Resipe para sa Malipayong Pamilya
Ania ang siyam ka pamaagi nga inyong mapalig-on ang inyong pamilya.
Sa lista sa importanting mga doktrina sa ebanghelyo ni Jesukristo, ang pamilya sigurado nga usa sa taas og prayoridad. Kamo batan-ong mga babaye kanunay mo-recite sa inyong pasalig “sa paglig-on sa panimalay ug sa pamilya,”1 kamo batan-ong mga lalaki gidapit sa “paghimo og lista sa mga pamaagi nga ikaw makatabang og tukod og usa ka malipayon nga pamilya,”2 ug ang batan-ong mga lalaki ug batan-ong mga babaye gipahinumduman: “Ang inyong pamilya mapanalanginan kon kamo naghimo sa inyong bahin sa paglig-on niini.”3
Busa unsay pinakamaayong paagi sa paglig-on sa inyong pamilya ug sa pagtabang nga makahimo og malipayong panimalay? “Ang Pamilya: Usa ka Pamahayag ngadto sa Kalibutan” adunay tubag Kini nga importanting dokumento naghulagway nganong ang pamilya importante kaayo sa plano sa Langitnong Amahan ug unsay atong mahimo aron sa paglig-on sa mga relasyon sa atong pamilya. Kini usab nagpasabut kon unsaon nato nga mahimong mas malipayon diha sa atong pamilya. Walay sekreto nga resipe—ang sukaranang mga baruganan sa ebanghelyo nga dugay nang gitudlo kanato: “Ang kalipay diha sa kinabuhi sa pamilya labaw nga makab-ot kon gipasikad diha sa mga pagtulun-an ni Ginoong Jesukristo. Malampuson nga mga kaminyoon ug mga pamilya natukod ug napadayon diha sa mga baruganan sa hugot nga pagtuo, pag-ampo, paghinulsol, pagpasaylo, pagtahud, gugma, kalooy, buhat ug maayong makalingaw nga mga kalihokan.”4
Inyo nang nasayran—ang yano nga pormula sa paghimo og malipayong pamilya ug sa pagpalambo sa inyong mahangturong mga relasyon sa pamilya. Hinoon, kana wala magpasabut nga kini wala na magkinahanglan og trabaho ug paningkamot sa inyong bahin. Apan ang tanan ninyong paningkamot sa paglig-on sa inyong pamilya sa katapusan makahimo kaninyo—ug kanila—nga mas malipayon.
Ania ang pipila ka mga ideya kon unsaon paggamit kini nga mga baruganan.
Hugot nga Pagtuo
-
Pag-apil sa pamilya ug personal nga pagtuon sa kasulatan ug sa family home evening.
-
Paghimo og tumong uban sa inyong pamilya nga mas makasunod og usa ka sugo, sama sa balaod sa pagpuasa o sa balaod sa ikapulo.
-
Paghimo og mga plano nga mamimaw sa umaabut nga kinatibuk-ang komperensya o sa pagtuon sa milabayng kinatibuk-ang komperensya isip pamilya.
Pag-ampo
-
Pag-apil sa pag-ampo sa pamilya.
-
Sa inyong personal nga mga pag-ampo, piho nga ipag-ampo ang kada sakop sa pamilya, isulti ang ngalan. Hunahunaa ang ilang mga panginahanglan samtang mag-ampo kamo para kanila.
Paghinulsol
-
Pagsulti og pasayloa ko; isulti kini kanunay. Ug kinasingkasing kining buhaton.
-
Pagkat-on og dungan sa kaimportante sa Pag-ula ni Kristo ug sa sakrament ug ang bahin [role] niini sa proseso sa paghinulsol.
Pagpasaylo
-
Pagmapainubsanon ug ilha nga ang tanan, bisan mga ginikanan, mahimong masayop.
-
Paghinumdom kon unsay inyong naganahan pag-ayo niadtong nakapasakit o nakapasilo kaninyo.
-
Pag-ampo alang sa panabang sa pagpasaylo sa uban.
Pagtahud
-
Pagtahud sa inyong mga ginikanan.
-
Ayaw pagsulti og bati o dili mabination ngadto sa bisan kinsang sakop sa inyong pamilya.
-
Pagtan-aw sa positibong mga kinaiya sa kada sakop sa pamilya. Ipakigbahin kanila kon unsay inyong naganahan pag-ayo kanila.
Gugma
-
Pag-ampo alang sa gugmang putli—ang gugma sa Manluluwas—para sa mga sakop sa inyong pamilya.
-
Pagpangita og mga pamaagi sa pagserbisyo sa inyong pamilya.
