Ang Milagro sa Pagkasakop diha sa Pakigsaad
Ni Elder Gerrit W. Gong
Sa Korum sa Napulog Duha ka mga Apostoles
Gikan sa usa ka pakigpulong sa Komperensya sa mga Babaye sa Brigham Young University, “Paglig-on sa Usag Usa diha sa Ginoo,” nga gihatag niadtong Mayo 4, 2018.
Ang pagkabagay sa atong mga pakigsaad ug sa Pag-ula ni Jesukristo madungog diha sa mga huni ug mga awit samtang ang pagpahimulos sa Pag-ula sa atong Manluluwas motabang kanato sa pagtuman sa atong mga pakigsaad sa bag-o ug mas balaan nga paagi.
Sa mga kasinatian sa mortal nga kinabuhi, ang Ginoo midapit kanato sa pagkat-on ug paglambo sa pangtibuok kinabuhi ug mahangturong mga paagi pinaagi sa paghigugma Kaniya og una ug pinaagi sa paglig-on sa usag usa diha sa Iyang gugma.
Ang paglig-on sa usag usa diha sa Ginoo ug diha sa Iyang gugma gipakita diha sa una ug ikaduhang dagko nga mga sugo. Sama sa gitudlo sa bag-ohay lang nga sulat sa Unang Kapangulohan, “Ang pagpangalagad sa Manluluwas maoy ehemplo sa duha ka dako nga sugo: ‘Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan’ ug ‘Higugmaa ang imong silingan sama sa imong kaugalingon’ (Mateo 22:37, 39).” Ang sulat sa Unang Kapangulohan mipadayon: “Niana nga diwa, mitudlo usab si Jesus nga, ‘Kamo mao sila kinsa Ako mipili sa pagpangalagad niini nga mga katawhan’ (3 Nephi 13:25).”1
Ang kanta sa matubsanong gugma sa atong nabanhaw nga Manluluwas nagsaulog sa pagkabagay sa mga pakigsaad, nga nagkonektar nato ngadto sa Dios ug sa usag usa; ug sa Pag-ula ni Jesukristo, nga nagtabang nato sa pagsalikway sa kinaiyanhong tawo ug motugyan ngadto sa “mga pagdani sa Balaang Espiritu” (Mosiah 3:19).
Kana nga pagkabagay gipahayag diha sa plano sa kalipay, diin makat-on ug molambo kita pinaagi sa inadlaw nga paggamit sa indibidwal nga moral nga kabubut-on ug diin wala kita pasagdi nga maglatagaw sa atong kaugalingon apan gihatagan og usa ka dalan sa pakigsaad ug sa gasa sa Espiritu Santo. Ang Alpha ug Omega (tan-awa sa Doktrina ug mga Pakigsaad 61:1), ang Ginoong Jesukristo, uban kanato gikan sa sinugdanan. Ug Siya uban kanato hangtud sa katapusan, sa diha nga “pagapahiran sa Dios ang tanang luha sa [atong] mga mata” (Pinadayag 7:17), gawas sa atong mga luha sa kalipay.
Ang atong mga pakigsaad nagkonektar kanato ngadto sa Dios ug sa usag usa. Gituyo nga mahangturon, ang atong mga pakigsaad naglakip sa Dios nga atong Mahangturong Amahan ug sa Iyang Anak, si Jesukristo. Ang mahangturon nga mga pakigsaad makadala sa gahum sa gugma sa Dios—sa paghatag og paglaum ug pagpalambo sa gugma; sa pagbayaw ug pag-usab; sa paghatag og kaayohan ug pagbalaan; sa pagtubos ug paghimaya.
Diha sa pagpadayag sa atong tinuod, balaan nga mga kaugalingon pinaagi sa atong mga pakigsaad uban sa Dios, makakat-on kita sa pag-ila ug paghigugma sa atong mga kaigsoonan sama sa Iyang gihimo. Kining nagkadako nga gugma ug kahibalo modapit, mohatag og gahum, ug mobalaan kanato aron masayud ug, sa atong kaugalingong paagi, mahimong mas sama Kaniya.
Mga Pakigsaad ug ang Pag-ula sa Ginoo
Ang pagkabagay sa atong mga pakigsaad ug sa Pag-ula ni Jesukristo madungog diha sa mga huni ug mga awit samtang ang pagpahimulos sa Pag-ula sa atong Manluluwas motabang kanato sa pagtuman sa atong mga pakigsaad sa bag-o ug mas balaan nga paagi. Manag-uban, ang atong mga pakigsaad ug ang Pag-ula sa atong Manluluwas makahulma sa unsay atong matinguha, masabut, ug masinati sa inadlaw nga mortalidad ug moandam kanato alang sa sosyal nga mga koneksyon sa langit (tan-awa sa Doktrina ug mga Pakigsaad 130:2).
