Dapig sa Ginoo: Mga Leksyon gikan sa Kampo sa Zion

July 2017

Dapig sa Ginoo: Mga Leksyon gikan sa Kampo sa Zion

Ni Elder David A. Bednar

Sa Korum sa Napulog Duha ka mga Apostoles

Gikan sa pakigpulong diha sa Education Week nga debosyonal, “Kinsay Dapig sa Ginoo? Karon Mao ang Panahon sa Pagpakita,” nahatag didto sa Brigham Young University–Idaho niadtong Hulyo 30, 2010.

Ang panaw sa Kampo sa Zion nga gipanguluhan ni Propeta Joseph Smith niadtong 1834 mao ang usa ka talagsaong ehemplo sa pagpili nga mahimong dapig sa Ginoo. Ang pagribyu sa kasaysayan sa Kampo sa Zion makatabang kanato nga makakat-on sa bililhon ug walay kinutuban nga mga leksyon gikan niining importante nga panghitabo sa kasaysayan sa Simbahan nga magamit sa atong kinabuhi ug mga kahimtang karon.

Unsa ang Kampo sa Zion?

Ang Propeta nga si Joseph Smith nakadawat og usa ka pagpadayag niadtong 1831 diin gitudlo nga ang Lalawigan sa Jackson, Missouri, isip ang dapit nga Zion, ang sentro nga lugar nga magpundok ang mga Santos sa Ulahing mga adlaw ug ang dapit alang sa Bag-ong Jerusalem nga nahibaloan diha sa Biblia ug sa Basahon ni Mormon (tan-awa sa D&P 57:1–3; tan-awa usab sa Pinadayag 21:1–2; Ether 13:4–6). Sa ting-init niadtong 1833, ang mga lumulupyo nga Mormon gibana-bana nga tulo ka bahin sa populasyon sa Lalawigan sa Jackson. Ang paspas kaayong pagsaka sa gidaghanon, ang potensyal nga politikanhong impluwensya, ug ang lahi nga relihiyoso ug politikal nga gituohan niining mga bag-ong nangabut maoy hinungdan sa kabalaka sa ubang lumulupyo diha sa dapit, kinsa sa katapusan mibungat nga ang mga miyembro sa Simbahan mobiya sa ilang mga panimalay ug mga kabtangan. Sa dihang wala matuman kining gipangayo, ang mga taga-Missouri miataki sa mga lumulupyo niadtong Nobyembre 1833 ug mipugos sa mga Santos sa pagbiya.

Ang pagkatukod sa Kampo sa Zion usa ka pinadayag nga sugo niadtong Pebrero 1834 (tan-awa sa D&P 103). Ang nag-unang katuyoan alang niining mga kasundalohan sa Ginoo mao ang pagpanalipod sa mga Mormon sa Lalawigan sa Jackson gikan sa dugang nga mga pagsulong—human ang militia sa Missouri mituman sa obligasyon niini sa paghatud sa mga nanimuyo nga luwas balik sa ilang mga panimalay ug kayutaan. Ang kampo kinahanglan usab nga modala og kwarta, mga suplay, ug moral nga suporta ngadto sa kabus nga mga Santos. Sa ingon, sa panahon sa Mayo ug Hunyo 1834, usa ka pundok nga kapin sa 200 ka mga boluntaryo nga mga Santos sa Ulahing mga adlaw nga gipangulohan ni Propeta Joseph Smith mibiyahe sa gibana-bana nga 900 ka milya (1,450 km) gikan sa Kirtland, Ohio, ngadto sa Lalawigan sa Clay, Missouri. Si Hyrum Smith ug si Lyman Wight usab nagtawag og mas gagmay nga grupo sa mga boluntaryo gikan sa Teritoryo sa Michigan ug nakighimamat sa grupo sa Propeta didto sa Missouri. Ang mga partisipante sa Kampo sa Zion naglakip ni Brigham Young, Heber C. Kimball, Wilford Woodruff, Parley P. Pratt, Orson Hyde, ug daghan pang inila nga mga indibidwal gikan sa kasaysayan sa Simbahan.

