ការអធិស្ឋាន ៖គន្លឹះឆ្ពោះទៅរកទីបន្ទាល់ និងការស្តារឡើងវិញ

ដោយអែលឌើរ រ៉ូបឺត ឌី ហែល ( ១៩៣២–២០១៧ )

ក្នុងកូរ៉ុមនៃពួកសាវកដប់ពីរនាក់

ដកស្រង់ចេញពីសុន្ទរកថានៅក្នុងសន្និសីទទូទៅខែ តុលា ឆ្នាំ ២០០៣ ។

តាមរយៈគំរូរបស់យ៉ូសែប ស្ម៊ីធ និងលំនាំនៃការស្តារឡើងវិញ ។ សូមបើកព្រះគម្ពីរ ។ សូមលុតជង្គង់អធិស្ឋាន ។ សូមដោយចិត្តជឿ ។ សូមស្ដាប់ព្រះវិញ្ញាណបរិសុទ្ធ ។

ក្នុងនាមជាថ្នាក់ដឹកនាំ ជារឿយៗយើងសួរថា « តើខ្ញុំទទួលទីបន្ទាល់អំពីដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទយ៉ាងដូចម្តេច ? »

ការទទួលបានទីបន្ទាល់ និងការប្រែចិត្តជឿចាប់ផ្តើមជាមួយនឹងការសិក្សា និងការអធិស្ឋាន បន្ទាប់មករស់នៅតាមដំណឹងល្អដោយអត់ធ្មត់ និងខ្ជាប់ខ្ជួន ហើយអញ្ជើញ និងទុកចិត្តលើព្រះវិញ្ញាណ ។ ជីវៈប្រវត្តិរបស់ យ៉ូសែប ស្ម៊ីធ និងលំនាំនៃការស្តារឡើងវិញគឺជាគំរូដ៏ល្អឥតខ្ចោះអំពីដំណើរការនេះ ។ ដូច [ ខ្ញុំចែកចាយ ] ជាមួយអ្នកអំពី … ព្រឹត្តិការណ៍នៃការស្តារឡើងវិញ សូមរកមើលជំហាននានាដែលនាំទៅរកទីបន្ទាល់ ។ …

ការរំជួលជាខ្លាំង

យ៉ូសែប ស្ម៊ីធ បានកើតនៅថ្ងៃទី ២៣ ខែ ធ្នូ ឆ្នាំ ១៨០៥ នៅភូមិ សារ៉ុន រដ្ឋ វ័រម៉ន្ត ស.រ.អា. ។ លោកកើតក្នុងគ្រួសារមួយដែលបានអធិស្ឋាន និងសិក្សាព្រះគម្ពីរប៊ីប ។ នៅក្នុងយុវវ័យរបស់លោក លោកបានចាប់អារម្មណ៍លើសាសនា ហើយជួបប្រទះនឹង « ការរំជួលជាខ្លាំង » ទៅលើគោលលទ្ធិនៃព្រះគ្រីស្ទជាមួយ « អាចារ្យម្នាក់ទាស់នឹងអាចារ្យម្នាក់ទៀត ហើយអ្នកប្រែចិត្តជឿម្នាក់ទាស់នឹងអ្នកប្រែចិត្តជឿម្នាក់ទៀត » ( យ៉ូសែប ស៊្មីធ — ប្រវត្តិ ១:៦ ) ។

ការរំជួលជាខ្លាំងនេះ … បានចាប់ផ្តើមជាច្រើនសតវត្សរ៍មុននៅអ្វីដែលហៅថា ការក្បត់សាសនាដ៏ធំ ។ សាវកប៉ុលបានថ្លែងថាជា ថ្ងៃនៃព្រះគ្រីស្ទ « ដ្បិតថ្ងៃនោះមិនមកឡើយ ទាល់តែមានសេចក្តីក្បត់សាសនាមកជាមុន » ( ថែស្សាឡូនិចទី ២ ២:៣ ) ។

ពីរបីទសវត្សរ៍បន្ទាប់ពីការមានព្រះជន្មរបស់ព្រះគ្រីស្ទ សាវករបស់ទ្រង់ត្រូវបានសម្លាប់ ការបង្រៀនរបស់ទ្រង់បានពុករលួយ ហើយបព្វជិតភាពត្រូវបានដកចេញពីផែនដី ។ ប៉ុន្តែ ប៉ុល ដោយបានឃើញអំពីជំនាន់យើងបានទស្សទាយ « ថា ការកាន់កាប់ត្រួតត្រាក្នុងកាលដែលពេលពេញកំណត់បានមកដល់ [ ព្រះនឹង ] បំព្រួញគ្រប់ទាំងអស់ក្នុងព្រះគ្រីស្ទ ទាំងរបស់នៅស្ថានសួគ៌ និងរបស់នៅផែនដីផង » ( អេភេសូរ ១:១០ ) ។ ទ្រង់នឹងស្តារសាសនាចក្រពិតរបស់ព្រះគ្រីស្ទមកកាន់ផែនដីម្តងទៀត ។ …

