អ្វីជាការស្តារឡើងវិញ មូលហេតុ និង របៀប ៖ ការពិពណ៌នាលម្អិតអំពីការស្តារឡើងវិញ

ដោយ ហ្វេត សូធើលីន ប្លែកហើស

ទស្សនាវដ្តីសាសនាចក្រ

ដើម្បីបង្រៀនដំណឹងល្អ អ្នកត្រូវតែអាចពន្យល់អំពី ការក្បត់សាសនា គ្រាកាន់កាប់ត្រួតត្រា និងការស្តារឡើងវិញ ។ តារាងនេះអាចជួយបាន ។

ឧបមាថា អ្នកកំពុងធ្វើដំណើររយៈពេលមួយសប្តាហ៍ពេញ ទៅមាត់សមុទ្រជាមួយគ្រួសារមិត្តភក្តិរបស់អ្នក ។ អ្នកមានភាពរីករាយច្រើន ប៉ុន្តែអ្នកកំពុងចាប់ផ្តើមនឹកគ្រួសាររបស់អ្នកផ្ទាល់ ។ បន្ទាប់មកឪពុករបស់អ្នកបានផ្ញើសារមកអ្នកដើម្បីដឹងពីសុខទុក្ខរបស់អ្នក — វាជាអ្វីដែលអ្នកត្រូវការដើម្បីមានអារម្មណ៍ថាគេស្រឡាញ់ និងចងចាំ ។

ជីវិតនៅលើផែនដីនេះមានសភាពដូចនោះបន្តិចបន្តួចដែរ ។ ព្រះពុំផ្ញើសារឲ្យយើងឡើយ ប៉ុន្តែយើងនៅឆ្ងាយពីផ្ទះសួគ៌ារបស់យើង ដូច្នេះរបៀបមួយដែលព្រះវរបិតាសួគ៌ថ្លែងពីសេចក្តីស្រឡាញ់របស់ទ្រង់សម្រាប់ពួកយើងគឺតាមរយៈការបញ្ជូនពួកព្យាការី ។

គ្រាកាន់កាប់ត្រួតត្រា

ពួកព្យាការីដឹកនាំអ្វីមួយដែលហៅថា គ្រាកាន់កាប់ត្រួតត្រា ជារយៈពេលដែល ( ១ ) ព្រះមានអ្នកដឹកនាំបព្វជិតភាពយ៉ាងហោចណាស់ម្នាក់ ដែលមានសិទ្ធិអំណាចនៅលើផែនដី និង ( ២ ) អ្នកដឹកនាំ ដែលជាព្យាការីនេះរៀនអំពីផែនការនៃសេចក្តីសង្គ្រោះដោយផ្ទាល់ពីព្រះ ។ បន្ទាប់មកព្យាការីបង្រៀន ឬ ចែកចាយ ដំណឹងល្អដល់មនុស្ស ។

ដោយសារព្រះគម្ពីរ នោះយើងដឹងអំពីគ្រាកាន់កាប់ត្រួតត្រាជាច្រើន ។ គ្រាកាន់កាប់ត្រួតត្រាសំខាន់មួយចំនួនមានដូចជា អ័ដាម, អេណុក, ណូអេ, អ័ប្រាហាំ, ម៉ូសេ, ព្រះយេស៊ូវគ្រីស្ទ និង យ៉ូសែប ស៊្មីធ ។ ព្រះអម្ចាស់បានចាប់ផ្តើមគ្រាកាន់កាប់ត្រួតត្រាមួយតាមរយៈព្យាការីទាំងនេះម្នាក់ម្តងៗ ។

ការក្បត់សាសនា

ការក្បត់សាសនា = អំពើទុច្ចរិត ។ នៅពេលបុគ្គលម្នាក់ ឬក្រុមណាមួយងាកបែរចេញពីសេចក្តីពិតនៃដំណឹងល្អរបស់ព្រះយេស៊ូវគ្រីស្ទ បដិសេធពួកព្យាការី ហើយធ្លាក់ទៅក្នុងអំពើបាប នោះពួកគេកំពុងនៅក្នុងការក្បត់សាសនាហើយ ។

