Mga Samad sa Diborsyo
Ang tagsulat nagpuyo sa British Columbia, Canada.
Isip miyembro sa Royal Canadian Navy, gibansay ko nga maghimo og “after-action review” human sa engkwentro sa kaaway o ubang kalamidad. Usa kini ka makuti nga pagtimbang-timbang unsaon niadtong naapil nga mas mapaubsan o malikayan ang dugang kadaut. Sa tibuok kinabuhi ug ilabi na sa panahon sa mga pagsulay sama sa diborsyo, ang after-action review makahatag og daghang paagi sa pagkat-on ug paglambo.
Kini masugdan pinaagi sa pagdawat sa saktong bahin sa responsibilidad sa nahitabo. Kon kita adunay haum nga pagsubay sa atong mga linihukon, tingali uban sa tabang sa usa ka tigtambag, pag-ila kon asang dapita naapil ang atong kabubut-on ug asa usab dapita ang kabubut-on sa atong kanhi kapikas naapil, kita makaobserbar sa mga butang nga atong mausab sa kinabuhi. Matimbang-timbang usab nato ang atong mental, espiritwal, ug emosyonal nga kahimsog.
Ang pagbuhat og mapuslanong mga paningkamot nga mag-usab samtang atong gigamit ang mga leksyon nga atong nakat-unan nagdasig sa proseso sa pagkaalim para sa mas masanagong kaugmaon.
Paggamit sa Pag-ula sa Manluluwas
Sa gubat adunay makahahadlok nga mga samad. Kini mahimong lalum ug sakit, apan kadtong wala pa makasinati niini dili gayud makasabut kon sama sa unsa kini. Ang mga samad diha sa atong kasingkasing ug kalag tungod sa diborsyo susama ka sakit ug kalisud sabton niadtong wala pa makasulay og butang nga susama niini.
Apan wala kita mag-inusara. Ang Manluluwas andam nga motabang kanato. Ang makaalim nga gahum sa Iyang Pag-ula makatabang nato nga maayo. Ayaw pagbiya sa Simbahan. Pangayo og mga panalangin sa priesthood ug adto sa templo kutob sa imong mahimo. Ang proseso sa pagkaayo kanunayng dugay, apan kon maanaa ang Espiritu sa inyong kinabuhi mapadali ang pagkaayo niini.
Lisud kaayo ang unang tuig human sa diborsyo. Adunay proseso sa pagbangutan tungod sa pagkawala sa relasyon nga kausa mao ang sentro sa atong mga paglaum. Ang mga emosyon ug hagit niini mahimong kalit nga mosaka ug mopaubos. Himoon nato ang atong bahin sa proseso sa pagkaayo pinaagi sa paghinumdom nga kita bililhong mga anak sa atong Langitnong Amahan nga adunay balaanong potensyal, pagtambong sa mga miting sa Simbahan, pagbasa sa atong kasulatan, pag-ampo, pagserbisyo, ug pag-adto sa templo. Bisan og ang proseso sa pagkaayo dugay kaayo, ang saad sigurado gayud. Sunda ang Ginoo, ug inyong madawat ang kinabuhing dayon ug ang tanang gisaad nga mga panalangin diha kaninyo, lakip ang kalinaw ug hingpit nga kalipay diha sa inyong kalag.
Pagplano nga Magminyo og Usab
Pagmabinantayon kon kamo modesisyon nga magsugod sa pagpakig-date. Siguradoa nga kamo nakaila sa inyong kaugalingon ug unsa ang inyong gusto. Mobati nga OK ra nga mag-inusara (uban ang Manluluwas). Kon kamo malipayon kon si kinsa kamo ug asa kamo padulong, mas lisud para sa kaaway sa pagtintal kaninyo o kamo sa katapusan mahimutang sa dili maayong relasyon nga magsalig sa uban. Ang relasyon nga inyong napalambo uban sa inyong kanhi kapikas dugay nakakab-ut og importante nga mga emosyonal ug romantikanhong panghitabo. Bisan ang dili maayo nga relasyon adunay dapit sa kahupayan, busa makatintal nga makig-relasyon diha-diha dayon sa usa ka tawo. Magmatngon sa inyong linihukan.
Pagsuporta sa Nadiborsyado nga Kalalakin-an
Kadtong nakasinati og diborsyo susama sa mga beterano nga anaa sa panggubatan niining gubat para sa atong mga kalag. Sila nagkinahanglan sa atong pagtahud, gugma, pagsabut, suporta, ug pagdawat. Pagpabati og mahigugmaong paagiya ug pagdasig kon sila maghisgot niini. Saligi sila ug hinumdumi nga ang Manluluwas adunay Iyang panahon [timetable] aron pag-ayo sa masulub-ong kasingkasing ug espiritu. Ang pag-ayo ug mga milagro mahitabo, inig-abut sa panahon.
Gilitratohan ni Justin Skinner/iStock/Thinkstock