Pinaagi sa Pag-ula ni Jesukristo, makakaplag kita og pagtuo, kalig-on, ug pagsalig nga moduol kang Kristo, nasayud nga ang pagkahingpit anaa Kaniya. Ang ingon nga kahibalo naghatag og kalingkawasan gikan sa kanunay nga kabalaka mahitungod sa pagkaperpeksyonista. Tingali adunay pipila ka kamatuoran sa kanta nga “Let It Go”2 kon ang “let it go” nagpasabut nga “mobuhi” sa kalibutanong ekspektasyon nga gipahamtang sa kaugalingon nga dili gayud makatagbaw ug kon nagpasabut usab kini nga “mokupot” sa langitnon nga mga paglaum nga gihatag sa Dios ug sa mga saad nga gitanyag sa Ginoo.
Nakabantay ka ba nga ang matag ordinansa nagtawag kanato sa atong mga ngalan ug mikonekta nato pinaagi sa atong mga ngalan ngadto sa ngalan ni Jesukristo?
Ang mga ordinansa malukpanon ug ulusahon (indibidwal) sa samang higayon. Mga katuigan ang milabay, isip high councilor nga responsable sa mga bunyag sa stake, nakamatikod ko nga ang ordinansa sa bunyag managsama ra alang sa matag tawo apan managlahi sa tagsa-tagsa tungod kay ang matag tawo nga gibunyagan gitawag, sa tinagsa, pinaagi sa ilang ngalan, ug ang ilang ngalan gikonektar pinaagi sa pakigsaad ngadto “sa ngalan sa Amahan, ug sa Anak, ug sa Espiritu Santo” (3 Nephi 11:25).
Ang Iyang katingalahang grasya sama ka malukpanon ug ka talagsaon sa atong Manluluwas Mismo. Usa ka Kordero nga walay lama, Iyang gipakita ang sumbanan pinaagi sa pagpabunyag aron sa pagtuman sa tanan nga pagkamatarung (tan-awa sa 2 Nephi 31:6). Ang mga kasulatan mitawag niini, ug ang atong mga misyonaryo nagtudlo niini, nga “ang doktrina ni Kristo” (2 Nephi 31:21; tan-awa usab sa 3 Nephi 11:38–40). Ang doktrina ni Kristo naglakip sa “[pagsunod sa] ehemplo ni Jesukristo pinaagi sa pagpabunyag sa usa ka tawo nga naghupot sa katungod sa priesthood sa Dios.”3
Mosulod kita agi sa ganghaan sa paghinulsol ug bunyag pinaagi sa tubig, “ug unya mosunod ang kapasayloan sa inyong mga sala pinaagi sa kalayo og sa Espiritu Santo” (2 Nephi 31:17). Ang higpit ug pig-ot nga dalan—ang dalan sa pakigsaad—mopadulong sa kinabuhing dayon (tan-awa sa 2 Nephi 31:18). Parte kini kon sa unsang paagi ang matag usa kanato malig-on diha sa Iyang gugma.
Ang atong mga pakigsaad ug ang Pag-ula ni Jesukristo mikonektar usab sa ubang mga paagi.
Pagkasakop diha sa Pakigsaad
Pinaagi sa balaanong pakigsaad, iya kita sa Dios ug sa usag usa. Ang pagkasakop diha sa pakigsaad usa ka milagro. Dili kini pagpangangkon. Sama sa gugmang putli, kini “mapailubon ug mapuanguron,” ug kini “dili masinahon; … dili tigpagawal, dili tigpaburot” (1 Mga Taga-Corinto 13:4; tan-awa usab sa Moroni 7:45). Ang pagkasakop diha sa pakigsaad naghatag og koneksyon sa nangagi ug potensyal sa umaabut. Mipalingkawas kini kanato pinaagi sa pasalig. Mopalambo kini kanato pinaagi sa gugma.