របៀបដែលការក្បត់សាសនាកើតឡើង

ព្រះហៅព្យាការីដែលបង្រៀនសេចក្តីពិតនៃដំណឹងល្អរបស់ព្រះយេស៊ូវគ្រីស្ទ ។

មនុស្សដែលធ្វើតាមការបង្រៀនរបស់ព្យាការីបានទទួលពរ ។

មនុស្សមួយចំនួនមានអំនួត ហើយបដិសេធព្យាការី ។

ជារឿយៗ ព្រះអម្ចាស់បានដកយកព្យាការីទ្រង់ពីប្រជាជន ដែលបដិសេធគោលការណ៍នៃដំណឹងល្អ ។

នៅពេលណាមួយត្រឹមត្រូវ ព្រះហៅព្យាការីថ្មីដើម្បីស្តារសេចក្តីពិត បព្វជិតភាព និងសាសនាចក្រឡើងវិញ ។

ការស្តារឡើងវិញ

ការស្តារឡើងវិញគឺជាសកម្មភាពនៃការត្រឡប់មកវិញនៃអ្វីៗដែលជាលក្ខខណ្ឌដើមរបស់វា ។ វាពុំមែនជាការកែប្រែថ្មី ដែលផ្លាស់ប្តូរអ្វីៗដែលមានដើម្បីបង្កើតអ្វីមួយថ្មីឡើយ ។ ឧទាហរណ៍ ប្រសិនបើអ្នកចង់ស្តារផ្ទះចាស់មួយឡើងវិញ អ្នកត្រូវសាងសង់វាជាថ្មីជាមួយនឹងរូបរាងដដែលដែលវាមានពីដើមមក ។ អ្នកអាចបន្ថែមកន្លែងឡភ្លើងថ្មី ប៉ុន្តែពេលនោះអ្នកកំពុងផ្លាស់ប្តូរផ្ទះនោះហើយ មិនមែនស្តារវាឡើងវិញទេ ។

ដំណឹងល្អនៃព្រះយេស៊ូវគ្រីស្ទចាំបាច់ត្រូវស្តារឡើងវិញ ដោយសារវាបានបាត់បង់អំឡុងពេលការក្បត់សាសនាដ៏ធំ ។ មនុស្សបានរស់នៅអស់រយៈពេលជាច្រើនសតវត្សរ៍ដោយគ្មានព្រះវិហារពិត ។ ដូច្នេះព្រះអម្ចាស់ បានស្តារ សាសនាចក្រ និងដំណឹងល្អរបស់ទ្រង់តាមរយៈយ៉ូសែប ស្ម៊ីធ គឺដូចជាព្យាការីជំនាន់បុរាណបានព្យាករ ( សូមមើល អេសាយ ២:១–៣; ២៩:១៣–១៤; កិច្ចការ ៣:១៩–២១; វិវរណៈ ១៤:៦–៧; នីហ្វៃទី ២ ៣:៣–១៥ ) ។

ដំណឹងល្អដ៏ពិតនៃព្រះយេស៊ូវគ្រីស្ទនឹងបន្តមាននៅទីនេះ — ដូច្នេះតើអ្នកនឹងនៅជាមួយដំណឹងល្អដែរឬទេ ? ទោះបីជាលោកិយនេះមានអំពើទុច្ចរិតកាន់តែច្រើនឡើងៗក្តី ក៏សាសនាចក្ររបស់ព្រះយេស៊ូវគ្រីស្ទនឹងបន្តនៅជារៀងរហូត ។

