ចូរយើង ចែកចាយ ការចេះដឹងរបស់យើងអំពីព្រះអង្គសង្គ្រោះ
ដោយអែលឌើរ ហ្គែរី អ៊ី ស្ទីវ៉ែនសុន
ក្នុងកូរ៉ុមនៃពួកសាវកដប់ពីរនាក់
សម្រង់ចេញពីសុន្ទរកថាដែលធ្វើឡើងសម្រាប់សន្និសីទស្ត្រីនៅសាកលវិទ្យាល័យព្រិកហាំ យ៉ង់ « ការចេះដឹងអំពីព្រះអង្គសង្គ្រោះ » ដែលបានថ្លែងនៅថ្ងៃទី ៥ ខែ ឧសភា ឆ្នាំ ២០១៧ ។
សារលិខិតរបស់យើងគឺជាសារលិខិតនៃភាពសុខសាន្ត ហើយអ្នកគឺជាសារទូតដែលផ្សាយសារលិខិតនោះ ។ អ្នកអាចធ្វើការនេះតាមរយៈបណ្តាញបច្ចេកវិទ្យាថ្មី និងគួរឲ្យរំភើប ។
រូបថតមកពី Getty Images រូបភាពព្រះគ្រីស្ទ ដោយ ហិនរីឆ ហូហ្វមិន
យើងគឺជាសាសនាចក្រនៃព្រះយេស៊ូវគ្រីស្ទ ដែលបានស្ថាបនាឡើងវិញនៅក្នុងថ្ងៃចុងក្រោយនេះ ។ តាមរបៀបដូចគ្នាដែលព្រះអម្ចាស់បានបង្គាប់ពួកសិស្សទ្រង់កាលពីបុរាណ នោះយើងមានការទទួលខុសត្រូវនៅក្នុងថ្ងៃចុងក្រោយនេះឲ្យ « ទៅពេញសព្វក្នុងលោកិយទាំងមូល ហើយផ្សាយដំណឹងល្អទូទៅដល់គ្រប់មនុស្សទាំងអស់ចុះ » ( ម៉ាកុស ១៦:១៥ ) ។
ព្យាការី នីហ្វៃ កាលពីបុរាណបានសង្ខេបពីបេសកកម្ម និងសារលិខិត និងវត្ថុបំណងចំពោះការធ្វើបែបនោះ « ហើយយើងនិយាយអំពីព្រះគ្រីស្ទ យើងអររីករាយក្នុងព្រះគ្រីស្ទ យើងផ្សាយអំពីព្រះគ្រីស្ទ យើងព្យាករអំពីព្រះគ្រីស្ទ ហើយយើងសរសេរស្របតាមពាក្យព្យាករទាំងឡាយរបស់យើង ដើម្បីឲ្យកូនចៅយើងអាចដឹងថា តើត្រូវស្វែងរកប្រភពណាមួយ ដើម្បីឲ្យបានផ្ដាច់បាបរបស់ពួកគេ » ( នីហ្វៃទី ២ ២៥:២៦ ) ។
នៅក្នុងគម្ពីរម៉ូសាយ យើងអានអំពីរបៀបដែលព្យាការីព្រះគម្ពីរមរមនបុរាណគឺស្តេចបេនយ៉ាមីន បានប្រមូលប្រជាជនទ្រង់ទូទាំងដែនដីទៅឯទីតាំងព្រះវិហារបរិសុទ្ធ ដែលត្រូវសាងសង់ប៉មមួយឡើយ ហើយបង្រៀនពួកគេ ។ នៅពេលទ្រង់បង្រៀនពួកគេ នោះទ្រង់ក៏ព្យាករដល់ពួកគេអំពីជំនាន់របស់យើង ៖ « ហើយថែមទៀត យើងសូមប្រាប់អ្នកថា ថ្ងៃនោះនឹងមកដល់ កាលណាការចេះដឹងអំពីព្រះអង្គសង្គ្រោះនឹងបានផ្សាយទូទៅគ្រប់ទាំងសាសន៍ គ្រប់ពូជមនុស្ស គ្រប់ភាសា និងគ្រប់ទាំងប្រជាជន » ( ម៉ូសាយ ៣:២០ ) ។
« ការចេះដឹងអំពីព្រះអង្គសង្គ្រោះ »
អំណោយទានដ៏វិសេសបំផុតដែលត្រូវផ្តល់តម្លៃនៅក្នុងក្រុមគ្រួសារយើង និងផ្តល់ដល់អ្នកដទៃនោះគឺ « ការចេះដឹងអំពីព្រះអង្គសង្គ្រោះ » ឬអំពីព្រះយេស៊ូវគ្រីស្ទ ។
ជាមួយនឹងការចាប់ផ្តើមនៃគ្រាកាន់កាប់ត្រួតត្រានៃពេលពេញកំណត់បានកើតមាននូវការបំភ្លឺលើមនុស្សទាំងអស់ និងសន្ទុះជឿនលឿននៃបច្ចេកវិទ្យា ។ វាបាននាំមកនូវយុគសម័យឧស្សាហកម្ម និងឧបករណ៍ទំនាក់ទំនង ដែលធ្វើឲ្យការព្យាកររបស់ស្តេចបេនយ៉ាមីនបានបំពេញ ។
ក្នុងនាមជាសមាជិកក្នុងកូរ៉ុមនៃពួកសាវកដប់ពីរនាក់ ដែលបានហៅឲ្យធ្វើជាសាក្សីពិសេស « អំពីព្រះនាមនៃព្រះគ្រីស្ទនៅពេញសព្វក្នុងពិភពលោក » ( គ. និង ស. ១០៧:២៣ ) ជាមួយនឹងការចាត់តាំងពិសេសទាំងក្នុងកិច្ចការសាធារណៈ និងគណៈកម្មការសេវាទំនាក់ទំនង ខ្ញុំអាចផ្តោតលើការបំពេញការព្យាករនេះ — ថា « ការចេះដឹងអំពីព្រះអង្គសង្គ្រោះ » បានសាយភាពទូទាំងពិភពលោក — ដោយប្រើប្រាស់បច្ចេកវិទ្យាចុងក្រោយគេបំផុតដែលមានសម្រាប់យើង ។
