Aekakiia Taan Reirei Raa Ngkami?
Ngkana ti bon kan riki raoi n ai aron te Tia Kamaiu, ti riai n reirei arona ngke E angareirei.
Tad R. Callister, beretitenti (nuka); John S. Tanner, moan kauntira (maing); ao Devin G. Durrant, kauoman ni kauntira (atai)
Te Uea are mangauti e a kaan bane Ana mwakuri ni mitinare i Amerika. E aki maan imwain anne, E a tia n ruo mai karawa, n uota te ota ni kanakoa te roo are e kaona abaia Nibwaite ao Reimwanaite imwiin matena. E a tia n reirei ao ni kakoaua ao n tataro. E a tia ni kakabwaia, kaekai titiraki, ao ni katea Ana Ekaretia. Ngkai, ngkai E katauraoi ni kitaniia Ana reirei, E anganiia tibwangaia are e na ria n tia ni kaoniia ma te aki nanokokoraki:
“E koaua, e koaua, ae I tuangkami, aio bon au euangkerio; ao kam atai bwaai ake kam riai ni karaoi inanon au ekaretia …
“… Ngaia are aekan aomata raa ngkami? E koaua ae I tuangkami, kam na riki n ai arou” (3 Nibwaai 7:21, 27).
Iesu e kaoira bwa ti na riki n ai Arona, ao teuana arona ae korakora bon Ana konabwai n angareirei. Bon ngaia te Mwatita n Tia Reirei. N riki n ai arona ti riai naba ni kona riki n tangira ao riki bwa taan reirei aika a bitii maiu, tiaki tii n te ekaretia ma inanon naba mweengara. N riki n ai Arona e na reke inanora te nano ae korakora n reirei n arona n angareirei.
Titiraki ao Kakao
Nibwaite ake Teniman, iroun Gary L. Kapp
Iesu e reirei n tabetai rinanon titiraki ao kakao. Iangoa te katoto man te tai are E kabanea ma Ana reirei iaon aban Amerika. N te taina ngke a tataro, te Tia Kamaiu e kaoti nakoia ao e titiraki te titiraki ae kaukuki n te kakao: “Tera ae kam tangiria bwa Nna angani ngkami?” (3 Nibwaai 27:21). Ana tera am kaeka ngkana e titirakiniko te Tia Kamaiu te titiraki aei?
A kaeka ana reirei: “Te Uea, ti tangiria bwa ko na tuangira te ara are ti na arana iai te ekaretia aio; bwa bon iai te itabaraaraa ibuakoia aomata ni kaineti ma te bwai aio” (3 Nibwaai 27:3).
Kristo e kaekai aia titiraki n teuana are bon mai irouna: “A tuai ni wareki koroboki aika a tabu, are e taku bwa kam na katoka ia aomi aran Kristo, are bon arau?” (3 Nibwaai 10:5). Te titiraki aei e kauringiia naake a reiakina arona bwa a riai ni kona ni kaekai oin aia titiraki ao kaeka nakon titiraki aika mwaiti a kona n reke inanon koroboki aika a tabu.
Imwina E kainiin ni kauringiia ana reirei kakaawakin Arana. Ana taeka e kaoiia bwa a na mwakuriia ao e berita nakoia kakabwaia: “Ao ane e katoka iaona arau, man teimatoa n uaa te toki, ao e na bon kamaiuaki n te kabanea ni bong” (3 Nibwaai 27:6).
Banna ni Katoto n Angareirei
Inanon kibu aika kimototo aikai, Iesu Kristo e anganiira te banna n angareirei mai karawa. E waaki ma te titiraki are e kaira te iango are e karaoaki bwa e na atai kainnanoia naake E reireiniia. Imwiina e tataninga ao e kakauongo nakon aia kaeka.
Imwiin aia kaeka naake E reireiniia, E buokiia ni kakaea te bwai are a ukoukoria ibukin kairakiia nakon koroboki aika a tabu.
N tokina, E kanakoi uoua taian kakao ao e berita bwa iai kakabwaia aika tamaroa nakoia ake a tauraoi nanoia ni karaoa Ana kakao. Aron ana angareirei Kristo n te tai aei e kona ni kakimototoaki inanon reirei aika nimaua aikai:
1. Anga titiraki aika nakoraoi.
E titiraki te Tia Kamaiu, “Tera ae Nna angani ngkami?” Te titiraki aei e kaoi kaeka aika kakaokoro. Ngkai ti kanakoi aekakin titiraki aikai, ti buokiia naake ti reiakiniia ni kamatataia bwa tera are a tangiria nikan reiakinna, ao ti buokiia bwa a na kabotoi aia iango iaon bwaai akanne aika kakawaki riki; ti buokia bwa ana kaoti aia iango ni kanakoraoa te reirei.
2. Ongora nakoia naake ko reiakiniia.
Iesu Kristo e ongora ngke a taku, “Te Uea, ti tangiria bwa ko na tuangira te ara are ti na arana iai te ekaretia aio.” Man te kakauongo raoi, ti na tauraoi riki ni kabanei ara iango iaon kainnanoia naake ti reiakiniia.
