Taetae ni Burabeti ao Kakabwaia n te Tembora
Iroun Unimwaane Koichi Aoyagi
Man te Itingaun
I kakoaua bwa ngkana ti tataro ibukin kairakira, n iriria burabeti aika maiu, ao ni karika te tembora bwa te moan bwai ni maiura, Tamara are i Karawa e na kairira ao e kakabwaiaira.
Ngke te ataeinimwaane ngai, Unimwaane Spencer W. Kimball (1895–1985), te membwa n te tai anne n aia Kooram Abotoro ake te Tengaun ma Uoman, e nako Tiabaan ao n taetae n te maungatabu are I iria. I teimatoa n uringa ana reirei: “A riai n nako kairake ni mitinare, ao ni mare n te tembora.”
I namakina ana kairi te Tamnei ae Raoiroi ao n iangoia bwa N na nako ni mitinare ao ni mare n te tembora, e ngae ngke e tuai n reke ana tembora Tiabaan.
N te tai anne, bon te 19 au ririki ni maiu n au kauoua n ririki n au reirei n te iuniwetiri. Au karo, aika tiaki Aika Itiaki ni Boong Aika Kaitira, a matoatoa n totokoa au iango ni kan nako ni mitinare. N tainako ao I tataro bwa a na anganai aia kariaia ao aia kakabwaia. Onoua te namwakaina imwiina e kaeka au tataro te Uea.
“Iai ara kaangaanga n te mwane, ao ti aki kona ni kabwaka room n te reirei ao boon maium,” a tuangai au karo. “Man te tai aei ao ko na maiu i bon iroum. Ti aki tabe ngkana ko nako ke ko aki nako ni mitinare!”
I karekea aia kakabwaia au karo, ngaia are I a katoka te reirei, I ibuobuoki n ana mition ni kateitei te Ekaretia, ao ni moana kakaean au mwakuri ni kareke mwane ibukin au mwakuri n tataekina te euangkerio. Man ana ibuobuoki te Uea, I kunei teniua mwakuri! Ni katoa bong ma ti te Tabati ibukin te ririki are imwiina, I tibwatibwai nutibeeba man 3:00 n te moanibong nakon 7:00 n te bwakantaai, I kaitiaki taian kateitei man 9:00 n te moaningabong nakon 4:00 n te bwakantaai, ao ni mwakuri bwa te tia kuka man 5:00 n te bwakantaai nakon 7:30 n te tairiki. Imwiina I oneai n au kunikai ao ni mwakuri n te tairiki bwa te mitinare n te mwakoro.
Ngke 22 au ririki, I weteaki bwa N na nakon te Northern Far East Mition. Rinanon au mwakuri n ibuobuoki I namakina te kimwareirei ae I tuai n namakinna, e reke au tai n ata ana tangira te Atua, ao ni karekei kakabwaia aika mwaiti. A kakabwaiakaki au karo n au mwakuri n ibuobuoki ngke a buokaki man aia kaangaanga n te mwane.
Irirakin te Burabeti
Ngke e a bane au mitinare, e kauringai te Tamnei bwa N na ira ana kauoua ni mwakoro n reirei Beretitenti Kimball ao n aki kawaeremwea te nako ni mare n te tembora. Te ririki are mai imwaina, a moanna ni babairea mwanangaia nakon te Salt Lake Tembora. Ibukina bwa a na nako n te maan ae teniua te namwakaina, I tataro ao I aki mamatam bwa N na kairaki nakon te kairake n ataeinaine ae tau are N nakona ni kairia nakon te tembora.
Tabeua te tai imwiina I nako ni kaea te waaki ni kakukurei n te Ekaretia n au taun iMatsumoto City. Ngke I mena ikekei I kaitibo ma Shiroko Momose, are e nakon te kuura ae rietata are I nako naba iai ngke I kaina te Ekaretia. E waekoa te Tamnei ni kamatoa bwa ngaia neiei are e a tia ni katauraoaki ibukiu.
E aki maan imwiin are I marooroo ma Shiroko ao I tuangnga au rongorongo bwa e na mare ma ngai. E kakukureiai ngke e kariaia, ma e kamimiai n te bwai are e taekinna imwiina.
