Gikan sa Unang Kapangulohan

Pag-ila sa Imong Pamilya

Ni Presidente Dallin H. Oaks

Unang Magtatambag sa Unang Kapangulohan

Gipahaum gikan sa usa ka pakigpulong nga gihatag atol sa RootsTech 2018 Family Discovery Day.

Ang family history magsugod kon magkat-on ka mahitungod sa imong katigulangan. Tinuod sila nga mga tawo nga unang nabuhi kay kanimo ug parte sa usa ka pamilya. Kinahanglan kitang mabugkos ngadto sa atong mga katigulangan aron makapuyo kita uban kanila sa sunod nga kinabuhi.

Kon magkat-on ka mahitungod sa imong mga katigulangan, ikaw:

• Mobati nga mas malipayon ug masaligon.

• Dili mobati nga nag-inusara pag-ayo.

• Masayud nga ang matag tawo bililhon sa panan-aw sa Langitnong Amahan.

Ania ang tulo ka paagi aron makaangkon ka niini nga mga panalangin:

1. Diskubriha kon kinsa ang imong mga katigulangan.

2. Panguha og mga istorya mahitungod kanila ug pabalik-balik kini nga ipaambit!

3. Ikonektar sila ngadto sa imong pamilya pinaagi sa pagpadala sa ilang mga ngalan ngadto sa templo. Mahimo silang mabunyagan ug ang ubang mga ordinansa ipahigayon alang kanila, sama sa pagkabugkos ngadto sa imong pamilya hangtud sa kahangturan.

Ang akong inahan, si Stella Oaks, namatay nga wala pay natawo sa bisan kinsa sa among mga apo. Busa si Sister Oaks ug ako mipahigayon og “Stella party” sa pagtabang kanila nga mahibalo mahitungod kaniya. Ang mga miyembro sa pamilya misulat og libro mahitungod niya ug mahitungod sa akong amahan. Makakat-on ka usab og dugang mahitungod sa imong mga katigulangan. Mohatag kini nimo og kalig-on ug direksyon alang sa imong kinabuhi.