Dalha Siya Dayon sa Ospital!
Gayle Y. Brandvold, California, USA
Si Anita miingon nga maayo ra siya, apan mipalayo ko sa kilid sa iyang higdaanan, miluhod ug nag-ampo.
Dili pa ko minyo ug may negosyo sa dihang bag-o ko nga miyembro sa Simbahan, busa may mga adlaw nga aduna koy libreng oras. Sa usa niadtong mga adlawa gitawagan nako ang presidente sa Relief Society ug nangutana kon aduna bay nanginahanglan og tabang nianang hapona. Siya naghisgot sa usa ka tigulang nga sister nga ginganlan og Anita (ang ngalan giusab) kinsa bag-ohay lang nauli gikan sa ospital ug nag-inusara. Ako nang nahimamat si Anita kaniadto ug ikalipay ko nga mobisita kaniya.
Ako siyang gitawagan ug dayon miadto sa iyang apartment. Iya ko nga gihangyo sa pag-andam og paniudto alang niya, ug pagkahuman nindot ang among panag-istorya. Siya maayo nga mopakatawa ug ganahang mokatawa ug maghisgot sa iyang kinabuhi.
Human sa paniudto siya miingon nga gikapoy siya ug mihangyo nga tabangan siya nga mobalhin gikan sa wheelchair ngadto sa higdaanan. Wala madugay nabalhin nako siya sa higdaanan. Sa kalit lang, ang ligdong, hinay nga tingog klaro nakong nadungog: “Dalha siya karon dayon sa ospital!”
Dili ganahan si Anita ngadto sa ospital ug bag-ohay lang miuli. Nangutana ko kon OK ra iyang pamati. Siya miingon nga maayo ra siya apan gibati og kakapoy.
Mipalayo ko sa kilid sa iyang higdaanan ug miluhod. Sa dihang mag-ampo na unta ko, misubli ang tingog, “Dalha siya sa ospital, ug dalha siya karon dayon!”
Nagduha-duha ko, nagpangutana sa akong kaugalingon, “Unsa may akong isulti sa doktor didto sa ospital?”
Mitawag ko og higala, kinsa nag-ampo usab ug dayon misulti nako nga sundon nako ang pag-aghat.
Si Anita nasuko nga ako siyang gisultian nga dalhon nako siya sa ospital, apan mitawag gihapon ko og ambulansya. Sa pag-abut niini, duha ka paramedic misulod ug misusi sa iyang mga vital sign. Walay pagpangutana, siya ilang gibutang sa usa ka may ligid nga stretcher [gurney] ug daling gidala sa ambulansya.
Ako nagsunod sakay sa van. Sa pag-abut sa ospital, milingkod ko ug nagpaabut. Sa wala madugay migawas ang doktor. Siya nangutana nako, “Wala siya mosulti nimo nga siya natagak sa wala pa ka moabut sa iyang apartment, dili ba?”
“Wala,” mitubag ko.
Siya miingon nako nga nadaut ang iyang spleen ug nagdugo sa sulod. Kon wala pay dinaliang pagtagad sa medikal, miingon ang doktor, siya mahimong mamatay.
Mibati ko og sagol nga pagbati sa pagbasol ug kalipay—pagbasol kay nagduhaduha ko ug kalipay kay sa katapusan naminaw ko sa Espiritu Santo. Labaw sa tanan, mapasalamaton ko sa pagkasayud nga ang Ginoo misalig nako sa pagtabang niining nasakitan nga sister ug midasig sa akong presidente sa Relief Society nga ipadala ko ngadto kaniya.
Ako usab may sakit sa akong panglawas sukad niining kasinatian, apan ang Ginoo nag-aghat gihapon nako. Kanunay ko nga nag-ampo og kalig-on sa pagsunod niadtong mga pag-aghat.