Ang Permanente nga mga Sumbanan sa Langitnong Amahan
Gikan sa usa ka debosyonal nga pakigpulong, “Standards and Tolerance,” gihatag didto sa Brigham Young University–Idaho niadtong Nobyembre 13, 2012. Alang sa kompleto nga teksto sa Iningles, bisitaha ang byui.edu.
Ang mga sumbanan [standard] sa Dios permanente, ug walay usa nga makausab niini. Ang mga indibidwal kinsa naghunahuna nga makausab sila masurprisa pag-ayo sa Katapusang Paghukom.
Litrato pinaagi sa Kojihirano/iStock/Thinkstock
Ang akong unang trabaho pagkahuman sa kolehiyo mao ang pagtrabaho sa usa ka dakong kompaniya nga tighimo og eroplano. Samtang didto, akong nakat-unan nga sa paghimo sa eroplano nga luwas, ang kompaniya adunay mga espisipikasyon alang sa matag pisa. Ang mga pisa kinahanglang makapasar sa tanang mga sumbanan, lakip sa porma, gidak-on, materyal, ug mga tolerance.
Kon ang usa ka pisa makapasar sa mga sumbanan, ibutang kini sa imbentaryo sa paghimo og eroplano. Kon kini wala makapasar sa mga sumbanan, ang pisa dili dawaton ug iuli ngadto sa supplier. Ang mga supplier sa pisa mabinantayon sa pagsabut ug pagtuman sa tanan nga mga kinahanglanon, lakip ang mga tolerance.
Andam ba kamong mosakay sa eroplano nga gihimo sa dili maayong mga pisa? Siyempre dili! Gusto ninyo ang mga pisa molabaw pa sa mga sumbanan. Pipila ka mga tawo, hinoon, ingon og andam sa paghangup sa dili maayong kinaiya sa ilang kinabuhi. Apan pinaagi lamang sa pagkahibalo, pagsabut, ug pagsunod sa doktrina ni Kristo nga kamo makabaton sa kinaiya nga gikinahanglan aron mokwalipay sa kahimayaan.
Ang Tolerance mao ang pulong nga nadungog kanunay sa katilingban karon, kasagaran sa kinatibuk-ang kahulugan sa pagtugot o pagdawat sa mga kultura o kinaiya sa ubang mga tawo. Usahay gigamit kini sa mga tawo nga gusto nga dawaton ang pagbuhat og usa ka butang nga wala maghunahuna sa mga epekto niini sa katilingban o sa uban. Ang akong tuyo dili ang pag-istorya sa kahulugan apan sa pagtutok sa engineering nga kahulugan sa pulong ug ang kagamitan niini ngari nato.
Ang tolerance gigamit sa pagpasabut sa madawat nga kalahian gikan sa gihimo nga standard. Sa usa ka hinimo nga pisa, ang tolerance mahimong gitakda nga lima ka pulgada ang gitas-on (13 cm), sobra o kulang og ika-usa ka libo sa pulgada (0.0025 cm). Laing pisa mahimong ingnon nga himoon sa usa ka materyal nga 99.9 porsyento ang kalunsay, sama sa bareta nga bulawan. Ang Ginoo migahin og mga pagtugot aron pagtabang kanato nga mokwalipay sa kahimayaan.
Mga Sumbanan ug Paghukom
Ang mga sumbanan sa kaluwasan gitawag og mga sugo, nga gihatag sa atong Amahan sa Langit. Kini nga mga sumbanan magamit sa tanang bahin sa atong mga kinabuhi ug sa tanang panahon. Dili kini hinagpat nga gamiton sa piho nga higayon o sa piho nga sitwasyon. Ang mga sugo nga nagpakita og kamainantuson gikinahanglan aron mokwalipay sa kahimayaan.
Adunay usa ka paghukom nga, sa pagsabut, sama sa proseso sa pagpasar alang sa usa ka pisa sa eroplano. Sama nga adunay mga pag-testing aron mapasar alang sa mga pisa sa eroplano, ang atong Amahan sa Langit adunay paghukom sa pagtino kon kita nakapasar ba. Alang sa atong kaayohan nga masayud ug makatagbaw sa mga sumbanan subay sa tolerance nga gitakda sa Ginoo.
Kamo makahinumdom nga ang napulo ka dalagang birhen sa sambingay sa Manluluwas gidapit sa kumbira sa kasal. Sa dihang miabut ang pamanhunon, lima dunay lana ug nakahimo sa pagsulod. Ang laing lima ulahing miabut ug dili makasulod. (Tan-awa sa Mateo 25:1–13.)
