សារលិខិតគណៈប្រធានទីមួយ
នៅពេលយើងបន្តឆ្ពោះទៅមុខជាមួយគ្នា
ដោយប្រធាន រ័សុល អិម ណិលសុន
បងប្អូនប្រុសស្រីជាទីស្រឡាញ់ ខ្ញុំមានចិត្តរាបសាដែលបាននៅជាមួយនឹងបងប្អូននាព្រឹកនេះ ។ រយៈពេល ៤ ថ្ងៃកន្លងទៅ ពួកយើងបានរៀបចំទុកដាក់ការបញ្ចុះសពបុរសដ៏អស្ចារ្យដែលជាព្យាការីនៃព្រះគឺប្រធាន ថូម៉ាស អេស ម៉នសុន ទៅកាន់ទីសម្រាករបស់លោក ។ គ្មានពាក្យពេចន៍ណាអាចថ្លែងបញ្ជាក់អំពីទំហំ និងក្តីអស្ចារ្យនៃជីវិតរបស់លោកបានឡើយ ។ ខ្ញុំនឹងរីករាយចំពោះមិត្តភាពរបស់ពួកយើងជារៀងរហូត ព្រមជាមួយនឹងអំណរគុណចំពោះអ្វីដែលលោកបានបង្រៀនខ្ញុំ ។ ឥឡូវ យើងត្រូវតែមើលទៅអនាគតដោយសេចក្ដីជំនឿទាំងស្រុងទៅលើព្រះអម្ចាស់ ព្រះយេស៊ូវគ្រីស្ទ ដែលជាម្ចាស់នៃសាសនាចក្រនេះ ។
កាលពីពីរថ្ងៃមុន ពួកសាវកនៅរស់ទាំងអស់បានជួបជុំគ្នានៅបន្ទប់ជាន់លើនៃព្រះវិហារបរិសុទ្ធ សលត៍ លេក ។ នៅទីនោះ ពួកលោកបានធ្វើការសម្រេចចិត្តជាឯកឆន្ទ ទីមួយ គឺត្រូវរៀបចំគណៈប្រធានទីមួយឡើងវិញក្នុងពេលឥឡូវនេះ ហើយទីពីរ គឺថាខ្ញុំបម្រើជាប្រធានសាសនាចក្រ ។ គ្មានពាក្យពេចន៍ណាអាចថ្លែងប្រាប់បងប្អូនបានក្បោះក្បាយគ្រប់គ្រាន់ពីអារម្មណ៍របស់ខ្ញុំ នៅពេលដែលមានបងប្អូនប្រុសរបស់ខ្ញុំ ជាអ្នកដែលកាន់កូនសោបព្វជិតភាព ដែលបានស្ដារឡើងវិញតាមរយៈព្យាការី យ៉ូសែប ស៊្មីធ នៅក្នុងគ្រាកាន់កាប់ត្រួតត្រានេះ មកដាក់ដៃរបស់ពួកលោកនៅលើក្បាលរបស់ខ្ញុំ ដើម្បីតែងតាំង និងញែករូបខ្ញុំចេញឲ្យធ្វើជាប្រធានសាសនាចក្រនោះទេ ។ វាគឺជាបទពិសោធន៍ពិសិដ្ឋ និងរាបសាមួយ ។
បន្ទាប់មក វាក្លាយជាការទទួលខុសត្រូវរបស់ខ្ញុំដើម្បីដឹងថានរណាជាអ្នកដែលព្រះអម្ចាស់បានរៀបចំឲ្យធ្វើជាទីប្រឹក្សារបស់ខ្ញុំ ។ តើខ្ញុំអាចជ្រើសរើសតែសាវកពីររូបក្នុងចំណោមពួកដប់ពីរនាក់ ដែលម្នាក់ៗជាមនុស្សដែលខ្ញុំស្រឡាញ់យ៉ាងខ្លាំងបានដោយរបៀបណា ? ខ្ញុំមានអំណរគុណដ៏ពន្លឹកចំពោះព្រះអម្ចាស់សម្រាប់ការឆ្លើយតបការអធិស្ឋានដ៏ក្លៀវក្លារបស់ខ្ញុំ ។ ខ្ញុំមានអំណរគុណណាស់ដែលប្រធាន ដាលិន ហារិស អូក និង ប្រធាន ហិនរី ប៊ែនញៀន អាវរិង មានឆន្ទៈបម្រើជាមួយខ្ញុំជាទីប្រឹក្សាទីមួយ និងទីប្រឹក្សាទីពីរ ។ ប្រធាន ឌៀថើរ អេស្វ អុជដូហ្វ បានត្រឡប់ទៅកាន់កន្លែងលោកនៅក្នុងកូរ៉ូមនៃពួកសាវកដប់ពីរនាក់វិញ ។ លោកបានទទួលយកការចាត់តាំងដ៏ធំមួយរួចទៅហើយដែលលោកមានសក្ដិសមជាពិសេស ។
ខ្ញុំសូមថ្លែងអំណរគុណដល់លោក និងប្រធាន អាវរិង ចំពោះការបម្រើដ៏អស្ចារ្យរបស់ពួកលោក ក្នុងនាមជាទីប្រឹក្សារបស់ប្រធាន ម៉នសុន ។ ពួកលោកពិតជាមានពេញដោយសមត្ថភាព ការលះបង់ និងការបំផុសគំនិត ។ ពួកយើងអរគុណយ៉ាងខ្លាំងចំពោះពួកលោក ។ ពួកលោកម្នាក់ៗមានឆន្ទៈដើម្បីបម្រើនៅត្រង់កន្លែងដែលលោកត្រូវការចាំបាច់បំផុតក្នុងពេលនេះ ។
ក្នុងនាមជាសាវករៀមច្បងទីពីរ ប្រធាន អូក ក៏ក្លាយជាប្រធាននៃកូរ៉ុមនៃពួកសាវកដប់ពីរនាក់ផងដែរ ។ ប៉ុន្តែដោយលោកត្រូវបានហៅមកកាន់គណៈប្រធានទីមួយ ព្រមទាំងស្របតាមលំដាប់ក្នុងសាសនាចក្រ នោះប្រធាន អិម រ័សុល បាឡឺដ គឺជារៀមច្បងបន្ទាប់ ដែលនឹងបម្រើជាប្រធានស្ដីទីនៃកូរ៉ុមនោះ ។ គណៈប្រធានទីមួយនឹងធ្វើការគៀកដៃគ្នាជាមួយនឹងពួកដប់ពីរនាក់ដើម្បីដឹងអំពីព្រះហឬទ័យរបស់ព្រះអម្ចាស់ ហើយរំកិលកិច្ចការដ៏ពិសិដ្ឋរបស់ទ្រង់ឆ្ពោះទៅមុខ ។
ពួកយើងសូមអរគុណចំពោះការអធិស្ឋានរបស់បងប្អូន ។ ដែលបានអធិស្ឋាននៅទូទាំងពិភពលោកសម្រាប់ពួកយើង ។ នៅព្រឹកបន្ទាប់ពីមរណភាពរបស់ប្រធាន ម៉នសុន មានកុមារាអាយុបួនឆ្នាំម្នាក់ ឈ្មោះបែនសុនបានអធិស្ឋានដូច្នេះ ។ ខ្ញុំសូមដកស្រង់ចេញមកពីសំបុត្រម្ដាយរបស់គាត់ដែលបានសរសេរមកភរិយារបស់ខ្ញុំ វិនឌី ។ បែនសុនបានអធិស្ឋានថា ៖ « ព្រះវរបិតាសួគ៌អើយ សូមអរគុណដែលប្រធាន ថូម៉ាស អេស ម៉នសុន អាចបានជួបនឹងភរិយារបស់លោកម្ដងទៀត ។ សូមថ្លែងអំណរគុណចំពោះព្យាការីថ្មីរបស់យើង ។ សូមជួយលោកឲ្យមានភាពក្លាហាន ហើយកុំខ្លាចចំពោះភាពថ្មីថ្មោងរបស់លោក ។ សូមជួយលោកឲ្យធំឡើងមានសុខភាពល្អ ហើយរឹងមាំ ។ សូមជួយលោកមានអំណាច ដោយសារលោកមានបព្វជិតភាព ។ ហើយសូមជួយពួកយើងធ្វើល្អជានិច្ច » ។
