Para sa Gagmayng mga Bata
Si Clara ug ang Programa sa Primary
Ang tagsulat nagpuyo sa Colorado, USA.
Si Clara ug ang iyang pamilya bag-o lang nabunyagan. Si Clara ganahan momata sa Dominggo ug makigdungan og simba.
Usa ka Dominggo ang presidente sa Primary miingon nga adunay usa ka programa sa Primary sa dili madugay. Wala makasiguro si Clara kon unsa ang programa sa Primary. Apan siya nasayud nga siya gusto nga moapil niini.
“Mahimo bang mobasa ka og kasulatan ug mopamatuod sa programa sa Primary?” nangutana ang iyang magtutudlo.
Si Clara mitando. Ganahan siya! Gusto siya nga makat-on kutob sa iyang mahimo mahitungod sa ebanghelyo. Apan nakulbaan usab siya. Unsa kaha kon makahimo siya og sayop?
Nagpraktis si Clara sa iyang bahin matag gabii. Wala pa siya masayud sa tanan nga mga pulong sa kasulatan.
“Makamao lagi ka,” miingon si Mama.
Dili kaayo sigurado si Clara. Kini mao ang iyang unang programa sa Primary. Ang ubang mga bata nakabuhat na niini kaniadto.
“Hinumdumi, kon buhaton nimo ang imong labing maayo, ang Langitnong Amahan mobuhat sa uban,” si Papa misulti kaniya.
Sa gabii sa wala pa ang programa, nag-ampo si Clara alang sa tabang sa pagbuhat sa iyang labing maayo. Nagpabilin siyang nagluhod ug naghunahuna kabahin sa iyang bahin. Mibati siya og nindot kabahin niini.
Pagka-Dominggo sa buntag nag-ampo si Clara nga siya dili mahadlok.
Sa dihang iyaha na nga turno, mipaingon si Clara sa atubangan. Nakalimot siya sa usa ka pulong sa kasulatan. Apan nakahinumdom dayon siya kon unsa ka nindot ang iyang gibati human sa iyang pag-ampo. Mipahiyom siya ug mipamatuod. Gihisgutan niya kon unsa niya kamahal ang Manluluwas.
Nagpahiyom si Clara samtang siya milingkod og balik. Nasayud siya nga ang Langitnong Amahan wala magsapayan nga wala niya masulti sa hingpit ang tanan. Naghunahuna Siya kon unsa ang anaa sa iyang kasingkasing.
Mga paghulagway pinaagi ni Kristin Kwan