Misyon o Kwarta?
Ang tagsulat nagpuyo sa Ceará, Brazil.
Walay kantidad sa kwarta ang makatupong sa mga panalangin nga makakita sa mga pamilya nga nag-andam sa pag-adto sa templo ug sa pagpabugkos.
Paghulagway pinaagi ni David Malan
Usa ka tuig human nahimong miyembro sa Ang Simbahan ni Jesukristo sa mga Santos sa Ulahing mga Adlaw, gipadala nako ang akong mga papeles aron moserbisyo isip full-time nga misyonaryo. Ang akong pamilya hingpit nga nagdumili nga ako moserbisyo og misyon ug naghunahuna hinoon nga ako kinahanglang mokuha sa akong master’s degree. Bag-o lang kong nakahuman sa akong bachelor’s degree, ug pangandoy nako nga makakuha og master’s degree kon mahuman na ko. Ang akong mga propesor andam usab motabang nako tungod kay ako usa ka maayong estudyante.
Samtang nangandam ko sa pagbiya alang sa akong misyon, naglisud pag-ayo ang akong pamilya sa kwarta. Ang akong kinamagulangan nga lalaki nawad-an sa iyang trabaho. Sa wala madugay ang kompanya nga gitrabahoan sa akong amahan sulod sa daghang mga tuig nagkalisud, ug siya nataktak sa trabaho. Ang akong amahan miggamit sa iyang tanang mga benepisyo sa gobyerno sa pagtabang sa akong lola, ug usa ka gabii akong nakita siya nga naghilak tungod kay siya wala masayud kon unsaon sa pagsuporta sa pamilya.
Nianang higayona, ako nakadawat og usa ka scholarship sa unibersidad nga hapit mokatunga sa minimum nga sweldo. Kon makadawat ko sa akong bayad, kanunay nakong unahon ang pagbayad sa akong ikapulo. Apan sa dihang akong nadawat ang akong labing bag-o nga bayad human mawad-i sa trabaho ang akong amahan, ang akong inahan mihangyo nako nga dili mohatag og kwarta ngadto sa Simbahan tungod kay gikinahanglan namo kini sa balay. Giingnan nako siya bahin sa ikapulo ug sa kaimportante niini ug mipakita kaniya sa mga saad nga gihatag sa Ginoo sa Malaquias 3:10. Bisan tuod wala siya malipay, mibayad ko sa akong ikapulo ug nasayud ko nga kini maoy sakto.
Samtang nagpadayon ko sa pag-andam sa akong misyon, miapil ko sa usa ka kompetisyon sa usa ka lokal nga unibersidad sa pagsuta kon unsay akong mahimo. Nakapasar ko ug gitanyagan og usa ka posisyon diin ako makasweldo og hapit sa samang kantidad sa kwarta nga kinitaan sa akong amahan sa iyang trabaho. Kini igo na nga makasuporta sa akong pamilya hangtud ang akong amahan makaretiro. Ang akong pamilya naglaum nga akong dawaton ang trabaho.
Ako nag-ampo og kadaghan, ug ang Ginoo mitubag nga ako kinahanglan nga magmisyon. Misalig ko Kaniya ug midawat sa akong call ngadto sa Brazil Santa Maria Mission. Ang Ginoo mipanalangin sa akong pamilya samtang ako didto sa akong misyon. Ako nasayud nga ang mga tamboanan sa langit gibuksan (tan-awa sa Malaquias 3:10). Ang akong amahan ug igsoong lalaki nakakita og trabaho pag-usab, ug ang pamilya nakahimo sa pagbuhi og gatasan nga mga baka alang sa dugang nga kinitaan.
Ang akong pagpamatuod ni Jesukristo ug sa Iyang buhat milambo, ug nagtan-aw sa hingpit nga kalipay sa mga nawong ug sa kausaban sa mga kasingkasing niadtong akong giserbisyuhan usa ka butang nga bililhon kaayo alang nako. Walay kantidad sa kwarta ang makatupong sa mga panalangin nga makakita sa mga pamilya nga nag-andam sa pag-adto sa templo ug sa pagpabugkos.