Mensahe sa Unang Kapangulohan
Mahimong Tinubdan sa Kahayag
Ako may pribelihiyo nga makatambong og daghang mga pagsaulog sa kultura uban sa mga pagpahinungod sa templo. Ganahan kaayo ko niining tanan, lakip sa pinakabag-o nga akong gitambungan sa Phoenix, Arizona, USA, sa miaging Nobyembre.
Ang mga batan-on nga Santos sa Ulahing mga Adlaw kinsa miapil sa mga pagsaulog sa kultura adunay talagsaon, dili malimtan nga mga programa. Sa miaging tuig sa Phoenix, sa wala pa magsugod ang pagsaulog, akong giingnan ang mga partisipante, “Kamo ang mga anak sa kahayag.”
Gusto nakong ipahibalo sa tanang mga batan-on sa Simbahan nga sila ang mga anak sa kahayag. Tungod niini, sila adunay responsibilidad nga mahimong “kahayag dinhi sa kalibutan” (Mga Taga-Filipos 2:15). Sila adunay katungdanan sa pagpakigbahin sa kamatuoran sa ebanghelyo. Sila adunay calling nga morepresentar sa katuyoan sa templo, nagpakita sa kahayag sa ebanghelyo ngadto sa nagkangitngit nga kalibutan. Sila may mando nga ipadayong magsiga ang ilang kahayag kanunay.
Aron sa “mga magtutuo [m]agkinabuhi [kita] ingon nga panig-ingnan” (1 Timoteo 4:12), kita mismo kinahanglang motuo. Kita kinahanglang mopalambo og pagtuo nga kinahanglan aron maluwas sa espirituhanong paagi ug sa pagpakita og kahayag ngadto sa uban. Kinahanglan nga atong amumahon ang atong pagpamatuod hangtud kini mahimong angkla sa atong kinabuhi.
Ang pipila sa epektibo kaayong mga paagi sa pag-angkon ug paghupot og pagtuo nga atong gikinahanglan karon mao ang pagbasa ug pagtuon sa kasulatan ug kanunay nga pag-ampo. Ngadto sa mga batan-on sa Simbahan, ako moingon, kon wala pa ninyo mahimo, pagpalambo og batasan nga magbasa sa kasulatan ug mag-ampo kada adlaw. Kon wala kining duha ka importanting mga praktis, ang impluwensya sa kalibutan ug usahay ang sakit nga kamatuoran sa kinabuhi makapaawop o gani makapawala sa inyong kahayag.
Ang katuigan sa pagkabatan-on dili sayon. Kini ang panahon nga si Satanas motintal kaninyo ug buhaton niya ang tanan sa pagdani kaninyo nga mahilayo sa dalan nga mogiya kaninyo balik sa langitnong panimalay. Apan samtang kamo magbasa ug mag-ampo ug kamo magserbisyo ug mosunod, inyong mas maila ang “kahayag nga nagdan-ag sa kangitngit” (D&P 6:21), atong Ehemplo ug atong kalig-on—gani ang Ginoong Jesukristo. Siya ang Kahayag nga atong ipataas aron mawala ang pagpundok sa kangitngit (tan-awa sa 3 Nephi 18:24).
Uban sa lig-ong pagpamatuod sa Manluluwas ug sa Iyang gipahiuli nga ebanghelyo, kamo makabaton og walay kinutuban nga oportunidad sa pagsanag. Sila naglibut kaninyo kada adlaw, sa bisan unsa nga sirkumstansya diin kamo maanaa. Samtang kamo nagsunod sa ehemplo sa Manluluwas, kamo adunay oportunidad nga mahimong kahayag, sa kinabuhi niadtong nagpalibut kaninyo—masakop man sa inyong pamilya, kaklase, kauban sa trabaho, kaila, o sa mga estranghero.
Kon kamo kahayag sa kalibutan, ang mga tawo nga nagpalibut kaninyo mobati og espesyal nga diwa nga gusto nilang makig-uban ninyo ug mosunod sa inyong ehemplo.
Mohangyo ko sa mga ginikanan ug mga lider sa atong mga batan-on sa pagtabang kanila nga magbarug nga lig-on diha sa kamatuoran ug pagkamatarung. Tabangi nga mas molapad ang ilang panglantaw sa pagkat-on, pagsabut, ug pagserbisyo sa gingharian sa Dios. Lig-una sila aron makabuntog sa mga tintasyon sa kalibutan. Dasiga sila sa pagdesisyon nga magalakaw nga mahiyason ug may hugot nga pagtuo, nga magmainampuon, ug molantaw sa langit isip kanunay nilang kalig-on.
Para sa mga batan-on, moingon ko, ang atong Langitnong Amahan nahigugma kaninyo. Unta mabati usab ninyo ang gugma sa mga lider sa Simbahan para kaninyo. Unta kamo adunay tinguha sa pagserbisyo sa inyong Langitnong Amahan ug sa Iyang Anak. Ug unta kamo kanunayng maglakaw diha sa kamatuoran ug mahimong kahayag diha sa mga anak sa Dios.
Imahe sa parola pinaagi sa dzm1try/iStock/Thinkstock