Atong mga Panimalay, Atong mga Pamilya
Usa ka Mahimayaon nga Panagkita
Ang mga tigsulat nagpuyo sa Utah, USA, ug nagserbisyo sa Ghana Accra Mission.
Ang dekada sa panagbulag ug kagul-anan natapos sa dihang ang Ginoo mihiusa sa amahan ug anak nga lalaki diha sa templo.
Usa kadto ka matahum nga kabuntagon sa Abril 2012 sa dihang si Juan Ekow-Mensah misulod sa Accra Ghana Temple. Ang tigulang nga lalaki, karon kapin na sa 80, mibiyahe uban sa grupo sa mga Santos gikan sa Nkawkaw, diin siya nagpuyo nga nag-inusara. Ang grupo nagplano nga magpalabay sa gabii sa diha sa duol nga mga lawak alang sa mga patron sa templo ug mogahin og duha ka adlaw sa pagserbisyo sa templo.
Naglingkod sulod sa templo, si Brother Ekow-Mensah naghulat nga moapil sa mga ordinansa sa initiatory sa dihang usa ka mas manghud nga lalaki milingkod tupad kaniya. Ang mas manghud nga lalaki, nag-edad og 54, nagplano nga mosulod sa sesyon sa endowment nianang buntag uban sa iyang asawa apan, naulahi og abut alang nianang sesyon, nakahukom siya nga moapil sa mga ordinansa sa initiatory.
“Taga diin ka?” Nangutana si Brother Ekow-Mensah.
“Sekondi,” mitubag ang tawo.
“Asa dapita sa Sekondi?” Nangutana si Brother Ekow-Mensah.
“Ketan,” ang mas manghud nga lalaki mitubag, “sa dapit diin ang mga eskwelahan anaa mahimutang.” Samtang nagpadayon sa pag-istoryahanay, ang duha ka lalaki mibati asa padulong kini nga mga pangutana.
Nadasig sa nagkakusog nga pagbati nga nakaila, ang mas manghud nga lalaki mitan-aw ni Ekow-Mensah. “Ikaw akong amahan,” mipahibalo siya. “Unsay imong ngalan?”
“John Ekow-Mensah.”
“Mao sad kana ang akong ngalan,” tubag sa anak.
Paghulagway pinaagi ni Brian Call; litrato sa maayong kabubut-on sa mga tagsulat
Human makaserbisyo sa templo, ang duha ka mga lalaki naglingkod og dugay sulod sa celestial room, naghinumdom sa ilang mga kinabuhi ug nagpabati sa ilang gugma. Bisan og ang tanan nga gisulti ug gihimo ni Brother Ekow-Mensah Jr. matinahuron ug sakto, ingon og dili siya andam sa pagdawat sa iyang amahan sa tibuok niyang kasingkasing—hangtud iyang nahibaloan nganong ang iyang amahan kinahanglang mobiya ug nganong dili niya makontak ang iyang pamilya.
Dul-an na sa 50 ka tuig ang milabay si Brother Ekow-Mensah Sr. naminyo sa usa ka babaye kansang apohan nga babaye—ang labing tigulang nga matriyarka nianang higayona—naghupot og gahum sa pagpangulo sa ilang tribo. Subo lang, ang matriyarka supak sa kaminyoon ni John ngadto sa iyang apo nga babaye. Sa iyang mga pagpamugos ang magtiayon sa katapusan nagkabulag sa dihang ang ilang kinamagulangan nga anak nga lalaki, si John Jr., nag-edad pa lang og upat o lima ka tuig. Si John Jr. nakaila sa iyang apohan sa tuhod isip usa ka lig-on, kugihan nga babaye, dili ang rason nga nakahikaw kaniya sa tanan nga asosasyon uban sa iyang amahan dul-an sa 50 ka tuig.
Ang pagkasalikway gikan sa pamilya nakaputol sa tanang mga relasyon. Tungod sa kakulang sa telepono o serbisyo sa sulat, si John Sr. walay mahimo sa pagkontak sa iyang pamilya. Ang iyang pagpangita og trabaho mao usab ang nakapahilayo kaniya. Nagpuyo siya sa Mankessim gikan sa mga 1963 hangtud 1989, diin siya nagdumala og gamayng paint shop. Gikan didto mibalhin siya ngadto sa Ada, diin ang usa ka babaye kansang building iyang gipintalan mipaila kaniya sa ebanghelyo ni Jesukristo. Si Brother Ekow-Mensah Sr. nagpasakop sa Simbahan niadtong 1991.
Tungod kay si Brother Ekow-Mensah Jr. bata pa kaayo sa dihang nabungkag ang kaminyoon sa iyang mga ginikanan, siya wala kaayo masayud mahitungod sa iyang kabilin. Usahay ang iyang inahan miingon nga siya “liwat kaayo” sa iyang amahan, apan diha ra kutob ang iyang kahibalo.
Pagkadako na niya ug naminyo, si John ug ang iyang asawa, si Deborah, nakahukom nga mangita og simbahan nga ilang apilan. Si John didto sa University of Ghana didto sa Accra sa dihang iyang nakita ang usa ka Liahona nga magasin diha sa estante. Gikuha niya kini ug nainteresado siya sa unsay nahisulat niini. Gitiman-an ni John ang nagmantala: Ang Simbahan ni Jesukristo sa mga Santos sa Ulahing mga Adlaw.
Sa dihang si John miuli gikan sa eskwelahan ngadto sa iyang panimalay sa Sekondi, ang iyang asawa naghinam-hinam sa pagsulti kaniya sa usa ka simbahan nga iyang nahibaloan gikan sa usa ka higala. Iyang gisultihan ang iyang bana nga ang ngalan mao Ang Simbahan ni Jesukristo sa mga Santos sa Ulahing mga Adlaw. Gisultihan siya ni John nga mao kini nga simbahan nga iyang nabasahan sa usa ka magasin didto sa unibersidad.
Si John ug si Deborah gitudloan sa ebanghelyo ug nabunyagan niadtong 1999. Usa ka dekada ang milabay sila nabugkos didto sa Accra Ghana Temple, ug ang tulo nga labing bata sa ilang lima ka anak nabugkos ngadto kanila.
Dayon diha sa templo niadtong Abril 2012, mga luha miagas sa dihang ang amahan ug anak nagkailhanay sa usag usa. Ang ilang kalipay midako sa ilang pagsabut nga sila tagsa-tagsa nga nagpamiyembro sa Simbahan ug miadto sa templo nianang matahum nga kabuntagon.
Amahan ug anak, nagkita diha sa templo human sa dul-an 50 ka tuig nga panagbulag.