Mga Disipulo ug Pagdepensa sa Kaminyoon
Gikan sa pakigpulong sa gradwasyon sa BYU, “Disciples of Christ—Defenders of Marriage,” nga gihatag niadtong Agosto 24, 2014. Alang sa kompleto nga teksto sa Iningles, bisitaha ang speeches.byu.edu.
Ang mga disipulo sa Ginoo mao ang tigdepensa sa tradisyonal nga kaminyoon. Dili kita motugot. Ang atong kaliwatan dili mao ang atong maghuhukom. Ang kalibutanong katilingban dili mao ang atong maghuhukom. Ang Dios mao ang atong maghuhukom!
Paghulagway sa litrato pinaagi sa SychuginaElena/iStock/Thinkstock
Adunay talagsaon nga gahum sa lig-ong pakigparis. Ang tinuod nga paris mas daghang makab-ut kaysa maglihok nga mag-iya-iya. Uban sa tinuod nga paris, ang usa dugangan og usa sobra pa kaysa duha. Sama pananglit, si Dr. William J. Mayo ug iyang igsoon, si Dr. Charles H. Mayo, mitukod sa Mayo Clinic. Ang mga abogado ug ang uban pa moporma og importanting pakigparis. Ug sa kaminyoon, ang bana ug asawa moporma sa pinakaimportanting pakigparis sa tanan—mahangturong pamilya.
Ang lig-ong kalamboan sa bisan unsang paningkamot mag-agad sa pagtinabangay ug pakigsabut. Ang talagsaong mga lider ug paris nakapalambo og mga kahanas sa pagpakigbahin og mga ideya ug paningkamot ug sumbanan sa pag-uyon sa tanan. Ang talagsaong mga paris hingpit nga mag-unungay. Ilang pugngan ang ilang personal nga garbo agig baylo alang sa pagkahimong kabahin sa usa ka butang nga mas dako pa kaysa ilang kaugalingon. Ang talagsaong pakigparis mosalig sa usag usa sa pagpalambo sa ilang mga kinaiya.
Mga Magbalantay sa Hiyas
Karon ingon og akong panahon sa pagtambong sa mga haya. Nakasaksi ko og daghang pamilya nga nanamilit sa ilang gimahal ug kang kinsa sila nabugkos. Kanunay mobiya ko sa mga haya nga naghunahuna, “Unsay akong gusto nga ilang isulti kabahin nako sa akong haya?”
Dili kini sayo kaayo sa inyong kinabuhi nga mangutana sa samang pangutana. Unsay inyong gusto nga ilang isulti kabahin ninyo sa inyong haya?
Unta masulti nga kamo buotan nga bana ug amahan o buotan nga asawa ug inahan, nga kamo usa ka tawo nga may integridad, nga kamo mabination ug mapailubon, nga kamo mapainubsanon ug kugihan, ug nga kamo usa ka tawo nga may hiyas.
Ang pinakamaayong magbalantay sa tanang hiyas mao ang kaminyoon ug pamilya. Ilabi na gyud sa hiyas sa kaputli ug kamaunungon, kining duha gikinahanglan aron makamugna og makalahutay ug hingpit nga magantihong pakigparis sa kaminyoon ug relasyon sa pamilya.
Ang lalaki ug babaye gimugna para sa unsay ilang mabuhat ug mamahimo—nga silang duha. Kinahanglan og lalaki ug babaye aron makabaton og anak dinhi sa kalibutan. Ang mga inahan ug amahan dili mahimong magkabali. Ang mga lalaki ug babaye managlahi ug mohingpit sa usag usa. Ang mga bata angayan nga magtubo uban sa usa ka inahan ug usa ka amahan.1
Kamo makasugat og nagkadaghang debate sa kahulugan sa kaminyoon. Daghan sa inyong mga silingan, kauban sa trabaho, ug higala wala makadungog sa nahan-ay ug dinasig nga mga kamatuoran kabahin sa kaimportante sa kaminyoon sama sa gipasabut Mismo sa Dios. Kamo adunay daghang oportunidad sa paglig-on sa pagpasabut sa habig sa Ginoo kabahin nianang argumento pinaagi sa kaanindot sa inyong ehemplo, isip indibidwal ug isip pamilya.
Si Apostol Pablo nanagna sa atong kahimtang sa dihang siya miingon:
“Sa kaulahiang mga adlaw managpangabut ang mga panahon nga malisud.