« ទៅដល់គ្រប់ទាំងសាសន៍ ពូជមនុស្ស ភាសា និង ប្រជាជន »
ស្របតាមប្រវត្តិសាស្ត្រ ការជឿនលឿននៅក្នុងការបោះពុម្ព និងការបង្កើតវិទ្យុ និងទូរទស្សន៍អាចធ្វើឲ្យសារលិខិតនៃការស្តារឡើងវិញចេញទៅទូទាំងពិភពលោក ។ យើងរកឃើញគំរូជាច្រើនអំពីរឿងនេះ ដែលរឿងមួយចំនួនវានៅក្នុងការចងចាំរបស់យើង ។
ក្នុងអំឡុងពេល ១០ ឆ្នាំនៃការនិមិត្តដំបូង និងមួយខែពីមុនសាសនាចក្របានរៀបចំឡើង ព្រះគម្ពីរមរមនចំនួន ៥០០០ ក្បាលបានបោះពុម្ពផ្សាយ ។ ចាប់តាំងពីនោះមកដល់ឥឡូវនេះ គម្ពីរជាង ១៧៥ លានក្បាលត្រូវបានបោះពុម្ព ។
នៅព្រឹកថ្ងៃអាទិត្យ អ្នកអាចស្តាប់ ឬទស្សនាការចាក់ផ្សាយនៃ តន្ត្រីអមដោយបទអត្ថាធិប្បាយ ដែលវាឈានដល់ខួបទី ៥០០០ នៃការចាក់ផ្សាយ ។ ការចាក់ផ្សាយមុនដំបូងបង្អស់ធ្វើឡើងដោយផ្សាយផ្ទាល់តាមវិទ្យុក្នុងឆ្នាំ ១៩២៩ ។ ការចាក់ផ្សាយដំបូងបង្អស់អំពីសន្និសីទទូទៅតាមទូរទស្សន៍បានធ្វើឡើងនៅឆ្នាំ ១៩៤៩ ។
គួរឲ្យចាប់អារម្មណ៍ណាស់ក្នុងឆ្នាំ ១៩៦៦ ប្រធាន ដេវីឌ អូ មិកឃេ ( ១៨៧៣–១៩៧០ ) បានថ្លែងអំពីអ្វីៗដែលនឹងកើតឡើង ៖ « ការរកឃើញពីអនុភាពដែលកំបាំងបែបនោះ ទោះវាជាពរជ័យ ឬជាការបំផ្លាញនៃមនុស្សជាតិក្តី ដែលអាចធ្វើឲ្យការទទួលខុសត្រូវដ៏ធំសម្បើមបំផុតរបស់មនុស្សក្នុងការគ្រប់គ្រងវាបានផ្ទុកផ្តាក់ក្នុងកណ្តាប់ដៃមនុស្ស ។ … យុគសម័យនេះគឺប្រកបទៅដោយគ្រោះថ្នាក់រាប់មិនអស់ព្រមទាំងអ្វីៗជាច្រើនទៀតដែលពុំអាចថ្លែងបាន » ។១
ក្នុងឆ្នាំ ១៩៧៤ ប្រធាន ស្ពែនស៊ើរ ដបុលយូ ឃឹមបឹល ( ១៨៩៥–១៩៨៥ ) បានពិពណ៌នាអំពីការនិមិត្តរបស់លោកអំពីថ្ងៃមួយដែលនឹងមកដល់ ៖ « ព្រះអម្ចាស់បានប្រទានពរដល់ពិភពលោកជាមួយនឹង … ផ្កាយរណបជាច្រើន ។ វាមានទីតាំងនៅខ្ពស់លើមេឃ ដោយបញ្ជូនរលកសញ្ញាការចាក់ផ្សាយទៅស្ទើរតែសព្វទិសទីនៅលើផ្ទៃផែនដីនេះ ។ … ប្រាកដណាស់ ផ្កាយរណបទាំងនេះគឺគ្រាន់តែជាការចាប់ផ្តើមនៃអ្វីដែលមាននៅក្នុងឃ្លាំងសម្រាប់ការចាក់ផ្សាយទូទាំងពិភពលោកនាពេលអនាគតប៉ុណ្ណោះ ។ … ខ្ញុំជឿថា ព្រះអម្ចាស់ពិតជាមានព្រះទ័យអន្ទះសាក្នុងការប្រទានឲ្យយើងនូវការច្នៃប្រឌិត ដែលយើងជាមនុស្សលោកនេះ ពុំអាចយល់ដល់បានឡើយ » ។២
ជាមួយនឹងការជឿនលឿននៃបច្ចេកវិទ្យាក្នុងទំនាក់ទំនង និងប្រព័ន្ធផ្សព្វផ្សាយ ឥឡូវនេះតាមរយៈអ៊ិនធើរណែតដ៏ធំអស្ចារ្យ យើងហាក់ដូចជាបានឃើញវានៅក្នុងជំនាន់របស់យើងនូវការបំពេញដ៏ពិតប្រាកដអំពីការព្យាកររបស់ស្តេចបេនយ៉ាមីន ប្រធាន ម៉ាកខេ និងប្រធាន ឃឹមបឹល ។
ក៏មានលំនាំដ៏ស្អាតស្អំនៃការជ្រើសយកបច្ចេកវិទ្យាទាំងនេះដើម្បីកសាងនគរព្រះនៅលើផែនដីផងដែរ ។ ខ្ញុំចង់ចែកចាយឧទាហរណ៍នេះជាមួយអ្នក ។
គេហទំព័រ LDS.org និង Mormon.org