Dili nako tuyo nga ihulagway ang mga detalye niining malisud nga panaw o mosugilon sa tanang importanting espirituhanon nga yugto nga nahitabo. Tuguti lang ko nga i-summarize ang pipila ka dagkong mga panghitabo sa panaw sa Kampo sa Zion:

Si Gobernador Daniel Dunklin sa Missouri napakyas sa paghatag sa gisaad nga militia nga tabang nga gikinahanglan alang sa mga lumulupyo nga Mormon aron mabalik sa ilang mga kayutaan.
Mga negosasyon nga gisugdan tali sa mga lider sa Simbahan, mga opisyal sa estado sa Missouri, ug sa mga lungsuranon sa Lalawigan sa Jackson aron malikayan ang armadong panagsumpaki ug ang pagsulbad sa panaglalis sa kabtangan napakyas nga moabut sa husto nga panag-uyon.
Sa katapusan, ang Ginoo mimando kang Joseph Smith sa pagbungkag sa Kampo sa Zion ug mipasabut nganong ang mga kasundalohan sa Ginoo wala nakakab-ot sa gihunahuna nga tumong (tan-awa sa D&P 105:6–13, 19).
Ang Ginoo mimando sa mga Santos sa pagpasiugda sa panagdait diha sa dapit agi og pagpangandam alang sa panahon kon ang Zion mahibalik sa legal nga paagi kay sa pamaagi sa militar (tan-awa sa D&P 105:23–26, 38–41).

Ang kasundalohan sa Zion nabahin-bahin ngadto sa ginagmay nga mga grupo sa ulahing bahin sa Hunyo 1834, ug sa katapusan naisyuhan sa mga dokumento sa pagka-discharge sa unang pipila ka mga adlaw sa Hulyo 1834. Kadaghanan sa mga miboluntaryo mibalik ngadto sa Ohio.

Unsa nga mga leksyon ang atong makat-unan gikan sa Kampo sa Zion?

Tungod sa kapakyas sa pagpabalik sa mga Santos diha sa ilang mga kayutaan didto sa Lalawigan sa Jackson, ang Kampo sa Zion giisip sa pipila nga walay kalampusan ug walay kapuslanan nga paningkamot. Usa ka brother didto sa Kirtland—usa ka tawo nga kulang ang hugot nga pagtuo nga moboluntaryo sa pag-uban sa kampo—iyang nahimamat si Brigham Young sa iyang pagpauli gikan sa Missouri ug nangutana, “‘Nan, unsa man ang inyong naangkon niining walay kapuslanan nga panaw ngadto sa Missouri uban ni Joseph Smith?’ ‘Among nahimo ang tanan,’ ang daling tubag ni Brigham Young. ‘Dili nako ikabaylo ang kasinatian nga akong naangkon niana nga panaw sa tanang bahandi sa Lalawigan sa Geauga,’” ang lalawigan diin nahisakop ang Kirtland kaniadto.¹

Dapiton ko kamo nga hunahunaon og maayo ang tubag ni Brigham Young: “Among nahimo ang tanan.” Unsa ang importanting mga butang nga atong makat-unan gikan sa usa ka tahas nga wala makab-ot ang gipahayag nga katuyoan apan bisan pa man nakahatag niana ngadto sa mga nag-unang mga Santos, ug nahatag ngari kanato, ang mga panalangin sa tibuok kinabuhi?

Nagtuo ko nga ang duha sa labing ubos nga leksyon makita diha sa tubag ni Brother Brigham ngadto nianang mabiaybiayon nga pangutana: (1) ang leksyon sa pag-testing, pagsala, ug pag-andam, ug (2) ang leksyon sa pag-obserbar, gikan sa pagkat-on ug pagsunod sa mga Kaigsoonan. Akong ipasabut nga kining mga leksyon importante, kon dili man gani mas importante pa, alang kanato nga makat-on ug sa paggamit niini karon sama sa ilang paggamit kapin sa 180 ka tuig na ang milabay alang sa mga boluntaryo sa Kampo sa Zion.

Ang Leksyon sa Pag-testing, Pagsala ug Pagpangandam

Ang maunungon nga mga Santos kinsa mimartsa isip kasundalohan sa Ginoo gisulayan ug napamatud-an. Sumala sa gipamahayag sa Ginoo, “Ako midungog sa ilang mga pag-ampo ug midawat sa ilang mga halad; ug kini gikinahanglan ngari kanako nga sila kinahanglan pagadad-on hangtud dinha alang sa pagsulay sa ilang hugot nga pagtuo” (D&P 105:19).