“Kay ang mga tawo unya magamahigugmaon man sa ilang kaugalingon, mga hinapi, tigpagawal, hambugiro, tampalasan, masukihon sa mga ginikanan, walay igabalus, dili diosnon,
“Walay pagbati sa paghigugma, dili malukmay, tigbutang-butang, … dili mahigugmaon sa maayo,
“… nga nagahigugma sa kalipayan inay sa Dios.”
Dayon iyang gitapos: “Likayi kining maong mga tawhana” (2 Timoteo 3:1–5).
Human sa iyang talagsaong panagna sa atong panahon, si Pablo midugang niining pasidaan: “Sa pagkatinuod, pagalutuson gayud hinoon ang tanan nga nagatinguha sa diosnon nga pagkinabuhi diha kang Kristo Jesus” (2 Timoteo 3:12).
Pamalandungi kana! Kini nagpasabut nga niining malisud nga panahon, ang kinabuhi dili hayahay para sa mga tinuod nga mga disipulo ni Ginoong Jesukristo. Apan anaa kanato ang Iyang pagtugot. Siya mihatag nato niining pasalig: “Ug bulahan silang tanan kinsa gigukod alang sa kaayohan sa akong ngalan, kay ila ang gingharian sa langit” (3 Nephi 12:10).
Buot ipasabut, isip mga disipulo, kitang tanan pagasulayan. Bisan kanus-a, kita adunay pribelihiyo sa pagpili tali sa husto ug sayop. Kini dugay na kaayong gubat nga gisugdan sa kinabuhi sa wala pa dinhi sa yuta. Ug kana nga gubat nga nagkagrabe kada adlaw. Ang inyong indibidwal nga kalig-on sa kinaiya gikinahanglan gyud kaayo karon.
Walay Part-Time nga mga Disipulo
Dili na panahon nga kamo mahimong hilom ug hayahay nga Kristiyano. Ang inyong relihiyon dili lang kabahin sa pagsimba ma-Dominggo. Kini kabahin sa pagpakita isip tinuod nga disipulo gikan sa Dominggo sa buntag hangtud Sabado sa gabii—24/7! Wala gayud kanang part-time nga disipulo sa Ginoong Jesukristo.
Si Jesus nagdapit sa tanan kinsa gusto nga mahimo Niyang mga disipulo nga dalhon ang iyang krus ug mosunod Kaniya (tan-awa sa Mateo 16:24; Marcos 8:34; D&P 56:2; 112:14). Andam na ba kamo nga moapil sa pundok? O inyo ba nga ikaulaw ang ebanghelyo? Inyo ba nga ikaulaw ang inyong Ginoo ug Iyang plano? (tan-awa sa Mormon 8:38). Mosunod ba kamo sa mga ideya sa uban kinsa nag-agni kaninyo nga mouyon sa sikat nga mga pilosopiya karon?
Dili! Ang mga batan-on sa Zion dili mapakyas! Nagtuo ko nga kamo magmaisugon ug mosangyaw sa kamatuoran sa Dios nga may kaklaro ug kamabination, bisan kon ang Iyang kamatuoran dili sikat! Gihan-ay ni Pablo ang sundanan sa dihang siya mideklarar, “Wala ko igakaulaw ang Maayong Balita: kay kini mao ang gahum sa Dios alang sa kaluwasan sa matag usa nga nagatuo” (Mga Taga-Roma 1:16; tan-awa usab sa 2 Timoteo 1:8).
Ang mga disipulo sa Ginoo mao ang tigdepensa sa tradisyonal nga kaminyoon. Dili kita motugot. Ang atong kaliwatan dili mao ang atong maghuhukom. Ang kalibutanong katilingban dili mao ang atong maghuhukom. Ang Dios mao ang atong maghuhukom! Para kanato, ang Adlaw sa Paghukom mahitabo sumala sa pamaagi ug panahon sa Dios (tan-awa sa Mga Taga-Roma 2:5; Alma 33:22; Ether 11:20; D&P 88:104; 133:38).
Ang kaugmaon sa kaminyoon ug sa daghang kinabuhi sa tawo madeterminar sa inyong kaandam nga mopakigbahin sa balaang pagsaksi sa Ginoo ug magkinabuhi sumala sa Iyang ebanghelyo. Dakong proteksyon maanaa kanato kon kita magpaunlod diha sa katubigan sa bunyag ug mismo atong dalhon ang ngalan ni Jesukristo. Mipasabut si Haring Benjamin: “Ug karon, tungod sa pakigsaad diin kamo nakahimo kamo pagatawgon nga mga anak ni Kristo, iyang anak nga mga lalaki, ug iyang anak nga mga babaye; kay tan-awa, niining adlawa siya sa espirituhanon nga paagi nanganak kaninyo; kay kamo nag-ingon nga ang inyong mga kasingkasing nausab pinaagi sa hugot nga pagtuo diha sa iyang ngalan; busa, kamo natawo kaniya ug nahimo nga anak nga mga lalaki ug iyang anak nga mga babaye” (Mosiah 5:7; tan-awa usab sa bersikulo 8).
Nakadayeg ko sa pahayag ni Sister Sheri Dew, kanhi sakop sa kinatibuk-ang kapangulohan sa Relief Society, sa bag-ohay nga Brigham Young University Women’s Conference. Siya miingon: “Ang pinakamahinungdanong baruganan aron mahimong disipulo mao ang pagbuhat sa unsay atong gisaad kada higayon nga kita moambit sa sakrament—nga ‘kanunay mohinumdom’ sa Ginoo. Kini nagpasabut sa paghinumdom Kaniya kon kita mopilli unsang klase nga media nga andam kitang ipabantang ang atong espiritu. Kini nagpasabut sa paghinumdom Kaniya kon giunsa nato paggahin ang atong panahon ug kon kita mopili tali sa butang nga makapasikat o ang Pulong sa Dios. Kini nagpasabut sa paghinumdom Kaniya sa panahon sa panagsumpaki o sa grabe nga tintasyon. Kini nagpasabut sa paghinumdom Kaniya kon ang mga kritiko moataki sa Iyang Simbahan ug magbiay-biay sa kamatuoran. Kini nagpasabut sa paghinumdom nga atong gidala ang Iyang ngalan ngari kanato.”2
Ang mensahe ni Sister Dew nahiuyon sa mensahe ni Presidente Howard W. Hunter (1907–95), kinsa miingon: “Kon ang atong kinabuhi ug pagtuo nakasentro kang Jesukristo ug sa Iyang gipahiuli nga ebanghelyo, wala gayuy masayop. … Kon ang atong kinabuhi wala masentro sa Manluluwas ug sa Iyang mga pagtulun-an, walay kalampusan nga permanente gyud nga husto.”3
Pagsangyaw sa Kabubut-on sa Dios
Bisan asa kita moadto, kamo ug ako isip mga disipulo sa Ginoo nagdala og sagradong responsibilidad sa pagsangyaw sa kabubut-on sa Dios sa tanang katawhan. Ug sa usa sa labing mahagiton [demanding] nga mga oportunidad sa atong panahon mao ang pagbarug sa kamatuoran kabahin sa sagradong kinaiyahan sa kaminyoon.
Ang atong mensahe gideterminar sa balaanong doktrina, opisyal nga gidawat sa Biblia:
“Sa sinugdanan gibuhat sa Dios ang mga langit ug yuta” (Genesis 1:1).
“Ug gibuhat sa Dios ang tawo sa iyang kaugalingong dagway, sa dagway sa Dios gibuhat niya sila; lalaki ug babaye iyang gibuhat sila” (Genesis 1:27).
“Gipanalanginan sila sa Dios, ug … miingon ang Dios kanila, Sumanay, ug dumaghan kamo, ug pun-on ninyo ang yuta” (Genesis 1:28).
“Tungod niini ang lalaki magabiya sa iyang amahan ug sa iyang inahan, ug moipon siya sa iyang asawa: ug sila mahimong usa ka unod” (Genesis 2:24).
“Ug gihinganlan [ni Adan] ang ngalan sa iyang asawa si Eva; tungod kay siya mao ang inahan sa ngatanan nga adunay kinabuhi” (Genesis 3:20; tan-awa usab sa Moises 4:26).
Ang Dios mao ang Amahan sa tanang lalaki ug babaye. Sila Iyang mga anak. Siya ang mi-orden sa kaminyoon nga mao ang panaghiusa sa lalaki ug babaye. Ang kaminyoon wala gimugna sa tawhanong mga maghuhukom o magbabalaod. Kini wala gimugna sa mga grupo sa tigsiksik o sa pagbutar o sa kanunayng gikutlo nga mga blogger o mga pundit [mga kritiko sa hilisgutan]. Kini wala gimugna sa mga grupo sa tawo nga nagpaluyo sa mga politiko. Ang kaminyoon gimugna sa Dios!
