Ang Igpapahulay usa ka Kahimut-an

Lima ka mga paagi sa paghimo nga mas makahuluganon ang inyong mga Dominggo.

Uban sa mga hagit nga nahitabo sa atong palibut, ang pagtahud sa Igpapahulay dunay dugang nga kahulugan tungod kay makatabang kini nato nga magpabiling lig-on sa espirituhanong paagi. Kining mga kabatan-onan gikan sa Eastern Europe mipakigbahin sa ilang mga hunahuna mahitungod kon sa unsang paagi ang Igpapahulay naglig-on kanila—ug sa unsang paagi usab kini makapalig-on ninyo.

Mas Mahiduol ngadto sa Ginoo

Ang Igpapahulay mao ang adlaw nga hingpit nakong mahatag ang akong kaugalingon ngadto sa Ginoo. Naningkamot kong dili mausik ang panahon apan hinoon mogamit niini aron mahimong mas maayo ug mas mahiduol ngadto sa Langitnong Amahan. Sa mga Dominggo malipayon kaayo ko nga moserbisyo sa mga miyembro sa Simbahan pinaagi sa paglingkod duol nila aron sa pagpakita nga sila wala hikalimti. Ang pagserbisyo sa uban naghatag nako og kalipay.

Alang nako, ang Igpapahulay mao ang adlaw sa pagkat-on, ug hingpit nga kalipay samtang nagkat-on ko sa pagserbisyo sa Ginoo. Akong balaanon ang adlaw nga Igpapahulay kutob sa akong mahimo. Ang pagsalig sa Langitnong Amahan sa tanan nga mga butang makahatag nato og kalipay dinhi sa yuta ug didto sa langit uban Kaniya ug sa Iyang Anak, si Jesukristo.

Arvis B., edad 18, Latvia

Pag-ambit sa Sakrament

Matag adlaw nga ako nagpaabut sa adlaw nga ako moadto sa simbahan ug moambit sa sakrament. Dili ko makahulat hangtud nga akong masul-ob ang akong mga sinina sa Dominggo, mangandam sa akong kaugalingon, moadto sa simbahan, ug sa makausa mobag-o sa mga pakigsaad sa Dios.

Usahay kon ako mobangon sa buntag, ako saputon. Apan kon ako moadto sa simbahan ug moambit sa sakrament, motambong sa akong mga miting, ug magtuon sa kasulatan, bation nako Espiritu Santo, ug makapabayaw kini sa akong espiritu. Importante ang pag-ambit sa sakrament matag semana, tungod kay ang atong Manluluwas Mismo mipakita kanato kon unsay gikinahanglan natong buhaton.

Diana D., edad 14, Latvia

Pagtuon sa Kasulatan Uban sa Lain

Ang pagtambong sa tulumanon sa Dominggo ug pag-ambit sa sakrament mopuno nato sa Espiritu sa tibuok semana. Makakuha kita og dugang nga impormasyon gikan sa mga kasulatan, ug ang mga kasinatian sa atong mga magtutudlo makatabang kanato nga mas makasabut sa mga kasulatan. Kon kita dungan nga magtuon sa kasulatan, kita makaangkon og bag-ong mga panabut niini ug makakat-on gikan sa usag usa.

Antonina B., edad 18, Central Federal District, Russia

Pagpili og mga Kalihokan sa Pagbaton sa Espiritu

Ang hangyo ni Jesus nga magpabilin ug magbantay uban Kaniya (tan-awa sa Mateo 26: 38) nakatandog sa akong kasingkasing ug migiya kanako sa pagkaamgo nga ang adlaw nga Igpapahulay mao ang adlaw nga kita makaambit sa sakrament isip usa ka timaan sa handumanan sa Iyang pagserbisyo kanato.

Kon magsige ko og hunahuna kabahin niini, mas gusto kong makaila Kaniya. Kini nga matang sa pagpaningkamot nakatabang nako sa pagpili sa matarung nga mga butang sa usa ka adlaw nga gawasnon gikan sa kalibutanong mga tinguha: Dominggo. Kini nga mga butang maglakip sa pagbasa ug pagtuon sa mga kasulatan, pagserbisyo sa akong pamilya, pagtan-aw og makapabayaw nga mga salida, pagpakigbahin sa espirituhanon nga panabut ngadto sa mga higala, ug makanunayon nga pag-ampo. Kon akong ipunting ang akong kasingkasing ngadto ni Jesus, mas makaila ko ug mas mahiduol Kaniya. Dili ako makahingalan og usa ka nga panalangin nga mas nindot pa niini.

Sister Aleksandrovna C., edad 25, Russia Novosibirsk Mission

Mahimong Mabayaw pinaagi sa Espiritu

Alang nako ang adlaw nga Igpapahulay usa ka oportunidad sa pagtuon sa ebanghelyo ni Jesukristo sa mas lawom. Walay pagduhaduha, usa ka tawo kinsa moabut sa simbahan nga nag-andam ug nagtinguha sa pag-apil sa sakrament ug kinsa naningkamot sa pagkat-on makadawat og mga panalangin ug mabayaw pinaagi sa Espiritu, dili lang sa Dominggo, apan sa tibuok nga mosunod nga semana.

Adunay daghang mga oportunidad sa gawas sa paril sa simbahan diin kita makabalaan sa adlaw nga Igpapahulay: paggahin og panahon uban sa pamilya, pagtabang sa mga misyonaryo, pagserbisyo sa ward, ug sa pagbasa sa literatura sa Simbahan. Ang adlaw nga Igpapahulay mao ang usa ka panahon sa pagsabut sa mga balaod sa Dios. Kon kita moila niini ug magpasalamat sa Dios alang niining oportunidad, kita dili maglisud sa pagbalaan sa adlaw nga Igpapahulay.

Elder Vladimir Aleksandrovich Z., edad 18, Russia Novosibirsk Mission

Padayon nga Walay Buling

“Ug nga kamo mahimo unta nga labaw nga moamping sa inyong mga kaugalingon nga walay buling gikan sa kalibutan, ug kamo moadto sa balay alampoanan ug mohalad sa inyong mga sakramento diha sa akong balaan nga adlaw;

“Kay sa pagkatinuod kini mao ang adlaw nga gitudlo ngadto kaninyo sa pagpahulay gikan sa inyong mga kahago, ug mohatag og mga paghalad sa inyong mga pag-ampo ngadto sa Labing Halangdon.”

Doktrina ug mga Pakigsaad 59:9–10

“Kon ilikay mo ang imong tiil gikan sa adlaw nga igpapahulay, gikan sa pagbuhat sa imong kalipayan sa akong adlaw nga balaan; ug sa pagtawag sa adlaw nga igpapahulay nga usa ka kahimut-an, ug sa balaan sa Ginoo nga halangdon; ug mopasidungog ka niini, nga walay pagbuhat sa imong kaugalingon nga mga paagi ni mangita sa imong kaugalingon nga kalipayan, ni magasulti sa imong kaugalingon nga mga pulong:

“Unya ikaw magakalipay sa imong kaugalingon sa Ginoo.”

Isaias 58:13–14

USA KA ADLAW SA PAGPAHULAY

“Ang Dios mihatag kanato niining espesyal nga adlaw, dili para malingaw o maghago apan aron mopahulay gikan sa katungdanan, uban sa pisikal ug espiritwal nga pagpahulay.”

Elder Russell M. Nelson sa Korum sa Napulog Duha ka mga Apostoles, “Ang Igpapahulay usa ka Kahimut-an,” Liahona, Mayo 2015, 129.

Mga paghulagway pinaagi ni J. Beth Jepson