Te Mwakuri n Ibuobuoki Are E Anganaki Imwiina
Krisi Church Summers, Utah, USA
Uncle Joe e maeka n tingaia ao e botu. Ngaia ae ti kataia ni kakawaria ngai ma kaain au ru n tainako n aron ae ti kona.
Kamataata n te tamnei iroun Bradley Clark
N au moan ririki n te reirei ae rietata, N na nako n tainako ma raou n reirei ni kawara tarin tinan taman tarin tamana are aki toki n aranna bwa Uncle Joe. E maeka n ti ngaia ao e botu, ngaia ae ti kataia ni kakawaria n tainako n aron ae ti kona. N ara tai ni kawaria ao e na karakin nakoira rongorongona ngke e mena i Mexico inanon taun tabeua irarikin tian Mexico ao te United States i Arizona, n raonaki ma Nogales.
Ngke e oki teutana te tai nakon mweengana kain au ruu, I namakinna ae N na riai ni kateimatoa kawarakin Uncle Joe. E riki bwa raoraou ae I rangin ni kaan ma ngaia, ao I kawaria ni karokoa e mate teuana ma te iterana te ririki imwiina. I nanokawaki ni buan raoraou ma I kakaitau ibukin te tai ae kakawaki ae I a tia ni kabanea ma ngaia.
Tebwina te ririki imwiin maten Uncle Joe, I wareware inanon ana tieno tinan tinan tinau te unaine. Te tieno e taekina kainabana are e kitanna n akea te mwane ae katikua, tabena ni kabwaka $30 ibukin tangoan te auti, ruaman ataei aika e na kamwarakeia.
Imwiina e koroia: “I Bisbee [Arizona] aomata a rangin n raoiroi nakoira. E ngae ngke ti maeka itinanikun te taun i maiakin Bisbee, a uotira ni kaokiira nakon mweengara [man te taromauri]. Te Tari Joseph Kleinman, are e maeka i Mexico, e aki toki ni uotira nakon mwengara n te tai ae mwaiti, ao tiaki ti anne, ma [ana utu] a uotira ni kabane bwa ti na amwarake ma ngaia. A kamwarakeira ma te rabiti ae baniaki n raonaki ma aekan amwarake riki tabeua, are ti rangin ni kukurei iai. A mwaing nako Nogales … ao a katikuira ma aia rabiti, aika mainaina man tikiraoi, ngaia anne are ti kona ni kang.”
Ngke I wareka te koroboki aei, I kunea bwa Joseph Kleinman are e a tia ni buoka tinan tinan tibu te unaine bon Uncle Joe! I namakina ana wirikiriki te Tamnei are I a tia ni kaungaki bwa N na reitanako kawarakin Uncle Joe bwa kanga te kakaitau ae uarereke ibukin te akoi are e a tia ni karaoia nakon tibutoru te unaine ao ana utu.
I rangin ni mimi n riki bwa mwakoron te karaki n tangira ao te ibuobuoki are e a tia ni karaoaki bwa te kakaitau (ibukin te tangira ao te ibuobuoki). I ataia bwa e atai aia kaangaanga natina te Uea. Ngkana ti kakauongo nakon ana wirikiriki te Tamnei ae Raoiroi, ti kona ni kakabwaiai maiuia tabeman ao ni kakabwaiaiaki imwiina.