Ang Napulo ka Sugo nagdumili sa pagpanapaw ug pagmaibugon (tan-awa sa Exodo 20:14, 17; Deuteronomio 5:18, 21).
Sa wala madugay kining karaang kasugoan gihatag ngadto sa mga tawo panahon sa Bag-ong Tugon (tan-awa sa Mateo 5:27–28; 19:18; Mga Taga-Roma 13:9) ug panahon sa Basahon ni Mormon (tan-awa sa Mosiah 13:22, 24; 3 Nephi 12:27). Sa modernong pagpadayag ang Ginoo mimatuod, “Higugmaa ang inyong asawa sa inyong tibuok nga kasingkasing, ug unong ngadto kaniya ug wala nay lain” (D&P 42:22).
Ang tinuod nga kasuod sa pagbati, sumala sa giplano sa atong Tiglalang, masinati lang sulod sa sagradong panaghiusa sa bana ug asawa tungod kay kini mapalambo pinaagi sa kamatuoran ug mahimong halangdon pinaagi sa pagtuman sa mga pakigsaad sa bana ug asawa ngadto sa usag usa ug ngadto sa Dios. Importante nga masabtan nga ang hingpit nga pagkamaunungon niadtong mga pakigsaad nagdumili sa pornograpiya, kahigal, o abuso sa bisan unsa nga matang.
Ang pagpamugos [pressure] sa sosyal ug politika nga usabon ang mga balaod sa kaminyoon miresulta sa mga binuhatan nga kontraryo sa kabubut-on sa Ginoo kabahin sa mahangturong kinaiyahan ug mga katuyoan sa kaminyoon. Ang tawo dili yanong makahimong moral sa usa ka butang nga gideklarar sa Dios nga dili moral. Ang sala, bisan kon himoong legal sa tawo, sala gihapon sa mga mata sa Dios.
Mga kaigsoonan, nagsuporta sa dili mausab nga kamatuoran, ipahayag ang inyong gugma sa Dios! Ipahayag ang inyong gugma sa tanang katawhan, “nga walay malisya, uban sa gugmang putli para sa tanan.”4 Sila isip mga anak sa Dios atong mga kaigsoonan. Atong gihatagan og bili ang ilang mga katungod ug pagbati. Apan dili mahimo nga atong tugutan ang mga paningkamot nga usabon ang balaang doktrina. Dili tawo ang makausab niini.
Ang Gugma Nagpasabut nga Magmasulundon
Ang Dios nahigugma sa Iyang mga anak. Ug kon sila nahigugma Kaniya, ila kining ipakita pinaagi sa pagsunod sa Iyang mga sugo (tan-awa sa Juan 14:15, 21; 1 Juan 5:2; D&P 46:9; 124:87), lakip nga mahimong putli sa dili pa magminyo ug hingpit nga pagkamaunungon diha sa kaminyoon. Ang kasulatan nagpasidaan nga ang batasan nga sukwahi sa mga sugo sa Ginoo dili lang makahikaw sa magtiayon sa balaang gitugutan nga kasuod sa pagbati apan makadala usab sa striktong paghukom sa Dios (tan-awa sa Levitico 26:15–20; Salmo 89:31–32; Mateo 5:19).
Ang pinakahalangdong tinguha sa kasingkasing sa tawo mao nga ang kaminyoon molahutay lapas pa sa kamatayon. Ang hingpit nga pagkamaunungon ngadto sa mga pakigsaad nga gihimo diha sa balaang mga templo makapahimo sa bana ug asawa nga mabugkos hangtud sa kahangturan (tan-awa sa D&P 132:7, 19).
Bug-at ang palas-anon sa pagkadisipulo. Isip mga disipulo sa Ginoo, kamo mobarug isip tigdepensa sa kaminyoon. Ug samtang nagmatinuoron ug nagmatinud-anon kamo, dili lang Siya motabang ug moprotektar kaninyo (tan-awa sa D&P 84:88), Siya usab mopanalangin sa inyong mga pamilya (tan-awa sa Isaias 49:25; D&P 98:37).
Kamo ang tigdawat sa kaayohan sa mahangturong Pag-ula sa Ginoo. Tungod Kaniya, kamo sa katapusan pagagantihan og pagka-imortal. Ug tungod Kaniya, inyong matagamtam ang panalangin sa kinabuhing dayon uban Kaniya ug sa inyong mga pamilya.
Sa wala: gilitratohan ni Shauna Jones Nielsen
Sa tuo: Mesa Arizona Temple