Ang mga Lalaki nga Santos sa Ulahing mga Adlaw ug Diborsyo
Ang tagsulat nagpuyo sa Utah, USA.
Bisan og ang lig-on nga kaminyoon mao ang sumbanan, pipila ka mga kaminyoon walay swerte nga natapos sa diborsyo. Kon kamo nagdiborsyo, aniay pipila ka mga pamaagi nga magpabiling duol sa inyong mga anak ug lig-on sa ebanghelyo.
Mga paghulagway pinaagi ni J. Beth Jepson
“Ang labing mahinungdanong katuyoan sa tanan nga atong gitudlo mao ang paghiusa sa mga ginikanan ug mga anak diha sa hugot nga pagtuo kang Ginoong Jesukristo, nga sila malipayon sa panimalay, nabugkos sa mahangturon nga kaminyoon.”1 Bisan pa niining dinasig nga pagtulun-an gikan ni Presidente Boyd K. Packer, Presidente sa Korum sa Napulog Duha ka mga Apostoles, ang diborsyo mahitabo. Ang diborsyo makapatruma: kadtong nalambigit makasinati og kakugang, dili makatuo, kalibug, depresyon, ug kasuko, ingon man usab sa pisikal nga mga sintoma sama sa kausaban sa naandan nga pagkatulog ug pagkaon.
Sa akong kasinatian isip magtatambag, akong nakita nga, bisan tuod kadaghanan sa unsay nasinati sa mga lalaki ug babaye sa diborsyo pareha ra, adunay pipila ka mga kalainan:
-
Sa minyo pa, ang mga lalaki mas mopaminus sa kaseryoso sa mga problema sa kaminyoon. Ang ilang kasurprisa sa diborsyo mosangpot sa pagbati sa walay kasiguroan.
-
Ang mga lalaki dili kaayo hilig mosulti sa ilang mga gibati, mao nga sila dili kaayo makakat-on gikan sa ilang mga kasinatian.
-
Ang mga lalaki mas ganahan nga molihok, mao nga dili kaayo sila mangayo og tambag ug hinoon ilang ilubong ang ilang mga pagbati pinaagi sa pagtrabaho og dugay o paggugol sa ilang kaugalingon sa usa ka hobby.
-
Tungod sa pinansyal nga mga problema ug kadaot sa ilang ego, ang ubang mga lalaki makasinati og mga hagit sama sa depresyon, madugangan ang timbang, paggamit og alkohol, ug dili na kaayo aktibo sa Simbahan.
Ang bugtong luwas nga dalan sa diborsyo mao ang pagpabilin nga matinud-anon sa ebanghelyo. Ang maayong kausaban nagkinahanglan og abilidad nga magmabination bisan kon dili ka ganahan niini, magpadayon sa pagsalig ug kabililhon sa kaugalingon, makasagubang sa masakit nga mga pagbati samtang magpadayon sa paglihok, magmapailubon sa uban nga nalambigit, magmakiangayon ug dili mapanimaslon, ug magbaton og lig-on nga espirituhanong pundasyon, nga makapaduol nimo ngadto sa Ginoo, kinsa “mikunsad ubos sa” tanan nga mga butang ug kansang Pag-ula igo sa pag-ayo ug pagbayaw kaninyo (D&P 122:8).
Bisan kinsa ang mas sad-an sa inyong diborsyo, ang kaayohan dili moabut hangtud dunay paghinulsol ug pagpasaylo. Sama sa gitudlo ni Presidente Dieter F. Uchtdorf, Ikaduhang Magtatambag sa Unang Kapangulohan: “Kinahanglan atong isalikway ang atong mulo. … Hinumdumi, ang langit puno sa mga tawo kinsa aduna niini: Gipasaylo sila. Ug sila mipasaylo.”2
Pagmintenar og Relasyon uban sa Inyong mga Anak
Tingali walay usa ka isyu ang makaaghat og pagpakigbisog labaw kay sa pagkustodiya sa anak. Kon ang mga anak mogahin sa kasagaran sa ilang panahon uban sa ilang inahan, sayon kaayo mobati ang amahan nga siya nahimong usa ka bisita sa iyang kaugalingong mga anak. Kini makahimo kaniya nga mobati nga walay gahum ug kontrolado sa sistema. Hinoon, gawas kon dunay potensyal sa pang-abuso o ubang makadaot nga inter-aksyon, ang mga anak mas makahimo og labing maayo kon imentinar nila ang relasyon uban sa amahan ug inahan. Maayo gani, kadaghanan sa kanhi mga kapikas nakat-on sa pagkooperar alang sa kaayohan sa ilang mga anak.