យ៉ូសែបទទួលបានចម្លើយ

យ៉ូសែប … នៅអាយុ ១៤ ឆ្នាំបានឃើញថាគាត់ជាប់ចិត្តនៅក្នុង « ការជ្រួលច្របល់ខាងគំនិតជឿលើ [ សាសនា ] នេះ » ។ ជារឿយៗលោកបានសួរខ្លួនឯងថា « បើសិនជាមានព្រះវិហារណាមួយក្នុងចំណោម [ ព្រះវិហារទាំងនេះ ] ដែលត្រូវ នោះតើមួយណាទៅ ហើយតើខ្ញុំនឹងស្គាល់តាមរបៀបណាបាន ? » ( យ៉ូសែប ស៊្មីធ — ប្រវត្តិ ១:១០ ) ។

យ៉ូសែប បានបើកព្រះគម្ពីរប៊ីបដើម្បីបានចម្លើយ ។ « តែបើអ្នករាល់គ្នាណាមួយខ្វះប្រាជ្ញា មានតែសូមដល់ព្រះ ដែលទ្រង់ប្រទានដល់មនុស្សទាំងអស់ដោយសទ្ធា ឥតបន្ទោសផង នោះទ្រង់នឹងប្រទានឲ្យ » ( យ៉ាកុប ១:៥ ) ។

ការធ្វើតាមការណែនាំរបស់យ៉ាកុប យ៉ូសែបទៅក្នុងព្រៃក្បែរផ្ទះរបស់លោក ហើយអធិស្ឋាន ។ នៅពេលលោកអំពាវដល់ព្រះ « បង្គោលពន្លឺមួយ … ចុះមក » ពន្លឺភ្លឺខ្លាំងជាងពន្លឺព្រះអាទិត្យនាពេលកណ្តាលថ្ងៃត្រង់ទៅទៀត ហើយ « តួអង្គពីរ » បានបង្ហាញព្រះកាយមក ។ « តួអង្គមួយមានព្រះបន្ទូល … ដោយហៅឈ្មោះ [ យ៉ូសែប ] ហើយចង្អុលទៅតួអង្គមួយទៀត ដោយមានព្រះបន្ទូលថា — នេះជាព្រះរាជបុត្រាដ៏ស្ងួនភ្ងារបស់យើង ។ ចូរស្តាប់តាមទ្រង់ចុះ ! » ( យ៉ូសែប ស៊្មីធ — ប្រវត្តិ ១:១៦–១៧ ) ។

ព្រះជាព្រះបិតា និងព្រះរាជបុត្រាទ្រង់ គឺព្រះយេស៊ូវគ្រីស្ទបានសន្ទនាជាមួយយ៉ូសែប ។ ពួកទ្រង់ឆ្លើយសំណួររបស់លោក ។ ពួកទ្រង់បានបង្រៀនលោកថា សាសនាចក្រពិតរបស់ព្រះយេស៊ូវគ្រីស្ទបានបាត់បង់ពីលើផែនដីនេះហើយ ។ យ៉ូសែប បានរៀនថា សមាជិកក្រុមព្រះគឺមានរូបកាយដាច់ដោយឡែក និងផ្សេងពីគ្នា ពួកទ្រង់ស្គាល់ឈ្មោះលោក ហើយពួកទ្រង់មានព្រះទ័យឆ្លើយតបការអធិស្ឋានលោក ។ ស្ថានសួគ៌បានបើកឡើង យប់នៃការក្បត់សាសនាបានបញ្ចប់ ហើយពន្លឺនៃដំណឹងល្អបានចាប់ផ្តើមរះឡើង ។

ដូចយ៉ូសែបដែរ ពួកយើងជាច្រើនឃើញថា ខ្លួនយើងស្វែងរកពន្លឺនៃសេចក្តីពិត ។ … ដូចយ៉ូសែបដែរ យើងត្រូវស្រាវជ្រាវព្រះគម្ពីរ អធិស្ឋាន …[ មាន ] ការបន្ទាបខ្លួន និង [ រៀន ] អនុវត្តសេចក្តីជំនឿ ។

