga n te bwati, e a matu Sofía. E a uti ngke e ongo tangin te ataei. Te tina ao te karo ma te ataei ae uarereke a toka iaon te bwati. E bon aoraki te ataei ao e tang n takarua. Ana karo te ataei a tara n raraoma.
Sofía e nanokawaki ibukin te ataei. E nanokawaki naba ibukiia kaaro. Ngkanne e a reke ana iango. E wirikiriki inanon taningan tinana. “I kona n atonga te tataro ao ni butiia te Tama are i Karawa bwa e na kakabwaia te ataei?”
“Eng,” e taetae Tinana ma te moangare.
E kabaraaka atuna Sofia ao n atonga ana tataro inanona ae aki karongoa. E tataro mwaaka. E butiia te Tama are i Karawa bwa e na kakabwaia te teei. E butiia bwa e na buoka te teei n rikirake ni marurung ao n toki tangina.
Sofía e ataia bwa ti na aki n taainako ni karekea te bwai are ti tataro ibukina. E ataia naba bwa ara tataro a na aki n taainako ni kaekaaki naba n te tai arei. Ma n te tai ae kimototo e a rau te teei. Ngkanne e a toki tangin te teei. E a taraa ni marurung riki. Ana karo a aikoa taraa n raraoma.
Sofía e namakina te abuee ao ni kukurei inanona. E a kukurei ibukin te teei—ao ibukin ana karo te teei. E ataia bwa te Tama are i Karawa e a tia n ongo ana tataro.