Kabahin niini nga sambingay, si Elder Dallin H. Oaks sa Korum sa Napulog Duha ka mga Apostoles miingon: “Ang mensahe niini nga sambingay makahadlok. Ang napulo ka dalagang birhen klaro nga nagrepresentar sa mga miyembro sa Simbahan ni Kristo, kay ang tanan gidapit sa kumbira sa kasal ug ang tanan nasayud kon unsa ang gikinahanglan aron makasulod sa dihang miabut ang pamanhunon. Apan katunga lamang ang andam na sa dihang siya miabut.”1
Ang unang lima ka mga birhen nakatuman sa mga sumbanan, ug busa kinahanglan usab kita.
Ang Dios milalang nato sa kaugalingon Niyang panagway. Ang plano alang kanato dinhi sa yuta mao ang pag-angkon og lawas, kasinatian, makadawat sa mga ordinansa, ug molahutay hangtud sa katapusan. Ang mga sumbanan giestablisar ug ang mga limitasyon gitakda aron kita kinahanglang magpuyo aron mokwalipay alang sa kahimayaan. Ang Dios misaad nga kita mahimaya, apan Siya usab miingon, “Ako, ang Ginoo, mapugos sa pagtuman kon kamo mobuhat sa unsa nga Ako misulti; apan kon kamo dili mobuhat sa unsa nga Ako misulti, kamo dili makaangkon og saad” (D&P 82:10).
Mga Sumbanan ug Kabubut-on
Sa plano sa Dios sa kaluwasan, kita gihulma, giporma, ug gihashasan aron mahimong sama Kaniya. Kini usa ka butang nga ang matag usa kanato makasinati sa indibidwal nga paagi.
“Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo” (Moises 1:39).
Ang Dios miestablisar unsay angay natong buhaton ug sa mga sumbanan nga kinahanglan gayud atong sundon. Ang talagsaong butang mao nga Iyang gihatag kanato ang moral nga kabubut-on sa paghukom kon modawat o mosunod ba sa mga sumbanan. Hinoon, adunay mga sangputanan sa atong mga desisyon. Siya mihatag kanato sa kabubut-on, apan wala Siya mohatag kanato sa awtoridad sa pag-usab sa mga sumbanan o sa mga sangputanan sa atong mga desisyon.
Tungod kay adunay mga sumbanan ug tungod kay kita adunay kabubut-on sa pagpili, adunay Katapusan nga Paghukom, diin nga panahon ang matag usa kanato ribyuhon aron makita kon kita nakatuman ba sa mga sumbanan—sa laing pagkasulti, aron makita kon kita nagpuyo subay sa mga sumbanan ug tolerance nga gihatag sa Dios. Ang Iyang paghukom dili na mausab.
Ang doktrina sa paghinulsol nagtugot kanato sa pagkorihir o pag-ayo sa mga depekto, apan mas maayo nga motutok sa pagsunod sa mga sumbanan sa Dios kay sa pagplano sa paggamit sa baruganan sa paghinulsol sa dili pa ang Paghukom sa Dios. Nakakat-on ko niini nga leksyon sa dihang bata pa ko.
Isip tin-edyer gigahin nako ang akong summer sa pagtrabaho sa ranso sa akong lolo sa Wyoming, USA. Ranso kadto sa mga karnero ug mga baka nga sobra sa 2,000 ka mga acre (810 ektarya), dugang pa sa agrikultura nga yuta. Ang operasyon sa ranso nagkinahanglan og daghang mga ekipo. Tungod kay ang labing duol nga sentro sa pagpaayo layo kaayo, ang akong lolo mitudlo kanamo sa pagmintenar sa ekipo ug susihon ang tanan sa dili pa kami mobiya sa ranso. Kon dunay maguba, sa kasagaran mga milya kini gikan sa balay sa ranso, ug kana nagpasabut nga layo ang laktan.
Wala magdugay akong nakat-unan ang balaod sa mga sangputanan. Mas maayo nga malikayan ang problema kay sa molakaw og layo. Pareha ra usab sa mga sugo sa atong Langitnong Amahan. Makaila Siya sa kalainan tali sa usa ka tawo kinsa tinud-anay nga naningkamot nga mahimong sama Kaniya ug sa indibidwal kinsa mosulay sa paglapas sa gitakda nga limit apan naningkamot nga magpabilin sa madawat ra nga mga limit.
Mga Sumbanan ug mga Oposisyon
Adunay mga tawo sa kalibutan karon kinsa naningkamot nga wagtangon o usbon ang mga sumbanan nga giestablisar sa Dios. Dili kini bag-o nga panghitabo.