“I rangin ni kukurei n ataia ae Atuam bon Atuau,” e taku. “Ngke a katanoata te mwananga nakon te Salt Lake Tembora, I iangoia n ira te mwananga anne. I tataro n taai aika mwaiti bwa e na buokai te Uea ni kakaea temanna ae N na kona ni mare ma ngaia ikekei. Tao teuana te ririki n nako I ataia rinanon te Tamnei ngke I tataro bwa I riai n tataningaiko ao are ko na tuangai am rongorongo ngkana ko oki man am mition.”
Anne bon te bwai ae ti rinanona n te maiu n tamnei ae tamaroa ibukira, ao e kakorakorai ara iango bwa ti na mare n te Salt Lake Tembora. E aki tau ara mwane ni kabwakai kantokara ibukin te mwananga, ma ti aki kariaia anne bwa e na kabwarai nanora. Ma ti ataia bwa ngkana ti onimakinate Uea ao ni kawakin Ana tua, E na buokira ni kakoroi bukin bwaai ake ti na bon aki kona ni kakoroi bukia.
Ti bubuti buokara mairoun Tamara are i Karawa n te tataro ao ni kabanea korakorara ni karikirakea ara karekemwane. Mwakuri aikanne, n ikotaki ma ana ibuobuoki n ana kataumwane raoraon temanna Shiroko, tia kona n raonia Aomata Aika Itiaki mai i Tiabaan ake a nakon Salt Lake Tembora.
E bon aki kona ni kabwarabwaraki aron te kimwareirei ae ti namakinna ngke ti kabaeaki ikekei bwa taanga aika akea tokiia. Ti na bon aki kona ni mwaninga taekan te bwai are ti rinanona anne. Tera ae kamwaita kimwareireira bwa ti a tia ni ukoukoria nimaua te roro irouia ara bakatibu ao n tia ni katauraoi araia ibukin te mwakuri n te tembora. Ngke ti mena i Salt Lake City ti karaoi otenanti n onomwi ibukia bakatibu aikanne. Karaoakin otenanti aikanne e buokira n namakina kaniara ma ngaia. Ti ataia bwa a namakina te kimwareirei ibukin ara mwakuri.
Bon taanga ngaira aika boou aika akea arora, ma ti karaoi otenanti n te tembora bwa te bwai ae moan ni bwai, imwiina ti nakon te Laie Hawaii Tembora n tabetai ngkana e tau te mwane.
Kakabwaiaki man te Tembora
“Ti kainnanoa te tembora irarikin bwaai riki tabeua,” e taku te Burabeti IotebwaTimiti.1
N ana baire ni kamaiu te Atua, e kakawaki te tembora nakon kukureira ae akea tokina ibukina bwa ti karaoi nebonebo aika tabu ao otenanti ni kamaiu ikekei. E tuangira te Bible Dictionary bwa te tembora bon te tabo n nebonebo ae moan te tabu n te aonaaba ao bon “te tabo are e na kona n roko iai te Uea.”2
Ngkana ti karinei ara berita aika tabu n te tembora ao n nakon te tembora “ma naano aika nanorinano, inanon te itiaki, ao te karinerine, ao te etieti,”3 ti na namakina te Tamnei ae Raoiroi ao ni karekea riki te oota ae korakora ma te rabakau. Ngke ti kitana te tembora, ti na kitanna ma te kamanoaki ni mwaakan te Uea ma Arana iaora, Kimwareireina ni katobibira, ao Ana anera n tararuaira (taraa D&C 109:13, 22).
Ngke ti oki nako Tiabaan imwiin ara mare, e kakoroaki nanon ana berita te Uea inanon maiu ngke I kakaea au mwakuri ae bwanin taina.
E Kakoroi Nanon Ana Berita te Uea
I mwakuri n ae tii te itera n tai ngke e reke ara moan nati. Ti rangin ni kukurei, ma I ataia ae I aki kona ni boutoka ara utu ae rikirake n akea te mwakuri ae bwanin taina. Ti moanna n tataro ma te onnon ibukin ana ibuobuoki karawa.
