Mga Pangutana ug mga Tubag
“Ang akong mga ginikanan naminyo didto sa templo, apan karon sila nagdiborsyo. Nasuko ko nga ilang gibungkag ang among pamilya. Unsaon nako sa pagpasaylo kanila?”
Ang diborsyo makaguol ug malisud alang sa tanan nga mga sakop sa pamilya. Ang mga pagbati sa kasuko, pagkawala, ug kasakit normal ra. Hinoon, ang pagpadayon sa negatibong mga pagbati makapalayo ninyo sa kalinaw ug kaayohan. Pag-ampo sa Langitnong Amahan sa pagtabang kaninyo nga mawala ang makadaot nga mga pagbati ug sa pagsabut sa inyong mga ginikanan. Hibaloi nga sila gisakitan usab.
Hinumdumi nga Si Jesukristo—kinsa nag-antus alang sa atong mga kasub-anan ug mga sala—andam nga mopasaylo sa matag usa kanato. Kita usab kinahanglang mopasaylo sa uban. (Tan-awa sa sambingay sa mga nakautang sa Mateo 18:23–35.) Ang inyong mga ginikanan magmapasalamaton sa inyong dili hinakog nga gasa sa pagpasaylo. Samtang kamo ug ang mga sakop sa inyong pamilya mohunong na sa pagkasuko ug pagbasol, ang inyong tibuok pamilya malig-on ug mas makahimo sa pag-adjust. Kadtong kinsa mopasaylo “mosaka ngadto sa mas taas nga ang-ang sa pagtamud sa kaugalingon ug pagkatawo” (James E. Faust, “Ang Makaalim nga Gahum sa Pagpasaylo,” Liahona, Mayo 2007, 68).
Niining malisud nga panahon, importante ang pagpadayon sa pagtukod sa inyong relasyon sa pamilya, ilabi na sa inyong mga ginikanan. Sa mga tuig nga moabut, kamo makasalig ug mohandom niadto nga mga relasyon. Ayaw itugot nga ang pagbati sa kasuko makapugong niining importante nga mga relasyon sa pagtubo.
Pagbaton og hugot nga pagtuo sa plano sa Langitnong Amahan alang kaninyo ug sa inyong pamilya. Tuohi nga “tanan nga mga butang … alang sa imong kaayohan” (D&P 122:7). Tuohi nga Siya mopadayon sa paggiya ug sa pagpanalangin sa inyong kinabuhi. Tuohi nga kamo makaangkon og usa ka maanindot nga kaminyoon ug nga ang Dios mosangkap sa inyong pamilya niining kinabuhia ug sa kahangturan.
Usa ka proseso ang pagpasaylo ug nagkinahanglan og panahon. Pagmapailubon sa inyong mga paningkamot sa paghigugma, pagpasaylo, ug pagsabut sa inyong mga ginikanan. Paabuta ang kalinaw ug kalipay nga moabut pinaagi sa pagpasaylo.
Pag-ampo aron Makasabut
Sa dihang ang akong mga ginikanan nagdiborsyo, lisud kadto sa akong mga igsoon ug kanako. Milungtad og pipila ka tuig una ko nakapasaylo sa akong amahan. Kinahanglan kong magtuon sa mga kasulatan ug mag-ampo sa tibuok nakong kasingkasing. Gani ako nakigsulti ngadto sa usa ka magtatambag. Dayon ako nag-ampo aron makasabut sa akong papa. Ang akong mga mata nabuksan, ug ako nakasabut kaniya, ug kini nakatabang nako nga mamaayo. Nakapasaylo ko, ug ako nakalingkawas gikan sa mga kadena nga naggapos nako sa dugayng panahon. Ako nasayud nga ang Pag-ula sa Manluluwas tinuod. Ang Ginoo nahigugma kanato ug dili gayud mobiya kanato nga dili mahupay.
Pangalan gipugngan
Pagsalig sa Langitnong Amahan ug Pagpasaylo
Nakaagi ko niining sama nga sitwasyon, ug ako nasayud nga kini lisud gayud. Importante nga makaamgo nga bisan og ang imong mga ginikanan wala na maghigugmaay sa usag usa, nahigugma sila gihapon kanimo tungod kay ikaw ilang anak. Usab, salig sa Langitnong Amahan. Misugo Siya nato sa pagpasaylo sa tanan. Nakaila Siya nimo ug adunay plano alang kanimo. Kon magpadayon kita sa pagpuyo nga takus, ako nasayud nga kita makadawat sa saad nga makaangkon og mahangturon nga pamilya, bisan og ang atong mga pamilya dinhi sa yuta magkabulag.
Ashley W., edad 17, Texas, USA
Ipakita ang Imong Gugma
Hunahunaa kon unsa nimo ka mahal ang imong mga ginikanan. Hinumdumi ang makalingaw nga panahon uban kanila sa wala pa kini mahitabo. Pakigsulti nila mahitungod niadto nga mga panahon ug pagplano og tagsa-tagsa nga mga kalihokan uban sa imong mama ug papa. Pakigdula uban nila ug pagpakita og gugma ngadto kanila.
Sierra J., edad 15, Idaho, USA
Paningkamot sa Pagsabut
Paningkamot nga ibutang ang inyong kaugalingon sa ilang lugar. Dili sayon ang pagpasaylo kanila kon ikaw dili maningkamot sa pagsabut sa ilang sitwasyon. Salig nga ang Dios adunay plano alang nimo ug sa imong pamilya ug nga kita adunay mga pagsulay niining kinabuhi aron nga kita makakat-on ug molambo. Usahay dili kita makakontrol sa atong mga kahimtang, apan kita makakontrol sa atong kinaiya. Bisan tuod og kini lisud, paningkamuti kanunay sa pagpangita sa kaayo sa imong mga ginikanan ug hunahunaa kon unsaon nimo sa pagtabang.
Elder Caten, edad 20, Argentina Córdoba Mission
Pagkuha og Suporta sa Uban
Nakadawat ra ko sa pagdiborsyo sa akong mga ginikanan ug mipasaylo nila uban sa tabang sa mga tawo nga naglibut kanako. Akong mga higala, mga lider, mga igsoon ug mga sakop sa pamilya mitabang nako sa tanang butang. Nakahimo ko sa pagpadayon sa akong kinabuhi uban sa suporta gikan sa tanan.
Geena C., edad 18, New Mexico, USA
Paningkamuti nga Mawala ang Kalagot
Ang kalagot makadaut ug supak sa mga pagtulun-an sa Simbahan. Pag-ampo sa Langitnong Amahan, pagpuasa, ug pagbasa sa mga kasulatan sa pagpangita og mga tubag. Kon kamo magtinil og kaligutgot, kamo nagtugot ni Satanas nga mosulod ug moguba sa inyong pamilya tungod kay siya nasayud kon unsa ka importante ang mga pamilya sa plano sa atong Langitnong Amahan.
Carol M., edad 14, Honduras
Tinguhaa ang Espiritu santo
Una, walay usa nato nga perpekto, gawas lamang sa atong Ginoong Jesukristo. Sulayan nako pagtan-aw ang sitwasyon pinaagi pagtan-aw sa imong mga ginikanan. Pagpili og maayo nga panahon ug pakigsulti kanila. Ayaw sawaya ang imong mga ginikanan sa unsay ilang gibuhat. Ikaduha, daghang mga tawo maglagot sa mga pagsulay nga sama niini, busa paningkamuti nga makabaton sa Espiritu Santo uban kanimo. Buhata ang imong personal nga pagtuon sa kasulatan ug pag-ampo matag adlaw.
Ashley P., 15 anyos, Utah, USA