Sa labing literal nga paagi, ang pisikal ug espiritwal nga mga hagit sa Kampo sa Zion naglangkob sa pagsala sa trigo gikan sa mga sagbut (tan-awa sa Mateo 13:25, 29–30; D&P 101:65), sa pagbahin sa mga karnero gikan sa mga kanding (tan-awa sa Mateo 25:32–33), sa pagbulag sa espirituhanong kalig-on gikan sa mga huyang. Sa ingon, ang matag lalaki ug babaye kinsa mipasakop sa kasundaluhan sa Ginoo nag-atubang ug nagtubag sa makapahinuktok nga pangutana nga “Kinsa ang dapig sa Ginoo?”²

Samtang si Wilford Woodruff mipahimutang sa iyang mga kalihokan sa patigayon ug nangandam sa pag-apil sa Kampo sa Zion, ang iyang mga higala ug mga silingan mipasidaan kaniya nga dili modawat sa ingon ka delikado nga biyahe. Mitambag sila nga, “Ayaw pag-adto, kon buhaton na nimo mamatay ka.” Mitubag siya nga, “Kon makahibalo ko nga maigo sa bala ang akong kasingkasing sa una nakong lakang sa estado sa Missouri moadto ko.”³ Nasayud si Wilford Woodruff nga dili siya kinahanglan nga mahadlok sa dautang mga sangputanan kon siya magmatinud-anon ug masulundon lang. Klaro kaayo nga dapig siya sa Ginoo.

Sa pagkatinuod, “ang panahon sa pagpakita”⁴ alang niadtong matinud-anong kalalakinhan ug kababayen-an mao ang ting-init niadtong 1834. Apan ang desisyon sa pagmartsa uban ni Propeta Joseph ngadto sa Missouri dili kinahanglan nga kausa ra, apil ang tanan, o diha-diha dayon nga tubag sa pangutana nga “Kinsa ang dapig sa Ginoo?” Ang panahon alang sa mga Santos sa pagpakita nga dapig sa Ginoo latas sa mental ug pisikal nga kaluya, sa nagkadugo nga mga luto sa mga tiil, sa kakulang sa pagkaon ug sa hugaw nga tubig, sa daghang mga kasagmuyo, sa mga panagsumpaki ug mga pagsukol sulod sa kampo, ug latas sa mga hulga sa mga kaaway.

Ang panahon sa pagpakita miabut diha sa mga kasinatian ug mga kalisud sa kada takna, sa kada adlaw, ug sa kada semana. Mao kadto ang talagsaong kombinasyon sa ingon og ginagmay nga mga pagpili ug mga lihok sa mga kinabuhi niining mga mahalaron nga mga Santos nga nakahatag sa panapos nga tubag sa pangutana nga, “Kinsa ang dapig sa Ginoo?”

Sa unsang paagi nga ang pagsulay ug pag-ayag nga nahitabo sa mga kinabuhi sa mga partisipante sa Kampo sa Zion nagsilbing usa ka pagpangandam? Makapaikag kaayo nga, walo sa mga kaigsoonan natawag ngadto sa Korum sa Napulog Duha ka mga Apostoles niadtong 1835, ingon man usab ang tanan sa mga Seventy gitawag sa samang higayon, mga beterano sa Kampo sa Zion. Sa usa ka miting pagkahuman og tawag sa mga Seventy, si Propeta Joseph Smith namahayag:

“Mga kaigsoonan, ang uban ninyo mga nasuko kanako, tungod kay kamo wala na makig-away didto sa Missouri; apan ako mosulti kaninyo, ang Dios dili gusto nga makig-away kamo. Dili Niya maorganisar ang iyang gingharian uban sa napulog duha ka mga kalalakin-an sa pag-abli sa pultahan sa ebanghelyo ngadto sa mga nasud sa yuta, ug uban sa kapitoan ka kalalakin-an ubos sa ilang direksyon sa pagsunod sa ilang lakang, gawas kon siya midala kanila gikan sa usa ka pundok sa mga kalalakin-an kinsa mihalad sa ilang mga kinabuhi, ug kinsa mihimo og ingon ka dako nga sakripisyo sama sa gibuhat ni Abraham.

“Karon, ang Ginoo aduna nay iyang Napulog Duha ug Kapitoan, ug adunay mga korum sa Kapitoan nga natawag.”⁵

Sa tinud-anay, ang Kampo sa Zion mao ang usa ka kalayo sa magtutunaw alang sa tanan nga mga boluntaryo sa kinatibuk-an ug alang sa daghan pa nga umaabut nga mga lider ilabina sa Simbahan sa Ginoo.

Ang mga kasinatian nga naangkon sa mga boluntaryo sa kasundalohan sa Ginoo mao ang usa ka pagpangandam alang sa mas dako, nga mga paglalin sa mga miyembro sa Simbahan sa umaabut. Kapin sa 20 ka mga partisipante sa Kampo sa Zion ang nahimong mga kapitan ug mga tenyente sa duha ka dagkong pagpanlakaw—ang una apan miabut og upat ka tuig, naglakip sa pagpapahawa sa mga 8,000 ngadto sa 10,000 ka mga tawo gikan sa Missouri ngadto sa Illinois⁶; ug ang ikaduha, 12 ka tuig sa umaabut, ang dako nga pag-uswag sa kasadpan nga gibana bana nga anaa sa mga 15,000 ka Santos sa Ulahing mga Adlaw gikan sa Illinois ngadto sa Salt Lake ug uban pang mga walog sa Rocky Mountain. Isip usa ka pagpangandam nga pagbansay, ang Kampo sa Zion adunay hilabihan ka dako nga bili ngadto sa Simbahan. Ang tuig sa 1834 mao ang panahon sa pagpakita—ug sa pagpangandam alang sa 1838 ug 1846.

