Paglukop sa Yuta pinaagi sa Social Media
Gikan sa pakigpulong nga gihatag niadtong Agosto 19, 2014, atol sa Campus Education Week sa Brigham Young University.
Ipakatap sa yuta ang mga mensahe nga puno sa pagkamatarung ug kamatuoran.
Kita nagpuyo sa usa ka talagsaon nga dispensasyon.
Ang dispensasyon sa ebanghelyo mao ang panahon diin ang gikinahanglan nga awtoridad sa priesthood, mga ordinansa, ug kahibalo sa doktrina makita dinhi sa yuta sa pag-implementar sa plano sa Amahan sa kaluwasan alang sa Iyang mga anak. Importante sa pag-establisar sa usa ka dispensasyon mao ang usa ka tinugutan nga sulugoon sa Dios, usa ka pangulo sa dispensasyon, kinsa naghupot ug naggamit sa awtoridad ug sa mga yawe sa balaan nga priesthood. Ang mga dispensasyon sa ebanghelyo gitukod pinaagi ni Adan, Enoch, Noe, Abraham, Moises, Jesukristo, Joseph Smith, ug uban pa. Sa matag dispensasyon ang mga kamatuoran sa ebanghelyo gipadayag pag-usab—gitugyan—aron ang mga tawo niana nga panahon dili magdepende sa hingpit sa miaging mga dispensasyon alang sa kahibalo sa plano sa Langitnong Amahan.
Ang apostasiya gikan sa kamatuoran nahitabo sa matag dispensasyon nga milabay. Hinoon, ang buhat sa kaluwasan nga gisugdan apan wala makompleto niadtong nag-una nga mga panahon nagpadayon sa katapusan nga dispensasyon. Si Propeta Joseph Smith mipasabut nga tungod niini nga rason, ang kalamboan sa himaya sa ulahing adlaw, gani ang dispensasyon sa kahingpitan sa panahon, “mao ang katuyoan nga nakapaikag sa katawhan sa Dios sa matag panahon; usa kini ka tema diin ang mga propeta, mga pari ug mga hari nagpakabuhi uban sa talagsaon nga kahimuot; ila kining gilauman uban sa malipayon nga pagpaabut sa adlaw diin kita magpuyo; ug gidasig uban sa langitnon ug mahimayaon nga mga pagpaabot nga ilang giawit ug gisulat ug gipanagna kining atong panahon.”1
Diha niining labing mahinungdanon ug katapusan sa tanang mga dispensasyon sa ebanghelyo, “ang tibuok ug walay kulang ug hingpit nga pagkahiusa, ug pagkasumpay sa mga kapaigoan, ug mga yawe, ug mga gahum, ug mga himaya kinahanglan nga mahitabo, ug ipadayag gikan sa mga adlaw ni Adan bisan niini nga panahon. Ug dili lamang niini, apan kadto nga mga butang nga wala mapadayag gikan sa katukuran sa kalibutan, apan gitago gikan sa maalamon ug mabuot, ipadayag ngadto sa mga bata ug mga masuso karon, dinhi niini nga kapaigoan sa kahingpitan sa mga panahon” (D&P 128:18).
Ang Dispensasyon sa Kahingpitan sa Panahon ug ang Teknolohiya
Bulahan kita nga nagpuyo, nagkat-on, ug nagserbisyo niining labing talagsaon nga dispensasyon. Usa ka importante nga aspeto sa kahingpitan nga anaa kanato niining espesyal nga panahon mao ang usa ka milagroso nga pag-uswag sa kalamboan ug imbensyon nga nakahimo ug nakapaspas sa buhat sa kaluwasan: gikan sa mga tren ngadto sa mga telegrama ngadto sa mga radyo ngadto sa mga sakyanan ngadto sa mga eroplano ngadto sa mga telepono ngadto sa mga transistor ngadto sa mga telebisyon ngadto sa mga computer ngadto sa mga satellite transmissions ngadto sa Internet—ug sa hapit walay katapusang lista sa teknolohiya ug mga himan nga mopanalangin sa atong mga kinabuhi. Kining tanang kalamboan kabahin sa pagpadali sa Ginoo sa Iyang buhat sa ulahing mga adlaw.