ខ្ញុំអរគុណព្រះចំពោះកុមារទាំងឡាយដូចជាកុមាររូបនេះ និងឪពុកម្ដាយទាំងឡាយដែលយកចិត្តទុកដាក់ដោយហ្មត់ចត់អំពីការតាំងចិត្តរបស់ពួកគេដើម្បីបីបាច់កូនចៅក្នុងសេចក្ដីសុចរិត និងចេតនាពិត—ដ្បិតគ្រប់ឪពុកម្ដាយ គ្រូបង្រៀន និងសមាជិកដែលរែកបន្ទុកធ្ងន់ៗ បានបម្រើដោយសុឆន្ទៈ ។ ម្យ៉ាងទៀត ខ្ញុំមានអំណរគុណដោយរាបសាជាទីបំផុតចំពោះបងប្អូនម្នាក់ៗ ។
ព្រះអម្ចាស់គង់នៅឯចង្កូតនាវា
នៅពេលយើងឆ្ពោះទៅមុខជាមួយគ្នា ខ្ញុំសូមអញ្ជើញបងប្អូនឲ្យគិតអំពីរបៀបដ៏វិសេសវិសាលដែលព្រះអម្ចាស់គ្រប់គ្រងសាសនាចក្ររបស់ទ្រង់ ។ នៅពេលប្រធានសាសនាចក្រមួយរូបទទួលមរណភាព នោះពុំមានអាថ៌កំបាំងអំពីនរណាដែលនឹងត្រូវបានហៅឲ្យបម្រើបន្ទាប់ក្នុងតំណែងនោះទេ ។ ពុំមានការបោះឆ្នោត ពុំមានធ្វើយុទ្ធនាការទេ ប៉ុន្តែត្រូវបានធ្វើការតាមផែនការរបស់ព្រះដោយស្ងាត់ស្ងៀមក្នុងការស្នងតំណែង ដែលត្រូវបានរៀបចំឡើងជាស្រេចដោយព្រះអម្ចាស់ផ្ទាល់ ។
រាល់ថ្ងៃនៃការបម្រើរបស់សាវកម្នាក់ គឺជាថ្ងៃនៃការរៀនសូត្រ និងការរៀបចំសម្រាប់ការទទួលខុសត្រូវបន្ថែមនៅពេលអនាគត ។ វាត្រូវការពេលវេលាក្នុងការបម្រើរាប់ទស្សវត្សរ៍ ដើម្បីសាវកមួយរូបផ្លាស់ពីកៅអីសិស្សប្អូន ទៅកាន់កៅអីរៀមច្បងនៅក្នុងរង្វង់នោះ ។ អំឡុងពេលនោះ លោកទទួលបាននូវបទពិសោធន៍ផ្ទាល់នៅក្នុងចំណែកនីមួយៗនៃកិច្ចការរបស់សាសនាចក្រ ។ លោកក៏បានស្គាល់មនុស្សនៅលើផែនដី រួមទាំងប្រវត្តិសាស្ត្រ វប្បធម៌ និងភាសារបស់ពួកគេច្បាស់ផងដែរ នៅពេលដាក់កិច្ចការចាត់តាំងដដែលៗទៅឲ្យលោកទៅក្នុងផែនដីនេះ ។ ដំណើរការនៃការស្នងតំណែងថ្នាក់ដឹកនាំនៃសាសនាចក្រនេះ គឺពិសេសដាច់ដោយឡែក ។ ខ្ញុំដឹងថាពុំមានអ្វីដូចនេះឡើយ ។ រឿងនោះពុំគួរជាការភ្ញាក់ផ្អើលចំពោះយើងឡើយ ដោយសារនេះគឺជាសាសនាចក្ររបស់ព្រះអម្ចាស់ ។ ទ្រង់ពុំធ្វើកិច្ចការតាមរបៀបមនុស្សលោកនោះទេ ។