មរ៉ូណៃ និងផ្ទាំងមាស

អំឡុងពេលបីឆ្នាំក្រោយពីការនិមិត្តដំបូងរបស់លោក យ៉ូសែប [ បាននិយាយថា ជារឿយៗលោកមានអារម្មណ៍បាក់ទឹកចិត្ត ដោយសារតែភាពទន់ខ្សោយ និងភាពមិនល្អឥតខ្ចោះរបស់លោក ] ។ ប៉ុន្តែលោកពុំបាត់បង់សេចក្តីជំនឿ ឬបំភ្លេចអំណាចនៃការអធិស្ឋានឡើយ ។

នៅថ្ងៃទី ២១ ខែ កញ្ញា ឆ្នាំ ១៨២៣ នៅអាយុ ១៧ ឆ្នាំ [ យ៉ូសែប ] បានលុតជង្គង់ទូលសូម « សូមក្ដីអភ័យទោសចំពោះអស់ទាំងអំពើបាប [ របស់លោក ] … និង [ ដើម្បីដឹងអំពី ] ជំហររបស់លោកចំពោះ [ ព្រះ ] ( សូមមើល យ៉ូសែប ស៊្មីធ — ប្រវត្តិ ១:២៩ ) ។ ពេលលោកបានអធិស្ឋាន ពន្លឺមួយ … បានរះខ្លាំងឡើង « រហូតធ្វើឲ្យវាភ្លឺជាងពន្លឺថ្ងៃត្រង់ទៅទៀត » ( ខទី ៣០ ) ។ នៅក្នុងពន្លឺនោះមានតួអង្គមួយបានឈរដោយស្លៀកពាក់រ៉ូប « សក្រៃលែង » ( ខទី ៣១ ) ។ ទ្រង់បានហៅឈ្មោះយ៉ូសែប ហើយណែនាំឈ្មោះទ្រង់ថាជាមរ៉ូណៃ ។ ទ្រង់បានថ្លែងថា ព្រះមានកិច្ចការមួយដើម្បីឲ្យ [ យ៉ូសែប ស្ម៊ីធ ] ធ្វើ » ហើយបានប្រាប់លោកអំពីកំណត់ត្រាបុរាណ « សរសេរនៅលើផ្ទាំងមាស » ដែលក្លាយជាព្រះគម្ពីរមរមនពេលបកប្រែ ។ ព្រះគម្ពីរនោះមានកំណត់ត្រានៃភាពពេញលេញនៃដំណឹងល្អ ។ ( សូមមើលខទី ៣៣–៣៤ ) ។ … យ៉ូសែបត្រូវបានដឹកនាំទៅរក … កំណត់ត្រានោះ ដែលកប់ទុក … [ នៅក្នុងដី ] ក្បែរកូនភ្នំ … គូម៉ូរ៉ា ។

នៅថ្ងៃបន្ទាប់មក យ៉ូសែប បានរកឃើញផ្ទាំងចំណារ ប៉ុន្តែពេលដែលត្រូវយកផ្ទាំងចំណារនោះពុំទាន់មកដល់នៅឡើយទេ ។ មរ៉ូណៃបានបង្គាប់យ៉ូសែបឲ្យជួបទ្រង់នៅទីនោះនៅថ្ងៃដដែលរៀងរាល់ឆ្នាំរយៈពេលបួនឆ្នាំ ( សូមមើលខទី ៥២–៥៣ ) ។ យ៉ូសែបបានគោរពតាម ។ រៀងរាល់ឆ្នាំលោកបានទៅលើកូនភ្នំនោះ ជាកន្លែងដែលមរ៉ូណៃផ្តល់ « ការបង្គាប់ » ( ខទី ៥៤ ) ទាក់ទងនឹងការស្តារឡើងវិញនៃសាសនាចក្ររបស់ព្រះគ្រីស្ទ ។ …

យ៉ូសែបបានទទួលផ្ទាំងចំណារនៅថ្ងៃទី ២២ ខែ កញ្ញា ឆ្នាំ ១៨២៧ នៅអាយុ ២១ ឆ្នាំ ។ លោកក៏បានទទួលឧបករណ៍បុរាណសម្រាប់បកប្រែគម្ពីរនោះដែលហៅថា យូរីម និង ធូមីម ។ យ៉ូសែប ស្ម៊ីធ បានចាប់ផ្តើមការងារបកប្រែដោយប្រើប្រាស់ឧបករណ៍បកប្រែពិសិដ្ឋនេះ រួមជាមួយនឹងព្រះវិញ្ញាណបរិសុទ្ធ ។ …