Niadtong 1862 si Presidente Brigham Young (1801–77) miingon: “Ang tanang nadiskobrehan sa siyensya ug art, nga tinuod gayud ug mapuslanon sa katawhan gihatag pinaagi sa direktang pagpadayag gikan sa Dios, bisan tuod diyutay ra ang motuo niini. Gipanglantawan kini nga moandam alang sa katapusang kadaugan sa kamatuoran, ug ang katubsanan sa yuta gikan sa gahum sa sala ug ni Satanas.”2
Palihug karon hunahunaa ang mga pulong ni Presidente Spencer W. Kimball (1895–1985), nga gipamulong niadtong 1974, samtang iyang gihulagway ang kaugmaon sa misyonaryo nga buhat:
“Nagtuo ko nga ang Ginoo mahinamong mohatag nato sa mga imbensyon nga dili gani nato mahanduraw. …
“Sa paghatag sa Ginoo niini nga mga milagro sa komunikasyon, ug uban sa dugang nga mga paningkamot ug debosyon sa atong mga misyonaryo ug natong tanan, ug ang uban nga ‘gipadala’, sa pagkatinuod ang balaan nga mando mahitabo: ‘ Kay, sa pagkatinuod, ang tingog kinahanglan mogawas gikan niini nga dapit ngadto sa tibuok kalibutan, ug ngadto sa labing hilit nga mga bahin sa yuta—ang ebanghelyo kinahanglan gayud isangyaw ngadto sa matag linalang’ (D&P 58:64).”3
Ug niadtong 1981 si Presidente Gordon B. Hinckley (1910–2008) mitudlo: “Masaligon kita nga samtang ang buhat sa Ginoo molambo, modasig siya og mga tawo sa pagpalambo og mga pamaagi diin ang mga miyembro sa Simbahan, bisan asa man sila, mahimong matambagan sa personal kaayo nga paagi pinaagi sa iyang pinili nga propeta.”4
Ang mga mensahe ug mga litrato nga nagkinahanglan og mga adlaw, mga semana, ug mga bulan sa pagpadala ug pagdawat karon mahimong mapadala sa tibuok kalibutan sa segundo. Kami magpasalamat Kanimo, O Dios, alang sa mga propeta kinsa nagtudlo ug nag-andam kanato alang sa panahon nga atong gipuy-an—ug kinsa nag-aghat kanato sa paggamit sa kalamboan sa teknolohiya sa pagsuporta sa nagpadayon nga misyon sa Ang Simbahan ni Jesukristo sa mga Santos sa Ulahing mga Adlaw.5
Ang Ginoo nagpadali sa Iyang buhat, ug dili sulagma nga kining talagsaong kalamboan sa komunikasyon ug imbensyon nahitabo niining dispensasyon sa kahingpitan sa panahon. Ang mga channel sa social media mao ang mga himan sa tibuok kalibutan nga personal ug positibong makaapekto sa daghang mga indibidwal ug mga pamilya. Ug ako nagtuo nga ang panahon miabut alang nato isip mga disipulo ni Kristo sa paggamit niining dinasig nga mga himan sa husto ug mas epektibo nga paagi sa pagpamatuod sa Dios ang Mahangturong Amahan, Iyang plano sa kalipay alang sa Iyang mga anak, ug sa Iyang Anak, nga si Jesukristo, isip Manluluwas sa kalibutan; sa pagsangyaw sa kamatuoran sa Pagpahiuli sa ebanghelyo sa ulahing mga adlaw; ug sa pagtuman sa buhat sa Ginoo.