ខ្ញុំបានបម្រើនៅក្នុងកូរ៉ុមនៃពួកដប់ពីរនាក់នៅក្រោមប្រធានសាសនាចក្រពីមុនៗចំនួនប្រាំរូប ។ ខ្ញុំបានមើលប្រធានម្នាក់ៗទទួលវិវរណៈ ហើយឆ្លើយតបនឹងវិវរណៈនោះ ។ ព្រះអម្ចាស់តែងតែបាន ហើយតែងតែនឹងបង្រៀន ព្រមទាំងបំផុសគំនិតដល់ពួកព្យាការីរបស់ទ្រង់ ។ ព្រះអម្ចាស់ជាអង្គកាច់ចង្កូតនាវា ។ ពួកយើងដែលត្រូវបានតែងតាំងឲ្យបម្រើជាសាក្សីនៃព្រះនាមបរិសុទ្ធរបស់ទ្រង់នៅទូទាំងពិភពលោក នឹងបន្ដព្យាយាមស្គាល់ព្រះទ័យទ្រង់ ហើយធ្វើតាម ។
ចូរបន្តនៅលើផ្លូវនៃសេចក្តីសញ្ញា
ឥឡូវនេះ ចំពោះសមាជិកសាសនាចក្រម្នាក់ៗ ខ្ញុំសូមប្រាប់ថា ៖ សូមបន្ដដើរនៅលើផ្លូវនៃសេចក្ដីសញ្ញា ។ ការតាំងចិត្តរបស់បងប្អូនដើម្បីធ្វើតាមព្រះអង្គសង្គ្រោះតាមរយៈការធ្វើសេចក្ដីសញ្ញាជាមួយទ្រង់ បន្ទាប់មករក្សាសេចក្ដីសញ្ញានោះ នឹងបើកទ្វារទៅកាន់ពរជ័យ និងឯកសិទ្ធិខាងវិញ្ញាណទាំងអស់ ដែលមានចំពោះបុរស ស្ត្រី និងកុមារនៅគ្រប់ទីកន្លែង ។
ក្នុងនាមជាគណៈប្រធានថ្មី ពួកយើងចង់ចាប់ផ្តើមជាមួយនឹងទស្សនៈវិស័យដ៏ច្បាស់លាស់ ។ ដោយសារតែហេតុផលនេះ ពួកយើងកំពុងនិយាយទៅកាន់បងប្អូនចេញពីព្រះវិហារបរិសុទ្ធ ។ នៅទីបំផុត ពួកយើងម្នាក់ៗព្យាយាមដើម្បីបានអំណោយទានពិសិដ្ឋជាមួយនឹងអំណាចនៅក្នុងដំណាក់នៃព្រះអម្ចាស់ ផ្សារភ្ជាប់ជាមួយក្រុមគ្រួសារ—ស្មោះត្រង់ចំពោះសេចក្តីសញ្ញាដែលបានធ្វើនៅក្នុងព្រះវិហារបរិសុទ្ធ—ដែលធ្វើឲ្យយើងសក្តិសមសម្រាប់អំណោយទានដ៏មហិមារបស់ព្រះគឺជីវិតអស់កល្បជានិច្ច ។ ពិធីបរិសុទ្ធនៃព្រះវិហារបរិសុទ្ធ និងសេចក្តីសញ្ញាដែលបងប្អូនធ្វើនៅទីនោះគឺជាគន្លឹះដើម្បីពង្រឹងជីវិតរបស់បងប្អូន អាពាហ៍ពិពាហ៍ និងគ្រួសាររបស់បងប្អូន ព្រមទាំងលទ្ធភាពរបស់បងប្អូនដើម្បីទប់ទល់នឹងការវាយប្រហារពីមារសត្រូវ ។ ការថ្វាយបង្គំនៅក្នុងព្រះវិហារបរិសុទ្ធ និងការបម្រើរបស់បងប្អូននៅទីនោះសម្រាប់ជីដូនជីតារបស់បងប្អូននឹងប្រទានពរដល់បងប្អូនទទួលបានវិវរណៈផ្ទាល់ខ្លួន និងភាពសុខសាន្តកាន់តែច្រើន ព្រមទាំងពង្រឹងការតាំងចិត្តរបស់បងប្អូនដើម្បីបន្តនៅលើផ្លូវនៃសេចក្តីសញ្ញា ។