ក្នុងឆ្នាំ ១៩៩៦ សាសនាចក្របានចាប់ផ្តើមប្រើប្រាស់គេហទំព័រជាផ្លូវការធ្វើជាយាន្តក្នុងការបញ្ជូនសារលិខិត និងការទំនាក់ទំនង ។ ចាប់តាំងពីពេលនោះមក គេហទំព័រដែលឧបត្ថម្ភដោយសាសនាចក្រប្រមាណជា ២៦០ ត្រូវបានចេញផ្សាយ រួមទាំងគេហទំព័រជាភាសាក្នុងមូលដ្ឋានរបស់ពួកគេដែលមាននៅស្ទើរតែគ្រប់ប្រទេសដែលសមាជិកសាសនាចក្ររស់នៅ ។
ខ្ញុំសូមចែកចាយឧទាហរណ៍អំពីគេហទំព័រដែលស្គាល់នេះ ។ ទីមួយគឺគេហទំព័រ LDS.org បានបង្កើតឡើងក្នុងឆ្នាំ ១៩៩៦ ដែលសព្វថ្ងៃនេះមានអ្នកចូលទស្សនាថ្មីៗជាង ២៤ លាននាក់ក្នុងមួយឆ្នាំ និងជាមធ្យមមានអ្នកទស្សនាជាង ១ លាននាក់រៀងរាល់សប្តាហ៍ ។ សមាជិកជាច្រើនស្វែងរកកម្មវិធីសិក្សាសម្រាប់ការបង្រៀន និងសុន្ទរកថាសន្និសីទទូទៅពីអតីតកាលនៅគេហទំព័រនេះ ។ ទីពីរគឺគេហទំព័រ Mormon.org ជាគេហទំព័រមួយដែលរៀបចំឡើងដើម្បីផ្សព្វផ្សាយអំពីដំណឹងល្អដល់អ្នកជិតខាង និងមិត្តភក្តិរបស់យើងដែលពុំមែនជាសមាជិកសាសនាចក្រ ។ គេហទំព័រនេះមានអ្នកចូលទស្សនាផ្សេងៗជាង ១៦ លាននាក់ក្នុងមួយឆ្នាំ ។
កម្មវិធីសម្រាប់ទូរសព្ទចល័ត
រូបភាពមកពី Getty Images
ប្រាកដណាស់ បច្ចេកវិទ្យាវិវឌ្ឍយ៉ាងលឿន ដែលតម្រូវឲ្យមានការខិតខំខ្ពស់ និងធនធាននានាដើម្បីបន្តផ្គត់ផ្គង់ ។ ជាមួយនឹងការបង្កើតទូរសព្ទស្មាតហ្វូនយើងមានអំណាច និងសិទ្ធិប្រើប្រាស់ទិន្នន័យដ៏ច្រើនលើសលុបនៅក្នុងឧបករណ៍ដែលកាន់ក្នុងដៃ ។ ភាគច្រើនទិន្នន័យទាំងនេះត្រូវបានរៀបចំឡើងក្នុងទម្រង់ជាកម្មវិធីក្នុងទូរសព្ទចល័ត ឬហៅថា « apps » ។ App ដែលឧបត្ថម្ភដោយសាសនាចក្រមុនដំបូងគេបង្អស់ត្រូវបានចេញឲ្យប្រើប្រាស់ក្នុងឆ្នាំ ២០០៧ ។
ឧទាហរណ៍ពីអត្ថប្រយោជន៍ជាច្រើនរបស់យើងក្នុងការប្រើប្រាស់កម្មវិធីសម្រាប់ទូរសព្ទចល័តគឺដើម្បីផ្សាយ « ការយល់ដឹងរបស់យើងអំពីព្រះអង្គសង្គ្រោះ » ។ ខ្ញុំនឹងពុំពិពណ៌នាអំពីមាតិកានៃ apps ជាច្រើនដែលមាននៅនឹងចុងម្រាមដៃរបស់អ្នកនោះទេ ប៉ុន្តែនេះគឺជាឧទាហរណ៍មួយចំនួនអំពី apps ដែលអ្នកទំនងជាស្គាល់ ៖
-
Gospel Library ( បណ្ណាល័យដំណឹងល្អ )
-
Mormon Channel ( ប៉ុស្ដិ៍មរមន )
-
LDS Tools ( ឧបករណ៍ អិល.ឌី.អេស )
-
LDS Music ( តន្ត្រី អិល.ឌី.អេស )
-
Family Tree ( មែកធាងគ្រួសារ )
កម្មវិធីទាំងនេះកំពុងត្រូវបានប្រើប្រាស់រាប់លានដងក្នុងមួយសប្តាហ៍ពីអ្នកប្រើប្រាប់រាប់លាននាក់ ។
ប្រព័ន្ធផ្សព្វផ្សាយសង្គម
តាមនិយមន័យ ប្រព័ន្ធផ្សព្វផ្សាយសង្គមគឺជា បច្ចេកវិទ្យាដែលគ្រប់គ្រងដោយកុំព្យូទ័រ ដែលអនុញ្ញាតឲ្យបុគ្គលម្នាក់ៗ និងអង្គការនានាទស្សនា បង្កើត និងចែកចាយព័ត៌មាន គំនិត និងការបង្ហាញអារម្មណ៍គ្រប់រូបភាពតាមរយៈសហគមន៍ និងបណ្តាញជាក់ស្តែង ។
ដោយចាប់ផ្តើមប្រហែលជាក្នុងឆ្នាំ ២០១០ សាសនាចក្របានចាប់ផ្តើមជ្រើសយកការអនុវត្តប្រើប្រាស់ប្រព័ន្ធផ្សព្វផ្សាយសង្គមដើម្បីសម្រេចនូវការផ្សព្វផ្សាយ « ការចេះដឹងអំពីព្រះអង្គសង្គ្រោះ » ។ នេះគឺជាការទំនាក់ទំនងគ្រប់រូបភាពដែលលឿន និងមានភាពបត់បែនល្អ ។ វាស្ទើរតែពុំអាចប្រៀបធៀបនឹងល្បឿននៃការផ្លាស់ប្តូរបាន ។
