Tabang! Adunay Magdiborsyo
Ang tagsulat nagpuyo sa Utah, USA.
Kon ang mga ginikanan magdiborsyo, sa kasagaran ang mga anak mobati og kahadlok, kabalaka, sad-an, kasuko, kalibug, kahupay, o kaguol—usahay ang tanan sa samang higayon. Kon kini nahitabo kanimo o sa usa sa imong mga higala, aniay pipila ka mga hunahuna nga tingali makatabang.
Mibati ko nga nag-inusara. Ingon og ang tanan gawas nako dunay perpekto nga mga pamilya.
Walay pamilya nga perpekto, bisan kon sila ingon niana.
Hinumdumi nga ang imong mga ginikanan, bishop, mga magtutudlo sa Primary, mga silingan, ug mga higala sa ward tanan nagmahal kanimo.
Usahay ang mga tawo tingali mosulti og mga pulong nga makapasakit sa imong mga pagbati nga wala tuyoa. Kon kana mahitabo, ayaw kahadlok sa pagsulti kanila unsay imong gibati ug tabangi sila nga makakita og mas maayo nga paagi sa pagsulti kanimo mahitungod sa diborsyo.
Naglagot ko sa akong mama ug papa.
Sayon ra nga mobati og kasuko kon ikaw walay mabuhat sa usa ka sitwasyon. Gani tingali imong ipagawas ang imong kapungot ngadto sa uban. Bisan tuod og kini lisud, padayon sa pagpaningkamot sa pagpakita og gugma alang sa imong pamilya. Pag-ampo alang sa tabang sa pagtan-aw sa imong mga ginikanan sama sa pagtan-aw ni Jesus kanila. Siya nahigugma kanila, kanimo, ug sa tanan sa imong pamilya.
Kon ikaw dili makahunong nga mobati og kasuko, pakigsulti sa imong mama o papa o sa usa ka tawo nga imong gisaligan. Makatabang sila kanimo sa pagpangita og maayong paagi nga mobati og mas maayo, sama sa pag-ehersisyo o paghimo og art.
Ikauban ba nako ang akong mga ginikanan didto sa langit?
Tungod sa Pag-ula ni Jesus, ang tanan mamaayo ra human kita mamatay. Dili ka angay nga mabalaka. Bisan unsa pa, ikaw kabahin kanunay sa pamilya sa imong langitnong mga ginikanan. Kon ikaw maningkamot sa pagpili sa matarung, ikaw makaangkon sa tanang mga panalangin nga giplano sa Langitnong Amahan alang nimo.
Sayop ba nako nga nagdiborsyo ang akong mga ginikanan?
Mahimong maghunahuna ka nga nakatabang unta ka nga ang imong mga ginikanan magpabilin nga maghiusa. Apan ang kamatuoran mao nga dili gayud imong sayop. Sila nakahimo sa desisyon nga magdiborsyo. Ang mga anak sa pamilya dili responsable sa diborsyo.
Nahadlok ko kon unsay sunod nga mahitabo.
Kon ang dagkong mga kausaban mahitabo, natural ra nga mabalaka mahitungod sa umaabut. Pakigsulti sa imong mama ug papa. Gusto silang masayud kon ikaw nahiubos, ug sila makatabang sa imong mga problema ug mga pangutana. Siguroha sa pag-ampo alang sa kahupayan.
Mobati gyud ko og kaguol kanunay.
OK ra nga mobati og kaguol. Ang pagkaguol mahitungod sa usa ka dako nga kausaban importante nga lakang aron mobati nga mas maayo unya. Bisan tuod nga ikaw mobati og kaguol usahay, ipadayon ang pagbuhat sa mga butang nga imong ganahan. Paggahin og panahon sa gawas. Pagbasa og maayong libro. Paminaw sa makapabayaw nga musika. Paningkamot sa pag-eskwela. Paglingaw-lingaw uban sa imong mga higala. Pag-ampo sa Langitnong Amahan.
Kon ang imong magul-anon nga pagbati molungtad gayud og dugay nga panahon ug nakapalisud nimo sa pagkatulog, pagkaon, pagtutok sa eskwelahan, o pagbuhat sa mga butang nga normal nimong buhaton, pakig-istorya og usa ka hamtong nga imong gisaligan aron siya makatabang nimo nga mobati og mas maayo pag-usab.
Mamaayo ra ang tanan.
Bisan unsa pay imong gibati karon, mobati ra ikaw og maayo inig labay sa panahon. Sa pagkakaron, padayon sa pag-ampo sa Langitnong Amahan alang sa kahupayan. Hinumdumi nga ang Langitnong Amahan ug si Jesus kanunay nga nagbantay nimo ug dili gayud mobiya kanimo nga mag-inusara. Sila nahigugma kanimo ug sa imong mga ginikanan ug makatabang kaninyong tanan. Sila mohatag kanimo og kalig-on sa pagbati nga malinawon ug malipayon.
Paghulagway pinaagi ni Katie Payne