ការស្តារឡើងវិញបានលាតត្រដាងឡើង

នៅអាយុ ២៣ ឆ្នាំ យ៉ូសែប កំពុងបកប្រែផ្ទាំងចំណារ ពេលលោក និង [ អ្នកកត់ត្រាឲ្យលោក ] អូលីវើរ [ ខៅឌើរី ] បានបកប្រែមកដល់វគ្គបទគម្ពីរមួយអំពីពិធីបុណ្យជ្រមុជទឹកសម្រាប់ការផ្ដាច់បាប ។ … ពួកលោកចង់ដឹងបន្ថែមទៀត ។ យ៉ូសែបបានដឹងអ្វីដែលត្រូវធ្វើអ្វីហើយ ។

នៅថ្ងៃទី ១៥ ខែ ឧសភា ឆ្នាំ ១៨២៩ [ យ៉ូសែប និង អូលីវើរ ] បានទៅក្នុងព្រៃដើម្បីទូលសួរព្រះអម្ចាស់ ។ ខណៈដែលកំពុងតែអធិស្ឋាន នោះយ៉ូហាន បាទីស្ទ បានលេចមក « នៅលើពពកនៃពន្លឺ » ( យ៉ូសែប ស៊្មីធ — ប្រវត្តិ ១:៦៨ ) ។ លោក … បានជ្រមុជទឹកព្រះអង្គសង្គ្រោះដោយផ្ទាល់ [ ហើយ ] លោកកាន់កូនសោបព្វជិតភាពដែលចាំបាច់ដើម្បីធ្វើពិធីបរិសុទ្ធនោះតាមរយៈសិទ្ធិអំណាចពីព្រះ ។

… យ៉ូហាន … បានដាក់ដៃលើ [ ក្បាលរបស់យ៉ូសែប និងអូលីវើរ ] ហើយប្រគល់បព្វជិតភាពអើរ៉ុនដល់ពួកលោក [ ម្នាក់ៗ ] ( សូមមើល គ. និង ស. ១៣; យ៉ូសែប ស៊្មីធ — ប្រវត្តិ ១:៦៨–៦៩ ) ។ … នៅចុងខែ ឧសភា ឬដើមខែ មិថុនា ឆ្នាំ ១៨២៩ បព្វជិតភាពមិលគីស្សាដែក ឬបព្វជិតភាពខ្ពស់ជាងត្រូវបានប្រគល់ឲ្យដល់យ៉ូសែប និងអូលីវើរ ដោយសាវក ពេត្រុស យ៉ាកុប និង យ៉ូហាន ។

ការបកប្រែព្រះគម្ពីរមរមនក៏បានបញ្ចប់នៅខែមិថុនានោះ ហើយព្រះគម្ពីរនេះបានបោះពុម្ពនៅថ្ងៃទី ២៦ ខែ មិនា ឆ្នាំ ១៨៣០ ។ … ជាច្រើនថ្ងៃក្រោយមកគឺនៅថ្ងៃទី ៦ ខែ មេសា សាសនាចក្រត្រូវបានបើកជាផ្លូវការ ។ … ដូចបានព្យាករដោយប៉ុល សាសនាចក្របុរាណរបស់ព្រះគ្រីស្ទបានបង្កើតឡើងវិញនៅលើផែនដីនេះសារជាថ្មីម្តងទៀត ។

ប៉ុន្តែកិច្ចការនៃការស្តារឡើងវិញពុំទាន់ចប់នៅឡើយទេ ។ [ ព្រះវិហារបរិសុទ្ធ ខឺតឡង់ គឺជាព្រះវិហារបរិសុទ្ធដំបូងគេ ដែលបានសាងសង់នៅក្នុងគ្រាកាន់កាប់ត្រួតត្រានេះ ] ត្រូវបានឧទ្ទិសឆ្លង … នៅថ្ងៃទី ២៧ ខែ មិនា ឆ្នាំ ១៨៣៦ ។ មួយសប្តាហ៍ក្រោយមកគឺនៅថ្ងៃទី ៣ ខែ មេសា ការប្រជុំមួយបានធ្វើឡើងនៅទីនោះ ។ បន្ទាប់ពីការអិស្ឋានដ៏ឱឡារិក និងស្ងប់ស្ងាត់មក … ព្រះអម្ចាស់យេស៊ូវគ្រីស្ទ [ បានបង្ហាញព្រះកាយទ្រង់ដល់យ៉ូសែប និងអូលីវើរ ] ។ … ម៉ូសេ, អេលីយ៉ា និងអេលីសេ បានបង្ហាញខ្លួន [ នៅក្នុងព្រះវិហារបរិសុទ្ធ ខឺតឡង់ ] ហើយ [ ប្រទានកូនសោបព្វជិតភាព ] ដល់យ៉ូសែប ( សូមមើល គ. និង ស. ១១០ ) ។

