Pagtudlo sa mga Tin-edyer ug Mas Gagmay nga mga Bata

10 ka mga Sugyot alang sa Pagtudlo og Paghinulsol

Ang paghinulsol usahay morag makahadlok o makalibug sa mga bata ug mga tin-edyer. Ania ang pipila ka mga sugyot alang sa pagtudlo og paghinulsol sa mahigugmaon, makahatag og gahum nga paagi.

1. Himoa kining sayon. Mahimo nimong tudloan ang imong mga anak nga “kon makasala kita, mopalayo kita sa Dios,” apan “kon maghinulsol kita, mobalik kita ngadto sa Dios.”¹ Makabalik kita sa Dios pinaagi sa pag-angkon sa atong mga kasaypanan, pagtarung sa mga butang, ug pagpaningkamot nga mahimong mas maayo.

2. Tutoki ang positibo. Bisan unsa pa man, “kanunay nga maayo ang paghinulsol.”² Dili kini silot sa ngil-ad nga kinaiya; oportunidad kini nga maningkamot pag-usab ug mas mopaduol sa Dios. Awhaga ang imong mga anak sa paghunahuna kon unsay ilang gibuhat nga matarung ug unsaon nila sa pagbuhat og daghan pa niana.

3. Hatagi og gibug-aton ang mga butang nga mabuhat nila kada adlaw. Ang paghinulsol alang sa gagmay nga mga sala ingon man sa mga dagko. Ang kada adlaw nga paghinulsol nagpasabut sa kanunay nga pagkorihir, sama sa barko nga gimentinar ang padulngan niini. Tabangi ang imong mga anak nga makaila sa gagmay nga mga paagi nga makalambo sila matag adlaw.

4. Pagmasinabtanon sa gagmay nga mga sayop. Tabangi ang imong mga anak nga makasabut nga ang mga sayop mahimong usa ka bahin sa pagkat-on. Tuguti sila sa pag-atubang sa mga sangputanan sa ilang mga pagpili ug tabangi sila sa paghunahuna unsaon sa pagtarung pag-usab sa mga butang. Tudloi sila sa pagdangup ngadto sa Dios alang sa tabang.

5. Pagpakita og ehemplo. Angkona kon makahimo ka og mga sayop. Pagmapainubsanon nga mangayo og pasaylo ngadto sa ug atubangan sa imong mga anak. Pakit-a sila nga naningkamot ka nga mahimong mas maayo ang mga butang, ug ipaambit ang imong pagpamatuod kon sa unsang paagi ang Manluluwas mitabang kanimo sa pag-usab.

6. I-personal kini. Samtang imong tudloan ang imong mga anak sa mga baruganan sa paghinulsol,³ pagmatngon nga ang proseso sa paghinulsol dili managsama sa matag tawo sa matag higayon. Dili kini lista sa mga butang nga tsekan kon mahuman na; usa kini ka magpadayon nga proseso sa paglambo. Mahitungod kini sa mga tinguha sa atong kasingkasing ug giunsa nato sa pagpaningkamot nga mapahiangay ang atong kaugalingon ngadto sa Manluluwas. Masayud kita nga hingpit kitang naghinulsol kon mobati kita og kalinaw, kalipay, ug kapasayloan.

7. Tan-awa kini gamit ang mahangturong panglantaw. Sayon ra nga mawad-an og paglaum kon himoon nimo ang samang bati nga mga pagpili sa makadaghang higayon. Tudloi ang imong mga anak nga kon mopadayon sila sa paghinulsol, ang Dios mopadayon sa pagpasaylo kanila (tan-awa sa Moroni 6:8). Ipasabut nga ang pagpaningkamot mao gayud ang importante. Pinaagi sa atong paningkamot ug pagsalikway sa kinaiyanhon nga tawo (tan-awa sa Mosiah 3:19) nga kita mas mahisama sa Dios.

8. Ilha ang kalainan tali sa kahasol sa konsensya ug kaulaw. Ang “Diosnong kasubo” gikinahanglan alang sa paghinulsol (tan-awa sa 2 Mga Taga-Corinto 7:9–10). Apan kon ang imong anak mibati nga dili takus o nawad-an og paglaum bisan human maghinulsol, ang kaulaw tingali maoy hinungdan.⁴ Pahinumdumi sila nga ang Langitnong Amahan kanunay nga nagmahal kanila ug nga “kon makasala ta, dili kaayo ta takus, apan dili gyud nga wala na tay bili!”⁵ Kon gikinahanglan, ikonsiderar ang pakigkita sa imong bishop o usa ka propesyunal nga magtatambag.

9. Sabta ang Pag-ula sa Manluluwas. Tudloi ang imong mga anak nga si Jesukristo mitubos dili lamang sa atong mga sala apan usab sa tanan natong pag-antus (tan-awa sa Alma 7:11–12). Pasaligi ang imong mga anak nga “dili [sila] basulon sa makapasakit nga binuhatan sa ubang mga tawo.”⁶ Ang mga biktima sa pang-abuso hingpit nga inosente; tabangi sila nga modangup sa Manluluwas alang sa kalinaw ug pagkaayo.

10. Padayon sa pagtudlo ngadto sa Manluluwas. Tudloi ang imong mga anak nga ang Manluluwas nakasabut sa unsay ilang gipanglimbasugan ug makatabang nila sa pagbuntog niini. Pagpamatuod kanunay mahitungod Kaniya diha sa imong panimalay. Awhaga ang imong mga anak sa pag-ampo, pagserbisyo, pagtuon sa mga kasulatan, ug pagbuhat sa ubang mga butang nga makatabang kanila nga mas makaila Kaniya aron natural sila nga magtinguha sa Iyang tabang sa pagbuntog sa ilang mga kahuyang.

Mubo nga mga Sulat

1. Neil L. Andersen, “Paghinulsol … Aron Ako Moayo Kaninyo,” Liahona, Nob. 2009, 40.

2. Stephen W. Owen, “Kanunay nga Maayo ang Paghinulsol,” Liahona, Nob. 2017, 48.

3. Tan-awa ang “Kapitulo 19: Paghinulsol,” Mga Baruganan sa Ebanghelyo (2009), 131–39.

4. Tan-awa sa Wendy Ulrich, “Dili Sala nga Mahimong Huyang,” Liahona, Abr. 2015, 20–25.

5. Joy D. Jones, “Bili nga dili Masukod,” Liahona, Nob. 2017, 14.

6. Matinud-anon sa Tinuhoan: Usa ka Pakisayran sa Ebanghelyo (2004), 7.

Para sa mga Bata

Anaa sa Higala niining bulana:

• “Usa ka Saad nga Maningkamot” (pahina H4)

• “Mas Maayo og Gamay Kada Adlaw” (pahina H6)

• “Maayo nga Ideya” (pahina H7)

• “Ang Desisyon mahitungod sa Yo-Yo” (pahina H16)

Alang sa mga Tin-edyer

Niini nga Isyu:

• Mga Pangutana ug mga Tubag: “Pabalik-balik ko nga matintal sa samang mga tintasyon. Unsaon nako sa pagbuntog niadto nga mga sala?” (pahina 62)

• “Mahinumdom gihapon ko sa mga sala nga ako nang nahinulsolan, ug mobati ko nga sad-an. Nganong dili man ko makalimot sa akong mga sala?” (pahina 63)

Alang sa ubang mga kapanguhaan, bisitaha ang youth.lds.org.