“Alaot ngadto kanila nga nagtawag sa pagkadautan nga matarung, ug ang pagkamatarung dautan, nga nagbutang og kangitngit alang sa kahayag, ug kahayag alang sa kangitngit, nga nagbutang og pait alang sa tam-is, ug tam-is alang sa pait!” (2 Nephi 15:20)
Kinahanglang dili kita malingla o maminaw niadtong kinsa mosulay sa pagdani kanato nga ang mga sumbanan sa Dios nausab. Wala silay katungod sa pag-usab sa mga sumbanan. Ang nagdisenyo lamang, ang Langitnong Amahan, ang makausab sa mga espisipikasyon.
Kitang tanan dali rang makaila kon unsa ka kataw-anan sa usa ka supplier sa mga pisa sa eroplano nga maminaw sa ubang mga indibidwal nga walay kahibalo nga moagni og kausaban sa mga espisipikasyon o tolerance sa usa ka pisa. Walay usa nato gustong mosakay sa eroplano nga gihimo sa ingon niana nga pisa.
Paghulagway sa litrato pinaagi ni Thomas Lammeyer/Hemera/Thinkstock
Sa samang paagi, walay usa nga mopasangil sa tighimo sa eroplano nga wala maghunahuna o dili matugtanon kon dili kini modawat sa maong mga pisa. Ang tighimo dili motugot nga pugson o hadlukon aron sa pagdawat sa mga pisa nga wala makapasar. Ang pagbuhat sa ingon makahatag og peligro sa negosyo niini ug sa mga kinabuhi sa mga pasahero nga mosakay sa eroplano.
Mao usab kini sa mga balaod ug mga sugo sa Dios. Ang iyang mga sumbanan dili mausab, ug walay makapausab niini. Ang mga indibidwal kinsa naghunahuna nga makausab sila masurprisa pag-ayo sa Katapusang Paghukom.
Pagsunod sa mga Sumbanan
Ang atong Langitnong Amahan mao ang nagdesinyo sa plano sa kaluwasan. Gibutang niya ang tanan nga atong gikinahanglan aron mahimong takus sa pagbalik ngadto sa Iyang presensya. Ang mga sumbanan gipahimutang, nahibaloan, ug sayon natong magamit.
Ang Manluluwas nagsulti kanato nga kitang tanan makahimo sa pagsunod sa mga sumbanan. Ang Pulong sa Kaalam mao ang ebidensya niini, nagpasabut nga “gihatag alang sa usa ka baruganan uban sa saad, gipahiangay ngadto sa kasarang sa maluya ug sa labing maluyahon sa tanan nga mga santos o matawag nga mga santos” (D&P 89:3; empasis gidugang).
Ang Manluluwas nagtudlo usab nga kita “dili mahimo nga matintal labaw niana diin [kita] mahimo nga moantus” (D&P 64:20), apan kita kinahanglang “magbantay ug mag-ampo sa kanunay” (Alma 13:28).
Kamo adunay gahum: “Kay ang gahum anaa [kaninyo], diin [kamo] mga tinugyanan ngadto sa [inyong] kaugalingon. Ug tungod kay ang mga tawo nagbuhat sa maayo sila dili mawad-an sa ilang ganti” (D&P 58:28).
Kamo mahimong makasunod sa mga sumbanan. Kamo adunay kapasidad nga mahimong sarang alang sa kahimayaan.
Giya gikan sa Espiritu Santo
Mahibaloan nato ang mga sumbanan pinaagi sa pagsimba ug pinaagi sa pagtuon ug pagsunod sa mga doktrina nga anaa sa mga kasulatan ug sa mga pulong sa modernong mga propeta.
Ang labing mahinungdanon nga tinubdan sa giya mao ang pag-aghat nga nagagikan sa Espiritu Santo, kinsa motudlo kanato sa tanang mga butang nga angay natong buhaton (tan-awa sa 2 Nephi 32:2–3). Uban sa tabang sa Espiritu Santo ug sa Kahayag ni Kristo (tan-awa sa Moroni 7:16–18), kita masayud sa eksakto ug sayop. Kita magiyahan sa tibuok natong kinabuhi. Atong mabati sa atong mga kasingkasing ug mga hunahuna mosulod sa atong pangisip nga makahatag og kahupayan ug giya. Kini tinuod bisan sa mga bata.
Ang Dios misaad nga Siya motabang kanato samtang kita naningkamot sa pagsunod sa Iyang mga sumbanan. Kita dili mosakay sa eroplano nga gihimo sa dili maayong mga pisa. Ni kinahanglan kita modawat o magpraktis sa dili maayong kinaiya. Pinaagi lamang sa pagkahibalo, pagsabut, ug pagsunod sa doktrina ni Kristo nga kita mokwalipay sa kahimayaan.