អ្នកមានជម្រើសដែលត្រូវសម្រេចចិត្ត — ជាជម្រើសដូចគ្នាដែលបានប្រឈមមុខនឹងជីវិតរមែងស្លាប់ ចាប់តាំងពីដើមដំបូងថា ៖ តើអ្នកនឹងធ្វើតាមព្យាការីដែរឬទេ ? ប្រសិនបើអ្នកធ្វើតាម នោះអ្នកនឹងទទួលពរ ហើយមានព្រះវិញ្ញាណដឹកនាំអ្នក ។

អ្នកដឹកនាំគ្រាកាន់កាប់ត្រួតត្រា

ពួកព្យាការីទាំងនេះត្រូវបានហៅពីព្រះ « ដោយសារសេចក្ដីជំនឿដ៏លើសលប់ និងកិច្ចការដ៏ល្អទាំងឡាយរបស់គេ » ( អាលម៉ា ១៣:៣ សូមមើលផងដែរ អ័ប្រាហាំ ៣:២២–២៣ ) ។ កូនសោបព្វជិតភាពដែលពួកលោកកាន់ត្រូវបានស្តារឡើងវិញដល់ព្យាការី យ៉ូសែប ស្មីធ ។

នេះគឺជារឿងដ៏គួរឲ្យចាប់អារម្មណ៍មួយចំនួនអំពីពួកព្យាការីទាំងនេះ ។ សូមចាំមើលថាអ្នកអាចរៀនអ្វីខ្លះអំពីពួកលោក ពេលអ្នកសិក្សាព្រះគម្ពីរ ។

អ័ដាម

អ័ដាមពិតជាអ្នកត្រួសត្រាយមួយរូប ៖ លោកគឺជាមនុស្សដំបូងគេនៅលើផែនដី និងជាព្យាការីដំបូងគេ ! លោកបានបង្រៀនគ្រួសារលោកអំពីដំណឹងល្អ ប៉ុន្តែចាប់តាំងពីដំបូងមកមានមនុស្សជាច្រើន « បានស្វែងរកការទូន្មានរបស់ខ្លួនក្នុងសេចក្ដីងងឹត » ហើយបានបដិសេធសេចក្តីពិត ( ម៉ូសេ ៦:២៨ ) ។

ការស្ដារឡើងវិញ

សូមទាយទៅមើល ? អ្នក មានពរជ័យនៃការស្តារឡើងវិញ ។ ប្រាកដណាស់ អ្នកមាន !

សាសនាចក្រនៃព្រះយេស៊ូវគ្រីស្ទត្រូវបានស្ដារឡើងវិញដោយមានព្យាការី និងពួកសាវកដឹកនាំ ។
ព្រះគម្ពីរមរមន, គោលលទ្ធិ និងសេចក្តីសញ្ញា, មុក្តាដ៏មានតម្លៃមហិមា និងវិវរណៈសម័យទំនើបដទៃទៀត បានស្តារឡើងវិញនូវសេចក្តីពិតដ៏មានតម្លៃដែលបានបាត់បង់នោះ ( សូមមើល នីហ្វៃទី ២ ២៧ ) ។
យ៉ូសែប ស៊្មីធ បានទទួលបព្វជិតភាពអើរ៉ុនពីយ៉ូហាន បាទីស្ទ ( សូមមើល គ. និង ស. ១៣ ) ហើយបព្វជិតភាពមិលគីស្សាដែកមកពីសាវក ពេត្រុស យ៉ាកុប និង យ៉ូហាន ( សូមមើល គ. និង ស. ១២៨:២០ ) ។
អ្នកកាន់បព្វជិតភាពដែលមានសិទ្ធិអំណាចធ្វើពិធីបរិសុទ្ធនៃសេចក្តីសង្គ្រោះបានត្រឹមត្រូវ ។
ហើយយើងដឹងថាសេចក្តីពិតនឹងពុំបាត់បង់តាមរយៈការក្បត់សាសនាទៀតឡើយ ( សូមមើល ដានីយ៉ែល ២:៤៤ ) ។