Makaangkon ba Ako og Basahon ni Mormon?
Joni Hilton, California, USA
Akong gihabwaan ang akong bag, ug sa ilawom uban sa akong boarding pass, mao ang isyu sa Ensign.
Sa akong pagsulod sa airport sa akong pagpauli gikan namisita sa karaang mga higala, ako mibati og kahigawad nga wala ko mopakigbahin sa ebanghelyo niini nga biyahe. Pirme kong magdala og Basahon ni Mormon sa akong bag aron sa pagpahinumdom nako sa pag-ampo alang sa usa ka tawo nga akong mahatagan niini, apan kanunay kini anaa sa bag. Kini nga biyahe lain na usab nga kapakyasan.
Miginhawa ko og lawom ug nag-ampo sa hilom sa pagpangayo og pasaylo. Mibati ko nga sama sa usa ka terible nga misyonaryo.
Samtang nag-aginod ko sa security line, nadasig ko sa pagpakigsulti sa usa ka babaye nga nag-una kanako. Nag-istorya mi mahitungod sa among destinasyon ug dayon nagbulag sa lain-laing mga linya. Samtang nagpadulong ko sa akong pultahan, akong nakita ang mao gihapon nga babaye. “Oh, hi na sab,” miingon siya. “Nindot nga nagkita ta!”
Nangutana ko niya kon kanus-a mobiya ang iyang biyahe. “Ah, dugay pa—sayo kaayo ko.”
“Nan, dali ug tupad nako!” Miingon ko.
Duna pa koy 45 minutos sa dili pa ang boarding, maong nanglingkod mi ug nag-istorya kabahin sa among trabaho. Akong gihisgutan ang pipila sa akong mga sinulat alang sa Santos sa Ulahing mga Adlaw, ug kalit misanag ang iyang nawong.
“Ikaw usa ka Mormon?” nangutana siya. “Gusto ko nga masayud og dugang mahitungod sa Mormons. Unsaon nako nga makaangkon og kopya sa Basahon ni Mormon?”
“Maayo,” miingon ko, miabli sa akong bag, “dia koy usa diri.”
“Oy,” siya miingon. “Sa akong hunahuna gikatakda nga magkita kita karon.”
Napuno sa pasalamat ang akong kasingkasing. Sa dihang nangutana siya kon unsay nakapalahi sa mga Santos sa Ulahing mga Adlaw gikan sa ubang mga relihiyon, akong gibati nga gigiyahan unsay isulti.
Giingnan nako siya nga dunay mga misyonaryo nga mokontak kaniya, ug dayon gipahibalo nga mag-boarding na. Giablihan nako ang akong bag aron pagkuha sa akong boarding pass apan wala nako makit-i. Akong gihabwaan ang akong bag. Didto, sa ilawom uban sa boarding pass, ang isyu sa kinatibuk-ang komperensya sa Ensign! Gihatag nako kini ngadto kaniya ug nagpasalamat sa Ginoo nga nangita ko sa akong boarding pass. Miingon siya nga sa kasagaran magdala siya og basahunon apan mibati nga dili lang usa niining higayona.
“Mao tingali aron ako makabasa niini,” miingon siya. Samtang naggunit sa akong boarding pass, gigakos nako siya ug nanamilit.
Karon mag-istorya mi kada semana, ug siya mosulti nako sa iyang pagpakigsulti uban sa mga sister nga misyonaryo. Usa ka tuig na, ug ako naglaum sa umaabut nga adlaw nga makakita niya nga mabunyagan. Wala ko masayud kon kana mahitabo, apan mahibulong gihapon ako sa gihimo sa Langitnong Amahan sa pagtabang nga magsugat ang among mga dalan. Nagpasalamat ko Kaniya sa pagdungog sa akong pag-ampo ug sa paghatag kanako sa yanong oportunidad sa pagpakigbahin sa Basahon ni Mormon.