លក្ខណៈមួយនៃការសង្កេតអំពីប្រព័ន្ធផ្សព្វផ្សាយសង្គមគឺថា ដរាបណាបុគ្គលណាម្នាក់ស្គាល់ ឬមានភាពងាយស្រួលជាមួយកម្មវិធីអ្វីមួយថ្មី អ្វីមួយដែលធំជាង ឬដែលដឹងថាមានប្រយោជន៍ជាង ឬប្រសើរជាងដរាបនោះបុគ្គលនោះនឹងកាន់តែប្រើប្រាស់វា ។
ខ្ញុំនឹងពិពណ៌នាសង្ខេបអំពីកម្មវិធីនៃប្រព័ន្ធផ្សព្វផ្សាយសង្គមចំនួនប្រាំដែលសាសនាចក្រកំពុងប្រើប្រាស់ជាបណ្តាញទំនាក់ទំនង ៖
១. Facebook មានអ្នកប្រើប្រាស់ជាង ២០០ ពាន់លាននាក់នៅទូទាំងពិភពលោក ។ នៅលើ Facebook អ្នកប្រើប្រាស់បង្កើតបណ្តាញសង្គមផ្ទាល់ខ្លួនពួកគេអំពីមិត្តភក្តិនៅតាមអ៊ិនធើរណែត ។
២. Instagram គឺជាគេហទំព័រសង្គមដែលផ្តោតលើរូបភាព និងវីដេអូ ។
៣. Pinterest គឺដូចជាក្តារខៀនផ្សាយព័ត៌មានចាំបាច់មួយ ។ នៅលើ Pinterest រូបភាពដែលហៅថា « pins » ត្រូវបានបិទភ្ជាប់លើក្តារនោះ ។ វាអាចជាឃ្លាដ៏បំផុសគំនិត ឬរូបថតតាមចិត្តប្រាថ្នា ។
៤. Twitter គឺជាបណ្តាញសង្គមមួយដែលអាចឲ្យអ្នកប្រើប្រាស់ផ្ញើ និងអានសារលិខិតខ្លីៗដែលមានតែ ២៨០ តួអក្សរដែលហៅថា « tweets » ។
៥. Snapchat លក្ខណៈពិសេសនៃរូបថត និងវីដេអូខ្លីៗដែលមើលលែងឃើញភ្លាម ឬក្នុងអំឡុងពេល ២៤ ម៉ោង ។
ស្របតាមស្ថាប័ន យើងកំពុងប្រើប្រាស់ប្រព័ន្ធផ្សព្វផ្សាយសង្គមទាំងនេះក្នុងរបៀបមួយដ៏មានអនុភាព ។
អ្នកអាចនឹកឃើញសារលិខិតសន្និសីទដ៏បំផុសគំនិតមួយស្តីពីជំងឺធ្លាក់ទឹកចិត្តដែលអែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានថ្លែងកាលពីពីរបីឆ្នាំកន្លងទៅ ។៣ ចេញពីសុន្ទរកថារបស់លោក វគ្គមួយនៃវីដេអូដែលបានផលិតមានគេចូលទស្សនាជាងពីរលានដងនៅលើតែ Facebook ជាមួយនឹងការចូលចិត្ត ការចែកចាយ និងការវាចាដែលវិជ្ជមានរាប់ពាន់ ។៤
នៅក្នុងខែ សីហា ឆ្នាំ ២០១៦ ប្រធាន ឌៀថើរ អេស្វ អុជដូហ្វ បានបង្ហោះវីដេអូមួយនៅលើ Instagram ដោយបង្រៀនគោលការណ៍ដំណឹងល្អដល់ អ៊ែរិក ចៅប្រុសរបស់លោក — អ្នកគិតទៅមើល — គឺកន្លែងអាកាសយាន្តនិករបស់យន្តហោះមួយ !៥ មានមនុស្សរាប់ពាន់នាក់រីករាយនឹងការបង្ហោះនៅលើ Instagram របស់ប្រធាន អុជដូហ្វ ហើយមានការវាចាវិជ្ជមានជាច្រើនទៅលើវា ។
សាសនាចក្រក៏បានចេញផ្សាយគណនី Instagram របស់ខ្លួននៅក្នុងខែវិច្ឆិកា ឆ្នាំ ២០១៧ នូវវីដេអូមួយរបស់អែលឌើរ ដាល្លិន អេក អូក និងអែលឌើរ អិម រ័សុល បាឡឺដ ឆ្លើយសំណួររបស់យុវមជ្ឈិមវ័យស្រីម្នាក់អំពីការបម្រើបេសកកម្មរបស់បងប្អូនស្រី ។ ការបង្ហោះវីដេអូនេះមានគេចូលមើលជាង ១១២០០០ ដង ។
នៅលើ Pinterest បុគ្គលម្នាក់អាចរកឃើញរូបភាព pin រាប់រយមកពីគេហទំព័រ LDS.org និងកាន់តែច្រើនទៀតពីសមាជិកម្នាក់ៗដែលបំផុសគំនិតអ្នកដទៃ ។ ឧទាហរណ៍ មនុស្សជាច្រើនចែកចាយប្រសាសន៍របស់ពួកព្យាការី — ទាំងអតីតកាល និងបច្ចុប្បន្នកាល ។ រូបភាព Pin មួយនៃការបង្រៀនរបស់ប្រធាន ថូម៉ាស អេស ម៉នសុន ដែលបង្រៀនថា « មានអ្វីៗជាច្រើននៅក្នុងជីវិតនេះ ដែលពឹងផ្អែកទៅលើឥរិយាបថរបស់យើង » ។៦