-
Pagsulat og mubong mga sulat sa pagdasig ug gugma. Itago kini sa bawnanan sa pagkaon, mga bulsa, o mga pitaka sa inyong sakop sa pamilya aron makit-an unya nila.
Kalooy
-
Pagdasig sa mga sakop sa pamilya sa pagpakigbahin sa ilang mga pagbati ug pagpaningkamot sa pagsabut sa usag usa.
-
Paghupay sa usag usa panahon sa kalisud ug pagtinabangay sa kalisud sa usag usa (tan-awa sa Mosiah 18:8–9).
Buhat
-
Pagboluntaryo nga moandam sa pagkaon para sa pamilya.
-
Pagtabang sa mga buluhaton sa balay, sama sa pag-ibut sa mga sagbut, pag-guna sa tanaman, o paglimpyo sa mga bintana.
-
Pagtabang sa inyong mga igsoon sa ilang assignment sa eskwelahan.
Maayong Makalingaw nga mga Kalihokan
-
Pagtabang sa pagplano sa mga outing, bakasyon sa pamilya, o sa mga kalihokan nga mahimong makalingaw sa inyong pamilya.
-
Pagpadaplin sa mga elektronik nga gamit. Pagnga ang TV ug uban pang elektronik nga mga gamit kon kauban ang inyong pamilya.
Mga Kasinatian sa Kabatan-onan
Kami nangutana sa pipila ka mga batan-on kon sa unsang paagi ilang gigamit kining mga baruganan sa ilang kaugalingong pamilya. Ania ang ilang gisulti kabahin sa ilang mga kasinatian:
Hugot nga Pagtuo
Gipili nako nga ihan-ay ang duha ka sunod-sunod nga mga family home evening, magtutok kabahin sa hugot nga pagtuo. Gisugdan nako pinaagi sa pag-andam sa mga leksyon ug pagkat-on sa mga chord diha sa gitara para sa mga awit nga among kantahon.
Ang unang leksyon kabahin sa hugot nga pagtuo. Gipangutana nako kon unsay among usabon isip pamilya aron molambo ang among pagtuo. Sila mitubag, “Pag-ampo, pagtuon sa kasulatan, pagpuasa, pagsimba,” ug uban pa. Kami nagkauyon nga adunay daghang butang nga inyong mahimo aron molambo ang inyong pagtuo, apan ang pinakaimportante nga butang mao ang pagbuhat gyud niini. Importante kaayo nga molihok aron sa paglig-on sa inyong pagtuo.
Ang ikaduha nga leksyon mao ang kabahin sa espirituhanong mga gasa. Kami naghisgot kon unsay relasyon sa hugot nga pagtuo ug sa espirituhanong mga gasa.
Maayo kaayo ang nahitabo sa among mga family home evening nga kabahin sa hugot nga pagtuo. Among gipalambo ang pipila ka butang sa among pamilya; kami nalingaw ug wala magdali-dali aron kini mahuman dayon. Among nabati ang Espiritu isip pamilya.
Riza S., 16 anyos, Roskilde, Denmark
Pag-ampo
Mihukom ko sa paggamit sa akong hugot nga pagtuo pinaagi sa pag-ampo ug paghangyo sa Dios og panabang ug giya. Sa sinugdanan wala ko makaamgo sa epekto sa akong mga pag-ampo, apan human sa pipila ka adlaw akong nakaplagan nga kami mas malinawon sa panimalay.
Apan gihagit ang akong hugot nga pagtuo. Ang akong kinamanghuran nga lalaki nasakit ug kinahanglan nga operahan dayon, usa sa akong mga higala nasakit pud og maayo, ug ang akong inahan nagkasakit sa tutunlan uban sa taas nga hilanat. Kining makahahadlok nga mga panghitabo nakapawala sa mga pagbati sa kalinaw sa akong palibut. Nagguol ko pag-ayo apan nagpadayon sa pag-ampo. Akong nahinumduman ang paborito nga balak sa akong lola, nga nag-ingon nga mas nasayud ang Dios kay kanato ug kita kinahanglang mosalig Kaniya. Busa akong gisugdan nga mas gamiton ang akong hugot nga pagtuo ug himoon ang tanan kutob sa akong mahimo. Dili ra kaayo dugay ang akong igsoon nga lalaki nakagawas na sa ospital. Ang akong higala wala gyud ingon nga nasakitan sama sa una kining makita. Naayo na ang akong mama.