3. Kabonganai koroboki aika tabu.
Kristo e kauringiia Ana reirei, “A tuai ni wareki koroboki aika tabu, are e taku bwa kam na katoka i aomi aran Kristo, are bon arau? E riai te tia reirei ao te tia reiakinaki bwa a na kabanea aia tai ni koroboki aika tabu ni katauraoi ibukin te reirei. Kamatebwaian koroboki aika tabu bon mwakoron kiingin te katauraoi n te maiu n tamnei ibukiia taan reirei ao taan reireinaki.
4. Kaoia naake ko reiakiniia bwa a na mwakuri.
Te Uea e kaoia Ana reirei bwa a na (1) katoka Arana iaoia ao n (2) teimatoa n ua te toki. Tataekina Au Euangkerio e taku, “E burenibwai, ngkana tao, kam na taetae nakoia aomata ke n reireiniia n aki kanakoa te kakao ni karaoan te bwai teuana are e na kakorakora aia onimaki iroun Kristo.”1 Aio te reirei ae tamaroa are tiaki ti nakoia mitinare ma ni kabane taan reirei n te euangkerio.
5. Kauringiia naake ko reireiniia berita n te ongotaeka ake a beritanaki.
Kabaneana, Iesu Kristo e berita nakoia naake E reireiniia bwa naake a mwakuriia Ana kakao “a na kamaiuaki n te kabanea ni bong” Kristo e berita n tainako nakoia Ana rinerine n kakabwaia ibukin ara ongotaeka (tara D&C 14:7). Ti kona naba ni karaoa aron aio, ngkai ngaira taan reiei n Ana euangkerio.
Te katooto are I eta e kamatatai tabeua kakawakin aron wakinan te reirei ake a kabonganaki iroun te Tia Kamaiu. N reitia, n tabetai E reirei man taeka ni kaikonaki ke kabotau. N tainako E kakaewenako ao e bon kaitara boaia naba Ana kairiribai. Ma n tainako e reirei ma te tangira, bon nakoia naba naake a kaitara (tara Kaotioti 3:19).
Tangiriia ake ko reireiniia
Lovest Thou Me More Than These? iroun David Lindsley
Ngaira naba ti riai n tainako n reirei ma te tangira ao te tangira ae itiaki ngkana ti kan reirei n ana kawai te Tia Kamaiu. Te tangira e kauka nanon te tia reirei ao aroia naba naake a na reireinaki, ngaia are “ni kauaitera [a kona] n reireiaki ao ni uaia ni kukurei” (D&C 50:22).
Te katoto ae matata n ana tangira te Tia Kamaiu ibukiia Naake e reireiniia a kona n reke n 3 Nibwaai are E tataro ibukiia, tang ma ngaia, ao ni kakabwaia aomata. Ngke E tataro nakon Tamana ibukiia, taian Nibwaite a namakina Ana tangira: “Ao ake ae kona n iangoa te kimwareirei are e kaona tamneira n te tai are ti ongo iai bwa e tataro ibukira nakon te Tama” (3 Nibwaai 7:17).
E tang ma te kukurei ibukiia ao e kakabwaiaia ibukin aia onimaki, ibukina bwa e rangin ni korakora Ana tangira ibukiia:
“Kam na kakabwaiaki ibukin ami onimaki. Ao ngkanne nooria, bwa e a bwanin kimwareireiu.
“Ao ngke e a tia n taekin taeka aikai, e tang” (3 Nibwaai 17:20–21).
Te tangira ae korakora e karekea te reirei ae korakora. E koreaki ni koroboki aika a tabu bwa “moamoana e moangare nakoia, ao a kaukaki nanoia ao a bon ota inanoia” (3 Nibwaai 19:25, 33).
Kaungaia Naake ko Reiakiniia bwa Ana Kakoaua
Te Tia Kamaiu e anganiianaba naake E reiakiniia aia tai n tibwaua aia koaua. “Ao Iesu, ngke E nako n aba ake i rarikin Kaitareia i Biribi, ao E titirakiniia ana reirei ni kangai, A taku aomata ba antai Natin te Aomata?
“Ao a taku, Temwangina a taku Ioane are te tia Babetito Ngkoe: ao temangina ba Eria, ao temangina ba Ieremia, ke te burabeti temanna.
“E taku nakoia, Ao ngkami kam taku bwa antai Ngai?
“Ao e kaeka Timoni Betero ni kangai, Bon te Kristo Ngkoe, are Natin te Atua are maiu” (Mataio 16:13–16).
Imwiina ngke e tia ni kaota ana koaua Betero, Kristo e taekin kakabwaia aika rianako nakoina.
