Te Bwai ni Buaka ae Raba
E maeka te tia korokaraki i Arizona, USA.
Aomata n tatabemaniia nako a tia ni kakea bonganan Ivy bwa tera ae kona ni karaoia.
“Iai tabeua bwaai ake a kona n anga aomata ni kabane” (Aia Boki n Anene Ataei, 236).
“Tiaki Ivy! Bon ngaia te ataeinaine,” E wirikiriki Braden iakun Adam.
Ma Adam bon kaabenin te tiim ibukin te taotibooro n te bong anne, ao e a tia ni karaoia ana rinerine. “I anaa Ivy,” e kaokia ni kabaibaiti riki teutana. Tyler, te kaaben n te tiim are teuana, e kaota moana ae e aki kukurei. N aiaron naba Kouti Garcia e bon taraa ni mimi n ana kauoua n rinerine Adam.
Ivy e taraa ni miimi naba ao imwiina ao e keerake n nako mooa ma te mamaa e. E ikerake Braden ma te aki kukurei.
Ivy bon tiaki tii te ataeinaine. Ngaia te kabanea ni uarereke n te kiraati. E taraa n aki biri mwaaka, ao te booro e taraa ni bubura riki nakoina. “E na bon aki kona n tabeka te booro,” e taku Braden ngke e a rinnako Ivy.
“Tao e na riki bwa ara bwai ni buaka ae raba,” e taku Adam, e kataia n te bwanaa ae koaua. Ma anne tiaki bukina ngkai e rinea neiei. Ivy e a tia n tuanga Adam n te taina bwa e aki tangiria ngkana a tatakaro ibukina bwa e bon ririneaki n te kabane. Ataeinimwaane ake tabeman a kaenaena, ma Mom ao Dad a tia n tuanga Adam bwa ataeinimwaane a riai ni kaota te karinerine nakoia ataeinaine. Ai ngaia are e a rinea Ivy. Ngke e matakuakina Tyler n rinea te kabanea ni bubura n ataeinimwaane n te kiraati, Adam e kantaningaia bwa e a tia ni karaoa te babaire ae eti.
Imwiin are a bane n reke aia tiim, e katanga te biira Kouti Garcia, ao tiim a biri nako tabon te marae ake a kaitara. Kouti Garcia e angan Tyler te booro, ao Tyler e taraa ana tiim Adam imwaain are e katurua ana taratara iaon Ivy. E katika baina rikaaki ao e kakiba ni kanakoa te booro.
Bam! E bwaka te booro iaontano ao n tebetebe n akea temanna ae teke iai. E aki kakoaua te baere e nooria Adam. E a bon tibwa mwaing Ivy n te tai anne. Ni kabane ake a mena irarikina a taraa ni mimii, ma e tii moangare Adam. Tao rinean Ivy e a tia n riki bwa te iango ae tamaroa n aki kantaningaki.
Ewaaki nako te takakaro. Tyler e teimatoa ni kataia ni katekea Ivy ma te booro, ma e teimatoa ni katua ao ni kiba n aki teke. Akea ae kona ni katekea ma te booro. Tyler ao tabeman kaain ana tiim a rangi n tabe ni kataia ni kaotinakoa Ivy are aikoa kabanea aia tai ni kareia riki tabeman. Adam e wingare—abwakin Ivye e karaoiani katamaroa riki ni katuaan te booro ibukin uarerekena ao waekoana e karaoia bwa e na kangaanga iai tetekena.
N te kabanea ana tiim Adam a moanna n te takakaro. “Te bwaini buaka ae raba e bon koaua,” e taku Braden. “Ivy e rangi n tamaroa.”
“Eng,” e taku Tyler. “Te tai are imwiina e na toka n au tiim. Ti na bon n tokanikai ni koaua!” E wiingare Ivy ngke e rianna n oki nakon ana kiraati, n otabwaniniaki irouia kaain ana tiim.
Adam e aki kona ni katoka moangarena ngke e ririmwiia ana kurubu. E a tia ni karaoa ae tamaroa nakon Ivy, ao e a tia ni buokiia ataeinimwaane ake tabeman ni karineia ataeinaine riki teutana. Te kabanea ni korakora ni bwainibuaka ae raba ai tiaki te te bwai ae raba riki—bon tii te riki n akoi.