លំនាំសម្រាប់យើងឲ្យធ្វើតាម

បងប្អូនប្រុសស្រី តើយើងអាចឃើញពីលំនាំនោះដែរឬទេ ? គ្រប់ព្រឹត្តិការណ៍ធំៗនៃការស្តារឡើងវិញ — ការនិមិត្តដំបូង, ការបង្ហាញខ្លួនរបស់មរ៉ូណៃ និងលេចចេញមកនៃព្រះគម្ពីរមរមន, ការស្តារឡើងវិញនៃបព្វជិតភាព និងការបង្ហាញព្រះកាយរបស់ព្រះយេស៊ូវគ្រីស្ទ [ នៅក្នុង ] ព្រះវិហារបរិសុទ្ធរបស់ទ្រង់ — បានកើតឡើងតាមរយៈការអធិស្ឋាន ។ …

[ ជាច្រើនលើកច្រើនគ្រា ] ខ្ញុំបានទទួលអារម្មណ៍នូវសាក្សីអំពីព្រះវិញ្ញាណនៃព្រះដែលមិនអាចបដិសេធបាន ដូចជាភ្លើងឆេះក្នុងចិត្តខ្ញុំថា ដំណឹងល្អដែលបានស្តារឡើងវិញគឺពិត ។ … [ ប្រសិនបើអ្នកពុំដឹងរឿងទាំងនេះដោយខ្លួនឯងទេ ] នោះខ្ញុំសូមផ្តល់យោបល់ដោយទទួលយកការអញ្ជើញឲ្យដែលមរ៉ូណៃបានប្រាប់នៅក្នុងព្រះគម្ពីរមរមនថា ៖ « ហើយកាលណាអ្នករាល់គ្នាបានទទួលនូវការណ៍ទាំងនេះ នោះខ្ញុំសូមទូន្មានដល់អ្នករាល់គ្នា ឲ្យសូមសួរដល់ព្រះជាព្រះវរបិតាដ៏គង់នៅអស់កល្បជានិច្ចដោយនូវព្រះនាមនៃព្រះគ្រីស្ទ បើសិនជាការណ៍ទាំងនេះមិនពិត ហើយបើសិនជាអ្នករាល់គ្នា សូមសួរដោយចិត្តស្មោះសរ គឺដោយស្មោះអស់ពីចិត្ត ដោយមានសេចក្ដីជំនឿជឿដល់ព្រះគ្រីស្ទ នោះទ្រង់នឹងសម្ដែងសេចក្ដីពិតនៃការណ៍នេះដល់អ្នក ដោយព្រះចេស្ដានៃព្រះវិញ្ញាណបរិសុទ្ធ » ។ ហើយដោយព្រះចេស្តានៃព្រះវិញ្ញាណបរិសុទ្ធ នោះអ្នករាល់គ្នាអាចស្គាល់សេចក្តីពិតនៃគ្រប់ការណ៍ទាំងអស់ » ( មរ៉ូណៃ ១០:៤–៥ ) ។ …

…សូមធ្វើតាមគំរូរបស់យ៉ូសែប ស្ម៊ីធ និងលំនាំនៃការស្តារឡើងវិញ ។ សូមបើកព្រះគម្ពីរ ។ សូមលុតជង្គង់អធិស្ឋាន ។ សូមដោយចិត្តជឿ ។ សូមស្ដាប់ព្រះវិញ្ញាណបរិសុទ្ធ ។ … ហើយនៅក្នុងព្រះនាមនៃព្រះយេស៊ូវគ្រីស្ទ ខ្ញុំសូមសន្យាថា « ប្រសិនបើអ្នកនឹង … សូមដល់ [ ព្រះវរបិតាសួគ៌ ] ដោយសេចក្ដីជំនឿ ដោយជឿថា អ្នកនឹងបានទទួល ដោយមានចិត្តឧស្សាហ៍កាន់តាមបញ្ញត្តិទាំងឡាយ [ របស់ព្រះអម្ចាស់ ] នោះរឿងទាំងនេះនឹងត្រូវបានធ្វើឲ្យអ្នកដឹងជាប្រាកដ ។ ( នីហ្វៃទី ១ ១៥:១១ ) ។