“Koa kabaia Timon, ae natin Iona: ba e aki kaota aei nakoim te iriko ma te rara, ma E kaotia Tamau are i karawa
“Ao I taku nako im, ba Betero ae te atibu ngkoe, ao N na katea au ekaretia i aon te b’a aei; ao a bon aki kataea ana kai mataroani neia tamneia maate.
“N na anganiko kingin uean te Atua: ao ane ko kabaea i aonaaba ao e a manga kabaeaki naba i karawa: ao ane e kabwara i aonnaba ao e a manga kabaraki naba i karawa” (Mattaio 16:13, 16–19).
Ni kataia n riki bwa taan reirei, ngaia naba ti na titirakiniira n tainako titiraki ake a na waekoa naake ti reireiniia n tibwa aia koaua, rinanon te bwai ae a taekinna ao te bwai ae a namakinna. Ti na kaoia naake ti reireiniia bwa a na ukoukora oin aia koaua-kateitei iaon namakinana inanon maiuia ni katoa bong. Imwiina, ngkana te tabo n te umwanreirei ke te mweenga e kariaia tabeman bwa ana namakina te Tamnei, naake a reirei a na mwengaraoi n tibwa aia namakin n te maiu n tamnei ao aia koaua imarenaia.
Maiuakina Are Ko Reireia
Iesu Kristo e kairiia tabeman ni karaoi bwaai ake E karaoi (tara 3 Nibwaai 27:21)—n iriiria (tara Mataio 4:19). E maiuakina te bwai are E reirei, ai ngaia are E reirei man te katoto.
E reireia taekan te ibuobuoki man ana ibuobuoki. Tera te reirei aei tao bon ti nakoia Ana reirei ngke E teboki waeia! “Ao ngkai I teboki waemi, ngai ae ami Uea ao ami tia Reirei, ao e riai bwa kam na teboteboki naba waemi.
“Bwa I anganingkami te bwai ni kakairi, bwa kam na katotonga ae I karaoia nakoimi” (Ioane 13:13–15).
E reireia taekan te tangira man bwainakin te tangira. “I anganingkami te tua nabangkai, bwa kam na itangitangiri; n ai arou ngke I tangiringkami, bwa kam na itangitangiri naba” (Ioane 13:34).
E reirei aron te tataro man ana tataro. Imwiin karaoakin taian tataro ae rang kaan man rang kakateke a bon aki kona n tauaki mwiia, E taku, “Ao n aron are I a tia n tataro ibuakomi ao kam na manga tataro n au ekaretia. … Nooria Ngai te oota; Ia tia ni katea te banna ni katoto ibukimi” (3 Nibwaai 18:16).
Iesu Krito e a tia ni katauraoa te baeten ibukiia taan reirei ni kabane n te euangkerio ake iai nanoia ni kan reirei n Ana kawai. Ngkai e bon aki kororaoi, ti kona ni kataia ni mwakuri korakora ni maiuakina te bwai are ti angareirei iai. N taekana teuana ni kunaia ataei, taan reirei a riai ni kona ni kangai, “Karaoa ae I karaoia, irirai, irirai!”2
Reirei n ana Kawai te Tia Kamaiu
Ni kabane taan reirei n te euangkerio a kaoaki bwa a na karekei onoua boton reirei aikai, ake a kaota aron te Tia Kamaiu n reirei:
1. Tangiriia ake ko reireiniia.
-
Ukoukora temanna.
-
Katuua am iango iaon kainnanoia naake ko reireiniia.
2. Katauraoiko n te maiu n tamnei.
-
Maiuakina are ko reireia
-
Atai bwaai n angareirei aika tauraoi.
3. Reirei ma te Tamnei.
-
Buokiia naake ko reireiniia bwa a na kina te Tamnei.
-
Riki bwa te tia reirei ae butimwaea reireiana.
-
Karekea te tabo n reirei.
4. Bootaki n Reiakina te euangkerio.
-
Katei kantaninga aika rietata.
-
Kaungaia naake ko reireiniia bwa a na kakoaua.
-
Anga titiraki aika nakoraoi.
-
Ongora nakoia naake ko reireiniia.
5. Reireia te tua.
-
Kabonganai booki aika a tabu.
-
Kabonganai karaki ao katoto.
-
Kakabwaia aika a taekinaki n te berita ao kakoaua.
6. Kaoia naake ko reireiniia bwa a na mwakuri.
-
Buokiia naake ko reiakiniia bwa a na kataneiai.
-
Ruamwiin taian kakao.
Ngkai ti kairii reirei aikai, ti na riki bwa taan reirei aika tamaroa riki, taan reiakinna aika tamaroa riki, kaaro aika tamaroa riki, ao ana reirei Iesu Kristo aika tamaroa riki. Bwa e a tia n tuangiira bwa ti na “reirei imarenara” ma te kakaonimaki, “n te aro are ni kabane a na bane ni kaitiakaki.” (D&C 88:77, 78, 122). A bia naake ti reireiniia noora are mai iroun te Mwatita n Tia Reirei ao n reke te namakin are aki ti anganaki rongorongo, ma e bitiia naba.