Isip mga indibidwal ug pamilya, kita usab pagasulayan, ayagon, ug andamon, sama sa mga miyembro sa Kampo sa Zion. Ang mga kasulatan ug mga pagtulun-an sa mga Kaigsoonan puno sa saad nga ang hugot nga pagtuo diha ni Ginoong Jesukristo; ang paghimo, pagpasidungog, ug paghinumdom sa sagradong mga pakigsaad; ug pagkamasulundon sa mga sugo sa Dios mopalig-on kanato aron maandam alang sa, pag-atubang, sa pagbuntog, ug sa pagkat-on gikan sa mga pagsulay sa mortalidad.

Ang mga lider sa Simbahan sa Ginoo klarong nakahibalo sa tiningub o panghenerasyon nga pagsulay nga kita makalaom nga masugatan sa atong panahon ug henerasyon. Isip Presidente sa Korum sa Napulog Duha ka mga Apostoles niadtong 1977, si Presidente Ezra Taft Benson (1899–1994) mipadangat og usa ka propetikanhon nga tingog sa pagpasidaan diha sa usa ka rehiyonal nga miting sa mga representante. Karon ako mokutlo og maayo sa mensahe ni Presidente Benson ug modapit sa inyong atensyon sa pagtutok sa iyang tukma sa panahon nga tambag:

“Ang matag henerasyon adunay mga pagsulay ug mga kahigayunan sa pagbarug ug pagpamatuod sa kaugalingon niini. Gusto ba kamo masayud sa usa sa atong kinalisuran nga pagsulay? Paminawa ang mga pulong sa mga pasidaan ni Brigham Young, ‘Ang labing ngil-ad nga akong gikahadlokan niining mga katawhan mao nga sila mahimong adunahan niining nasud, makalimot sa Dios ug sa Iyang katawhan, mahimong tapulan, ug ipalayo ang ilang mga kaugalingon sa Simbahan ug moadto sa impyerno. Kini nga mga katawhan makasugakod sa pagpanggubot, pagpanulis, kakabus, ug sa tanang matang sa pagpanggukod ug magmatuod. Apan ang akong labing dako nga kahadlok mao nga sila dili makasugakod sa bahandi.’”

Si Presidente Benson nagpadayon: “Ang atoa daw mao ang labing lisud nga pagsulay sa tanan, tungod kay ang dautan mas maliputon, ug mas abtik. Kining tanan ingon og dili kaayo mahulgaon ug kini mas lisud nga mamatikdan. Samtang ang matag pagsulay sa pagkamatarung nagrepresentar sa usa ka paningkamot, kining piho nga pagsulay ingon og dili gayud pagsulay, walay paningkamot ug mao nga maoy labing malinglahon sa tanan nga mga pagsulay.

“Nakahibalo ba kamo kon unsa ang mahimo sa kalinaw ug kauswagan ngadto sa mga tawo—Kini mapakatulog kanila. Ang Basahon ni Mormon nagpasidaan kanato sa unsa nga paagi si Satanas, sa katapusang mga adlaw, modala kanato sa hinay-hinay ngadto sa impyerno. Ang Ginoo adunay pipila ka mga potensyal nga mga higante sa espirituhanon kinsa iyang gitagana sulod sa unom ka libo ka tuig aron sa pagtabang nga modala sa Simbahan nga magmadaugon, ug ang yawa naningkamot sa pagpakatulog nila. Ang kaaway nasayud nga lagmit dili kaayo siya molampos sa paghimo kanila nga maghimog daghang dagko ug yawan-on nga mga pagpakasala. Busa siya mihimo kanila nga mahinanok sa pagkatulog, sama ni Gulliver, samtang siya migaid kanila sa ginagmayng mga sala sa pagbaliwala. Ug unsay maayo sa usa ka katulugon, mikalma, kulang sa pagpakabana isip usa ka lider?

