Mensahe sa Visiting Teaching
Balaan nga mga Kinaiya ni Jesukristo: Maaghup ug Mapailubon
Tun-i sa mainampuong paagi kini nga materyal ug tinguhaa nga masayud unsa ang angay nga ipakigbahin. Sa unsang paagi nga ang pagsabut sa kinabuhi ug tahas sa Manluluwas makapalambo sa inyong hugot nga pagtuo diha Kaniya ug mopanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Si Jesus MIHUGAS sa TIIL sa mga Apostoles, ni del parson
Si Jesus miingon, “Kinahanglan nga ang labing dako kaninyo magpakamanghud sa tanan, ug ang pangulo ingon sa tig-alagad. Kay kinsa man ang labaw sa kadako, ang nagalingkod ba tambong sa kan-anan o ang nagaalagad ba? Dili ba ang nagalingkod tambong sa kan-anan? Apan ako ania kaninyo ingon nga mag-aalagad” (Lucas 22:26–27).
“Ang Manluluwas mao ang atong labing taas nga ehemplo sa gahum sa pagpaubos ug pagkamauyunon. Ilabi na, nga ang Iyang pagtugyan sa Iyang kabubut-on ngadto sa Amahan nagdala sa labing mahinungdanon, ug gani ang labing gamhanan, nga panghitabo sa tibuok kasaysayan. Tingali ang pipila sa pinakasagrado nga mga pulong sa balaang kasulatan mao ang yano nga, ‘Dili akong pagbuot maoy matuman, kondili ang imo’ (Lucas 22:42).”1
Isip mga disipulo ni Jesukristo, kita kanunay nagtinguha nga mahimong sama Kaniya. “Ang kaaghup mahinungdanon aron kita mahimong sama kang Kristo,” miingon si Elder Ulisses Soares sa Seventy. Kon wala kini dili nato mapalambo ang ubang importanting mga hiyas. Ang pagkamaaghup wala magpasabut nga kahuyang, apan nagpasabut kini nga molihok uban sa kaayo ug kamabination, mopakita og kalig-on, kakalma, paghatag og bili sa kaugalingon, ug pagpugong.”2 Samtang kita maningkamot sa pagpalambo niini nga kinaiya, atong makita nga ang “mapainubsanong pagtugyan sa atong kabubut-on ngadto sa Amahan mohatag kanato sa gahum sa Dios—ang gahum sa pagpaubos. Mao kini ang gahum sa pagsagubang sa mga kalisud sa kinabuhi, ang gahum sa kalinaw, ang gahum sa paglaum, ang gahum sa matinguhaon nga kasingkasing nga puno sa gugma ug pagpamatuod alang sa Manluluwas nga si Jesukristo, gani ang gahum sa pagtubos.”3
Dugang nga mga Kasulatan
Gikan sa mga Kasulatan
Ang usa sa pinakatam-is ug pinaka-impluwensyal nga mga higayon sa pagpangalagad ni Kristo mao ang Iyang paghugas sa mga tiil sa Iyang mga disipulo. “Mitindog siya gikan sa kan-anan, mihukas sa iyang mga sapot ug gibaksan niyag tualya ang iyang kaugalingon. Ug naghuwad siyag tubig sa palanggana ug iyang gisugdan ang pagpanghugas sa mga tiil sa mga tinun-an ug sa pagpahid niini sa tualya nga iyang gibakus” (Juan 13:4–5).
Samtang ang Manluluwas mipaila niini nga ordinansa, ang mga disipulo tingali naulaw nga ang ilang Ginoo ug Manluluwas miluhod sa ilang atubangan ug mihimo og usa ka maaghup kaayo nga pagserbisyo. Si Jesus dayon mipasabut sa mga leksyon nga gusto Niyang makat-unan natong tanan:
“Kon ako, inyong Ginoo ug Magtutudlo, nanghugas man gani sa inyong mga tiil; nan kamo usab kinahanglan maghinugasay sa inyong mga tiil, ang usa sa usa.
“Kay usa ka panig-ingnan ang akong gihatag kaninyo, aron nga kamo usab kinahanglan magabuhat sama sa akong gibuhat kaninyo” (Juan 13:14–15).