E Kanga Aron Kakoroan Nanon Kouru aika Akea Tokiia

Iroun Unimwane Robert D. Hales

Man te Kooram n Abotoro n te Tengaun ma Uoman

Man moanakin te maroro are e kanakoaki i Brigham Young University-Idaho n Ritembwa 11, 2004.

I kan maroroakin tabeua kouru aika kabanea ni kakawaki n te maiu ake a na anganiko te kimwareirei ngkai ko kakoroa bukin am mition iaon te aba―kouru aika akea tokiia ake a na buokiko n oki ma te karineaki nakon Tamam are i Karawa. A raonaki ma:

1. Mareaki n te tembora ao karikirakea te reitaki n te utu ae akea tokina man te tataromwaaka ni kabaeranta waakin nako te maiu, n aron te utu, mwakuri, te reirei ae reitinako, mamaten nanom ae ko kan kakaraoia, ao te kamataku.

2. Te kakaonimaki ao te ongotaeka ni maiuakina am aro ao ni koaua nakon am berita aika tabu n te bwabetito ao n te tembora, n tainako ni kawakin bwaai aika a raraoi n te maiu.

3. Kateimatoa te taratara ae akea tokina, n uringnga bwa bwain te abanuea bon akea tokiia ao bwain te aonaaba bon bwain te rabwata ao a kai toki.

4. Uringnga n anga te mwakuri n ibuobuoki ae tabu ni kabuta maium ao n tainako n tararuaia aika rangi ni kainnano ake a kainnanoa am tangira ao tabeua boutoka.

Aikai kouru aika teiimaan ake a kainnanoa te nano ao te tai ni kakoroi nanoia. Karaoan kouru aikai e aki tau; ti riai ni karaoa te babaire ni waakina karaoaia.

N te tairiki ke ningaabong, iangoia raoi bwa tera ae ko na kakoroa nanona i nanon maium ao aekakira am kouru. Karekea am tai ni korei ao manga rinanoi rinanon ririki aika a na roko. Ngkanne kabanea tabeua te aoa n titirakiniko i bon iroum tera ae ko kona ni karaoia ni kakoroi bukin taian kouru aikai n te bong aei, ningabong, n te wiiki are e na roko, ao n namwakaina ake imwiina.

Ko kanga ni rinei ao ni kabwarabwarai kouru aikai aika kakawaki, aika akea tokiia? Ao, n aron ae kakawakina, ko kanga ni karaoa te babaire ni kakoroi nanoia? Uringnga: te tai e bon kakawaki—e kakawaki naba—inanon babaireana. Man te tabo ike ko tei iai ngkai, e taraaki bwa iai mwaitin am tai ae tuai baireaki ni kakoroi bukin bwaai aika akea tokiia.

Aomata n tatabemania iai aia tai; e bon koaua. Ma tii ibukin waakin te tai tiaki nanona bwa iai te rikirake ae ti karaoia.

“Te maiu aei bon aia tai aomata bwa a na katauraoia ni kaitibo ma te Atua; eng, nooria te bong ni maiu n te maiu aei bon te bong are aomata a na karaoi aia beku” (Aramwa 34:32).

Te kawai ae te kabanea n tamaroa bon rinean waaki ni kakukurei aikanne ma te wanawana ake a na buokiira ni kakoroi nanon ara kouru aika kairaki mai ieta ao ngkanne ni karekea te korakora n te katei ao te kakoaua ni kakeaa te bwai are e na katabetabeira ke n tukiira man tokin kawaira ae akea tokina.

I kakoaua bwa am tai iaon te aba e tau ni kakoroa bukin am katauraoi ao ni karaoi am beku n am mition ibukin maium—ngkana ko kabongana raoi am tai ma te wanawana. Ao akea riki te tai ae tamaroa ni karaoan anne nakon ae ngkai, inanon ataeim (taraa Aramwa 37:35).