នៅលើ Twitter អែលឌើរ ដាវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានចែកចាយនៅព្រឹកបុណ្យអ៊ីស្ទើរឆ្នាំមុន មានគេចូលទស្សនា ២១០០០០ ដង ។ អែលឌើរ បែដណា បានបង្ហាញថា សារលិខិតខ្លី សាមញ្ញ « ទ្រង់មិនគង់នៅទីនេះទេ ដ្បិតទ្រង់មានព្រះជន្មរស់ឡើងវិញហើយ » ( ម៉ាថាយ ២៨:៦ ) អាចមានឥទ្ធិពលខ្លាំងក្លា និងយូរអង្វែង ។
Snapchat
ទីបំផុត រូបភាព និងពាក្យពេចន៍នានាដែលបានចែកចាយដោយសារលិខិតមួយរបស់គណៈប្រធានទីមួយបានលេចឡើងថ្មីៗនៅលើ Snapchat ។
ហានិភ័យដែលទាក់ទង
ឥឡូវនេះ ដោយមានការសរសើរអំពីគុណធម៌នៃបច្ចេកវិទ្យាថ្មីៗទាំងនេះ និងបង្ហាញពីការប្រើប្រាស់ត្រឹមត្រូវរបស់វា ខ្ញុំគិតថា វាក៏មានប្រយោជន៍ផងដែរ ដើម្បីពិភាក្សាអំពីហានិភ័យមួយចំនួនដែលទាក់ទងនឹងវា ។
យើងទាំងអស់គ្នាគួរតែដឹងអំពីពេលវេលាដែលអាចប្រើលើប្រព័ន្ធផ្សព្វផ្សាយសង្គម ឬនៅក្នុងការប្រើប្រាស់កម្មវីធីសម្រាប់ទូរសព្ទចល័ត ។ ការប្រើប្រាស់ប្រព័ន្ធផ្សព្វផ្សាយសង្គមក៏នាំមកនូវហានិភ័យនៃការកាត់បន្ថយទំនាក់ទំនងជួបមុខគ្នាផ្ទាល់ ដែលអាចមានភាពស្មុគស្មាញលើការអភិវឌ្ឍនៃជំនាញសង្គមរបស់ពួកយុវវ័យជាច្រើន ។
ហានិភ័យគ្រោះថ្នាក់ដែលទាក់ទងនឹងមាតិកាពុំសមរម្យមិនត្រូវធ្វើដោយធ្វេសប្រហែសឡើយ ។ មានការកើនឡើងនូវការរាតដ្បាតនៃការញៀនការណ៍អាសគ្រាមនៅក្នុងសង្គម ដែលជះឥទ្ធិពលអវិជ្ជមាន និងធ្វើឲ្យរងគ្រោះដល់សមាជិកសាសនាចក្រ និងគ្រួសារ ។
ទីបំផុត ខ្ញុំសូមផ្តល់ហានិភ័យចូលគ្នាពីរបន្ថែមទៀត ដែលជះឥទ្ធិពលលើបុគ្គលម្នាក់ៗដោយផ្ទាល់ រួមទាំងយុវនារី និងម្តាយ និងភរិយាដែលកើតនាអំឡុងពេលនៃសហសវត្សរ៍ ។ ខ្ញុំដាក់ឈ្មោះហានិភ័យពីរនោះថា « ភាពពិតដែលកែច្នៃ » និង « ការប្រៀបធៀបដែលធ្វើឲ្យទន់ខ្សោយ » ។ ខ្ញុំគិតថា របៀបពិពណ៌នាអំពីហានិភ័យទាំងពីរនេះគឺជាការផ្តល់ឧទាហរណ៍មួយចំនួន ។
ជាទូទៅ រូបភាពដែលបង្ហោះនៅលើបណ្តាញសង្គមមានទំនោរបង្ហាញអំពីជីវិតនៅក្នុងរបៀបមួយដ៏ល្អឥតខ្ចោះ ហើយជារឿយៗវាពុំមែនជារឿងពិតនោះទេ ។ ជារឿយៗបណ្តាញសង្គមពោរពេញដោយរូបភាពស្អាតៗនៃការតុបតែងផ្ទះ កន្លែងដើរកម្សាន្តយ៉ាងល្អរុងរឿង និងការរៀបចំម្ហូបយ៉ាងធំសម្បើម ។ ប្រាកដណាស់ គ្រោះថ្នាក់នោះគឺថា មនុស្សជាច្រើនបានបាក់ទឹកចិត្តថា ពួកគេហាក់ដូចជាពុំបានល្អដូចទៅនឹងភាពពិតដែលបានកែច្នៃនោះឡើយ ។
ដោយបានជំរុញចិត្តពីរូប « នំផេនខេក » ជានំខួបកំណើតដែលបានបង្ហោះនាពេលថ្មីៗនេះក្នុង Pinterest នោះក្មួយស្រីរបស់ខ្ញុំក៏បានបង្ហោះរូបថតដូចគ្នានោះរបស់នាងផងដែរ ។ ជាជាងការអនុញ្ញាតឲ្យរឿងនេះបង្កើតជាសម្ពាធដែលជ្រុលហួសហេតុ នោះនាងបានសម្រេចចិត្តដើម្បីជំរុញចិត្តមនុស្សដទៃដោយបង្ហោះ « រូបភាពដែលបរាជ័យនៅលើ Pinterest » របស់នាង ( សូមមើលរូបថតនំផេនខេក )។