ឥឡូវនេះ ប្រសិនបើបងប្អូនបានដើរចេញពីផ្លូវនេះ ខ្ញុំសូមអញ្ជើញបងប្អូនដោយសង្ឃឹមទាំងស្រុងក្នុងចិត្តខ្ញុំថា សូមត្រឡប់មកវិញ ! ទោះបីបងប្អូនមានកង្វល់ មានឧបសគ្គយ៉ាងណាក្តី មានកន្លែងមួយសម្រាប់បងប្អូននៅទីនេះ ក្នុងសាសនាចក្ររបស់ព្រះអម្ចាស់ ។ បងប្អូន និងជំនាន់នានាដែលមិនទាន់កើតនៅឡើយនឹងមានពរតាមរយៈទង្វើរបស់បងប្អូនក្នុងពេលនេះដើម្បីត្រឡប់មកលើផ្លូវនៃសេចក្តីសញ្ញាវិញ ។ ព្រះវរបិតាដែលគង់នៅស្ថានសួគ៌រីករាយព្រះទ័យចំពោះបុត្រាបុត្រីទ្រង់ ហើយសព្វព្រះទ័យឲ្យយើងម្នាក់ៗត្រឡប់ទៅកាន់ទ្រង់វិញ ។ នេះគឺជាគោលដៅដ៏ចម្បងរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ—គឺដើម្បីជួយយើងម្នាក់ៗឲ្យត្រឡប់ទៅផ្ទះវិញ ។
ខ្ញុំសូមបង្ហាញសេចក្តីស្រឡាញ់ដ៏ជ្រាលជ្រៅចំពោះបងប្អូន—សេចក្តីស្រឡាញ់ដែលបានរីកចម្រើនឡើងជាច្រើនទសវត្សរ៍នៅពេលជួបនឹងបងប្អូន ថ្វាយបង្គំជាមួយបងប្អូន និងបម្រើបងប្អូន ។ ការត្រាស់បង្គាប់ពីព្រះរបស់យើងគឺថា ត្រូវទៅគ្រប់ទាំងសាសន៍ គ្រប់ពូជមនុស្ស គ្រប់ភាសា ហើយនឹងគ្រប់ទាំងប្រជាជន ជួយរៀបចំពិភពលោកសម្រាប់ការយាងមកជាលើកទីពីររបស់ព្រះអម្ចាស់ ។ យើងធ្វើកិច្ចការនេះដោយសេចក្តីជំនឿលើព្រះអម្ចាស់យេស៊ូវគ្រីស្ទ ដោយដឹងថា ទ្រង់ជាអ្នកគ្រប់គ្រងកិច្ចការនេះ ។ នេះជាកិច្ចការរបស់ទ្រង់ និងសាសនាចក្រទ្រង់ ។ ពួកយើងគឺជាអ្នកបម្រើទ្រង់ ។
ខ្ញុំសូមប្រកាសអំពីការបូជារបស់ខ្ញុំចំពោះព្រះជាព្រះវរបិតាអស់កល្បជានិច្ច និងព្រះបុត្រាទ្រង់គឺព្រះយេស៊ូវគ្រីស្ទ ។ ខ្ញុំស្គាល់ពួកទ្រង់ ស្រឡាញ់ពួកទ្រង់ ហើយប្តេជ្ញាចិត្តបម្រើពួកទ្រង់—និងបងប្អូន—រហូតដល់ដង្ហើមចុងក្រោយនៃជីវិតខ្ញុំ ។ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។