Sa pagkasakop diha sa pakigsaad, gilig-on nato ang usag usa diha sa gugma sa Manluluwas, sa ingon mas mohigugma sa Dios ug sa usag usa. Mahitabo kini sa usa ka bahin tungod kay ang pagkasakop diha sa pakigsaad “dili maakop-akupon, dili masuk-anon o maligutguton” (1 Mga Taga-Corinto 13:5). Ang pagkasakop diha sa pakigsaad “wala magakalipay sa mga buhat nga dili matarung, hinonoa nagakalipay kini sa mga butang nga maminatud-on” (1 Mga Taga-Corinto 13:6). Ang pagkasakop diha sa pakigsaad mao ang pagduol ug pagtan-aw nga mag-atubangay, makaila sama nga kita mailhan (tan-awa sa 1 Mga Taga-Corinto 13:12). Ang atong pagkamatinud-anon sa pakigsaad makanunayon ug dili matarug (tan-awa sa Mosiah 5:15; Alma 1:25).
Ang pagkasakop diha sa pakigsaad mao ang paglaum sa tanan nga mga butang, paglahutay sa daghan nga mga butang, ug “[mag]laum nga makalahutay sa tanan nga mga butang” (tan-awa sa Mga Artikulo sa Hugot nga Pagtuo 1:13; tan-awa usab sa 1 Mga Taga-Corinto 13:7; Moroni 7:45). Ang pagkasakop diha sa pakigsaad mao ang pagpabilin nga matinud-anon. Dili kini mohunong sa pagtuo sa atong kaugalingon, sa usag usa, o sa Dios.
Ang pagkasakop diha sa pakigsaad mao ang pagkahimuot niadtong kinsa nahimuot ug paglipay uban niadtong adunay hinungdan nga maglipay, ug mobarug isip mga saksi sa malumong mga kalooy sa Dios ug sa inadlaw nga mga milagro “sa tanan nga mga panahon ug diha sa tanan nga mga butang, ug diha sa tanan nga mga dapit” (tan-awa sa Mosiah 18:8–9).
Ang pagkasakop ngadto sa Dios ug sa usag usa diha sa pagkasakop sa pakigsaad mao ang paglipay sa wala damha nga mga sitwasyon samtang motan-aw kita gamit ang mga mata nga makakita ug maminaw gamit ang mga dunggan nga makadungog. Siya mousab kanato ug sa atong mga relasyon—lakip sa atong kaminyoon diha sa pakigsaad—nga mahimong mas balaan.
Sa usa ka klase sa mga relasyon sa kaminyoon, usa ka minyo nga estudyante mipataas sa iyang kamot ug miingon ngadto sa magtutudlo, “Pasayloa ko, nagsige ka og sulti nga ang kaminyoon lisud. Dili ang kaminyoon maoy lisud apan ang kinabuhi maoy lisud, ug ang kaminyoon, uban sa maayo ug bati nga mga panahon niini, mahimong usa ka panalangin diin makaatubang kita sa mga kalipay ug mga hagit sa kinabuhi nga magkauban.”
Samtang ang mahangturong kaminyoon mao ang atong gimithi, ang mga pagluib, pag-abuso sa bisan unsang matang, ug seryuso kaayo nga mga kalahian nga dili maresolbar manginahanglan tingali og dinalian nga pagpanalipod nga aksyon o panagbulag ug posible diborsyo. Nasayud kita nga ang mga pakigsaad balido ug mahangturon lamang pinaagi sa panag-uyon sa apektado nga mga tawo ug kon gikumpirmahan sa maloloy-on nga langit nga pagpakita sa Espiritu Santo, nga gihulagway sa mga kasulatan isip “ang Balaan nga Espiritu sa saad” (Doktrina ug mga Pakigsaad 88:3).
Adunay kahupayan, kalinaw, ug paglaum diha sa kasigurohan sa Ginoo nga ang takus nga mga indibidwal makadawat sa tanang gisaad nga mga panalangin.4 Usa kini ka bahin sa Iyang saad sa paglig-on sa matag usa kanato diha sa Iyang gugma, sa Iyang paagi, ug sa Iyang panahon (tan-awa sa Doktrina ug mga Pakigsaad 88:68).
“Ang Paagi sa Pagserbisyo”
Sa batan-on pa ko nga bishop, usa ka kasinatian sa among ward mitudlo kanako mahitungod sa pagkasakop sa pakigsaad nga gipakita sa paglig-on sa usag usa diha sa gugma sa Manluluwas. Ang mga pamilya sa ward nga Hans ug Fay Ritter ug Larry ug Tina O’Connor, kauban ang ubang talagsaon nga mga pamilya, kanunay nga nangalagad sa uban ug gipangga sa tanan.
