Hangtud sa Sunod Natong Panagkita
Siya Mitudlo Kanako sa Langitnong Han-ay sa Kahangturan
Gikan sa Autobiography of Parley P. Pratt (1979), 297–98.
Ako karon makahigugma uban sa espiritu ug makasabut usab.
Detalye gikan sa Joseph Smith and His Friends, ni William Warner Major, sa maayong kabubut-on sa Church History Museum
Sa Philadelphia nalipay ko sa makausa pa sa pakigmiting uban ni Presidente [Joseph] Smith, ug sa paggahin og pipila ka adlaw uban kaniya ug sa uban, ug uban sa mga Santos niana nga dakbayan ug lugar.
Atol niini nga mga interbyu mitudlo siya nako og daghan nga mahinungdanon ug mahimayaon nga mga baruganan mahitungod sa Dios ug sa langitnong han-ay sa kahangturan. Mao kining higayona nga akong nadawat gikan kaniya ang unang ideya sa mahangturon nga organisasyon sa pamilya, ug ang mahangturong panaghiusa sa mga lalaki ug babaye niadtong maanindot nga pakigrelasyon sa hilabihan nga gugma nga ang mga intelihente, ang lunsay ug putli og kasingkasing ra ang kahibalo magmanggad, ug diin mao ang pundasyon sa tanang takus nga tawgon og kalipay.
Hangtud niana nakat-on ko nga ikonsiderar ang mga pagbati ug pagsimpatiya niadtong akong gimahal nga kalabut lamang niining mortal nga kinabuhi, nga kinahanglang atong makat-unan nga ilahi ang atong kaugalingon, aron kita makaandam sa pagpuyo sa langitnong kahimtang.
Si Joseph Smith ang nagtudlo kanako unsaon sa pagmanggad sa maanindot nga mga relasyon sa amahan ug inahan, bana ug asawa; sa mga igsoon, anak nga lalaki ug anak nga babaye.
Gikan kaniya nga ako nakakat-on nga ang asawa nga akong gimahal mahimo nga mahiusa kanako sa karon ug hangtud sa kahangturan; ug nga ang lunsay nga mga simpatiya ug mga pagbati nga nakahimo namo sa paghigugmaay sa usag usa nagagikan sa tubod sa balaanong mahangturon nga gugma. Gikan kaniya nga ako nakakat-on nga kita mahimo nga makaugmad niini nga mga pagbati, ug motubo ug molambo sa gihapon hangtud sa kahangturan; samtang ang resulta sa atong walay katapusan nga panaghiusa mao ang mga anak nga sama sa gidaghanon sa mga bitoon sa langit, o sa mga balas sa baybayon sa dagat.
Gikan kaniya nga ako nakakat-on sa tinuod nga kaligdong ug padulngan sa anak sa Dios, gisul-uban sa mahangturon nga priesthood, isip patriyarka ug tigmando sa iyang dili maihap nga mga anak. Gikan kaniya nga akong nakat-unan nga ang labing taas nga kaligdong sa pagkababaye mao, ang pagbarug isip usa ka rayna ug pari nga babaye sa iyang bana, ug sa pagmando sa kahangturan isip inahan nga rayna sa iyang daghan ug magkadaghan nga mga anak.
Nahigugma ako kaniadto, apan wala ko masayud kon ngano. Apan karon ako nahigugma—uban sa kaputli—hilabihan ka taas, nahimaya nga pagbati, nga mobayaw sa akong kalag gikan sa temporaryo nga mga butang sa kalibutan ug mopalapad niini sama sa dagat. Mibati ko nga ang Dios mao gayud ang akong langitnong Amahan; nga si Jesus mao ang akong igsoong lalaki, ug nga ang akong asawa usa ka imortal, mahangturong nga kompanyon; usa ka mabinationg tigpangalagad nga anghel, gihatag ngari kanako isip usa ka kahupayan, ug korona sa himaya sa kahangturan. Sa laktud, ako karon makahigugma uban sa espiritu ug uban sa pagsabut usab.