“Daghan kaayo kita og potensyal nga mga higante sa espirituhanon kinsa angay nga mas baskog sa pagbayaw sa ilang mga panimalay, sa gingharian, ug sa nasud. Aduna kitay daghan nga mibati nga sila mga maayong kalalakin-an ug mga kababaye-an, apan kinahanglan sila nga mahimong maayo sa usa ka butang—lig-ong mga patriyarka, maisugong mga misyonaryo, makugihon sa family history ug mga temple worker, mapahinunguron nga mga bayani, matinud-anong mga miyembro sa korum. Sa laktod, kinahanglan gayud kitang pukawon ug mahigmata gikan sa usa ka espirituhanon nga paghinanok.”⁷

Hunahunaa nga ang pagkaadunahan, pag-uswag ug ang kasayon mahimong mga pagsulay sa atong panahon nga sama ra o mas mograbe pa sa pagpanggukod ug sa pisikal nga mga kalisdanan nga gisagubang sa mga Santos kinsa miboluntaryo sa pagmartsa ngadto sa Kampo sa Zion. Samtang si propeta Mormon mihulagway sa iyang talagsaon nga paglangkob sa cycle nga anaa sa Helaman 12:

“Ug sa ingon kita makakita unsa ka sayop, ug usab ang pagkadili makanunayon sa mga kasingkasing sa mga katawhan; oo, kita makakita nga ang Ginoo diha sa iyang dako ug walay katapusan nga kaayo mopanalangin ug mopauswag niadto kinsa mobutang sa ilang pagsalig diha kaniya.

“Oo, ug kita mahimo nga makakita niana nga panahon nga siya mopauswag sa iyang mga katawhan, oo, sa pagtubo sa ilang mga umahan, sa ilang mga panon ug sa ilang kahayopan, ug diha sa bulawan, ug diha sa pilak, ug diha sa tanan nga matang sa mahalon nga mga butang sa matag matang ug sa sining; milugway sa ilang mga kinabuhi ug miluwas kanila gikan sa mga kamot sa ilang mga kaaway; mipahumok sa mga kasingkasing sa ilang mga kaaway aron sila dili mopahayag og mga gubat batok kanila; oo, ug sa katapusan, mibuhat sa tanan nga butang alang sa kaayohan ug sa kalipay sa iyang mga katawhan; oo, niana mao ang panahon nga sila mipatig-a sa ilang mga kasingkasing, o nahikalimot sa Ginoo nga ilang Dios, ug mitunob-tunob sa ilang mga tiil sa Usa nga Balaan—oo, ug kini tungod sa ilang kahamugaway, ug sa ilang hilabihan ka dako nga kauswagan. (Helaman 12:1–2).

Dapiton ko kamo sa pagtimaan ilabina sa katapusang mga pulong sa bersikulo: “ug kini tungod sa ilang kahamugaway, ug sa ilang hilabihan ka dako nga kauswagan.”

Si Presidente Harold B. Lee (1899–1973) mitudlo usab kabahin sa tiningub nga pagsulay sa kahamugaway nga atong giatubang sa atong panahon: “Kita gisulayan, atong gisinati ang pinakagrabe nga pagsulay karon ug dili ta makaamgo tingali sa kabug-at sa mga pagsulay nga atong maagian. Niadtong mga panahona adunay mga pagpangbuno, pagpanggukod, dihay pagpang-atake, adunay mga pagpang-abug. Gipugos sila sa pagpahawa paingon sa disyerto, gipanggutom sila ug sila walay mga sinina, ug gitugnaw sila. Mianhi sila niining pinili nga yuta. Kita ang mga manununod sa unsay ilang nahatag ngari kanato. Apan unsa ang atong gibuhat niini? Karon kita nagtagamtam diha sa sabakan sa kaharuhay, nga wala pa kini makita sukad kaniadto sa kasaysayan sa kalibutan. Ingon kini og mao na tingali ang labing bug-at nga pagsulay sa bisan unsang pagsulay nga atong naangkon sa kasaysayan sa Simbahan.”⁸

Kini nga mga pagtulun-an gikan sa moderno ug karaang mga propeta bahin sa ulahing adlaw nga mga pagsulay nga makapa-amgo ug makapaligdong. Apan kini dili gayud makapasagmuyo, ug dili kita angayang mahadlok. Alang niadtong may mata aron makakita ug dalunggan nga makabati, ang espirituhanong mga pasidaan mogiya ngadto sa pagkamabinantayon. Kamo ug ako nagpuyo sa “usa ka adlaw sa pagpasidaan” (D&P 63:58). Ug tungod kay kita napasidan-an ug pasidan-an pa, nagkinahanglan gayud kita, sama sa gitambag ni Apostol Pablo, “magtukaw … uban sa bug-os nga pagkamapadayonon” (Mga Taga-Efeso 6:18). Samtang kita magbantay ug mangandam, sa pagkatinuod dili kita kinahanglan nga mahadlok (tan-awa sa D&P 38:30).