Pipila ka nag-unang mga sumbanan kinahanglang sundon samtang kita mogamit sa social media sa pagpasabut sa mga mensahe sa ebanghelyo:
1. Magmatinud-anon ug Magmakanunayon
Una, kita mga disipulo ug ang atong mga mensahe kinahanglan nga tinuod. Ang tawo o produkto nga dili tinuod usa ka bakak, mini, ug dili matinuoron. Ang atong mga mensahe kinahanglan nga matinud-anon, matinuoron, ug tukma. Kinahanglan nga dili nato pasobrahan, adornohan o magpakaaron ingnon nga usa ka tawo, o usa ka butang nga kita dili mao. Ang atong isulat kinahanglan nga kasaligan ug makaayo. Ug ang dili pagpaila diha sa Internet wala maghatag og katungod nga dili magmatinud-anon.
Ang pagkatinuod malig-on pinaagi sa pagkamakanunayon. Ang mga mensahe sa ebanghelyo nga inyong ipakigbahin mas dawaton kon ang inyong Kristohanong ehemplo makita diha sa padayon ninyo nga gipang-post.
Si Sister Bonnie L. Oscarson usa ka maayong ehemplo sa gahum sa pagkamakanunayon sa social media. Sa dihang gi-call sa pagserbisyo isip kinatibuk-ang presidente sa Young Women niadtong Abril 2013, ang iyang mga sumusunod sa Pinterest nadoble diha-diha dayon. Ang mga gipang-post ni Sister Oscarson kaniadto naghatag og igong mga ebidensya sa iyang kaligdong, nakaaghat sa usa ka blogger sa pagpangutana, “Ang imong pahina sa Pinterest makapasar ba sa testing ni Bonnie Oscarson? … Unsa may hunahuna sa mga tawo kaninyo kon ang tanan nilang nasayran mao ra ang unsay anaa sa imong pahina sa social media?”6
2. Maglig-on ug Magbayaw
Ikaduha, kita ug ang atong mga mensahe kinahanglang magtinguha sa paglig-on ug pagbayaw kay sa pakiglalis, pakigdebati, panghimaraut, o pagtamay.
Pagkigbahin sa ebanghelyo uban sa tinuod nga gugma ug pagpakabana alang sa uban. Magmaisugon ug walay kahadlok apan dili magmapugsanon sa pagpaluyo ug paglaban sa atong mga tinuohan, ug maglikay sa panagbingkil. Isip mga disipulo, ang atong katuyoan mao ang paggamit sa social media isip paagi sa pagpakita sa kahayag ug kamatuoran sa gipahiuli nga ebanghelyo ni Jesukristo ngadto sa kalibutan nga nagkangitngit ug nagkalibog.
3. Magtahud sa Intellectual Property
Ikatulo, kita ug ang atong mga mensahe kinahanglang motahud sa kabtangan sa ubang mga tawo ug mga organisasyon. Kini nagpasabut nga kamo kinahanglan nga dili maghimo og inyong kaugalingong content gamit ang art, pangalan, mga litrato, musika, video, o ubang content sa ubang tawo nga walay pagtugot. Ang content sa Media Library sa LDS.org, gawas kon gipasabut nga gidili, gitugot nga magamit sa mga miyembro nga dili na mangayo og pagtugot gikan sa Simbahan. Dugang nga impormasyon mahitungod sa paggamit sa Church media makita sa social.lds.org.
Kon mopakigbahin kamo sa mensahe sa online, siguroa nga ang uban makasabut nga kamo nagpahayag sa inyong personal nga mga hunahuna ug pagbati. Palihug ayaw gamita ang logo sa Simbahan o tingali magsugyot nga kamo nagsulti alang o para sa Simbahan.
4. Magmaalamon ug Magmabinantayon
Ikaupat, magmaalamon ug magmabinantayon sa pagpanalipod sa inyong kaugalingon ug niadtong inyong gimahal. Kinahanglan natong hinumduman nga ang Internet dili gayud makalimot. Bisan unsa ang inyong gihisgutan pinaagi sa social media channel molungtad gayud sa kahangturan—bisan lahi ang gisaad sa app o programa. Isulti o i-post lamang kon gusto ninyo nga ang tibuok kalibutan dunay access sa inyong mensahe o mga litrato sa tanang panahon.