សង្ឃឹមថាយើងអាចរៀនកាន់តែសប្បាយ ហើយមានការបាក់ទឹកចិត្តកាន់តែតិច ពេលដែលឃើញរូបភាពដែលបង្ហាញតែពីភាពពិតដែលបានកែច្នៃ ហើយជាញឹកញាប់ណាស់វានាំទៅរកការប្រៀបធៀបដែលធ្វើឲ្យទន់ខ្សោយនោះ ។
ការបង្ហាញនេះពុំគ្រាន់តែជាទីសម្គាល់នៃជំនាន់របស់យើងប៉ុណ្ណោះទេ តែវាដូចគ្នាទៅនឹងពាក្យមកពីប៉ុលកាលនៅក្នុងជំនាន់ដើមផងដែរ ៖ « ពួកអ្នកនោះដែលគេវាស់ … ហើយផ្ទឹមខ្លួននឹងខ្លួនគេ នោះគ្មានប្រាជ្ញាទេ » ( កូរិនថូសទី ២ ១០:១២ ) ។
ថ្មីៗនេះអែលឌើរ ជេ ដេវណ៍ ខួនីស្ស ក្នុងពួកចិតសិបនាក់បានផ្តល់ការទូន្មានក្នុងគ្រានេះផងដែរថា ៖ « យើងធ្វើបាបខ្លួនឯងដោយភាពពុំចាំបាច់តាមរយៈការប្រកួតប្រជែង និងការប្រៀបធៀប ។ យើងវិនិច្ឆ័យខ្លួនយើងយ៉ាងខុសឆ្គងតាមរយៈ អ្វីៗ ដែលយើងមាន និងគ្មាន ព្រមទាំងតាមរយៈ យោបល់របស់មនុស្សដទៃ ។ តែបើយើងចង់ប្រៀបធៀបនោះ ចូរឲ្យយើងប្រៀបធៀបថា តើនៅក្នុងអតីតកាល និង បច្ចុប្បន្នកាល យើងមានសភាពខុសគ្នាដូចម្ដេចខ្លះ — ហើយថា តើយើងចង់ក្លាយជាមនុស្សបែបណានាពេលអនាគត » ។៧
ខ្ញុំសូមចែកចាយការណ៍សម្ងាត់មួយរបស់គ្រួសារយើង ដែលមាននៅក្នុងរូបថតគ្រួសារនេះ ( សូមមើលទំព័របន្ទាប់ ) ដែលបានថតជាច្រើនឆ្នាំមកហើយមុននឹងប្រព័ន្ធផ្សព្វផ្សាយសង្គមកើតមាន ។ ប្រសិនបើវាបានថតនាពេលបច្ចុប្បន្ននេះ វាទំនងជាត្រូវបានបង្ហោះដោយបង្ហាញពីគ្រួសារដែលមានក្មេងប្រុសបួននាក់ដ៏គួរឲ្យស្រឡាញ់ ដែលចូលចិត្តថតរូបរួមគ្នាជាគ្រួសារ ។ តើអ្នកចង់ដឹងរឿងពិតដែរឬទេ ?
ខ្ញុំនៅតែចាំពីភរិយារបស់ខ្ញុំបានទូរសព្ទមក ។ « ហ្គែរី តើបងនៅឯណា ? ពួកយើងនៅឯកន្លែងថតរូបខាងក្រៅរបស់ជាងថតរូប ។ យើងទាំងអស់គ្នាត្រៀមខ្លួននឹងថតរូបហើយ ។ វាពុំងាយស្រួលទេក្នុងការឲ្យកូនប្រុសទាំងអស់ស្លៀកពាក់ សហការ ហើយត្រៀមខ្លួនឲ្យរួចរាល់នោះ ។ តើបងជិតមកដល់ទីនេះហើយឬនៅ ?
មែនហើយ ខ្ញុំបានភ្លេច ហើយពុំទាន់ចេញពីការិយាល័យនៅឡើយ ! ខ្ញុំបានមកយឺតកន្លះម៉ោង ហើយអ្វីៗពុំដំណើរការស្រួលឡើយដោយព្រោះតែអវត្តមានរបស់ខ្ញុំ វាជាការធុញទ្រាន់ដ៏វឹកវរមួយ ។
តើមានរឿងអ្វីកើតឡើង ? មែនហើយ កូនប្រុសច្បងរបស់ខ្ញុំបានរត់លេងកាត់ទីធ្លានោះ ហើយបានឃើញដើមប៉ោម បានបេះផ្លែប៉ោមមួយចំនួន ហើយចាប់ផ្តើមគប់វាទៅលើប្អូនៗរបស់គាត់ ។ គាត់បានគប់ផ្លែប៉ោមចំខ្នងកូនប្រុសទីបី ហើយធ្វើឲ្យគាត់ដួល ហើយគាត់បានចាប់ផ្តើមយំ ។
ក្នុងពេលដំណាលគ្នានោះ ខណៈដែលមានរឿងនោះកើតឡើង កូនប្រុសទីពីររបស់ខ្ញុំ បានអង្គុយ ហើយខោរបស់គាត់បានខើចជើងបន្តិច ។ កូនផ្សេងទៀតបានឃើញស្រោមជើងគាត់ជាស្រោមជើងពណ៌សរបស់ពួកកីឡាករ ដែលពុំមែនជាស្រោមជើងពាក់មកព្រះវិហារដែលម្តាយរបស់គាត់បានរៀបចំឲ្យគាត់ពាក់ឡើយ ។ នាងបានសួរគាត់ថា « ហេតុអ្វីកូនមិនពាក់ស្រោមជើងមកព្រះវិហាររបស់កូន ? »