Kinsa ang dapig sa Ginoo! Karon ang panahon sa pagpakita nga kita adunay mga hunahuna ug mga pagbati nga modawat ug motubag ngadto niining dinasig nga mga pasidaan. Karon ang panahon sa pagpakita nga kita nagtan-aw ug nangandam sa pagbatok sa mga pagsulay sa kauswagan ug garbo sa ulahing mga adlaw, sa kaharuhay ug kasayon, ug sa mga matig-a nga mga kasingkasing ug sa paghikalimut sa Ginoo nga atong Dios. Karon ang panahon sa pagpakita nga kita mahimong matinud-anon sa bisan unsa nga butang nga gisalig kanato sa atong Langitnong Amahan ug sa Iyang Hinigugmang Anak—ug nga kita mosunod sa mga sugo sa Dios ug sa paglakaw nga matarung diha sa Iyang atubangan (tan-awa sa Alma 53:20–21).

Ang leksyon sa Pag-obserbar, gikan sa Pagkat-on ug Pagsunod sa mga Kaigsoonan

Ang ligdong nga mga Santos diha sa kasundalohan sa Ginoo napanalanginan sa pag-obserbar, sa pagkat-on, ug sa pagsunod sa mga Kaigsoonan. Ug kita karon nakabenepisyo og dako gikan sa ehemplo ug pagkamatinud-anon sa relihiyoso nga mga miyembro sa Kampo sa Zion.

Agi og tubag sa tambag gikan kang Parley P. Pratt, si Wilford Woodruff mibiyahe ngadto sa Kirtland, Ohio, niadtong Abril 1834 aron sa pag-apil sa Kampo sa Zion. Ang istorya ni Brother Woodruff sa iyang unang miting uban ni Propeta Joseph Smith mapuslanon kaayo alang kanatong tanan:

“Dinhi sa unang higayon sa akong kinabuhi akong nahimamat ug na-interbyu ang atong pinalanggang Propeta nga si Joseph Smith, ang tawo kinsa gipili sa Dios sa pagdala sa Iyang mga gipadayag niining katapusang mga adlaw. Ang akong unang pag-ila-ila dili usa ka matang nga makapatagbaw sa akong daan nang ideya nga gihunahuna kon unsa ang usa ka propeta angay nga mamahimo, ug kon sa unsang paagi siya angayng makita. Tingali nakapakurat kini sa pagtuo sa pipila ka mga tawo. Ako siyang nakita ug ang iyang igsoong si Hyrum nga nagbansay sa pagpusil gamit ang parisan sa pistola. Dihang nahuman sila sa pagpusil-pusil, gipaila-ila ko ngadto ni Brother Joseph, ug kinasingkasing siya nga nakiglamano nako. Gidapit ko niya nga isipon ang iyang pinuy-anan nga akong panimalay samtang ako nagpabilin didto sa Kirtland. Kini nga imbitasyon gikahinangop nako sa pagdawat, ug hilabihan nga nalig-on sa akong pagpuyo uban kaniya.”⁹

Para nako dalaygon kaayo nga si Brother Woodruff, kinsa nakapuyo og usa ka higayon sa panimalay sa Propeta ug sa walay pagduha-duha nakaangkon og talagsaon nga oportunidad nga makaobserbar niya sa iyang inadlaw-adlaw nga pagpakabuhi, napanalanginan og mga mata aron sa pagtan-aw lapas sa “daan nang ideya nga gihunahuna kon unsa ang usa ka propeta angay nga mamahimo, ug kon sa unsang paagi siya angayng makita.” Ang ingon nga mga sayop nga mga ideya nakapahanap sa panan-awon sa kadaghanan sa kalibutan karon, sa sulod ug gawas sa gipahiuli nga Simbahan sa Ginoo.

Isip resulta sa akong tawag niadtong 2004 sa pagserbisyo diha sa Korum sa Napulog Duha ka mga Apostoles, aduna koy usa ka lahi nga panglantaw bahin sa unsa ang ipasabut sa pag-obserbar, sa pagkat-on, ug sa pagsunod sa Kaigsoonan. Karon akong nakita sa inadlaw-adlaw ang indibidwal nga mga personalidad, ang nagkalainlaing mga gusto, ug ang halangdong mga kinaiya sa mga lider niining Simbahan. Ang ubang mga tawo nakita nga ang limitasyon sa tawo ug mga kakulangan sa kaigsoonan makapabalaka ug makapakunhod sa hugot nga pagtuo. Alang nako, kadto nga mga kahuyang makapalig-on sa hugot nga pagtuo. Ang gipadayag nga sumbanan sa Ginoo sa pagdumala sa Iyang Simbahan nakahatag ug nakapakunhod sa epekto sa tawhanong kahuyang. Kini tinuod nga milagroso alang kanako sa pagsaksi sa pagtuman sa Ginoo sa Iyang kabubut-on pinaagi sa Iyang mga sulugoon bisan pa man sa mga kasaypanan ug kapakyasan sa Iyang pinili nga mga lider. Kini nga mga kalalakin-an wala gayud miangkon nga hingpit ug sila dili; dili gayud, apan, tinawag sa Dios.