Ang pagsunod niining yano nga mga sumbanan makapahimo sa mga miyembro sa Simbahan sa tibuok kalibutan sa paghimo ug pagpakigbahin sa mga mensahe sa ebanghelyo nga “mosanag gikan sa kangitngit” (Mormon 8:16).
Usa ka Apostolikanhon nga Pagdapit
Unsay nakab-ot na niini nga dispensasyon sa pagpahayag sa mga mensahe sa ebanghelyo pinaagi sa mga social media channel usa ka maayo nga sinugdanan—apan usa lamang ka hinay nga dagayday. Ako karon modapit kaninyo sa pagtabang sa pag-usab sa dagayday ngadto sa usa ka baha. Sugod niining adlawa, ako moawhag kaninyo sa paglukop sa yuta sa mga mensahe nga puno sa pagkamatarung ug kamatuoran—mga mensahe nga tinuod, makapalig-on, ug dalaygon—ug tinuod nga molukop sa yuta ingon sa usa ka lunop (tan-awa sa Moses 7:59–62).
Ako mag-ampo nga kita dili lamang moapil sa usa ka kalit nga baha nga dali ra nga motaas ug dali ra usab nga mohubas. Wala ako magsugyot og taphaw nga paningkamot diin kita dali nga makabuhat sa sunod nga buluhaton sa atong taas nga lista sa mga butang sa ebanghelyo nga buhaton. Dili kinahanglan nga mahimo kitang eksperto sa social media o mga mapanatiko. Ug dili kinahanglan nga mogahin kita og daghang mga oras sa paghimo ug sa pagpakaylap og maayong pagkahimo nga mga mensahe.
Hunahunaa ang epekto nga mahitabo kon gatusan ka liboan ug minilyon ka mga miyembro sa gipahiuli nga Simbahan sa Ginoo mosalmot sa ginagmay nga paagi sa pagpataas sa tubig. Hinaut nga ang atong daghang ginagmay, tagsa-tagsa nga mga paningkamot makahatag og makanunayon nga dagayday sa pagkamatarung ug kamatuoran nga sa hinay-hinay mahimong mga sapa ug mga suba—ug sa katapusan mahimong lunop nga mokatap sa yuta. Busa, ayaw pagluya diha sa maayo nga buhat, kay kamo nagpahimutang sa tukuranan sa usa ka mahinungdanon nga buhat. Ug gikan sa gagmay nga mga butang magagikan ang mga dagko” (D&P 64:33).
Kita napanalanginan sa daghang paagi; ug diin daghan ang gihatag, daghan ang gikinahanglan. Akong giampo nga kamo makasabut sa hingpit sa espirituhanon nga kaimportante ug panalangin sa pagpuyo sa dispensasyon sa kahingpitan sa panahon, nga hinaut nga kamo dunay mga mata nga klarong makakita sa mga posibilidad ug sa mga lit-ag sa talagsaon nga mga teknolohiya nga anaa kanato karon, nga kamo mahimong molambo diha sa inyong kapasidad sa paggamit niining dinasig nga mga himan sa husto nga paagi, ug nga kamo makadawat sa inspirasyon ug giya sa pagtabang sa pagpalukop sa yuta sama sa pagbaha kamatuoran ug pagkamatarung. Samtang kamo magpadayon niining balaan nga buhat, ako mosaad nga kamo mapanalanginan dinhi sa pagka-mortal sa tagsa-tagsa, piho, ug gikinahanglan nga mga pamaagi nga moandam kaninyo sa kahangturan.
Ang Ginoo nagpadali sa Iyang buhat, ug dili sulagma nga kining talagsaong kalamboan sa komunikasyon ug imbensyon nahitabo niining dispensasyon sa kahingpitan sa panahon.
Ako moawhag kaninyo nga molukop sa yuta uban sa mga mensahe nga puno sa pagkamatarung ug kamatuoran—mga mensahe nga tinuod, makapalig-on, ug dalaygon.