គាត់បាននិយាយថា « កូនអត់ចូលចិត្តវា » ។ វាធ្វើឲ្យខ្ញុំរមាស់ ។
ហើយអំឡុងពេលនាងកំពុងនិយាយជាមួយគាត់ កូនអាយុពីរឆ្នាំរបស់យើងបានរត់ពេញទីធ្លាជាន់លើអ្វីមួយ ហើយបានដួលឈាមច្រមុះ ។ ឥឡូវនេះមានឈាមបានហូរស្រក់លើអាវ-សរបស់គាត់ ហើយវាបានប្រឡាក់ ។ នេះគឺជាអ្វីដែលខ្ញុំឃើញពេលខ្ញុំបានទៅដល់ ។ របៀបមួយដើម្បីស្រោចស្រង់រូបភាពនោះគឺ ប្តូរអាវប្រឡាក់នោះពីក្រៅទៅក្នុង ហើយពាក់វាបែរមកខាងខ្នងវិញ ដោយលាក់ឈាមប្រឡាក់ពីម៉ាស៊ីនថត ។
ជាលទ្ធផលពេល កូនប្រុសច្បងរបស់យើងកំពុងរត់លេង ហើយគប់ផ្លែប៉ោម គាត់បានដួលហើយមានស្នាមស្មៅយ៉ាងធំមួយប្រឡាក់ជាប់នៅជង្គង់ខោរបស់គាត់ ។ ដូច្នេះនៅក្នុងរូបថតនេះ ដៃរបស់គាត់បានដាក់ពីលើស្នាមប្រឡាក់នោះដោយមានចេតនាបិទបាំងវា ។
សម្រាប់កូនទីបីរបស់យើងវិញ មែនហើយ យើងបានរង់ចាំអស់រយៈពេល ២០ នាទី ដើម្បីឲ្យភ្នែកគាត់បាត់ក្រហមសិន ដោយសារតែគាត់យំ ។
មែនហើយ ឥឡូវនេះ ស្នាមឈាមប្រឡាក់នោះគឺនៅលើខ្នងអាវរបស់កូនប្រុសច្បងយើង ។
ហើយឥឡូវនេះកូនប្រុសទីពីររបស់យើងវិញយកដៃគាត់គ្របដាក់លើស្រោមជើងពណ៌សដែលជាស្រោមជើងកីឡាករនោះក្នុងចេតនាបិទបាំងវា ដើម្បីឲ្យអ្វីៗគ្រប់យ៉ាងស៊ីគ្នា ។
សម្រាប់ខ្ញុំវិញ មែនហើយ កំពុងមានបញ្ហាដោយសារតែមកដល់យឺតដែលវាជាកត្តាជំរុញឲ្យមានអ្វីៗទាំងអស់នេះកើតឡើង ។
ដូច្នេះពេលអ្នកឃើញរូបថតស្រស់ស្អាតនេះរបស់គ្រួសារយើង ហើយនិយាយថា « ហេតុអ្វីយើងពុំអាចជួបជុំគ្នា ហើយថតរូបគ្រួសារដ៏ឥតខ្ចោះដូចពួកគេ ? » ឥឡូវនេះ អ្នកទាំងអស់គ្នាបានដឹងរឿងនោះច្បាស់ហើយ !
ប្រព័ន្ធផ្សព្វផ្សាយសង្គម និងកិច្ចការផ្សព្វផ្សាយសាសនា
រូបភាពមកពី Getty Images
ដូចអ្នកឃើញហើយថា យើងត្រូវដឹងអំពីគ្រោះថ្នាក់ និងហានិភ័យ រួមទាំង ភាពពិតដែលបានកែច្នៃ និងការប្រៀបធៀបដែលធ្វើឲ្យទន់ខ្សោយ ។ តាមធម្មតា លោកិយនេះពុំស្រស់ស្អាតជានិច្ចដូចដែលវាបង្ហាញលើប្រព័ន្ធផ្សព្វផ្សាយសង្គមឡើយ ។ ហេតុដូច្នេះហើយ មានអ្វីៗល្អជាច្រើនដែលបាន ហើយនឹងកើតមានឡើងតាមរយៈប្រភេទទំនាក់ទំនងទាំងនេះ ។
នាយកដ្ឋានអ្នកផ្សព្វផ្សាយសាសនាបានផ្តល់សេចក្តីណែនាំថ្មីមួយចំនួនក្នុងឆ្នាំ ២០១៧ ស្តីពីរបៀបអនុវត្តប្រព័ន្ធផ្សព្វផ្សាយសង្គមដែលអាចប្រើប្រាស់នៅក្នុងកិច្ចការផ្សព្វផ្សាយសាសនា ។ ធនធានចល័តជាច្រើនដែលមានសម្រាប់យើងអាចត្រូវបានប្រើក្នុងរបៀបដ៏មានអនុភាព ងាយស្រួល សាមញ្ញ និងមានប្រសិទ្ធភាពខ្លាំងបំផុត ។
មានការអនុវត្តជាច្រើនសម្រាប់ការប្រើប្រាស់បច្ចេកវិទ្យានៅក្នុងរបៀបមួយសមស្រប និងបំផុសគំនិត ។ យើងគួរតែធ្វើឲ្យអស់ពីសមត្ថភាពដើម្បីបង្រៀនអំពីការប្រើប្រាស់បច្ចេកវិទ្យាដោយសុចរិតទៅដល់ជំនាន់ដែលកំពុងពេញវ័យ ហើយព្រមាន និងការពារពីការប្រើប្រាស់ឥតសុចរិត និងគ្រោះថ្នាក់ដែលទាក់ទងផងដែរ ។ ការណ៍នេះគួរតែជួយបញ្ជាក់យើងថា សារៈប្រយោជន៍នៃបច្ចេកវិទ្យានឹងមានទម្ងន់ប្រសើរជាងហានិភ័យដែលទាក់ទងនោះ ។