Usa pa siya ka priest dihang nakiglakaw ngadto sa Missouri uban sa kasundalohan sa Ginoo, sa kaulahian si Wilford Woodruff mipahayag samtang nagserbisyo isip usa ka sakop sa Korum sa napulog duha Ka mga apostoles: “Atong naangkon ang kasinatian nga dili gayud unta nato maangkon sa bisan unsang paagi. Kita adunay prebilihiyo sa … pagbiyahe og liboan ka milya uban [sa Propeta], ug makakita sa mga buhat sa Espiritu sa Dios uban kaniya, ug sa mga pagpadayag ni Jesukristo ngadto kaniya ug sa katumanan niadto nga mga pagpadayag. … “Kon wala pa ako miuban sa Kampo sa Zion wala unta ko karon dinhi.”¹⁰

Sa katapusang Dominggo niadtong Abril 1834, gidapit ni Joseph Smith ang pipila ka mga lider sa Simbahan sa pagpakigpulong sa mga boluntaryo sa Kampo sa Zion nga nagpundok sa usa ka schoolhouse. Human ang kaigsoonan mitapos sa ilang mga mensahe, ang Propeta mibarug ug miingon nga siya nalamdagan pinaagi sa pagtudlo. Dayon nanagna Siya:

“Gusto kong mosulti ninyo sa atubangan sa Ginoo, nga kamo walay nahibaloan mahitungod sa padulngan niini nga Simbahan ug gingharian kay sa usa ka bata sa sabakan sa iyang inahan. Wala kamo makasabut niini. … ‘Gamay ra nga mga Priesthood ang inyong nakita karong gabhiona, pero kini nga Simbahan molukop sa Amihanan ug Habagatang Amerika––molukop kini sa kalibutan.”¹¹

Ang mga tawo sama nilang Brigham Young, Heber C. Kimball, Orson Pratt ug Wilford Woodruff naminaw ug nakakat-on og daghan gikan sa Propeta nianang gabhiona—ug mga tuig sa wala madugay nakatabang sa pagtuman sa iyang mapanagnaon nga pamahayag. Pagka mahimayaon nga mga oportunidad ang naa niini nga mga kalalakin-an nga nag-obserbar, nagkat-on, ug nagsunod sa Propeta.

Importante alang kanatong tanan sa paghinumdom nga kita makakat-on gikan sa mga pagtulun-an sa mga Kaigsoonan, ug gikan sa mga ehemplo sa ilang mga kinabuhi. Tungod sa talagsaon nga panan-awon sa umaabut nga pagtubo sa Simbahan nga gihulagway ni Propeta Joseph Smith, palihug ikonsiderar karon ang gahum sa iyang personal nga ehemplo sa paghimo sa balik-balik nga tulumanon apan gikinahanglan nga mga buluhaton. Gihulagway ni George A. Smith sa iyang journal ang reaksyon sa Propeta sa inadlawng mga hagit sa ilang pagmartsa ngadto sa Missouri.

“Si Propeta Joseph nakaambit sa kinatibuk-ang bahin sa mga kapaitan sa tibuok nga panaw. Dugang sa pag-asikaso sa panginahanglan alang sa Kampo ug sa pagdumala niini, siya naglakaw sa daghang higayon ug nakaangkon og paslot, dugoon, ug nagngulngol nga mga tiil. … Apan atol sa tibuok nga panaw siya wala gayud magbagulbol o moreklamo samtang ang kadaghanan sa mga sakop sa Kampo nagreklamo ngadto kaniya sa ilang nagsakit nga mga tudlo sa tiil, sa mga nangapaslot nga mga tiil, sa taas nga mga biyahe, ang kadaginuton sa ilang mga pagkaon, sa dili maayo nga matang sa pan, sa bati nga harinang mais [mais nga pan], pan-os [nadaot] nga mantikilya, bahoon nga dugos, giulod nga kusahos ug keso, ug uban pa. Bisan ang usa ka iro dili kapaghot sa pipila ka tawo nga wala ang ilang pagbagulbol ngadto ni Joseph. Kon sila mapugos pagkampo sa lugar nga walay maayong tubig, kini ingon sa paingon na ngadto sa pagrebelde, apan daghan kanamo ang dili mainampuon, walay maayong panghunahuna, walay pagmatngon, wala sa kaugalingon, buangon, o yawan-on, ug gani wala kami kabantay niini. Si Joseph nag-agwanta kanamo ug nagtudlo kanamo, sama sa mga bata.”¹²