Usa ka adlaw ang among stake president mihangyo nako sa pagsusi sa mga Ritter. Sa pag-abut nako sa ilang panimalay, nakabantay ko og pipila ka parte sa salog nga nagyunyun ug usa ka karaan nga takuri.
“Bishop, mao ni ang nahitabo,” miingon si Brother Ritter. “Nagtulo ang among water heater [pang-init sa tubig], ug ang init nga tubig miagas sa salog. Nangabut ang mga anay. Mao kana nganong miyunyun og gamay ang salog. Kinahanglan namong palungon ang water heater, ug mao kana nganong mag-init kami og tubig sa takuri.”
Miuyon ang mga Ritter nga akong hisgutan ang ilang sitwasyon sa among ward council. Talagsaon kaayo ang among ward council. Ang mga miyembro nakaila og tawo nga makatabang sa mga salog o sa mga bungbong o mga carpet o mga appliance o sa pintal. Ang mga boluntaryo miabut ug mitabang sa daghang madagayaon nga mga paagi. Apil kanila mao si Larry O’Connor, usa ka hanas nga tigtukod kinsa kanunayng moadto sa balay sa mga Ritter.
Ang asawa ni Larry, si Tina, nahinumdom nga si Larry ug ubang mga sakop sa korum usahay moadto sa mga Ritter kon Biyernes ug mopundo didto sa tibuok gabii. “Usa ka Sabado sa buntag, gidad-an nako sila og pamahaw,” miingon siya. “Nakita nako si Larry nga migawas sa kaligoanan nga naggunit og mga himan pangtubero.”
Midugang si Tina nga gikan sa mga tawo nga sama ni Hans Ritter ug uban pa “nga nakat-on ang akong bana nga mahimong tawo—mabination, mahunahunaon, malumo. Samtang ang akong bana nga si Larry mialagad kauban sa ingon ka maayo nga mga tawo, lakip diha sa nursery, nahimo siyang mas labi pa ka talagsaong bana ug amahan.”
Dihang nahuman na ang balay, naglipay kaming tanan.
Si Hans ug Fay Ritter dugay na nga mitaliwan, apan bag-o lang ko nga nakig-istorya sa ilang duha ka mga anak, si Ben ug Stephen. Nahinumdom sila nga ang hilum nga pagserbisyo sa uban mimentinar sa dignidad sa ilang amahan, kinsa walay kaluya nga mitrabaho aron sa pag-atiman sa iyang pamilya.
Samtang mitambong og kalihokan sa ward wala madugay human nakompleto ang balay sa mga Ritter, si Larry ug Tina O’Connor nakadawat og dinalian nga pahibalo nga nasunog ang ilang balay. Nagdali sila nga mipauli ug nakita bisan asa ang buak nga mga bintana (aron makahungaw ang aso) ug nabuslot nga mga bungbong (aron pagsusi kon dunay wala makit-i nga mga kalayo).
“Nahugno gayud kami,” miingon si Tina. Apan miabut dayon ang ward.
“Ang tanan mitabang,” miingon si Tina ug Larry. “Ang tibuok ward miabut nga nagkahiusa diha sa gugma. Didto kami isip usa ka pamilya.”
Ug kinsa ang lakip sa mga unang miabut ug katapusang mibiya samtang giayo ang balay sa mga O’Connor? Oo, ang pamilya ni Hans ug Fay Ritter.
Mapaubsanon si Ben ug Esteban apan nahinumdom nga ang ilang pamilya mitabang sa mga O’Connor. “Didto kaming tanan,” miingon sila. “Ingon niana ang paagi sa pagserbisyo. Kitang tanan moatiman sa usag usa, usahay sa pagtabang sa uban ug usahay sa pagtugot sa uban nga motabang kanato.”
Alang kanako, adunay mahimo nga talagsaon, mahiyason, mahigugmaong koneksyon samtang atong lig-unon ang usag usa diha sa gugma sa Manluluwas. Ang mga O’Connor mitabang sa mga Ritter, ang mga Ritter mitabang sa mga O’Connor, ug sa samang panahon giestablisar ang usa ka komunidad sa mga Santos sa Ulahing mga Adlaw. Matag adlaw sa daghang mga paagi, ang matag usa kanato nagkinahanglan, ug mahimong motanyag, og makapangalagad nga gugma ug suporta sa gagmay, yano, gamhanan, makausab sa kinabuhi nga mga paagi.