Imwain are I moana au mition, I a kaman tangiria ni kan mwakuri ma iokinibwai mai itinaniku. Ma ngkana ko na tangoaki man te kambwana n iokinibwai, e na riai te tia kani mwakuri n tia n reke ana beeba man te iuniwetiri ibukin kakoauakina. E tuai ni bane au reirei ao akea kakoauana, ma ngke ti tataro, ti namakinna bwa e na kakabwaiaira te Uea ao ni katauraoa te mwakuri ibukiu.
I iangoia bwa N na karaoi ukeuke ni kamwakuri n tabeua kambwana n iokinibwai n aki tabe ma akean au reirei. A aki butimwaeai taian moan kambwana ake uoua, ma iai au atatai ae moan te anainano ngke I kororeta nakon te katenua ni kambwana.
Iai tii tabeman membwa n te Ekaretia aika kain Tiabaan n te tai anne, ao a mwaiti aomata aika a kaitara te Ekaretia. Ngke a intwaiunai teniman taan tei man te katenua ni kambwana ni kaobwai, a taraa au retiume ao a kunea bwa ngai kain Aika Itiaki ni Boong Aika Kaitira. A moanna n titirakinai titiraki ibukin taekan te Ekaretia, ni bubuti rekeia aika bwarabwara raoi. E aki maan imwiin okiu man au mition, akea au kaangaanga n tataekina rongorongon Ana Ekaretia Iesu Kristo ae kaokaki.
Ibukin ae na nakon tii 40 te miniti, I taekina rongorongon te euangkerio ao ni kaota au kakoaua ni maiun Iesu Kristo, Kitanan te Koaua, Ana Moan ni Kaotioti Iotebwa Timiti, Ana Boki Moomon, Manga Kaokan ana Ekaretia Iesu Kristo ae koaua, ao reirein te Ekaretia.
Akea temanna mairouia kain te intawiu ae a katokai ngke I taetae. Tabeua te bong imwiina te kambwana ni kaobwai e anganai te mwakuri n te boo ae moan te kamimi. Imwiina, ngke I titirakina au manatia bwa bukin tera ngkai a anaai, e kaeka, “N tain am itawiu I kakoaua ae ko mwakuri raoi, iai nanom ae koaua, ao ni karinerine, ao ngaia anne te aeka n aomata ae ti tangiria bwa e na mwakuri ibukin ara kambwana.”
I kakoaua bwa e a tia ni kakoroa nanon Ana berita te Uea. N tain au intawiu I namakina te mwaaka ao Tamnein te Uea ae mena iaou, aron are E berita nakoia naake a nakon te tembora ao ni karinei aia berita aika tabu n te tembora. I namakina naba Tamneina bwa e raonai ngke I mwakuri ma te kambwana, ike I kakabwaiaki ni karaoi ibuobuoki aika bongana aika mwaiti.
E A Roko te Tembora i Tiabaan
N te maungatabu ni kabuta i Tokyo n 1975, e katanoata Beretitenti Kimball katean te Tokyo Tiabaan Tembora. Aomata Aika Itiaki iaon Tiabaan, a rotaki n te kukurei ae korakora, ao n te tai ae waekoa a uboubo n tatakarua ni kaota kimwareireia ao aia kakaitau.
E taubobonga te Tokyo Japan Tembora n te 1980. N tain kaukan te tembora ao te taromauri ni kaukuki, a kakabwaiaki aomata Aika Itiaki ma atatai n tamnei aika tamaroa ao te kimwareirei ae korakora. A reitinako atatai aikanne imwiin katabuan te tembora ngke aomata Aika Itiaki a karekei aia otenanti n te tembora ao n tei n oneamwiia aia bakatibu ake a tia ni mate.
N te bong aei, e kania 45 te ririki imwiin au mare ma Shiroko, au iango n iri aia reirei burabeti e reitinako ni kakabwaiai maiura ao maiuia natira. Ti a tia ni katea te auti ae tamaroa n ana kawai te Uea—ae aanaki n ana euangkerio Iesu Kristo, n raonaki ma berita aika tabu n te tembora.
I kakoaua bwa ngkana ti tataro ibukin kairakira, n iriria burabeti aika maiu, ao ni karika te tembora bwa te moanibwai ni maiura, ao Tamara are i Karawa e na kairira ao ni kakabwaiaira.