Si Joseph usa ka lig-on nga ehemplo sa baruganan nga gitudlo ni Alma: “Kay ang tigsangyaw dili labaw kay sa tigpaminaw, ni ang magtutudlo maayo pa kay sa tinudloan; … ; ug sa ingon niana silang tanan managsama, ug silang tanan naghago, matag tawo sumala sa iyang kusog” (Alma 1:26).

Sukad sa akong pagkatawag nga General Authority, naningkamot ako sa pag-obserbar ug sa pagkat-on samtang ang uban sa akong mga Kaigsoonan nagsagubang sa mga epekto sa katigulangon o sa walay hunong nga panginahanglan sa pisikal nga limitasyon ug kanunayng pagkasakit. Dili ug dili gayud ninyo masayran ang pribado ug hilum nga pag-antus sa pipila niining nga mga kalalakin-an samtang sila nagserbisyo sa publiko uban sa tibuok nilang kasingkasing, gahum, hunahuna, ug kusog. Ang makaserbisyo ug makatan-aw uban ni Presidente Gordon B. Hinckley (1910–2008), Presidente James E. Faust (1920–2007), Elder Joseph B. Wirthlin (1917–2008), Presidente Boyd K. Packer (1924–2015), Elder L. Tom Perry (1922–2015), Elder Richard G. Scott (1928–2015), ug sa uban nakong mga kaubanan sa pagka-apostol naghatag kanako og gahum nga klarong makapahayag ug masaligon nga ang mga Kaigsoonan kinsa akong gikauban sa pagserbisyo mga manggugubat—halangdon ug bantugan nga espirituhanon nga mga manggugubat—diha sa labing matinud-anon ug labing dalaygon nga pagkasulti! Ang ilang kamapailubon, kamakanunayon, ug kaisug makapahimo kanila nga “mopadayon sa unahan uban ang pagkamakanunayon kang Kristo” (2 Nephi 31:20) nga mao ang angay natong sundon.

Si Presidente Lee mipasidan-an sa usa ka dugang nga pagsulay nga padayon nga nagkadako dinhi niini nga henerasyon: “Ato na karong atubangon ang laing mga pagsulay—usa ka panahon nga tingali mahimo natong tawagon og pagpasulabi. Mao kini ang panahon diin dunay daghang maalamong tawo nga dili andam nga maminaw sa mapaubsanong mga propeta sa Dios. … Maingon og mao na kini ang grabe nga pagsulay.”¹³

Ang pagsulay sa pagpasulabi kauban sa pagsulay sa pag-uswag ug kasayon. Importante kaayo alang sa matag usa kanato nga mag-obserbar, magkat-on ug mosunod sa mga Kaigsoonan.

“Kinsa ang Dapig sa Ginoo! Karon ang panahon sa pagpakita pinaagi sa pagdungog ug pagpatalinghug sa tambag sa buhing mga apostoles ug mga propeta nga tinawag sa Dios niining ulahing mga adlaw sa pagdumala ug pagdirekta sa Iyang buhat dinhi sa yuta. Karon ang panahon sa pagpakita nga kita nagtuo nga ang “pulong [sa Dios] dili mahanaw, apan ang tanan matuman, bisan pinaagi sa [Iyang] kaugalingon nga tingog o pinaagi sa tingog sa [Iyang] mga sulugoon, kini managsama ra” (D&P 1:38). “Karon mao ang panahon sa pagpakita. Karon ang panahon!

Atong Kaugalingong Kampo sa Zion

Adunay panahon sa matag usa sa atong kinabuhi, kita dapiton sa pagmartsa ngadto sa atong kaugalingon nga Kampo sa Zion. Ang katukma sa mga imbitasyon magkalain-lain, ug ang piho nga mga babag nga atong masugatan sa panaw mahimong lahi. Apan ang atong padayon ug makanunayon nga tubag sa dili kalikayan nga tawag sa katapusan ang makatubag sa pangutana nga “Kinsa ang dapig sa Ginoo?”

Ang panahon sa pagpakita mao karon, karon, ugma, ug sa kahangturan. Hinaut nga atong hinumduman ang mga leksyon kabahin sa pagsulay, pagsala ug pag-andam ug sa pag-obserbar, gikan sa pagkat-on ug pagsunod sa mga Kaigsoonan.