Regular nga inter-aksyon uban sa inyong mga anak kinahanglan magpabilin nga usa ka taas nga prayoridad, bisan pa sa distansya o pagkaminyo pag-usab. Bisan kon ang panahon nga gihatag kulang ra, himoa nga positibo ang pagbisita ug ayaw gayud pagsulti og negatibo nga mga butang ngadto sa mga anak mahitungod sa ilang inahan. Ang mga bata malagmit maka-adjust sa diborsyo sa mga ginikanan kon ang ilang inahan ug amahan andam sa pag-una sa kalipay ug kaayohan sa mga anak kay sa ilang kaugalingong nasakitan nga mga pagbati.
Magpabiling Aktibo sa Simbahan
Pipila ka mga lalaki miingon nga walay nakatandog sa ilang mga pagpamatuod sama sa diborsyo. Tinuod kini ilabi na kon sila nagmatinud-anon sa mga kalihokan sa Simbahan ug nag-ampo alang sa kasulbaran sa mga problema sa kaminyoon. Kining natandog nga pagbati dili makapakomportable sa usa ka diborsyado sa pagsimba, ilabi kon nagtuo siya nga ang ang uban naghunahuna nga siya dili matinud-anon sa iyang asawa.
Apan ang pagpadayon sa pag-apil sa mga kalihokan sa Simbahan nakapabantang nato sa sakto nga mga baruganan ug naglibut kanato og maamumahon nga mga tawo. Kon ang mga miyembro sa Simbahan ingon og dili motabang nimo, ayaw kasuko. Tingali wala sila kahibalo unsay buhaton o isulti. Pagmapailubon ug tabangi ang imong kaugalingon. Pagpangita og suporta. Pakitambag sa imong presidente sa korum, bishop o presidente sa stake ug ikonsiderar ang propesyonal nga mga tambag, sama sa LDS Family Services, kon anaa. Kini makatabang nimo sa pagsusi sa imong kaugalingong kinaiya ug mas makakita og klaro.
Ang diborsyadong mga lalaki welcome sa Simbahan sama sa minyo nga mga lalaki. Si Elder Dallin H. Oaks sa Korum sa Napulog Duha ka mga Apostoles miingon, “Adunay daghang maayong mga miyembro sa Simbahan kinsa nagdiborsyo” ug mipasabut nga “gawas kon ang usa ka diborsyado nga miyembro nakabuhat og seryoso nga kalapasan, malalaki o mababaye mahimong takus sa rekomend sa templo ubos sa mao gihapong sumbanan sa katakos nga magamit sa ubang mga miyembro.”3
Naglambo pinaagi sa mga Kalisdanan
Pipila ka mga tawo moingon nga bisan og dili sila gusto nga makasinati sa maong kasinatian pag-usab, sila nakakat-on gikan niini. Naulian sila ug nagpadayon sa ilang kinabuhi. Ang mao nga paagi gipadayag niini nga tawo nga akong gitambagan: “Naglisud gihapon ko sa pagdawat sa konsepto nga ako usa ka diborsyado, apan ako tinuod nga diborsyado. Wala ako magdahum niini, apan kini nahitabo, ug gidawat ko kini. Ang akong tumong karon mao ang paghimo sa tanan nakong mahimo nga magpabiling matinud-anon ngadto kang Kristo, magtukod og lig-on nga bag-ong kaminyoon, ug mahimong ehemplo ngadto sa akong mga anak ug mga humabdos [stepchildren] kutob sa akong mahimo.”