Ug sa ingon, atong masinati ang milagro sa tinapay ug mga isda sa duha ka managlahing paagi: una, usa ka komunidad sa mga Santos magkapundok diha sa talagsaong panaghiusa aron matubag ang seryuso nga panginahanglan; ug ikaduha, sa samang panahon, ang pakigdait sa mga Santos matagik diha sa gugma pinaagi sa inadlaw, mahigugmaong pagpangalagad sa daghang hilum nga mga kahimtang—sama diha sa usa ka pamilya, branch, ward, o komunidad sulod sa daghang katuigan—nga walay dako nga panginahanglan.
Nalig-on diha sa Gugma sa Manluluwas
Kining tanan mokonektar balik ngadto sa atong pagsugod—ang una ug ikaduhang dako nga mga sugo ug ang pagdapit nga malig-on ug molig-on sa usag usa diha sa gugma sa Ginoo.
Kusganong misulti si Presidente Russell M. Nelson, “Ang among mensahe ngadto sa kalibutan yano ug sinsero: among gidapit ang tanang anak sa Dios sa duha ka habig sa tabil sa pagduol ngadto sa ilang Manluluwas, modawat sa mga panalangin sa balaan nga templo, magbaton og molahutay nga kalipay, ug mahimong angayan sa kinabuhing dayon.”5
Samtang magbusog kita sa mga pulong ni Kristo (tan-awa sa 2 Nephi 32:3) ug unahon ang Dios (tan-awa sa Mateo 6:33), ang Ginoo molig-on ug mopanalangin sa matag aspeto sa atong kinabuhi. Adunay balaanong pagkabagay ug pagkalanog sa pagkasakop diha sa pakigsaad samtang malig-on kita diha sa gugma sa Ginoo ug samtang molig-on kita sa usag usa diha Kaniya.
Ang mga pulong ni Apostol Pablo mipalanog sa pagkabagay sa atong mga pakigsaad ug sa Pag-ula ni Ginoong Jesukristo:
“Kinsa ba ang makapahimulag kanato gikan sa gugma ni Kristo? ang pag-antus ba o ang kasakitan, o ang paglutos, o ang gutom, o ang kahubo, o ang katalagman, o ang espada ba? …
“Kay masaligon ako nga walay kamatayon, o kinabuhi, o mga manolunda, o mga punoan, o mga butang karon, o mga butang umalabut, o mga gahum,
“O kahabugon, o giladmon, o bisan unsa diha sa tibuok kabuhatan, nga arang makapahimulag kanato gikan sa gugma sa Dios, sa gugma nga anaa kang Kristo Jesus nga atong Ginoo” (Mga Taga-Roma 8:35, 38–39).
Mao usab kana ang akong ligdong nga pagpamatuod.
Mopamatuod ko mahitungod sa Dios nga atong Langitnong Amahan, ug sa Iyang Anak, si Jesukristo. Mas nakaila Sila kanato ug nagmahal kanato labaw pa sa atong pag-ila o paghigugma sa atong kaugalingon. Makasalig kita sa Ginoo uban sa tibuok natong kasingkasing ug dili mosalig sa atong kaugalingong salabutan (tan-awa sa Proverbio 3:5).
Sa 159 ka mga balay sa Ginoo sa 43 ka mga nasud, mahimo kitang malig-on diha sa Ginoo pinaagi sa atong mga pakigsaad ug sa Pag-ula ni Jesukristo.
Napanalanginan kita sa awtoridad sa priesthood ug sa nagpadayon nga propetikanhong pagpadayag gikan ni Propeta Joseph Smith hangtud sa atong pinalanggang Presidente Nelson karon. Ang mga panghitabo sa bag-o lang nga mga panahon nakahimo nako nga mas sigurado, ug mapaubsanon, sa katinuod sa gipahiuli nga doktrina, mga yawe, mga ordinansa, ug mga pakigsaad sa Ang Simbahan ni Jesukristo sa mga Santos sa Ulahing mga Adlaw isip “ang gingharian sa Ginoo nga sa makausa pa gitukod na usab dinhi sa yuta, pagpangandam sa Ikaduha nga Pag-anhi sa Mesiyas.”6
Ang Basahon ni Mormon: Lain nga Tugon ni Jesukristo ug ang tanang balaan nga mga kasulatan mao ang pulong sa Dios.
Hinaut nga mas makaila kita sa atong Manluluwas ug mahimong mas sama Kaniya samtang malig-on kita diha sa Ginoo ug samtang molig-on kita sa usag usa diha Kaniya ug sa Iyang gugma.