Ko Tangiri Tabeua Uee?
Cindy Almaraz Anthony, Utah, USA
I namakina te Tamnei ae Raoiroi ni waekoa n tuangai bwa te aine e kainnanoi uee riki nakoiu.
Teuana te bong imwiin te kaibibiti ae matoatoa n aia tiekition ataei n te onaoraki, I kua ao ni kakai un. Ngke I nakon ana taibora te tikiuriti, I noori tabeua uee aika tikiraoi. Ngke I kamoamoai tikiraoia ao boiararaia nakon te aomata are iaon te taibora, e tuangai bwa I kona n anai.
I rangin ni kukurei! I taku n au iango bwa e tangirai te Tama are i Karawa bwa N na anai uee ni kanakoraoa au bong.
Ngke I nakonako nako tinanikun te onaoraki, I kunea bwa I nakonako ibukin te aine ma ana kaintekateka ae kokokaki. I moanna n aki kona n tataningaia ma n tokina ao I a kona n rirarikina ngke ti a otinako man te auti. Ngke I rirarikina, e tabeka atuna ao e taku, “O, ai tikiraoira uee aikanne.” I karabwa ao ni kawaekoa nakon kainabau, are e tataninga n ara ka. E ingainga nanou ni kan kaoti nakoina au uee.
N te tai ae waekoa I namakina te Tamnei ae Raoiroi n tuangai bwa e kainnanoa riki te uee te aine nakoiu. I aki kukurei n anganna, ma I ira te wirikiriki. Ngke I titirakinna bwa e tangiri, au kantaninga bwa e na atonga iaki.
“O, eng!” e kaeka. “I tangiri. A rangin n tikiraoi.”
I anganna, ma ngke I rairaki bwa N nang nako, e a moanna n tang. Ngke I titirakinna ngkana iai ana kaangaanga, e tuangai bwa e a tia ni mate kainabana tabeua te ririki n nako ao e a raka iaon teuana te ririki ao a tuai man kawaria natina. E taekinna bwa e a tia n tang nakon te Atua bwa e na kaota nakoina kanikinaean Ana tangira.
“Bon ngkoe te anera ae ko kanakomaiakaki mairoun te Atua n anganai uee aika mamaten nanou,” e taku. “Ngkai I ataia bwa E tangirai.”
E uruaki nanou. I a tia n rangin n tauti. Te aine aei e tangira te taeka ae tangira, ao I aki tangiria n taetae nakoina. Bon ti ngai te anera. Ngke ti a maenako, I moanna naba n tang.
Ngke I a roko n te kaa, e titiraki kainabau bwa tera ae riki ao bukin tera I a tia n anganako au uee. E taraa n aki ota n te bwai ae riki ma imwiina e rau nanona ngke I karaki nakoina.
“I kanakoi nakoim uee n te bong aei. I namakinna bwa ko kainnanoi,” e taku. “I raraoma bwa ko a tia n anganako. Ngkana tiaki aikanne uee aika I kanakoi nakoim, anga uee ake I ootan ibukim?”
E kunea bwa te titoa n uee e mwaninga n nikiri taian rooti, ngaia ae ti a buti nakon te titoa. E otinako kainabau ao e aki maan ngke e a oki ma bwariko ni uee aika tikiraoi.
I aki kona n taotaona nanou ngaia ae I a manga tang riki. E a tia Tamau are i Karawa n tuangai bwa N anganako uee aikanne, n ataia bwa iai bwaai aika tamaroa riki aika a tataninga ibukiu ao Natina ae maroa e tangira te kauring naba ibukin Ana tangira.