« ឱ សារទូតគួរឲ្យស្រឡាញ់អើយ »
អំឡុងពេលនេះ ខ្ញុំកំពុងពិចារណា និងអធិស្ឋានយ៉ាងខ្លាំងអំពីសារលិខិតនេះ ខ្ញុំបានក្រោកពីព្រលឹមនាព្រឹកមួយជាមួយនឹងចម្រៀង និងទំនុកបទដ៏សាមញ្ញរបស់វាក្នុងចិត្តខ្ញុំ « ឱ សារទូតគួរឲ្យស្រឡាញ់អើយ ដែលផ្សាយដល់យើងនូវដំណឹងល្អនៃភាពសុខសាន្ត » ។៨
សារលិខិតរបស់យើងគឺជាសារលិខិតនៃភាពសុខសាន្ត ហើយអ្នកគឺជាសារទូតដ៏គួរឲ្យស្រឡាញ់ដែលផ្សាយសារលិខិតនោះ ។ អ្នកអាចធ្វើការនេះតាមរយៈបណ្តាញបច្ចេកវិទ្យាថ្មី និងគួរឲ្យរំភើបនេះ ។ យើងរស់នៅក្នុងពិភពលោកមួយពិសេសក្នុងគ្រាពេញកំណត់ជាមួយសមត្ថភាពផ្សាយដំណឹងល្អនៃភាពសុខសាន្តពិតប្រាកដនៅចុងម្រាមដៃរបស់យើង ។
យើងមានពាក្យព្យាករពីព្យាការីបុរាណ ដែលបានដឹងយ៉ាងច្បាស់អំពីជំនាន់របស់យើង ហើយផ្តល់ការណែនាំដល់ជំនាន់យើងថា ៖ « ហើយថែមទៀត យើងសូមប្រាប់អ្នកថា ថ្ងៃនោះនឹងមកដល់ កាលណាការចេះដឹងអំពីព្រះអង្គសង្គ្រោះនឹងបានផ្សាយទូទៅ គ្រប់ទាំងសាសន៍ គ្រប់ពូជមនុស្ស គ្រប់ភាសា និងគ្រប់ទាំងប្រជាជន » ( ម៉ូសាយ ៣:២០ ) ។
យើងក៏មានពាក្យពេចន៍ចំពោះយើងតាមរយៈវិវរណៈសម័យទំនើបនេះ ដោយនិយាយ និងផ្តល់ការណែនាំសម្រាប់ជំនាន់ និងកាលៈទេសៈរបស់យើង ។ ខ្ញុំសូមដកស្រង់ប្រសាសន៍របស់អែលឌើរ បែដណា ៖ « ខ្ញុំជឿថា គ្រានោះបានមកដល់សម្រាប់ពួកយើងក្នុងនាមជាសិស្សរបស់ព្រះគ្រីស្ទ ដើម្បីប្រើប្រាស់ឧបករណ៍បំផុសគំនិតទាំងនេះដោយសមរម្យ និងកាន់តែមានប្រសិទ្ធភាព ដើម្បីថ្លែងទីបន្ទាល់អំពីព្រះជាព្រះវរបិតាអស់កល្បជានិច្ច ផែនការសុភមង្គលរបស់ទ្រង់សម្រាប់កូនចៅទ្រង់ និងព្រះរាជបុត្រាទ្រង់ ព្រះយេស៊ូវគ្រីស្ទ ជាព្រះអង្គសង្គ្រោះនៃពិភពលោក ដើម្បីប្រកាសពីភាពពិតនៃដំណឹងល្អដែលបានស្តារឡើងវិញនៅក្នុងថ្ងៃចុងក្រោយនេះ និងដើម្បីសម្រេចនូវកិច្ចការរបស់ព្រះអម្ចាស់ » ។៩
ខ្ញុំសូមអញ្ជើញបងប្អូនទាំងអស់គ្នាពិចារណាឲ្យបានដិតដល់អំពីតួនាទីរបស់អ្នកក្នុងការផ្សាយដំណឹងល្អនៃភាពសុខសាន្តក្នុងនាមជាសារទូតជាទីស្រឡាញ់ ។ សូមឲ្យយើងម្នាក់ៗធ្វើផ្នែករបស់យើងក្នុងការចែកចាយ « ការចេះដឹងរបស់យើងអំពីព្រះអង្គសង្គ្រោះ » ជាមួយគ្រប់ទាំងសាសន៍ គ្រប់ពូជមនុស្ស គ្រប់ភាសា និងគ្រប់ទាំងប្រជាជនដែរ ។ របៀបដ៏ល្អបំផុតដើម្បីធ្វើកិច្ចការនេះគឺមួយជំហានម្តងមួយជំហានម្តង និងក្នុងរបៀបពិសេសមួយដែលដំណើរការល្អបំផុតសម្រាប់អ្នក និងគ្រួសារអ្នក ។ សូមឲ្យយើងម្នាក់ៗក្លាហានក្នុងការសរសេរកំណត់ហេតុបណ្តាញ, ធ្វើរូបភាព pin, ចូលចិត្ត, ចែកចាយ, បង្ហោះ, ធ្វើមិត្ត, tweet, snap និង ប្រើឧបករណ៍ចល័តរបស់យើង ក្នុងរបៀបមួយដែលនឹងសរសើរតម្កើង ផ្តល់កិត្តិយស និងគោរពដល់ព្រះទ័យរបស់ព្រះវរបិតាសួគ៌ដែលពោរពេញដោយក្តីស្រឡាញ់ ហើយនាំយកការចេះដឹងអំពីព្រះអង្គសង្គ្រោះទៅកាន់គ្រួសារអ្នក មនុស្សជាទីស្រឡាញ់ និងមិត្តភក្តិ — រួមទាំងមិត្តរបស់អ្នកនៅលើប្រព័ន្ធផ្សព្វផ្សាយសង្គមផងដែរ ។