Pagserbisyo diha sa Simbahan
Ang Gahum sa Home Teaching
Ang tagsulat nagpuyo sa Arizona, USA.
Unsaon namo pag-home teach sa pamilya nga dili gani mi pasudlon sa balay?
Gi-assign ko nga mag-home teach uban ni Brother Erickson, tigulang nga miyembro diha sa ward kinsa matinud-anong home teacher. Iya ko nga gisugo nga mobuhat sa eskedyul, nga ok ra nako.
Usa sa among bisitahan nga pamilya, mao ang mga Wright (ang ngalan giusab), kinsa dili aktibo sa Simbahan. Sa dihang mitawag ko nila, si Brother Wright miingon, “Ayaw na ko tawagi pag-usab.”
Akong gisultian si Brother Erickson sa nahitabo. Pagkasunod bulan, sa dihang iya ko nga gihangyo nga tawagan usab ang mga Wright, ako siyang gipahinumduman nga dili gusto ni Brother Wright nga manawag mi niya. Apan miinsister si Brother Erickson nga tawagan ra gihapon, busa akong gibuhat. Sa dihang gitubag ni Brother Wright ang telepono, ako siyang gihangyo nga dili kini ibutang ug misulti niya nga ang akong kompanyon sa home teaching miinsister nga manawag ko. Mihangyo ko niya kon maka-home teach mi pinaagi sa pagtawag niya kada bulan. Siya miuyon.
Sukad niini, akong tawagan ang mga Wright kada bulan. Kada higayon nga motawag ko, si Brother Wright miingon, “Humana imong tawag.” Dayon iyang ibutang ang telepono. Ok ra ko kaayo niana, ug wala nay gihangyo pa si Brother Erickson.
Apan pipila ka bulan ang milabay, si Brother Erickson misugyot nga kami magpuasa para sa mga Wright. Miuyon ko, busa usa ka Dominggo kami nag-ampo ug nagpuasa sa pagpangita og paagi aron makaduol ni Brother Wright. Pagkabuntag samtang miagi ko sa panimalay sa Wright padulong sa akong trabaho, migawas si Brother Wright. Nakakita ko og dulaan nga truck ubos sa usa sa mga ligid sa luyo sa iyang sakyanan, busa mihunong ko ug gitudlo kini. Iya ko nga gipasalamatan.
“Bitaw,” miingon ko, “Ako ang imong home teacher.”
Siya nagpasalamat usab nako sa akong pagpadulong sa trabaho.
Akong gitawagan si Brother Erickson aron sultian siya sa nahitabo. Iya ko nga gihangyo nga tawagan si Brother Wright aron makigsabut og home teaching sa sunod gabii, nga akong gibuhat. Si Brother Wright mahigalaon ug maabi-abihon. Maayo ang among pagbisita sa pamilya ug nakigsabut og laing appointment. Mibiya ko sa ilang panimalay nga may dakong pagpamatuod sa pagpuasa ug pag-ampo ug sa kaimportante nga mahimong home teacher.
Sa ulahing bahin nianang semana among nahibaloan nga si Brother Wright mitugot sa full-time nga mga misyonaryo nga tudloan ang iyang 15 anyos nga anak nga babaye. Ang iyang anak nag-ampo sulod sa pipila ka bulan nga mohumok ang kasingkasing sa iyang amahan ug sa dili madugay motugot nga siya magpabunyag. Sa paglabay sa panahon ang pamilya misugod sa pagsimba, ug si Brother Wright sa katapusan miuyon nga magpabunyag ang iyang anak nga babaye. Gani, siya ang nagbunyag sa iyang anak.
Mapasalamaton ko nga si Brother Erickson nahiangay sa Espiritu. Ang iyang mga ideya niining kasinatian nakatabang nako nga makaangkon og mas dakong pagpamatuod sa gahum ug potensyal sa mapahinungurong home teaching.