Unsa ang Atong Gituohan
Kita Nagtuo sa Pagkamapainubsanon
“Ang mga mapahitas-on mas mahadlok sa hukom sa mga tawo kaysa hukom sa Dios. ‘Unsay hunahuna sa mga tawo ngari nako?’ mas bug-at kaysa ‘Unsay hunahuna sa Dios ngari kanako?’”—Presidente Ezra Taft Benson
Sa dihang kita namiyembro sa Simbahan ni Jesukristo, kita naghimo og pakigsaad nga kanunay mohinumdom Kaniya, modala sa Iyang ngalan, ug mosunod sa Iyang kasugoan (tan-awa sa D&P 20:77). Ang bisan unsang sala makapugong nato sa pagtuman niining pakigsaad, apan adunay usa ka sala, labaw sa tanan, nga kinahanglan natong likayan kay kini makapasangput sa ubang mga sala: garbo.
“Kadaghanan nato naghunahuna sa garbo isip paghunahuna lang sa kaugalingon, pagkagarbuso, pagkahambugero, pagkaarogante, o pagkamapalabi-labihon,” mitudlo si Presidente Ezra Taft Benson (1899–1994). “Kining tanan sala, apan ang pinakahulugan, o ang kinauyukan niini, kulang ra gihapon.” Siya miingon “ang klarong ebidensya nga anaa ang garbo mao ang pagdumot [kalagot]—pagdumot sa Dios ug sa atong isigkatawo.”1
Ang kalagot ngadto sa Dios “anaa sa diwa nga ‘ang akong pagbuot ug dili Iyang kabubut-on ang matuman.’ … Ang mga mapahitas-on dili makadawat nga ang awtoridad sa Dios ang modumala sa ilang kinabuhi. … Ang mga mapahitas-on nanghinaut nga ang Dios mouyon kanila. Dili sila ganahang mousab sa ilang mga opinyon aron mauyon sa Dios.”2
Ang pagdumot ngadto sa atong isigkatawo makita sa daghang paagi: “pagpangita og sayop, pagpanglibak, pagreklamo, pagpakabuhi sobra sa atong kapanguhaan, kasina, kaibog pugngan ang pagpasalamat ug pagdayeg nga makabayaw sa uban, ug dili mapasayloon ug kamasinahon.”3
Ang garbo makapugong sa atong kalamboan, makapasakit sa atong mga relasyon, ug maka-limit sa atong pagserbisyo. Si Presidente Benson misugyot niining solusyon: “Ang panagang sa garbo mao ang pagkamapainubsanon—pagkamaaghup, pagkamanunuton. Kini ang mapainubsanon nga kasingkasing ug mahinulsulon nga espiritu.”4 Siya mitudlo nga ang “pagkamapainubsanon mosunod sa kabubut-on sa Dios—sa kahadlok sa Iyang paghukom ug sa panginahanglan niadtong naglibut kanato. … Atong pilion ang pagpaubos.”5
Ang mosunod nga mga paghulagway nagpakita sa mga pamaagi kon unsaon nato nga magmapainubsanon.
Kita makapakita og kamapainubsanon pinaagi sa:
Pagdawat og tambag ug pagkorihir.
Pagserbisyo nga dili maghunahuna sa kaugalingon.
Pagserbisyo og misyon.
Paghimo sa buhat sa family history ug kanunayng pagtambong sa templo.
Pag-ampo nga kinasingkasing.
Gikan sa Mga Pagtulun-an sa mga Presidente sa Simbahan: Ezra Taft Benson (2014), 286–88.
Mga paghulagway pinaagi ni David Habben