Karon kon mag-ampo ko para sa uban, mag-ampo ko nga mas nakatutok ug mas may hugot nga pagtuo kaysa kaniadto. Kita kinahanglang adunay hugot nga pagtuo sa Dios, ilabi na kon ang pagtuo Kaniya ug sa Iyang mga plano lisud, ug ayaw og reklamo kay Siya nasayud sa unsay pinakamaayo.
Jarom K., 18 anyos, Graz, Austria
Paghinulsol
Nakaamgo ko sa kadako sa epekto sa paghinulsol sa tanang butang. Sama pananglit, sulod sa pipila ka bulan nagpakasala ko ug wala maghinulsol niini, ug naglisud ko sa pag-usab niini nga gawi. Apan human makig-istorya sa bishop ug ubang suod nga mga higala, akong gisunod ang proseso sa paghinulsol ug mibati nga mas duol sa Dios ug mas nagmalipayon pag-usab. Sa pag-ampo og maayo ug paggahin og daghang panahon sa pagbasa sa kasulatan, nakaamgo ko nga kinahanglan nakong usabon ang pipila ka bahin sa akong kinabuhi. Nakaamgo ko karon kon unsa ka dako ang akong kalamboan tungod niini. Pinaagi niini nga kasinatian mas nasuod nako ang akong inahan ug amahan.
Bisan tuod aduna gihapoy mga tintasyon ug makasala gihapon ko, ako makadangop sa Pag-ula sa Manluluwas aron sa paghinulsol ug sa pagribyu sa akong nahimo kada adlaw ug sa pagpaningkamot kanunay nga molambo. Ako mahangturong mapasalamaton sa Pag-ula sa akong kinabuhi.
Billy P., 17 anyos, Ipswich, England
Trabaho
Tungod kay akong gikonsiderar ang family history isip matang sa trabaho, mihukom ko sa pagbuhat og akong libro sa family history. Busa akong gitigom ang tanang mga litrato sa mga sakop sa akong pamilya. Ako kining gibuhat aron ang akong mga anak ug mga apo sa tuhod makakita kon unsay hitsura sa ilang mga katigulangan. Ug samtang ako kining gibuhat, mibati ko nga malinawon kaayo tungod kay ako nasayud nga wala ni nako buhata para sa akong kaugalingon, apan ako kining gibuhat para sa mga henerasyon nga moabut.
Glory S., 18 anyos, Johannesburg, South Africa
Maayong Makalingaw nga mga Kalihokan
Ang akong unang paningkamot sa paghimo og makalingaw nga mga kalihokan uban sa akong mga igsoon dili nindot. Apan ang nakausab sa akong panglantaw mao ang pagbiyahe ngadto sa Blue Ridge Mountains. Nagkadaiya ang mga kolor sa dahon, ang amusement park makalingaw, apan may mga higayon nga makasulti og sakit nga mga pulong, hinakog nga mga lihok, ug sayop nga pagsungog-sungog nga nakapawala sa kadasig. Sa wala pa kami mobiya, ang akong igsoong babaye ug ako misaka sa bungtod ug dayon hilom nga naglingkod samtang kami naminaw sa kinaiyahan sa among palibut. Mao kadto ang unang higayon sa taud-taud nang panahon nga nagtupad kami nga wala mag-away, hinay nga naghisgot sa umaabut nga mga adlaw ug sa kasamtangang mga panlimbasog. Mabati ang Espiritu, nagdala og kalinaw nga ako nang nalimtan.
Misugod ko sa pagpangita og paagi nga makaistorya ang akong mga igsoon, nangumusta sa ilang adlaw, mogakos kanila—mahimong kabahin sa ilang kinabuhi. Akong gitabangan ang akong kinamanghuran, autistic nga igsoong lalaki sa iyang homework. Akong gitabangan ang akong kinamanghurang babaye sa paghimo og mga grammar flash card ug paghimo og makapatawa nga mga rhyme aron sa pagmemorya sa lain-laing parts of speech. Sa iyang sunod nga pasulit misaka ang iyang grado og sobra sa 20 puntos ug nakadawat sa iyang pinakataas nga grado. Ang kalipay nga akong nabati gikan niadtong mga higayona lahi ug mas makahuluganon kaysa akong gidahom.
Ang makauban ang pamilya mahimong lisud, apan sa mga panahon nga sama niini angay lang kini. Kadtong mubo nga mga hitabo misangput sa kalingaw, pagdula ug pagkatawa; ug mibati ko og bag-ong pagkahiusa sa akong pamilya.
Emily C., 17 anyos, North Carolina, USA
Mga Leksyon sa Dominggo
Hilisgutan Niining Bulana:
Kaminyoon ug Pamilya